Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 39:1-43

NUHE E BẸHẸN LẸ

  • Awù yẹwhenọ tọn lẹ bibasi (1)

  • Efọdi (2-7)

  • Apò akọ́nnu tọn (8-21)

  • Awù he ma tindo awà (22-26)

  • Awù yẹwhenọ tọn devo lẹ (27-29)

  • Ogàn plẹ́bẹ́ (30, 31)

  • Mose gbeje gòhọtúntún lọ pọ́n (32-43)

39  Yé sọ yí sekan juju, sekan sopẹ́-sinmẹnọ po sekan vẹẹ ṣẹ́ṣẹ́+ po do lọ̀n awù dagbedagbe lẹ na sinsẹ̀nzọnwiwa to ofi wiwe lọ. Yé basi awù wiwe lẹ na Aalọn+ kẹdẹdile Jehovah ko degbe etọn na Mose do.  E sọ yí sika, sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po do basi efọdi*+ lọ.  Yé sọ tùn sika plẹ́bẹ́ lẹ kaka bọ yé fẹdẹ́, e sọ sán yé do tlẹ́lẹ-tlẹ́lẹ taidi okàn lẹ nado yí yé zan dopọ hẹ sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ dagbedagbe po nado kó efọdi lọ.  Yé sọ basi avọ̀ yinyẹ́n pẹvi abọ́ ji tọn lẹ bo sìn yé do e go bọ yé yin ṣiṣá do tónu awe efọdi lọ tọn lẹ go.  Podọ homẹblanu linlọ̀n* he yin sìnsìn do efọdi lọ go nado hẹn ẹn dote gbanun-gbanun+ yin bibasi po nuyizan dopolọ lẹ po, yèdọ sika, sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po, kẹdẹdile Jehovah ko degbe etọn na Mose do.  Enẹgodo, yé to zannu onizi tọn lọ lẹ do oslò sika tọn lẹ mẹ, yé sọ yí hiadonu do kàn yinkọ visunnu Islaeli tọn lẹ tọn do yé go, dile yè nọ yí hiadonu do kannu do núgo do.+  E sọ ze yé do avọ̀ yinyẹ́n pẹvi abọ́ ji tọn efọdi lọ tọn lẹ go bọ yé yin zannu oflin tọn lẹ na visunnu Islaeli tọn lẹ,+ kẹdẹdile Jehovah ko degbe etọn na Mose do.  Enẹgodo, e sọ yí azọ́nwanu avọ̀-kótọ tọn do basi apò akọ́nnu tọn*+ lọ, dile e ko yí sika, sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po do basi efọdi lọ do.+  Adà ẹnẹ lẹ sọzẹn eyin yè yẹ́n ẹn do awe. Yé sọ basi apò akọ́nnu tọn lọ he tedidi etọn po gbigblo etọn po yin alọpapa dopo* eyin yè yẹ́n ẹn do awe. 10  Yé sọ wleawuna tito debọdo-dego ẹnẹ zannu tọn do e go. Tito tintan tindo zannu lubi, topazi po emẹlaldi po tọn. 11  Tito awetọ tindo zannu tulkuasi, safili po jaspali po tọn. 12  Tito atọ̀ntọ tindo zannu lẹṣẹmi,* agati po amẹtisti po tọn. 13  Tito ẹnẹtọ tindo zannu klisọlite, onizi po jadi po tọn. Yé yin tito do oslò sika tọn lọ lẹ mẹ. 14  Zannu lọ lẹ nọtena yinkọ visunnu 12 Islaeli tọn lẹ tọn, podọ yinkọ lọ lẹ yin kinkan dile yè nọ yí hiadonu do kannu do núgo do, bọ yinkọ dopodopo nọtena hẹnnu 12 lọ lẹ dopodopo. 15  Enẹgodo, yé lọ̀n gẹdẹ lẹ do apò akọ́nnu tọn lọ go taidi okàn sika akú tọn lẹ.+ 16  Yé sọ basi oslò sika tọn awe po alọkẹ sika tọn awe po bo sìn alọkẹ awe lọ lẹ do agosu awe apò akọ́nnu tọn lọ tọn lẹ go. 17  Enẹgodo, yé hẹn okàn sika tọn awe lọ lẹ gbọn alọkẹ awe he to agosu apò akọ́nnu tọn lọ go lẹ mẹ. 18  Yé sọ hẹn tónu okàn awe lọ lẹ tọn gbọn oslò awe lọ lẹ mẹ bo sìn yé do avọ̀ yinyẹ́n pẹvi abọ́ ji tọn efọdi lọ tọn lẹ go to nukọn. 19  Yé sọ basi alọkẹ sika tọn awe bo ze yé do tónu awe he tin to apò akọ́nnu tọn lọ glọ lẹ go to odò pannukọn efọdi lọ.+ 20  Enẹgodo, yé basi alọkẹ sika tọn awe dogọ do efọdi lọ go, to nukọn to odò na avọ̀ yinyẹ́n pẹvi abọ́ ji tọn lọ lẹ podọ to aga na fie homẹblanu linlọ̀n* lọ yin ṣiṣá do efọdi lọ go te. 21  Yé sọ yí okàn juju de do sìn alọkẹ apò akọ́nnu tọn lọ tọn lẹ do alọkẹ efọdi lọ tọn lẹ go nado hẹn apò akọ́nnu tọn lọ do otẹn etọn mẹ to efọdi lọ go, yèdọ to aga na homẹblanu linlọ̀n* lọ, kẹdẹdile Jehovah ko degbe etọn na Mose do. 22  E sọ yí sekan juju kẹdẹ do basi awù he ma tindo awà he na yin dido do odò na efọdi lọ,+ he yin linlọ̀n gbọn avọ̀lọ̀ntọ de dali. 23  Nùvo de to ṣẹnṣẹn mẹ na awù he ma tindo awà lọ, taidi nùvo gbaja de tọn. Nùvo lọ tindo tónu titli de lẹdo pé, na e nikaa tlẹ́n. 24  Enẹgodo, yé yí sekan juju, sekan sopẹ́-sinmẹnọ po sekan vẹẹ ṣẹ́ṣẹ́ po do basi pomeglanate* lẹ gbọn tónu odò tọn na awù he ma tindo awà lọ. 25  Yé sọ yí sika akú do basi ogàn-kéké lẹ bo to yé gbọn ṣẹnṣẹn na pomeglanate* lọ lẹ do tónu odò tọn awù he ma tindo awà lọ tọn lẹdo pé; 26  yé to ogàn-kéké dopodopo bọdo pomeglanate* dopodopo go, gbọn tónu odò tọn awù he ma tindo awà lọ tọn he nọ yin yiyizan nado wà sinsẹ̀nzọn, kẹdẹdile Jehovah ko degbe etọn na Mose do. 27  Yé sọ basi tewu alavọ dagbedagbe tọn he yin linlọ̀n gbọn avọ̀lọ̀ntọ de dali na Aalọn po visunnu etọn lẹ po,+ 28  gọna tabla vonọtaun+ alavọ dagbedagbe tọn lọ, tabla+ alavọ dagbedagbe tọn lọ he yin aṣọ́dona, ṣokoto gli*+ alavọ tọn lọ lẹ he yin bibasi po alavọ linlọ̀n dagbedagbe po, 29  podọ homẹblanu he yè yí alavọ linlọ̀n dagbedagbe, sekan juju, sekan sopẹ́-sinmẹnọ po sekan vẹẹ ṣẹ́ṣẹ́ po do lọ̀n, kẹdẹdile Jehovah ko degbe etọn na Mose do. 30  Enẹgodo, yé yí sika akú do basi ogàn sisẹ́ plẹ́bẹ́ lọ, yèdọ ohia wiwe klandowiwe tọn* lọ bo kannu do e go dile yè nọ yí hiadonu do kannu do nude go do dọmọ: “Jehovah wẹ wiwe.”+ 31  Yé sọ sìn okàn juju de do e go, na e nido yin yíyí do sìn in do tabla vonọtaun lọ go, kẹdẹdile Jehovah ko degbe etọn na Mose do. 32  Gbọnmọ dali, azọ́n gòhọtúntún lọ tọn, yèdọ azọ́n gòhọ opli tọn lọ tọn lẹpo yin tadona, podọ Islaelivi lẹ wà nuhe Jehovah ko degbe etọn na Mose lẹpo.+ Yé wà domọ pẹpẹ. 33  Enẹgodo, yé hẹn gòhọtúntún+ lọ wá Mose dè, enẹ wẹ gòhọ+ lọ po nuyizan etọn lẹpo po: oplánú+ etọn lẹ, owhlẹ ote tọn+ etọn lẹ, opò+ etọn lẹ, dòtin etọn lẹ, oslò dodonu tọn+ etọn lẹ; 34  agbò-yú vẹẹ+ he yin ṣinṣinyọn do e ji, kanlin-yú* he yin ṣinṣinyọn do e ji, avọ̀ he nọ yin dido do họntonu lọ;+ 35  apotin Kunnudenu tọn lọ po opò+ etọn lẹ po gọna nùsu+ etọn; 36  tafo lọ po nuyizan+ etọn lẹpo po gọna akla sọhia tọn lọ; 37  miyọ́ngbán-tin he yè yí sika akú do basi lọ, miyọ́ngbán+ etọn he yin tito lọ lẹ, nuyizan+ etọn lẹpo po amì miyọ́ngbán lọ tọn+ po; 38  agbà+ he yè yí sika do basi lọ, amì mẹdide tọn lọ,+ nuyọnwan owán gblingblinnọ+ lọ, avọ̀*+ he nọ yin dido do họntonu gòhọ lọ tọn; 39  agbà he yè yí gànvẹẹ do basi lọ,+ agbájẹ́ etọn he yè yí gànvẹẹ do basi, opò+ etọn lẹ, nuyizan+ etọn lẹpo, basia lọ po nuhe ji e na yin zizedo+ po; 40  avọ̀ he nọ yin dido lẹdo awánu lọ, dòtin etọn lẹ po oslò dodonu tọn+ etọn lẹ po, avọ̀*+ he to họngbo awánu lọ tọn nù, okàn gòhọ tọn etọn lẹ, opò tlọ́ntlọ́n gòhọ tọn+ etọn lẹ po nuyizan he nọ yin yiyizan na sinsẹ̀nzọnwiwa to gòhọtúntún lọ mẹ lẹpo po, enẹ wẹ gòhọ opli tọn lọ; 41  awù linlọ̀n dagbedagbe lẹ na sinsẹ̀nzọnwiwa to fiwiwe lọ, awù wiwe lẹ na Aalọn yẹwhenọ lọ+ podọ awù visunnu etọn lẹ tọn he yé na nọ yizan nado sẹ̀n taidi yẹwhenọ lẹ. 42  Islaelivi lẹ sọ basi pẹpẹ sọgbe hẹ nuhe Jehovah ko degbe etọn na Mose lẹpo.+ 43  To whenue Mose gbeje azọ́n yetọn lẹpo pọ́n, e mọdọ yé ko wà ẹ kẹdẹdile Jehovah ko degbe etọn do; Mose sọ dona yé.

Nudọnamẹ Odò Tọn

Pọ́n Zẹm.
Kavi “ajákẹn.”
Enẹ wẹ, apò he nọ yin kikó he Yẹwhenọ Daho nọ zedo akọ́nnu.
Nudi cm 22,2. Pọ́n Nud. B14.
Yè ma sọgan dọ zannu akuẹgegenu tọn he e yin, vlavo ehe to alọdlẹndo ambẹli, hayakintu, ọpali kavi tumalinu.
Kavi “ajákẹn.”
Kavi “ajákẹn.”
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Kavi “awù odò tọn.”
Kavi “jẹgbakun wiwe.”
Enẹ wẹ, ayú kanlin he nọ nọ̀ hùmẹ de tọn.
Kavi “họmẹgbòvọ̀.”
Kavi “họmẹgbòvọ̀.”