Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Ezekiẹli 1:1-28

NUHE E BẸHẸN LẸ

  • Ezekiẹli mọ numimọ lẹ to Babilọni (1-3)

  • Numimọ awhàn-kẹkẹ Jehovah tọn (4-28)

    • Yujẹhọn, aslọ po miyọ́n po (4)

    • Mẹdida 4 lẹ (5-14)

    • Kẹkẹfọ 4 lẹ (15-21)

    • Dovlomẹ he to sisẹ́ di osin-agó (22-24)

    • Ofìn Jehovah tọn (25-28)

1  To owhe 30tọ to azán atọ́ntọ osun ẹnẹtọ tọn mẹ, whenue n’tin hẹ akọta he yin hinhẹn yì kanlinmọgbenu+ lọ to tọ̀sisa Kẹbali tọn kọ̀n+ wẹ olọn hùndonuvo bọ n’sọ jẹ numimọ lẹ mọ ji sọn Jiwheyẹwhe dè.  To azán atọ́ntọ osun lọ tọn mẹ—enẹ wẹ, to owhe atọ́ntọ kanlinmọgbenu yìyì Ahọlu Jehoiakini+ tọn whenu—  wẹ ohó Jehovah tọn wá Ezekiẹli* visunnu Buzi yẹwhenọ lọ tọn dè, to tọ̀sisa Kẹbali tọn kọ̀n to aigba Kaldeanu lẹ tọn ji.+ Finẹ wẹ huhlọn Jehovah tọn wá e ji te.+  Dile n’to pinpọn, n’mọ jẹhọn sinsinyẹn de+ he yìn sọn agewaji, podọ aslọ daho de tin to finẹ gọna miyọ́n* he to gbigbòdlán+ bọ hinhọ́n de sọ lẹdo pé, nuhe taidi ogàn sisẹ́*+ de sọ tin to miyọ́n lọ ṣẹnṣẹn.  Podọ nuhe taidi mẹdida ẹnẹ tin to ṣẹnṣẹn etọn,+ dopodopo mẹdida lọ lẹ tọn tindo awusọhia gbẹtọ tọn de.  Dopodopo yetọn tindo nukunmẹ ẹnẹ po awà ẹnẹ po.+  Afọ yetọn lẹ jlọ, ofẹ̀n yetọn lẹ sọ taidi ofẹ̀n oyìnvu de tọn, yé sọ to sisẹ́ taidi sisẹ́ gànvẹẹ kinkọ̀n de tọn.+  Yé tindo alọ gbẹtọ tọn lẹ to awà yetọn lẹ glọ to adà ẹnẹ lẹ mẹ, podọ yé omẹ ẹnẹ lẹ tindo nukunmẹ po awà lẹ po.  Awà yetọn lẹ jẹ yede go. Yé ma nọ lilẹ́ eyin yé to yìyì; dopodopo yetọn nọ zọ̀n tlọlọ.+ 10  Awusọhia he nukunmẹ yetọn lẹ tindo die: Dopodopo mẹdida ẹnẹ lọ lẹ tọn tindo nukunmẹ gbẹtọ tọn po kinnikinni+ tọn po to adusiwhé, nukunmẹ oyìnsú+ de tọn to amiyọnwhé, dopodopo yetọn sọ tindo nukunmẹ akùn+ de tọn.+ 11  Lehe nukunmẹ yetọn lẹ te niyẹn. Yé sọ dlẹn awà yetọn lẹ daga. Awe to awà dopodopo yetọn lẹ tọn mẹ jẹ yede go bọ awà yetọn awe sọ ṣinyọ́n agbasa yetọn.+ 12  Dopodopo yetọn nọ zọ̀n tlọlọ bo nọ to yìyì, yèdọ fidepope he gbigbọ lọ deanana yé hlan.+ Yé ma nọ lilẹ́ eyin yé to yìyì. 13  Podọ mẹdida lọ lẹ tindo awusọhia miyọ́nkán he to jiji lẹ tọn, nude he taidi miyọ́ngbán he họ́n taun de sọ to yigọyigọ basi gbọn mẹdida lọ lẹ ṣẹnṣẹn, podọ abì sọ to gbigbòdlán sọn miyọ́n lọ mẹ.+ 14  Podọ eyin mẹdida lọ lẹ yinukọn bo lẹkọ, tẹnsisẹ yetọn nọ taidi abì he gbòdlán. 15  To whenue n’to mẹdida lọ lẹ pọ́n, n’mọ kẹkẹfọ dopo to aigba ji to apá na mẹdida he tindo nukunmẹ ẹnẹ lẹ dopodopo.+ 16  Kẹkẹfọ lọ lẹ po aliho he mẹ yé yin awuwlena te po nọ to sisẹ́ taidi klisọlite, podọ awusọhia dopolọ wẹ yé omẹ ẹnẹ lẹ tindo. Awusọhia yetọn po aliho he mẹ yé yin awuwlena te po nọ taidi dọ kẹkẹfọ de tin to devo mẹ wẹ nkọ.* 17  Eyin yé sẹtẹn, yé ma nọ lilẹ́ whẹpo do yì fidepope to adà ẹnẹ lọ lẹ mẹ. 18  Agbá kẹkẹfọ lọ lẹ tọn yiaga sọmọ bo jiawu, podọ agbá mẹdida ẹnẹ lọ lẹpo tọn wẹ gọ́ na nukun lẹ lẹdo pé.+ 19  Whedepopenu he mẹdida lọ lẹ sẹtẹn, kẹkẹfọ lọ lẹ lọsu nọ sẹtẹn ga, podọ eyin mẹdida lọ lẹ yin zize yiaga sọn aigba ji, kẹkẹfọ lọ lẹ lọsu nọ yin zize yiaga.+ 20  Yé nọ yì fie gbigbọ lọ deanana yé nado yì, yèdọ fidepope he gbigbọ lọ yì. Kẹkẹfọ lọ lẹ nọ yin zize yiaga dopọ hẹ yé, na gbigbọ he to anadena mẹdida lọ lẹ* dopolọ wẹ to anadena kẹkẹfọ lọ lẹ lọsu ga. 21  Eyin mẹdida lọ lẹ sẹtẹn, kẹkẹfọ lọ lẹ lọsu nọ sẹtẹn ga; podọ eyin yé nọte guun, kẹkẹfọ lọ lẹ lọsu nọ nọte guun; podọ eyin yé yin zize yiaga sọn aigba ji, kẹkẹfọ lọ lẹ lọsu nọ yin zize yiaga dopọ hẹ yé, na gbigbọ he to anadena mẹdida lọ lẹ dopolọ wẹ to anadena kẹkẹfọ lọ lẹ lọsu ga. 22  Nuhe taidi dovlomẹ he to sisẹ́ di osin-agó he jiawu de tin to aga na mẹdida lọ lẹ, bo vlọ́n plẹsẹ do ota na yé.+ 23  Awà mẹdida lọ lẹ tọn dlẹn* tlọlọ hlan ode awetọ to dovlomẹ lọ glọ. Dopodopo yetọn tindo awà awe he ṣinyọ́n adà dopo agbasa yetọn tọn podọ awà awe he sọ ṣinyọ́n adà awetọ agbasa yetọn tọn. 24  To whenue n’sè nudidọ awà yetọn lẹ tọn, e taidi nudidọ osin he to sisà po zingidi po tọn lẹ, yèdọ taidi nudidọ Ganhunupotọ lọ tọn.+ Eyin yé to tẹnsẹ, nudidọ yetọn nọ taidi awhànpa de tọn. Eyin yé nọte guun, yé nọ bọ̀ awà yetọn lẹ. 25  Ogbè de sọ yin sisè to aga dovlomẹ he tin to ota na yé lọ tọn. (Eyin yé nọte guun, yé nọ bọ̀ awà yetọn lẹ.) 26  To aga na dovlomẹ he tin to ota na yé lọ wẹ nuhe taidi zannu safili tọn de tin te,+ e sọ taidi ofìn de.+ Mẹde he tindo awusọhia gbẹtọ tọn sọ sinai do ofìn lọ ji to aga.+ 27  N’sọ mọ nude he taidi ogàn sisẹ́+ de he di miyọ́n bo to tintọ́n sọn fie taidi alinkàn etọn dedo aga; podọ sọn alinkàn etọn dedo odò, yẹn sọ mọ nude he taidi miyọ́n.+ Lẹdo etọn lẹpo sọ to sisẹ́ 28  taidi sisẹ́ aidowhẹdo+ de tọn to aslọ mẹ to jikun whenu. Lehe hinhọ́n he lẹ́ do e lọ te do niyẹn. E taidi awusọhia gigo Jehovah tọn.+ To whenue yẹn mọ, yẹn ṣinyọ́n nukunmẹ ai bo jẹ ogbè mẹhe to hodọ de tọn sè ji.

Nudọnamẹ Odò Tọn

Zẹẹmẹdo “Jiwheyẹwhe Na Huhlọn.”
Kavi “abì.”
Núzinzan sisẹ́ de he yè yí sika po fataka po do basi.
Vlavo tin to adusiwhé to awà dopolọ ji.
To paa mẹ, “gbigbọ mẹdida lọ lẹ tọn.”
Kavi vlavo, “dlẹn jẹgbonu.”