Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 30:1-38

NUHE E BẸHẸN LẸ

  • Agbà nuyọnwan tọn (1-10)

  • Mẹhihia po akuẹ ovẹsè tọn po (11-16)

  • Basia gànvẹẹ tọn na alọ kiklọ (17-21)

  • Amì mẹdide tọn vonọtaun (22-33)

  • Nuyọnwan wiwe bibasi (34-38)

30  “Hiẹ na basi agbà de fie nuyọnwan lẹ na nọ yin mimẹ̀ te;+ owhlẹ akasia tọn wẹ hiẹ na yí do basi i.+  Adà ẹnẹ lẹ dona sọzẹn, yèdọ tedidi etọn awagbà dopo,* gbigblo etọn awagbà dopo podọ jiyiyi etọn awagbà awe. Azò etọn lẹ nasọ tin to e go.+  Hiẹ na và sika akú na ẹn: aga etọn, adà etọn lẹ lẹdo pé po azò etọn lẹ po; hiẹ nasọ yí aṣọ́donu sika tọn do doaṣọ́na* tónu etọn lẹdo pé.  Hiẹ nasọ basi alọkẹ sika tọn awe-awe do adà etọn awe ji to odò na* tónu etọn bọ opò he na nọ yin yiyizan nado ze e lẹ na gbọn yé mẹ.  Yí owhlẹ akasia tọn do basi opò lọ lẹ bo và sika na yé.  Hiẹ nasọ ze agbà lọ donukọnna họmẹgbòvọ̀ he ma dẹn do apotin Kunnudenu tọn lọ,+ fie yẹn na nọ sọawuhia te.+ E dona tin to apotin Kunnudenu tọn lọ po nùsu etọn po nukọn.  “Aalọn+ na nọ mẹ̀ nuyọnwan owán gblingblinnọ+ to e ji,+ bọ azọ̀ na nọ tì to agbà lọ ji to whenue e to nukunpedo miyọ́ngbán lọ lẹ go+ to afọnnu lẹ.  Humọ, eyin Aalọn to miyọ́ngbán lọ lẹ tá to whèjai plẹplẹ,* e na nọ mẹ̀ nuyọnwan. Avọ́nunina nuyọnwan tọn to gbesisọ mẹ de wẹ ehe yin to Jehovah nukọn sọn whẹndo de ji jẹ whẹndo de ji.  Mì ma dona yí nuyọnwan kavi avọ́nunina mimẹ̀ kavi avọ́nunina jinukun-lili tọn he ma yin alọkẹyi+ de do sanvọ́ to e ji gba, podọ mì ma dona kọ̀n avọ́nunina nùnù de do e ji. 10  Aalọn dona nọ basi ovẹsè to azò etọn lẹ ji whladopo to whemẹ.+ E na nọ yí sọn ohùn avọ́nunina ylando tọn he yin ovẹsè tọn lọ tọn mẹ+ nado basi ovẹsè na agbà lọ whladopo to whemẹ sọn whẹndo de ji jẹ whẹndo de ji. Onú wiwe gbaugbau wẹ e yin hlan Jehovah.” 11  Jehovah sọ dọna Mose dọmọ: 12  “Whedepopenu he hiẹ to visunnu Islaeli tọn lẹ hia,+ mẹdopodopo dona na nunina ofligọ tọn na ogbẹ̀* etọn hlan Jehovah to mẹhihia lọ whenu. Ehe yinmọ na azọ̀nylankan depope ma nado yin hinhẹnwa yé ji to mẹhihia lọ whenu. 13  Nuhe mẹhe yin hihia lẹpo na na lẹ die: ṣekẹli* daa sọgbe hẹ ojlẹnu ṣekẹli tọn he yin ofi wiwe lọ tọn.*+ Gela* 20 sọzẹn hẹ ṣekẹli dopo. Ṣekẹli daa wẹ na yin nunina he na yin bibasi hlan Jehovah.+ 14  Mẹdepope he tindo owhe 20 podọ humọ bo yin hihia na na nunina hlan Jehovah.+ 15  Adọkunnọ ma dona na hú ṣekẹli* daa mọ wamọnọ lọsu ma dona na bọ e na whè humọ, to whenue mì to nunina basi hlan Jehovah nado basi ovẹsè na ogbẹ̀* mìtọn. 16  Hiẹ na yí fataka-kuẹ ovẹsè tọn sọn Islaelivi lẹ dè bo na na do sinsẹ̀nzọn he nọ yin bibasi to gòhọ opli tọn mẹ lọ tamẹ, na e nido yin oflin de to Jehovah nukọn, na Islaelivi lẹ nado basi ovẹsè na ogbẹ̀* mìtọn.” 17  Jehovah sọ dọhona Mose dogọ dọmọ: 18  “Yí gànvẹẹ do basi basia de he mẹ yè na nọ klọ́ alọ po afọ po te po nuhe ji e na yin zizedo po;+ enẹgodo ze e do gòhọ opli tọn lọ po agbà lọ po ṣẹnṣẹn bosọ yí osin do e mẹ.+ 19  Aalọn po visunnu etọn lẹ po na nọ klọ́ alọ po afọ yetọn lẹ po to finẹ.+ 20  Eyin yé jei gòhọ opli tọn mẹ kavi to whenue yé wá agbà lọ kọ̀n nado wadevizọn podọ nado basi avọ́nunina lẹ gbọn miyọ́n dali he na to azọ̀ti hlan Jehovah, yé na nọ yí osin do klọ́ alọ po afọ po, na yé nikaa kú. 21  Yé dona nọ klọ́ alọ po afọ yetọn lẹ po, na yé nikaa kú podọ ehe dona yin aṣẹdai kakadoi de na yé, yèdọ na ewọ po kúnkan etọn lẹ po sọn whẹndo de ji jẹ whẹndo de ji.”+ 22  Jehovah sọ dọhona Mose yinukọn dogọ dọmọ: 23  “Enẹgodo, yí onú owán gblingblinnọ he họakuẹ tlala ehelẹ: zuya pinpẹn ṣekẹli 500, kinamọni owán gblingblinnọ odaa sọha enẹ tọn, yèdọ ṣekẹli 250 po kalamusi owán gblingblinnọ ṣekẹli 250 po, 24  gọna kasia ṣekẹli 500 he yin jijlẹ sọgbe hẹ ojlẹnu ṣekẹli tọn he yin ofi wiwe lọ tọn*+ po amì olivie tọn hini* dopo po. 25  Enẹgodo, hiẹ na yí i do basi amì mẹdide tọn wiwe de; e dona yin hihò dopọ po azọ́nyinyọnẹn po.*+ Amì mẹdide tọn wiwe de wẹ e na yin. 26  “Hiẹ na kọ̀n amì do* gòhọ opli tọn+ lọ po apotin Kunnudenu tọn lọ po ji, 27  do tafo lọ po nuyizan etọn lẹpo po ji, miyọ́ngbán-tin lọ po nuyizan etọn lẹ po ji, do agbà nuyọnwan tọn lọ ji, 28  do agbà avọ́nunina mimẹ̀ tọn lọ po nuyizan etọn lẹpo po ji podọ do basia lọ po nuhe ji e yin zizedo po ji. 29  Hiẹ dona klan yé do wiwe na yé nido yin wiwe gbaugbau.+ Mẹhe yin wiwe lẹ kẹdẹ wẹ na doalọ yé go.+ 30  Hiẹ nasọ yiamisisadode Aalọn+ po visunnu etọn lẹ+ po bo na klan yé do wiwe, na yé nido sẹ̀n taidi yẹwhenọ lẹ hlan mi.+ 31  “Hiẹ na dọna Islaelivi lẹ dọ, ‘Amì mẹdide tọn wiwe de wẹ ehe na yin hlan mi kakadoi sọn whẹndo de ji jẹ whẹndo de ji.+ 32  E ma dona yin sisá na gbẹtọvi de podọ mì ma dona yí nuyizan he e bẹhẹn lẹ do basi nudevo depope taidi ehe nkọ. Onú wiwe de wẹ e yin. E dona yin onú wiwe de na mì kakadoi. 33  Mẹdepope he basi amì owán gblingblinnọ taidi ehe nkọ bo sá ẹ na mẹhe ma jẹ de* dona yin sinsánsẹ* sọn omẹ etọn lẹ ṣẹnṣẹn.’”+ 34  Enẹgodo, Jehovah dọna Mose dọmọ: “Yí sọha dopolọ onú owán gblingblinnọ ehelẹ tọn:+ atin-sin owán gblingblinnọ, onika,* galbanọmi owán gblingblinnọ po nuyọnwan gblingblin akú de po. 35  Hiẹ nasọ yí i do basi nuyọnwan de;+ nuwhẹ́nkun lọ lẹ dona yin hihò dopọ po azọ́nyinyọnẹn po,* podọ ojẹ̀+ dona pé e mẹ bọ e na yin akú bosọ yin wiwe. 36  Hiẹ na lì delẹ to yé mẹ zun linfin dagbedagbe bo na yí sọn e mẹ do Kunnudenu lọ nukọn to gòhọ opli tọn lọ mẹ, fie yẹn na nọ sọawuhia we te. E dona yin onú wiwe gbaugbau de na mì. 37  Hiẹ ma dona yí nuyizan dopolọ lẹ do basi nuyọnwan de na dewetiti.+ Hiẹ na nọ pọ́n ẹn hlan taidi onú wiwe de hlan Jehovah. 38  Mẹdepope he basi nudepope taidi ehe nkọ nado duvivi owán etọn tọn dona yin sinsánsẹ* sọn omẹ etọn lẹ ṣẹnṣẹn.”

Nudọnamẹ Odò Tọn

Nudi cm 44,5. Pọ́n Nud. B14.
Kavi “nasọ kọ̀n sika do.”
Kavi “to fie sika yin kinkọ̀n do to.”
To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
Kavi “alindọn.”
Ṣekẹli dopo sọzẹn hẹ g 11,4. Pọ́n Nud. B14.
Kavi “sọgbe hẹ ṣekẹli wiwe lọ.”
Gela dopo sọzẹn hẹ g 0,57. Pọ́n Nud. B14.
Ṣekẹli dopo sọzẹn hẹ g 11,4. Pọ́n Nud. B14.
Kavi “alindọn.”
Kavi “alindọn.”
Kavi “sọgbe hẹ ṣekẹli wiwe lọ.”
Hini dopo sọzẹn hẹ L 3,67. Pọ́n Nud. B14.
Kavi “dile mẹhe nọ wleawuna amì owán gblingblinnọ de nọ basi do.”
To paa mẹ, “na yiamisisadode.”
To paa mẹ, “jonọ de,” enẹ wẹ, mẹhe ma wá sọn whẹndo Aalọn tọn mẹ.
Kavi “hùhù.”
Nuhe e yin taun ma yin yinyọnẹn. E sọgan ko yin didesọn atin owán gblingblinnọ de kavi apán whèvi de tọn go.
Kavi “dile mẹhe nọ wleawuna amì owán gblingblinnọ de nọ basi do.”
Kavi “hùhù.”