Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 11:1-25

NUHE E BẸHẸN LẸ

  • Ahọvi ylankan lẹ yin whẹgbledo (1-13)

    • Yè jlẹ tòdaho do nudàzẹ́n de go (3-12)

  • Opagbe hẹngọwa tọn (14-21)

    • “Gbigbọ yọyọ de” yin nina yé (19)

  • Gigo Jiwheyẹwhe tọn sẹtẹn sọn Jelusalẹm (22, 23)

  • Ezekiẹli lẹkọyi Kaldea to numimọ mẹ (24, 25)

11  Gbigbọ de sọ ze mi daga bo hẹn mi wá ohọ̀n he to whèzẹtẹn ohọ̀ Jehovah tọn lọ tọn kọ̀n, yèdọ ohọ̀n he pannukọn whèzẹtẹn lọ.+ To họntonu lọ finẹ wẹ yẹn mọ sunnu 25, podọ Jaazania visunnu Azuli tọn po Pelatia visunnu Bẹnaia tọn po, he yin ahọvi mẹlọ lẹ tọn sọ tin to ṣẹnṣẹn yetọn.+  E sọ dọna mi dọmọ: “Visunnu gbẹtọ tọn, omẹ ehelẹ wẹ to ayiha nuylankan tọn kàn bo to ayinamẹ ylankan lẹ na to* tòdaho ehe mẹ.  Yé to didọ dọ, ‘Be e ma yin ojlẹ lọ die nado gbá ohọ̀ lẹ ya?+ Tòdaho lọ* wẹ nudàzẹ́n*+ bọ míwlẹ yin olàn.’  “Enẹwutu, dọ dọdai sọta yé. Visunnu gbẹtọ tọn, dọ dọdai.”+  Whenẹnu wẹ gbigbọ Jehovah tọn wá ji e,+ e sọ dọna mi dọmọ: “Dọna yé dọ, ‘Nuhe Jehovah dọ die: “Owhé Islaeli tọn E, nugbo wẹ nuhe hiẹ dọ, yẹn yọ́n nuhe lẹn a te.*  Hiẹ ko hù mẹsusu to tòdaho ehe mẹ, podọ hiẹ ko hẹn oṣiọ lẹ gọ́ tòhomẹ-liho lẹ ji.”’”+  “Enẹwutu, nuhe Oklunọ Nupojipetọ Jehovah dọ die: ‘Oṣiọ he hiẹ ko vúnvún pé gbọn tòdaho lọ mẹ lẹ wẹ olàn lọ, podọ tòdaho lọ wẹ nudàzẹ́n.+ Ṣigba, mìlọsu na yin bibẹ yì sọn e mẹ.’”  “‘Hiẹ ko dibuna ohí,+ amọ́ ohí wẹ yẹn na hẹnwa ji we,’ wẹ Oklunọ Nupojipetọ Jehovah dọ.  ‘Yẹn na de we sọn e mẹ bo na ze we do alọmẹ na jonọ lẹ bo nasọ hẹn whẹdida wá ji we.+ 10  Hiẹ na jai gbọn ohí dali.+ Yẹn na dawhẹna we to dogbó Islaeli tọn ji,+ hiẹ nasọ yọnẹn dọ yẹn wẹ Jehovah.+ 11  Tòdaho lọ ma na yin nudàzẹ́n de na we, podọ hiẹ ma na yin olàn to e mẹ; yẹn na dawhẹna we to dogbó Islaeli tọn ji, 12  hiẹ nasọ yọnẹn dọ yẹn wẹ Jehovah. Na a ma yìn aṣẹdai ṣie lẹ bo masọ setonuna nudide whẹdida tọn ṣie lẹ wutu,+ ṣigba hiẹ ko yinuwa sọgbe hẹ nudide whẹdida tọn akọta he lẹdo we lẹ tọn.’”+ 13  Tlolo he yẹn dọ dọdai wẹ Pelatia visunnu Bẹnaia tọn kú, yẹn sọ ṣinyọ́n nukunmẹ ai bo yí ogbè lélé do viavi dọmọ: “Ṣo, Oklunọ Nupojipetọ Jehovah E! Be hiẹ na sukúndona pipotọ Islaeli tọn lẹ wẹ ya?”+ 14  Ohó Jehovah tọn sọ vọ́ wá dè e dọmọ: 15  “Visunnu gbẹtọ tọn, nọvisunnu towe lẹ, yèdọ delẹ to yé mẹ he tindo jlọjẹ mẹfifli tọn, to pọmẹ hẹ owhé Islaeli tọn blebu wẹ tòmẹnu Jelusalẹm tọn lẹ ko dọna dọ, ‘Mì nọla pete na Jehovah. Mítọn wẹ aigba lọ; e ko yin nina mí taidi nutindo de.’ 16  Enẹwutu dọna yé dọ, ‘Nuhe Oklunọ Nupojipetọ Jehovah dọ die: “Dile etlẹ yindọ yẹn ko jo yé do alọmẹ na akọta lẹ, bọ yẹn ko sọ vúnvún yé pé gbọn aigba lẹ ji,+ na ojlẹ kleun de yẹn na lẹzun fiwiwe de na yé to aigba he ji yé ko yì lẹ ji.”’+ 17  “Enẹwutu dọna yé dọ, ‘Nuhe Oklunọ Nupojipetọ Jehovah dọ die: “Yẹn nasọ ṣinyan mì sọn akọta lẹ mẹ bo na bẹ mì pli sọn aigba he ji yè ko vúnvún mì pé gbọn lẹ ji, yẹn nasọ na mì aigba Islaeli tọn.+ 18  Yé nasọ lẹgọwa finẹ bo na de awuhiọnu po osùnú lẹpo po sẹ̀ sọn e mẹ.+ 19  Yẹn nasọ na yé ahun gbekọndopọ tọn,*+ podọ yẹn na yí gbigbọ yọyọ de do ohò yetọn mẹ;+ yẹn nasọ de ahun yetọn he taidi zannu lọ sẹ̀+ bo na na yé ahun agbasalan tọn de,*+ 20  na yé nido nọ yìn osẹ́ndoai ṣie lẹ bo nọ hodo nudide whẹdida tọn ṣie lẹ bosọ nọ setonuna yé. Whenẹnu wẹ yé na yin omẹ ṣie lẹ bọ yẹn nasọ yin Jiwheyẹwhe yetọn.”’ 21  “‘“Ṣigba, na mẹhe magbe to ahun mẹ nado zindonukọn to awuhiọnu po osùnú lọ lẹ po mẹ lẹ, yẹn na hẹn kọdetọn ylankan aliho yetọn lẹ tọn wá ota yetọn ji,” wẹ Oklunọ Nupojipetọ Jehovah dọ.’” 22  Kelubimi lọ lẹ sọ dlẹn awà yetọn lẹ daga bọ kẹkẹfọ lọ lẹ to apá na yé,+ gigo Jiwheyẹwhe Islaeli tọn sọ tin to yé ji aga.+ 23  Enẹgodo, gigo Jehovah tọn+ sẹtẹn sọn tòdaho lọ ji bo yì nọte do osó he tin to whèzẹtẹn tòdaho lọ tọn ji.+ 24  Whenẹnu wẹ gbigbọ de ze mi daga—yèdọ to numimọ he yẹn mọ gbọn gbigbọ Jiwheyẹwhe tọn dali de mẹ—bo hẹn mi yì mẹhe tin to kanlinmọgbenu to Kaldea lọ lẹ dè. Todin, numimọ lọ doalọte. 25  Yẹn sọ jẹ nuhe Jehovah ko dohia mi lẹpo dọna mẹhe tin to kanlinmọgbenu lọ lẹ ji.

Nudọnamẹ Odò Tọn

Kavi “sọta.”
To paa mẹ, “Ewọ,” tòdaho Jelusalẹm tọn, fie Ju lẹ lẹndọ yé na yin hihọ́-basina te.
Kavi “nudàzẹ́n he onù etọn to gblagada.”
Kavi “nuhe wá ayiha towe mẹ.”
To paa mẹ, “ahun dopo.”
Enẹ wẹ, dehe nọ joawuna anademẹ Jiwheyẹwhe tọn.