Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 3:1-22

NUHE E BẸHẸN LẸ

  • Mose po wùnkan he to miyọ́n ji po (1-12)

  • Jehovah na zẹẹmẹ oyín Etọn tọn (13-15)

  • Jehovah na anademẹ Mose (16-22)

3  Mose sọ lẹzun lẹngbọhọtọ de na lẹngbọpa asi-tọ́ etọn Jẹtlo+ tọn, mẹhe yin yẹwhenọ Midiani tọn. To whenue e plan lẹngbọ lọ lẹ jei whèyihọ-waji danfafa lọ tọn, e wá jẹ osó Jiwheyẹwhe nugbo lọ tọn kọ̀n to Holẹbi.+  Whenẹnu wẹ angẹli Jehovah tọn sọawuhia ẹ to miyọ́n he to jiji to wùnkan de mẹ.+ Dile e zindonukọn bo to pinpọn, e mọdọ wùnkan lọ to jiji ṣogan bo ma fiọ.  Mose sọ dọmọ: “Yẹn na yì pọ́n nujiawu ehe nado yọ́n nuhewutu wùnkan lọ ma fiọ.”  To whenue Jehovah mọdọ e sẹwá nado pọ́n, Jiwheyẹwhe ylọ ẹ sọn wùnkan lọ mẹ bo dọmọ: “Mose! Mose!” bọ ewọ sọ gblọn dọmọ: “Yẹn die.”  E sọ yidogọ dọmọ: “A sọ sẹwá humọ blo. De afọpa towe lẹ sọn afọ, na aigba wiwe de ji wẹ hiẹ ṣite te.”  E sọ zindonukọn dọmọ: “Yẹn wẹ Jiwheyẹwhe otọ́ towe tọn, yèdọ Jiwheyẹwhe Ablaham tọn,+ Jiwheyẹwhe Isaki tọn+ podọ Jiwheyẹwhe Jakọbu tọn.”+ To whenẹnu, Mose whlá nukunmẹ etọn, na e dibu nado pọ́n Jiwheyẹwhe nugbo lọ wutu.  Jehovah sọ yidogọ dọmọ: “Matin ayihaawe, yẹn ko mọ yajiji omẹ ṣie he to Egipti lẹ tọn bo ko sọ sè awhágbe yetọn na mẹhe to hinhẹn yé gánnugánnu nado wazọ́n lẹ wutu; yẹn sọ yọ́n oyà he ji yé te lẹ ganji.+  Yẹn na jẹte yì nado whlẹn yé sọn alọ Egiptinu lẹ tọn mẹ+ bo nasọ plan yé sọn aigba enẹ ji yì aigba dagbe he gblo de, yèdọ aigba de he ji anọ́sin po owín po to sisà te ji,+ fie Kenaninu lẹ, Hetinu lẹ, Amolinu lẹ, Pelizinu lẹ, Hivinu lẹ po Jẹbusinu lẹ po nọ nọ̀.+  Todin pọ́n! Awhágbe Islaelivi lẹ tọn ko hẹji wá dè e, yẹn ko sọ mọ lehe Egiptinu lẹ to kọgbidina yé to aliho ylankan mẹ do.+ 10  Todin, gbọ yẹn ni do we hlan Falo dè bọ hiẹ nasọ plan omẹ ṣie lẹ, enẹ wẹ Islaelivi lẹ, sọn Egipti.”+ 11  Ṣigba, Mose dọna Jiwheyẹwhe nugbo lọ dọmọ: “Mẹnu wẹ yẹn bọ yẹn nado yì Falo dè nado plan Islaelivi lẹ tọ́n sọn Egipti?” 12  Whenẹnu wẹ e dọmọ: “Yẹn na tin hẹ we,+ podọ ehe wẹ na yin ohia lọ na we dọ yẹn wẹ do we hlan: To whenue hiẹ na ko plan akọta lọ sọn Egipti godo, mì na wá sẹ̀n* Jiwheyẹwhe nugbo lọ to osó ehe ji.”+ 13  Ṣigba, Mose dọna Jiwheyẹwhe nugbo lọ dọmọ: “Mí ni dọ dọ yẹn yì Islaelivi lẹ dè bo dọna yé dọ, ‘Jiwheyẹwhe tọgbo mìtọn lẹ tọn wẹ do mi hlan mì dè,’ bọ yé sọ kanse mi dọ, ‘Nawẹ oyín etọn nọ yin?’+ Etẹwẹ yẹn na gblọnna yé?” 14  Enẹwutu, Jiwheyẹwhe dọna Mose dọmọ: “Yẹn Na Lẹzun Nuhe Yẹn De* Nado Lẹzun.”*+ E sọ yidogọ dọmọ: “Nuhe hiẹ na dọna Islaelivi lẹ die, ‘Yẹn Na Lẹzun wẹ do mi hlan mì dè.’”+ 15  Enẹgodo, Jiwheyẹwhe dọna Mose whladopo dogọ dọmọ: “Nuhe hiẹ na dọna Islaelivi lẹ die, ‘Jehovah, Jiwheyẹwhe tọgbo mìtọn lẹ tọn, yèdọ Jiwheyẹwhe Ablaham tọn,+ Jiwheyẹwhe Isaki tọn+ podọ Jiwheyẹwhe Jakọbu tọn+ wẹ do mi hlan mì dè.’ Enẹ wẹ oyín ṣie kakadoi,+ podọ oyín enẹ wẹ dona nọ yin yiyizan nado flin mi sọn whẹndo de mẹ jẹ devo mẹ. 16  Todin, yì bo bẹ mẹho Islaeli tọn lẹ pli bosọ dọna yé dọ, ‘Jehovah, Jiwheyẹwhe tọgbo mìtọn lẹ tọn ko sọawuhia mi, yèdọ Jiwheyẹwhe Ablaham tọn, Isaki tọn po Jakọbu tọn po, e sọ dọmọ: “Na nugbo tọn, yẹn ko doayi ninọmẹ mìtọn+ po lehe yè to nuyiwa hẹ mì to Egipti do po go. 17  Enẹwutu wẹ yẹn dọ dọ yẹn na de mì sọn oyà+ he mì to jiji to alọ Egiptinu lẹ tọn mẹ lọ mẹ bo na plan mì yì aigba Kenaninu lẹ, Hetinu lẹ, Amolinu lẹ,+ Pelizinu lẹ, Hivinu lẹ po Jẹbusinu lẹ po tọn ji,+ yèdọ aigba de he ji anọ́sin po owín po to sisà te.”’+ 18  “Matin ayihaawe, yé na dotoaina ohó towe,+ bọ hiẹ po mẹho Islaeli tọn lẹ po nasọ yì ahọlu Egipti tọn dè bo nasọ dọna ẹn dọmọ: ‘Jehovah Jiwheyẹwhe Heblu+ lẹ tọn ko dọho hẹ mí. Enẹwutu, jaale bo dike mí ni zingbejizọnlin azán atọ̀n tọn yì danfafa ji, na mí nido sọgan sanvọ́ hlan Jehovah Jiwheyẹwhe mítọn.’+ 19  Ṣigba, yẹn yọnẹn ganji dọ ahọlu Egipti tọn ma na nagbè mì nado yì adavo ewọ yin hinhẹn gánnugánnu nado wàmọ.+ 20  Enẹwutu, yẹn dona dlẹnalọ ṣie tọ́njẹgbonu bo na yí azọ́njiawu he yẹn na wà to aigba lọ ji lẹpo do hò Egipti, bọ to enẹgodo, e na tún mì dote.+ 21  Yẹn nasọ hẹn akọta ehe nado mọ nukundagbe Egiptinu lẹ tọn, podọ whenue mì na dedo, mì ma na yì asigbá-alọgbá gbede pọ́n.+ 22  Yọnnu dopodopo dona biọ kọmẹnu etọn podọ mẹhe tin to owhé etọn gbè núzinzan fataka tọn lẹ, sika tọn lẹ po avọ̀ po bọ mìwlẹ nasọ do yé na visunnu mìtọn lẹ po viyọnnu mìtọn lẹ po; mì nasọ bẹ adọkunnu Egiptinu lẹ tọn yì.”+

Nudọnamẹ Odò Tọn

Kavi “basi sinsẹ̀n hlan.”
Kavi “Jlo.”
Kavi “Yẹn Na Do Dee Hia Nado Yin Nuhe Yẹn Jlo Nado Yin.” Pọ́n Nud. A4.