Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 8:1-32

NUHE E BẸHẸN LẸ

  • Azọ̀nylankan 2: opàn (1-15)

  • Azọ̀nylankan 3: jẹhli (16-19)

  • Azọ̀nylankan 4: supọ̀ adínọ (20-32)

    • Azọ̀nylankan lẹ ma jẹ Goṣẹni (22, 23)

8  Jehovah sọ dọna Mose dọmọ: “Yì Falo dè, bo dọna ẹn dọ, ‘Nuhe Jehovah dọ die: “Tún omẹ ṣie lẹ dote, na yé nido yì sẹ̀n mi.+  Eyin hiẹ gbẹ́ pò to gbigbẹ́ ma nado tún yé dote, yẹn na yí opàn lẹ do sayana aigba towe pete.+  Opàn lẹ nasọ gọ́ Tọ̀sisa Nile tọn mẹ, yé na wá bo biọ ohọ̀ towe mẹ podọ abò towe mẹ, yé na hẹ adọzan towe ji, yé na biọ ohọ̀ devizọnwatọ towe lẹ tọn mẹ bo nasọ wá omẹ towe lẹ ji, yé na biọ adò towe lẹ mẹ podọ aklahònú* towe lẹ mẹ.+  Opàn lẹ nasọ wá hiẹ, omẹ towe lẹ po devizọnwatọ towe lẹpo po ji.”’”  Enẹgodo, Jehovah dọna Mose dọmọ: “Dọna Aalọn dọ, ‘Dlẹn opò he to alọ towe mẹ do tọ̀sisa lẹ ji, do osinwhín Nile tọn lẹ po tándo lẹ po ji bo hẹn opàn lẹ hẹji wá aigba Egipti tọn ji.’”  Aalọn sọ dlẹnalọ etọn jẹgbonu do otọ̀ Egipti tọn lẹ ji, opàn lẹ sọ jẹ tintọ́n ji bo gọ́ aigba Egipti tọn pete ji.  Yẹwhenọ nujlẹtọ lẹ wà nudopolọ gbọn nujijlẹ yetọn dali bọ yelọsu lẹ sọ hẹn opàn lẹ hẹji wá aigba Egipti tọn ji.+  Enẹgodo, Falo ylọ Mose po Aalọn po bo dọmọ: “Mì vẹ̀ Jehovah na e nido de opàn lẹ sọn yẹn po omẹ ṣie lẹ po dè,+ na yẹn jlo na tún mẹlọ lẹ dote, na yé nido yì sanvọ́ hlan Jehovah.”  Mose sọ dọna Falo dọmọ: “Hiẹ wẹ na dọna mi whenue yẹn na basi ovẹvivẹ, na opàn lẹ nido yin didesẹ sọn dè we, sọn devizọnwatọ towe lẹ po omẹ towe lẹ po dè, podọ sọn owhé towe lẹ gbè. Tọ̀sisa Nile tọn mẹ kẹdẹ wẹ yé na gbọṣi.” 10  Falo sọ gblọn dọmọ: “To osọ.” Mose sọ dọmọ: “E na yin sọgbe hẹ nuhe a dọ, na hiẹ nido yọnẹn dọ mẹdevo de ma tin taidi Jehovah Jiwheyẹwhe mítọn.+ 11  Opàn lẹ nasọ yì sọn dè we, podọ sọn owhé towe lẹ gbè, sọn devizọnwatọ towe lẹ po omẹ towe lẹ po dè. Tọ̀sisa Nile tọn mẹ kẹdẹ wẹ yé na gbọṣi.”+ 12  Enẹwutu, Mose po Aalọn po tọ́nyi sọn Falo nukọn, bọ Mose sọ vẹ̀ Jehovah gando opàn he Ewọ ko hẹnwa Falo ji lẹ go.+ 13  Jehovah sọ basi dile Mose biọ do, opàn lọ lẹ sọ jẹ kúkú ji sọn owhé lẹ gbè, sọn awánu lẹ podọ sọn danji. 14  Yé sọ bẹ yé pli do gọnu-gọnu sù sọmọ bọ yè ma sọgan hia, aigba lọ sọ jẹ wánlùn ji. 15  To whenuena Falo mọdọ kọgbọ ko tin, e hẹn ahun etọn sinyẹn+ bosọ gbẹ́ nado dotoaina yé kẹdẹdile Jehovah ko dọ do. 16  Todin, Jehovah dọna Mose dọmọ: “Dọna Aalọn dọ, ‘Dlẹn opò towe bo lì kọ́gudu aigba tọn, kọ́gudu lọ nasọ lẹzun jẹhli lẹ to aigba Egipti tọn pete ji.’” 17  Yé sọ wàmọ. Aalọn sọ dlẹn opò he to alọ etọn mẹ bo lì kọ́gudu aigba tọn, jẹhli lẹ sọ gbaṣinyọ́n gbẹtọ lẹ po kanlin lẹ po. Kọ́gudu aigba tọn lẹpo sọ lẹzun jẹhli to aigba Egipti tọn pete ji.+ 18  Yẹwhenọ nujlẹtọ lẹ tẹnpọn nado wà nudopolọ, yèdọ nado basi jẹhli lẹ gbọn nujijlẹ yetọn dali,+ ṣigba e ma pà yé. Jẹhli lẹ sọ gbaṣinyọ́n gbẹtọ lẹ po kanlin lẹ po. 19  Enẹwutu, yẹwhenọ nujlẹtọ lẹ dọna Falo dọmọ: “Alọvi Jiwheyẹwhe tọn wẹ ehe!”+ Ṣigba, Falo gbẹ́ pò to ahun etọn hẹn sinyẹn deji, e masọ dotoaina yé kẹdẹdile Jehovah ko dọ do. 20  Jehovah sọ dọna Mose dọmọ: “Fọ́n to afọnnu fuu bo yì nọtepọn Falo. Pọ́n! Ewọ ja tọ̀tó! Dọna ẹn dọ, ‘Nuhe Jehovah dọ die: “Tún omẹ ṣie lẹ dote, na yé nido yì sẹ̀n mi. 21  Ṣigba, eyin hiẹ ma tún omẹ ṣie lẹ dote, yẹn na do supọ̀ adínọ* lẹ hlan we, hlan devizọnwatọ towe lẹ, hlan omẹ towe lẹ podọ hlan owhé towe lẹ gbè; podọ owhé he tin to Egipti lẹpo wẹ na gọ́ na supọ̀ adínọ lẹ, bọ yé nasọ gọ́ aigba he ji yé* ṣite do lọ pete ji. 22  To gbenẹgbe, e họnwun dọ yẹn na de aigba Goṣẹni tọn fihe omẹ ṣie lẹ nọ nọ̀ dovo. Supọ̀ adínọ depope ma na tin to finẹ,+ gbọn ehe dali wẹ mìwlẹ na yọnẹn dọ yẹn Jehovah, tin to aigba lọ ji.+ 23  Yẹn nasọ do vogbingbọn hia to omẹ ṣie lẹ po omẹ towe lẹ po ṣẹnṣẹn. Ehe na jọ to osọ.”’” 24  Jehovah sọ wàmọ, bọ supọ̀ adínọ susugege gbaṣinyọ́n owhé Falo tọn, devizọnwatọ etọn lẹ tọn po aigba Egipti tọn lẹpo po ji.+ Aigba lọ sọ yin hinhẹngble gbọn supọ̀ adínọ lẹ dali.+ 25  To godo mẹ, Falo ylọ Mose po Aalọn po bo dọmọ: “Mì yì sanvọ́ hlan Jiwheyẹwhe mìtọn to aigba lọ ji.” 26  Ṣigba, Mose dọmọ: “E ma sọgbe nado wàmọ, na osùnú wẹ nuhe mí na yí do sanvọ́ hlan Jehovah Jiwheyẹwhe mítọn na yin na Egiptinu lẹ.+ Eyin mí yí nuhe yin osùnú na Egiptinu lẹ do sanvọ́ to nukun yetọn mẹ, be yé ma na dlan zannu do mí? 27  Míwlẹ na zingbejizọnlin azán atọ̀n tọn yì danfafa ji bo na sanvọ́ hlan Jehovah Jiwheyẹwhe mítọn to finẹ kẹdẹdile e ko dọna mí do.”+ 28  Falo sọ dọmọ: “Yẹn na tún mì dote na mì nido yì sanvọ́ hlan Jehovah Jiwheyẹwhe mìtọn to danfafa ji. Nulọ poun wẹ yindọ mì ma dona yì fidindẹn. Mì basi ovẹvivẹ do ota ṣie mẹ.”+ 29  Enẹgodo, Mose dọmọ: “Todin, yẹn na tọ́n sọn nukọn towe bo nasọ basi ovẹvivẹ hlan Jehovah, bọ supọ̀ adínọ lẹ nasọ yì sọn Falo dè, sọn devizọnwatọ etọn lẹ dè podọ sọn omẹ etọn lẹ dè to osọ. Ṣigba, Falo ni gbọ kiklọ* mí gbọn gbigbẹ́ nado tún mẹlọ lẹ dote nado yì sanvọ́ hlan Jehovah dali.”+ 30  Mose sọ tọ́n sọn Falo nukọn bo yì vẹ̀ Jehovah.+ 31  Enẹwutu, Jehovah sọ basi sọgbe hẹ nuhe Mose dọ, supọ̀ adínọ lẹ sọ yì sọn Falo dè, sọn devizọnwatọ etọn lẹ dè podọ sọn omẹ etọn lẹ dè. Dopo tata ma pò. 32  Ṣigba, Falo sọ hẹn ahun etọn sinyẹn whladopo dogọ bo masọ tún mẹlọ lẹ dote.

Nudọnamẹ Odò Tọn

Kavi “agbán.”
Supọ̀ wunmẹ de he nọ dù omẹ.
Enẹ wẹ, Egiptinu lẹ.
Kavi “zinzan.”