Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 13:1-23

NUHE E BẸHẸN LẸ

  • Sọta yẹwhegán lalo lẹ (1-16)

    • Adó he yè tlẹ́ onú wewe do lẹ na họ́ (10-12)

  • Sọta yẹwhegán-yọnnu lalo lẹ (17-23)

13  Ohó Jehovah tọn sọ vọ́ wá dè e dọmọ:  “Visunnu gbẹtọ tọn, dọ dọdai sọta yẹwhegán Islaeli tọn lẹ+ bo dọna mẹhe nọ pà dọdai yetọn titi dọ lẹ*+ dọmọ, ‘Mì sè nuhe Jehovah dọ.  Nuhe Oklunọ Nupojipetọ Jehovah dọ die: “Dindọn na yẹwhegán nulunọ lẹ, mẹhe nọ doafọna linlẹn yetọn titi lẹ to whenue yé ma tlẹ ko mọ numimọ de!+  Islaeli E, yẹwhegán towe lẹ ko tin taidi owọ̀ lẹ to ofi gbọgbé lẹ.  Mì ma na yì adó he yin gbigbakija lẹ kọ̀n nado vọ́ yé jlado na owhé Islaeli tọn gba,+ na Islaeli nido zindonukọn to awhànfunfun mẹ to azán Jehovah tọn gbè.”+  “Yé ko mọ numimọ lalo tọn lẹ bo ko dọ dọdai lalo tọn, yé mẹhe to didọ dọ, ‘Nuhe Jehovah dọ die,’ to whenue Jehovah ma do yé hlan, yé ko sọ donukun dọ ohó yetọn na mọ hẹndi.+  Be e ma yin numimọ lalo tọn wẹ mì ko mọ, bo ko sọ dọ dọdai lalo tọn to whenue mì dọ, ‘Nuhe Jehovah dọ die,’ whenue yẹn ma dọ nudepope ya?”’  “‘Enẹwutu, nuhe Oklunọ Nupojipetọ Jehovah dọ die: “‘Na mì ko dolalo bo ko mọ numimọ lalo tọn lẹ wutu, yẹn na diọnukunsọ mì,’ wẹ Oklunọ Nupojipetọ Jehovah dọ.”+  Yẹn na ze alọ ṣie daga do yẹwhegán he nọ mọ numimọ lalo tọn bosọ nọ dọ dọdai lalo tọn lẹ ji.+ Yé ma na tin to mẹhe yẹn na nọ dewé dopọ hẹ lẹ mẹ; mọjanwẹ oyín yetọn ma na tin to kandai owhé Islaeli tọn tọn mẹ do niyẹn; podọ yé ma na lẹkọ do aigba Islaeli tọn ji; mìwlẹ nasọ yọnẹn dọ yẹn wẹ Oklunọ Nupojipetọ Jehovah.+ 10  Ehe lẹpo na jọ do yé go na yé ko hẹn omẹ ṣie lẹ buali gbọn didọ dali dọ, “Jijọho tin!” to whenuena jijọho de ma tin.+ Eyin yé do adó he ma sinyẹn, yé nọ tlẹ́ onú wewe do e go.’*+ 11  “Dọna mẹhe to onú wewe tlẹ́ do adó go lẹ dọ e na họliai. Jikun daho de na ja, kẹ́nsu lẹ* nasọ ja, podọ yujẹhọn sinsinyẹn lẹ na họ́ ẹ liai.+ 12  Podọ, to whenue adó lọ na họliai, yè na kanse mì dọ, ‘Fie wẹ nuhe mì tlẹ́ do e go lọ te?’+ 13  “Enẹwutu, nuhe Oklunọ Nupojipetọ Jehovah dọ die: ‘Yẹn na hẹn yujẹhọn sinsinyẹn lẹ nado yìn to adi ṣie mẹ, podọ jikun daho de na ja to homẹgble ṣie mẹ, kẹ́nsu lẹ nasọ ja to adi sinsinyẹn nuvasudo tọn ṣie mẹ. 14  Yẹn na họ́ adó he go mì tlẹ́ onú wewe do lọ liai, dodonu etọn nasọ jẹ gbangba. To whenue tòdaho lọ na jai, mìwlẹ na dọ̀n to e mẹ; mì nasọ yọnẹn dọ yẹn wẹ Jehovah.’ 15  “‘To whenue yẹn na ko hẹn homẹgble ṣie wá adó lọ po mẹhe tlẹ́ onú wewe do e go lẹ po ji to gigọ́ mẹ, yẹn na dọna mì dọmọ: “Adó lọ masọ tin ba, mẹhe to onú wewe tlẹ́ do e go lẹ lọsu masọ tin ba.+ 16  Yẹwhegán Islaeli tọn lẹ ko dọ̀n, yèdọ mẹhe nọ dọ dọdai na Jelusalẹm bosọ nọ mọ numimọ jijọho tọn to whenue jijọho de ma tin na ẹn lẹ,”’+ wẹ Oklunọ Nupojipetọ Jehovah dọ. 17  “Na hiẹ tọn, visunnu gbẹtọ tọn, diọnukunsọ viyọnnu omẹ towe lẹ tọn he nọ pà dọdai yetọn titi lẹ dọ bo dọ dọdai sọta yé. 18  Dọna yé dọ, ‘Nuhe Oklunọ Nupojipetọ Jehovah dọ die: “Dindọn na yọnnu he nọ lọ̀n okàn tlẹ́lẹ he yè nọ do dó awà go* lẹpo bosọ nọ basi nukunmẹṣinyọnnu lẹ na ota wunmẹ lẹpo nado yangbé ogbẹ̀* gbẹtọ lẹ tọn! Be mì na yangbé ogbẹ̀* omẹ ṣie lẹ tọn bo tẹnpọn nado whlẹn ogbẹ̀* mìtọn titi wẹ ya? 19  Be mì na yí balekun alọgogo dopo po akla vude po do hẹn mi flu to omẹ ṣie lẹ ṣẹnṣẹn,+ bo na hù mẹhe* ma dona kú lẹ bo nasọ pò mẹhe* ma dona nọgbẹ̀ lẹ dogbẹ̀, bo na to mọwà gbọn lalo he mì nọ to dido na omẹ ṣie he nọ dotó mì lẹ dali wẹ ya?”’+ 20  “Enẹwutu, nuhe Oklunọ Nupojipetọ Jehovah dọ die: ‘Todin, mì yọnnu lẹ emi, yẹn na diọnukunsọ okàn tlẹ́lẹ he mì nọ yí do yangbé gbẹtọ* lẹ tọn taidi ohẹ̀, yẹn nasọ de yé sọn awà mìtọn lẹ go bo na tún mẹhe sin gbé mì to yinyan taidi ohẹ̀ lẹ dote. 21  Yẹn nasọ de nukunmẹṣinyọnnu mìtọn lẹ dlan bo whlẹn omẹ ṣie lẹ sọn alọ mìtọn mẹ, mì ma nasọ yangbé yetọn ba; mìwlẹ nasọ yọnẹn dọ yẹn wẹ Jehovah.+ 22  Na mì ko yí lalo mìtọn do hẹn dodonọ gbọjọ+ to whenue yẹn ma hẹn awufiẹsa wá e ji, mì ko sọ hẹn alọ mẹylankan tọn lodo,+ sọmọ bọ e ma lẹkọ sọn aliho ylankan etọn ji nado nọgbẹ̀.+ 23  Enẹwutu, mì yọnnu lẹ ma nasọ mọ numimọ lalo tọn lẹ bo na nọ dọ dọṣẹ ba;+ yẹn nasọ whlẹn omẹ ṣie lẹ sọn alọ mìtọn mẹ, mìwlẹ nasọ yọnẹn dọ yẹn wẹ Jehovah.’”

Nudọnamẹ Odò Tọn

Kavi “mẹhe nọ dọ dọdai nuhe to ahun yetọn mẹ lẹ tọn.”
Enẹ wẹ, yé do adó homẹ tọn he ma lodo de bosọ sá osẹ̀n wewe do nado hẹn ẹn taidi nuhe lodo.
To paa mẹ, “podọ hiẹ, kẹ́nsu E.”
Enẹ wẹ, okàn tlẹ́lẹ afinyọnnuwiwa tọn he nọ yin dido do alọkọ kavi abọ́ go.
Kavi “alindọn.”
Kavi “alindọn.”
Kavi “alindọn.”
Kavi “alindọn he.”
Kavi “alindọn he.”
Kavi “alindọn.”