Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 6:1-30

NUHE E BẸHẸN LẸ

  • Opagbe tundote tọn yin vivọ́ do (1-13)

    • Oyín Jehovah tọn ma yin yinyọnẹn to gigọ́ mẹ (2, 3)

  • Kúnkan Mose po Aalọn po tọn (14-27)

  • Mose dona vọ́ yì Falo nukọn (28-30)

6  Enẹwutu, Jehovah dọna Mose dọmọ: “Todin, a na mọ nuhe yẹn na wà na Falo.+ Alọ huhlọnnọ de na hẹn ẹn gánnugánnu nado tún yé dote, podọ alọ huhlọnnọ de wẹ na hẹn ẹn gánnugánnu nado de yé tọ́n sọn aigba etọn ji.”+  Enẹgodo, Jiwheyẹwhe dọna Mose dọmọ: “Yẹn wẹ Jehovah.  Yẹn ko sọawuhia Ablaham, Isaki po Jakọbu po taidi Jiwheyẹwhe Ganhunupotọ,+ amọ́ gbọn oyín ṣie Jehovah+ dali wẹ yẹn ma hẹn dee zun yinyọnẹn na yé to gigọ́ mẹ.+  Yẹn sọ basi alẹnu de hẹ yé nado na yé aigba Kenani tọn, yèdọ aigba lọ he ji yé nọ taidi jonọ lẹ.+  Todin, yẹnlọsu ko sè hunwinwẹn omẹ Islaeli tọn lẹ tọn, mẹhe Egiptinu lẹ to hinhẹn taidi afanumẹ, yẹn sọ flin alẹnu ṣie.+  “Enẹwutu, dọna Islaelivi lẹ dọmọ: ‘Yẹn wẹ Jehovah, yẹn nasọ de mì sọn azọ́n sinsinyẹn he Egiptinu lẹ hẹn mì gánnugánnu nado to wiwà lẹ glọ, yẹn nasọ whlẹn mì sọn afanumẹ-yinyin na yé mẹ,+ yẹn nasọ yí awà dindlẹn* ṣie do fli mì gọ̀ bo na sayana Egiptinu lẹ sinsinyẹn.+  Yẹn na kẹalọyi mì taidi omẹ ṣie lẹ bo nasọ yin Jiwheyẹwhe mìtọn,+ mìwlẹ nasọ yọnẹn hezeheze dọ yẹn wẹ Jehovah Jiwheyẹwhe mìtọn he to dide mì sọn azọ́n sinsinyẹn he wà mì te to Egipti lẹ kọ̀n.  Yẹn nasọ plan mì yì aigba he yẹn ko yí whiwhle do whlé* nado na Ablaham, Isaki po Jakọbu po lọ ji; yẹn nasọ yí i na mì taidi nutindo.+ Yẹn wẹ Jehovah.’”+  Mose sọ dowẹn ehe na Islaelivi lẹ, ṣigba yé ma dotoaina ẹn na gbigbọjọ podọ na afanumẹ-yinyin sinsinyẹn he glọ yé te wutu.+ 10  Jehovah sọ dọna Mose dọmọ: 11  “Yì bo dọna Falo, ahọlu Egipti tọn dọ ewọ ni tún Islaelivi lẹ dote sọn aigba etọn ji.” 12  Ṣigba, Mose gblọnna Jehovah dọmọ: “Pọ́n! Islaelivi lẹ ma dotoaina mi;+ nawẹ Falo na wá dotoaina yẹn mẹhe ma didẹ́*+ ehe gbọn?” 13  Ṣigba, Jehovah sọ vọ́ dọhona Mose po Aalọn po gando nuhe yé na dọna Islaelivi lẹ podọ na Falo ahọlu Egipti tọn go, na yé nido de Islaelivi lẹ tọ́n sọn aigba Egipti tọn ji. 14  Tatọ́ owhé otọ́ yetọn lẹ tọn lẹ die: Visunnu Leubẹni he yin plọnji Islaeli tọn lẹ+ wẹ Hanọki, Palu, Hẹzloni po Kalmi+ po. Whẹndo Leubẹni tọn lẹ niyẹn. 15  Visunnu Simeoni tọn lẹ wẹ Jẹmuẹli, Jamini, Ohadi, Jakini, Zohali po Ṣauli visunnu yọnnu Kenaninu de tọn+ po. Whẹndo Simeoni tọn lẹ niyẹn. 16  Oyín visunnu Levi+ tọn lẹ tọn sọgbe hẹ hukan whẹndo tọn yetọn lẹ die: Gẹlṣọni, Kohati po Melali po.+ Levi sọ nọgbẹ̀ na owhe 137. 17  Visunnu Gẹlṣọni tọn lẹ he yin sislẹ sọgbe hẹ whẹndo yetọn lẹ+ wẹ Libni po Ṣimei po. 18  Visunnu Kohati tọn lẹ wẹ Amlami, Izhali, Heblọni po Uziẹli po.+ Kohati sọ nọgbẹ̀ na owhe 133. 19  Visunnu Melali tọn lẹ wẹ Mahli po Muṣi po. Yewlẹ wẹ whẹndo Levi tọn lẹ sọgbe hẹ hukan whẹndo tọn yetọn.+ 20  Amlami sọ plan Jokebẹdi, nọviyọnnu otọ́ etọn tọn taidi asi.+ E sọ ji Aalọn po Mose po na ẹn.+ Amlami nọgbẹ̀ na owhe 137. 21  Visunnu Izhali tọn lẹ wẹ Kola,+ Nefẹgi po Zikli po. 22  Visunnu Uziẹli tọn lẹ wẹ Miṣaẹli, Ẹlzafani+ po Sitli po. 23  Todin, Aalọn plan Eliṣeba, viyọnnu Aminadabi tọn, yèdọ nọviyọnnu Naṣọni+ tọn taidi asi. E sọ ji Nadabi, Abihu, Eleazali po Itamali po+ na ẹn. 24  Visunnu Kola tọn lẹ wẹ Asili, Ẹlkana po Abiasafi po.+ Whẹndo Kola tọn lẹ+ niyẹn. 25  Eleazali+ visunnu Aalọn tọn sọ plan dopo to viyọnnu Putiẹli tọn lẹ mẹ taidi asi. E sọ ji Finehasi na ẹn.+ Yewlẹ wẹ nukọntọ whédo otọ́ Levinu lẹ tọn lẹ, sọgbe hẹ hukan whẹndo tọn yetọn lẹ.+ 26  Aalọn ehe po Mose po wẹ Jehovah dọna dọmọ: “Mì plan omẹ Islaeli tọn lẹ tọ́n sọn aigba Egipti tọn ji gọnu-gọnu.”*+ 27  Yewlẹ wẹ dọho hẹ Falo ahọlu Egipti tọn nado de omẹ Islaeli tọn lẹ tọ́n sọn Egipti. Mose ehe po Aalọn po wẹ.+ 28  To gbenẹgbe, whenue Jehovah dọhona Mose to aigba Egipti tọn ji, 29  Jehovah dọna Mose dọmọ: “Yẹn wẹ Jehovah. Dọ nuhe yẹn to didọna we lẹpo na Falo ahọlu Egipti tọn.” 30  Mose sọ dọ to Jehovah nukọn dọmọ: “Doayi e go! Yẹn ma didẹ́,* enẹwutu nawẹ Falo na dotoaina mi+ gbọn?”

Nudọnamẹ Odò Tọn

Kavi “awà huhlọnnọ.”
To paa mẹ, “ko ze alọ ṣie daga.”
To paa mẹ, “mẹhe nùflo ṣie yin adàmagbonọ.”
To paa mẹ, “sọgbe hẹ awhànpa yetọn lẹ.”
To paa mẹ, “Nùflo ṣie yin adàmagbonọ.”