Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 38:1-31

NUHE E BẸHẸN LẸ

  • Agbà avọ́nunina mimẹ̀ tọn (1-7)

  • Basia gànvẹẹ tọn (8)

  • Awánu (9-20)

  • Sọha nuyizan gòhọtúntún tọn lẹ yíyí (21-31)

38  E sọ yí owhlẹ akasia tọn do basi agbà avọ́nunina mimẹ̀ tọn lọ. Adà ẹnẹ agbà lọ tọn lẹ sọzẹn, tedidi etọn yin awagbà* atọ́n podọ gbigblo etọn awagbà atọ́n bọ jiyiyi etọn yin awagbà atọ̀n.+  E sọ basi azò lẹ do agosu etọn ẹnẹ lẹ ji. Azò lọ lẹ tin to e go. E sọ và gànvẹẹ na yé.+  Enẹgodo, e basi nuyizan agbà lọ tọn lẹpo, yèdọ panu lẹ, fẹli lẹ, agbán lẹ, ṣivi-fẹ̀nnọ lẹ po miyọ́n-hẹnnú lẹ po. Gànvẹẹ wẹ e yí do basi nuyizan etọn lẹpo.  E sọ basi agbájẹ́ de na agbà lọ, yèdọ agbájẹ́ gànvẹẹ tọn de do agbà lọ homẹ sẹpọ tónu aga tọn etọn bọ agbájẹ́ lọ ma dẹn do ṣẹnṣẹn agbà lọ tọn.  E sọ basi alọkẹ ẹnẹ do agosu ẹnẹ lẹ mẹ sẹpọ agbájẹ́ gànvẹẹ tọn lọ he mẹ opò lọ lẹ na gbọn.  E sọ yí owhlẹ akasia tọn do basi opò lẹ bo và gànvẹẹ na yé.  E sọ hẹn opò lọ lẹ gbọn alọkẹ he to adà agbà lọ tọn mẹ lẹ mẹ, na yé nido nọ yin yiyizan nado ze e. E basi agbà lọ taidi apotin owhlẹ tọn he ma tindo nùsu de.  Enẹgodo, e yí gànvẹẹ do basi basia lọ+ po nuhe ji e na yin zizedo po; mẹpọ́nnu* yọnnu lọ lẹ he ko yin dide nado nọ wà sinsẹ̀nzọn to aliho kannukannu tọn mẹ to họntonu gòhọ opli tọn lọ tọn lẹ wẹ e yizan.  E sọ basi awánu lọ.+ Na adà hùwaji tọn awánu lọ tọn, yèdọ fie pannukọn hùwaji, alavọ linlọ̀n dagbedagbe wẹ e basi do finẹ, bọ tedidi etọn yin awagbà 100.+ 10  E tindo dòtin 20 po oslò dodonu tọn gànvẹẹ tọn 20 po, e sọ yí fataka do basi oplá dòtin lọ lẹ tọn po opò aga tọn* yetọn lẹ po. 11  Avọ̀ he yin dido do adà agewaji tọn lọsu dite na awagbà 100. Podọ gànvẹẹ wẹ yè yí do basi dòtin etọn 20 lẹ po oslò dodonu tọn etọn 20 lẹ po. E sọ yí fataka do basi oplá lọ lẹ po opò aga tọn* dòtin lọ tọn lẹ po. 12  Ṣigba, avọ̀ he yin dido do adà whèyihọ tọn yin awagbà 50. E sọ tindo dòtin ao po oslò dodonu tọn ao po, podọ fataka wẹ yin yiyizan nado basi oplá dòtin lọ tọn lẹ po opò aga tọn* yetọn lẹ po. 13  Gbigblo etọn to whèzẹtẹn-waji, pànta whèzẹtẹn, yin awagbà 50. 14  Avọ̀ he yin dido do adà tintan ji dite na awagbà 15, gọna dòtin atọ̀n po oslò dodonu tọn atọ̀n po. 15  Podọ avọ̀ he yin dido do adà awetọ họngbo awánu lọ tọn ji yin awagbà 15, gọna dòtin atọ̀n po oslò dodonu tọn atọ̀n po. 16  Avọ̀ he yin dido lẹdo awánu lọ lẹpo wẹ yin alavọ linlọ̀n dagbedagbe. 17  Gànvẹẹ wẹ yin yíyí do basi oslò dodonu tọn dòtin lọ tọn lẹ, fataka wẹ yin yíyí do basi oplá yetọn po opò aga tọn* yetọn lẹ po, bọ yè sọ và fataka na yé to aga, podọ fataka wẹ yin yíyí do basi opò aga tọn dòtin awánu lọ tọn lẹpo.+ 18  Sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po wẹ yin yiyizan nado lọ̀n avọ̀* he to họngbo awánu lọ tọn nù. Tedidi etọn yin awagbà 20 podọ jiyiyi etọn yin awagbà 5, yèdọ jiyiyi dopolọ po avọ̀ he yin dido lẹdo awánu lọ po.+ 19  Gànvẹẹ wẹ yin yíyí do basi dòtin ẹnẹ po oslò dodonu tọn yetọn ẹnẹ lẹ po. Fataka wẹ yin yíyí do basi oplá yetọn lẹ podọ fataka wẹ yè và na yé to aga po opò aga tọn* yetọn lẹ po. 20  Opò tlọ́ntlọ́n gòhọtúntún lọ tọn lẹ po dehe lẹdo awánu lọ pé lẹpo po wẹ yè yí gànvẹẹ do basi.+ 21  Nuhe bọdego ehelẹ wẹ gòhọtúntún lọ bẹhẹn, yèdọ gòhọtúntún Kunnudenu+ lọ tọn he adà voovo etọn lẹ yin gbigbejepọn gbọn Levinu lẹ+ dali to anademẹ Itamali+ visunnu Aalọn yẹwhenọ lọ tọn glọ sọgbe hẹ gbedide Mose tọn. 22  Bezalẹli+ visunnu Uli, he yin visunnu Huuli tọn, sọn hẹnnu Juda tọn mẹ wà nuhe Jehovah ko degbe etọn na Mose lẹpo. 23  Oholiabi+ visunnu Ahisamaki tọn sọn hẹnnu Dani tọn mẹ sọ wazọ́n dopọ hẹ ẹ, yèdọ mẹhe yin alọnuzọ́nwatọ podọ avọ̀-kótọ bosọ nọ yí sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ dagbedagbe po do lọ̀n avọ̀. 24  Sika lẹpo he yin yiyizan na azọ́n ofi wiwe lọ tọn lẹpo sọzẹn hẹ sọha sika avọ́nunina he yè mimí lọ tọn,+ yèdọ talẹnti* 29 po ṣekẹli* 730 po sọgbe hẹ ojlẹnu ṣekẹli tọn he yin ofi wiwe lọ tọn.* 25  Podọ fataka mẹhe yin hihia to akọta lọ mẹ lẹ tọn yin talẹnti 100 podọ ṣekẹli 1 775 sọgbe hẹ ojlẹnu ṣekẹli tọn he yin ofi wiwe lọ tọn.* 26  Ṣekẹli daa wẹ mẹdopodopo na sọgbe hẹ ojlẹnu ṣekẹli tọn he yin ofi wiwe lọ tọn,* yèdọ mẹhe yin hihia lẹpo bẹsọn mẹhe tindo owhe 20 ji sọyi aga lẹ+ bọ lẹndopọ mẹhe yin hihia lẹpo tọn yin 603 550.+ 27  Lẹndopọ oslò dodonu tọn ofi wiwe lọ tọn lẹ po oslò dodonu tọn họmẹgbòvọ̀ lọ tọn lẹ po yin talẹnti 100; oslò dodonu tọn 100 lọ lẹ sọzẹn hẹ talẹnti 100, yèdọ talẹnti dopo sọzẹn hẹ oslò dodonu tọn+ dopo. 28  Sọn ṣekẹli 1 775 lọ lẹ mẹ, e basi oplá lẹ na dòtin lọ lẹ bo bu aga yetọn bosọ ṣá yé dopọ. 29  Gànvẹẹ avọ́nunina* tọn yin talẹnti 70 po ṣekẹli 2 400 po. 30  Enẹ wẹ e yí do basi oslò dodonu tọn he tin to họntonu gòhọ opli tọn lọ tọn lẹ, agbà gànvẹẹ tọn lọ po agbájẹ́ gànvẹẹ tọn etọn po, nuyizan agbà lọ tọn lẹpo, 31  oslò dodonu tọn he lẹdo awánu lọ pé lẹ, oslò dodonu tọn lẹ he tin to họntonu awánu lọ tọn, opò tlọ́ntlọ́n gòhọtúntún lọ tọn lẹpo po opò tlọ́ntlọ́n gòhọ tọn+ he lẹdo awánu lọ pé lẹpo po.

Nudọnamẹ Odò Tọn

Awagbà dopo sọzẹn hẹ cm 44,5. Pọ́n Nud. B14.
Enẹ wẹ, mẹpọ́nnu ogànnọ he yè hẹn sẹ́ ganji.
Kavi “alọkẹ; okàn” he na blanú.
Kavi “alọkẹ; okàn” he na blanú.
Kavi “alọkẹ; okàn” he na blanú.
Kavi “alọkẹ; okàn” he na blanú.
Kavi “họmẹgbòvọ̀.”
Kavi “alọkẹ; okàn” he na blanú.
Talẹnti dopo sọzẹn hẹ kg 34,2. Pọ́n Nud. B14.
Ṣekẹli dopo sọzẹn hẹ g 11,4. Pọ́n Nud. B14.
Kavi “sọgbe hẹ ṣekẹli wiwe lọ.”
Kavi “sọgbe hẹ ṣekẹli wiwe lọ.”
Kavi “sọgbe hẹ ṣekẹli wiwe lọ.”
Kavi “avọ́nunina he yè mimí.”