Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 33:1-23

NUHE E BẸHẸN LẸ

  • Wọhẹmẹ Jiwheyẹwhe tọn (1-6)

  • Gòhọ opli tọn to gbonu osla lọ tọn (7-11)

  • Mose biọ nado mọ gigo Jehovah tọn (12-23)

33  Jehovah sọ zindonukọn nado dọna Mose dọmọ: “Wleali dedo sọn fi po mẹhe a plan tọ́n sọn aigba Egipti tọn ji lẹ po. Mì zingbejizọnlin yì aigba lọ ji he yẹn ko whlé nado na Ablaham, Isaki po Jakọbu po dọ, ‘Kúnkan* towe wẹ yẹn na yí i na.’+  Yẹn na do angẹli de hlan he na jẹnukọnna we+ nado yàn Kenaninu lẹ, Amolinu lẹ, Hetinu lẹ, Pelizinu lẹ, Hivinu lẹ po Jẹbusinu lẹ po sẹ̀.+  Mì hẹji yì aigba he ji anọ́sin po owín po to sisà te lọ ji.+ Ṣigba, yẹn ma na zọnhẹ mì, na gbẹtọ tasinyẹntọ* lẹ wẹ mì+ yin bọ e sọgan wá jọ bọ yẹn na sukúndona mì to aliji.”+  To whenue mẹlọ lẹ sè hogbe sinsinyẹn ehelẹ, yé biọ aluẹmẹ bọ depope to yé mẹ ma yí aṣọ́donu yetọn lẹ do doaṣọ́.  Jehovah sọ dọna Mose dọmọ: “Dọna Islaelivi lẹ dọ, ‘Gbẹtọ tasinyẹntọ* lẹ wẹ mì yin.+ To ojlẹ kleun de gblamẹ, yẹn sọgan jugbọn ṣẹnṣẹn mìtọn bo sukúndona mì.+ Enẹwutu, mì de aṣọ́donu mìtọn lẹ todin, bọ yẹn nasọ pọ́n nuhe yẹn na wà na mì.’”  Enẹwutu, bẹsọn Osó Holẹbi tọn kọ̀n wẹ Islaelivi lẹ masọ nọ yí aṣọ́donu yetọn lẹ do doaṣọ́na yede ba.*  Todin, Mose ze gòhọ etọn bo yì tùn in do gbonu osla lọ tọn, yèdọ to olá na osla lọ, e sọ ylọ ẹ dọ gòhọ opli tọn. Mẹdepope he jlo na kanhose Jehovah+ dona nọ yì gòhọ opli tọn he to gbonu osla lọ tọn mẹ.  Eyin Mose tọ́n tlolo bo jei gòhọ lọ mẹ, mẹlọ lẹpo nọ fọ́n bo nọ ṣite to họntonu gòhọ yetọn titi lẹ tọn bosọ nọ to pinpọn ẹn tlintlin kakajẹ whenue e biọ gòhọ lọ mẹ.  Eyin Mose biọ gòhọ lọ mẹ tlolo, dòtin aslọ tọn+ nọ jẹte wá bo nọ gbọṣi họntonu gòhọ lọ tọn eyin Jiwheyẹwhe to hodọ hẹ Mose.+ 10  Eyin mẹlọ lẹpo mọ dòtin aslọ tọn lọ to họntonu gòhọ lọ tọn, dopodopo yetọn nọ fọ́n bo nọ dẹ́ do odò to họntonu gòhọ yetọn titi lẹ tọn. 11  Jehovah nọ dọho hẹ Mose nukun sọ nukun,+ kẹdẹdile gbẹtọ de nọ dọho hẹ gbẹtọ hatọ etọn do. Eyin e lẹkọyi osla lọ mẹ, Jọṣua+ visunnu Nuni tọn he yin lizọnyitọ podọ devizọnwatọ etọn+ ma nọ sẹtẹn sọn gòhọ lọ mẹ. 12  Todin, Mose dọna Jehovah dọmọ: “Pọ́n, hiẹ dọna mi dọ, ‘Plan omẹ ehelẹ yì,’ ṣigba hiẹ ma ko do mẹhe na zọnhẹ mi yì lọ hia gba. Humọ, hiẹ ko dọ dọ, ‘Yẹn yọ́n oyín towe,* bọ hiẹ ko sọ mọ nukundagbe ṣie.’ 13  Yẹn vẹ̀ we, eyin yẹn ko mọ nukundagbe towe, jaale hẹn mi yọ́n ali towe lẹ,+ na yẹn nido yọ́n we bo zindonukọn nado to nukundagbe towe mọyi. Sọ flin ga dọ, omẹ towe lẹ wẹ akọta ehe yin.”+ 14  Enẹwutu, e dọmọ: “Yẹnlọsu* na yì hẹ we,+ yẹn nasọ na we gbọjẹ.”+ 15  Mose sọ dọna ẹn dọmọ: “Eyin hiẹ lọsu titi* ma na zọnhẹ mí yì, a plan mí sọn fi blo. 16  Etẹwẹ na dohia dọ yẹn po omẹ towe lẹ po ko mọ nukundagbe towe? Be e ma na yin gbọn zinzọnhẹ mí+ dali wẹ na zọ́n bọ yẹn po omẹ towe lẹ po nado yin yinyọnẹn gbọnvona akọta he pò lẹpo to aigba nukunmẹ ya?”+ 17  Jehovah sọ zindonukọn nado dọhona Mose dọmọ: “Yẹn nasọ wà nuhe hiẹ biọ ehe, na hiẹ ko mọ nukundagbe ṣie bọ yẹn ko sọ yọ́n oyín towe.” 18  Whenẹnu wẹ Mose dọmọ: “Jaale, do gigo towe hia mi.” 19  Ṣigba, e gblọn dọmọ: “Yẹn na do dagbewà ṣie lẹpo hia we podọ yẹn na lá oyín Jehovah tọn+ to nukọn towe; yẹn nasọ do nukundagbe hia mẹhe yẹn na do nukundagbe hia podọ yẹn na do lẹblanu hia mẹhe yẹn na do lẹblanu hia.”+ 20  Ṣigba, e yidogọ dọmọ: “Hiẹ ma sọgan mọ nukunmẹ ṣie, na gbẹtọ ma sọgan mọ nukunmẹ ṣie bo nọgbẹ̀.” 21  Jehovah sọ yidogọ dọmọ: “Nọtẹn de die to yakẹ fi. Nọte to osé lọ ji. 22  To whenue gigo ṣie na juwajei, yẹn na ze we do oslò osé lọ tọn mẹ bo nasọ yí alọ ṣie do ṣinyọnyẹ ji we kakajẹ whenue yẹn na ko juwayi. 23  Enẹgodo, yẹn na dealọ ṣie sẹ̀ bọ hiẹ na mọ godo ṣie. Ṣigba, nukunmẹ ṣie wẹ ma sọgan yin mimọ.”+

Nudọnamẹ Odò Tọn

To paa mẹ, “Okún.”
To paa mẹ, “okọ̀ sinsinyẹnnọ.”
To paa mẹ, “okọ̀ sinsinyẹnnọ.”
To paa mẹ, “Islaelivi lẹ de aṣọ́donu yetọn lẹ.”
Kavi “Yẹn ko de we.”
To paa mẹ, “Nukunmẹ ṣie.”
To paa mẹ, “Eyin nukunmẹ towe.”