Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 37:1-29

NUHE E BẸHẸN LẸ

  • Aki lọ bibasi (1-9)

  • Tafo (10-16)

  • Miyọ́ngbán-tin (17-24)

  • Agbà nuyọnwan tọn (25-29)

37  Bezalẹli+ sọ yí owhlẹ akasia tọn do basi Apotin+ de. Tedidi etọn yin awagbà* awe daa, gbigblo etọn awagbà dopo daa podọ jiyiyi etọn awagbà dopo daa.+  E sọ và sika akú na ẹn to homẹ po gbonu po bo yí aṣọ́donu sika tọn do gbá* tónu etọn lẹdo pé.+  Enẹgodo, e basi alọkẹ sika tọn ẹnẹ na ẹn do aga na afọ etọn ẹnẹ lẹ, yèdọ alọkẹ awe to adà dopo ji podọ alọkẹ awe to adà awetọ ji.  E sọ yí owhlẹ akasia tọn do basi opò lẹ bo và sika na yé.+  E sọ hẹn opò lọ lẹ gbọn alọkẹ he to adà Apotin lọ tọn go lẹ mẹ, na yé nido nọ yin yiyizan nado ze Apotin+ lọ.  E yí sika akú do basi nùsu lọ.+ Tedidi etọn yin awagbà awe daa podọ gbigblo etọn awagbà dopo daa.+  E sọ tùn kelubimi+ sika tọn awe* do tónu awe nùsu lọ tọn lẹ ji aga.+  Kelubimi dopo to tónu dopo bọ kelubimi awetọ to tónu awetọ. E basi kelubimi lọ lẹ do tónu nùsu lọ tọn awe lẹ ji aga.  Kelubimi awe lọ lẹ sọ dlẹn awà yetọn lẹ hlan aga bo yí yé ṣinyọ́n nùsu lọ ji.+ Yé sọ pannukọn yede bọ nukunmẹ yetọn yin lilẹ́ pànta nùsu lọ.+ 10  E sọ yí owhlẹ akasia tọn do basi tafo lọ.+ Tedidi etọn yin awagbà awe, gbigblo etọn awagbà dopo podọ jiyiyi etọn awagbà dopo daa.+ 11  E sọ và sika akú na ẹn bo yí aṣọ́donu sika tọn do gbá* tónu etọn lẹdo pé. 12  Enẹgodo, e basi tónu de dego he gblo sọ alọpahomẹ dopo* lẹdo e pé bo yí aṣọ́donu sika tọn do gbá* tónu lọ lẹdo pé. 13  E sọ basi alọkẹ sika tọn ẹnẹ na ẹn bosọ ze alọkẹ lọ lẹ do agosu ẹnẹ fie afọ lọ lẹ tin te lẹ go. 14  Alọkẹ lọ lẹ sẹpọ tónu lọ nado hẹn opò he na nọ yin yiyizan nado ze tafo lọ lẹ. 15  E sọ yí owhlẹ akasia tọn do basi opò lẹ he yè na nọ yí do ze tafo lọ bosọ và sika na yé. 16  E sọ yí sika akú do basi nuyizan he na nọ tafo lọ ji lẹ—agbánvla lẹ, kọfo lẹ, agbán lẹ po tọ̀zẹ́n lẹ po, ehe mẹ yé na nọ kọ̀n avọ́nunina nùnù lẹ sọn.+ 17  Enẹgodo, e yí sika akú do basi miyọ́ngbán-tin+ lọ. E tùn miyọ́ngbán-tin lọ. Dodonu etọn, gotò etọn, agó etọn lẹ, osẹ́pò etọn lẹ po osẹ́ etọn lẹ po zẹ̀ jẹgbonu sọn e go.+ 18  Alà ṣidopo wẹ zẹ̀ jẹgbonu sọn miyọ́ngbán-tin lọ go, alà atọ̀n sọn adà dopo ji podọ alà atọ̀n devo lẹ sọn adà awetọ ji. 19  Agó atọ̀n he taidi vounvoun almọndi tọn lẹ tin to alà dopodopo go to adà dopo ji bọ osẹ́pò po osẹ́ lọ lẹ po bọdo yede go, podọ agó atọ̀n he taidi vounvoun almọndi tọn lẹ tin to adà awetọ ji bọ osẹ́pò po osẹ́ lọ lẹ po sọ bọdo yede go. Lehe alà ṣidopo lọ lẹ zẹ̀ jẹgbonu sọn gotò miyọ́ngbán-tin lọ tọn go do niyẹn. 20  Agó ẹnẹ he taidi vounvoun almọndi tọn lẹ, osẹ́pò po osẹ́ lẹ po he bọdo yede go tin to gotò miyọ́ngbán-tin lọ tọn go. 21  Osẹ́pò de tin to alà awe tintan he zẹ̀ jẹgbonu sọn gotò miyọ́ngbán-tin lọ tọn go lẹ glọ, osẹ́pò de to alà awe devo he bọdego lẹ glọ, podọ osẹ́pò de tin to alà awe devo lẹ glọ, na alà ṣidopo wẹ zẹ̀ jẹgbonu sọn gotò miyọ́ngbán-tin lọ tọn go. 22  Sika akú wẹ yin yiyizan nado tùn osẹ́pò lọ lẹ, alà lọ lẹ podọ miyọ́ngbán-tin lọ blebu. 23  Enẹgodo, e yí sika akú do basi miyọ́ngbán ṣinawe etọn lẹ,+ miyọ́n-denú etọn lẹ po miyọ́n-hẹnnú etọn lẹ po. 24  Sika akú talẹnti* dopo wẹ e yí do basi miyọ́ngbán-tin lọ po nuyizan etọn lẹpo po. 25  Todin, e yí owhlẹ akasia tọn do basi agbà nuyọnwan tọn+ de. Adà ẹnẹ lẹ sọzẹn, yèdọ tedidi etọn awagbà dopo, gbigblo etọn awagbà dopo podọ jiyiyi etọn awagbà awe. Azò lẹ sọ tin to e go.+ 26  E sọ và sika akú na ẹn to aga etọn, to adà etọn lẹ mẹ lẹdo pé podọ na azò etọn lẹ, e sọ yí aṣọ́donu sika tọn do gbá* tónu etọn lẹdo pé. 27  E sọ basi alọkẹ sika tọn awe-awe do adà etọn awe ji to odò na* tónu etọn bọ opò he na nọ yin yiyizan nado ze e lẹ na gbọn yé mẹ. 28  Enẹgodo, e yí owhlẹ akasia tọn do basi opò lọ lẹ bo và sika na yé. 29  E sọ basi amì mẹdide tọn+ wiwe de po nuyọnwan owán gblingblinnọ+ akú de po, he yin hihò dopọ po azọ́nyinyọnẹn po.*

Nudọnamẹ Odò Tọn

Awagbà dopo sọzẹn hẹ cm 44,5. Pọ́n Nud. B14.
Kavi “bo kọ̀n sika do.”
Enẹ wẹ, nado yí núwhènú de do wà anazọ́n do kelubimi sika tọn awe lọ lẹ go.
Kavi “bo kọ̀n sika do.”
Nudi cm 7,4. Pọ́n Nud. B14.
Kavi “bo kọ̀n sika do.”
Talẹnti dopo sọzẹn hẹ kg 34,2. Pọ́n Nud. B14.
Kavi “nasọ kọ̀n sika do.”
Kavi “to fie sika yin kinkọ̀n do to.”
Kavi “dile mẹhe nọ wleawuna amì owán gblingblinnọ de nọ basi do.”