Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 27:1-21

NUHE E BẸHẸN LẸ

  • Agbà avọ́nunina mimẹ̀ tọn (1-8)

  • Awánu (9-19)

  • Amì miyọ́ngbán-tin tọn (20-21)

27  “Hiẹ na yí owhlẹ akasia tọn do basi agbà de;+ tedidi etọn na yin awagbà* atọ́n podọ gbigblo etọn awagbà atọ́n. Adà ẹnẹ agbà lọ tọn lẹ dona sọzẹn bọ jiyiyi etọn na yin awagbà atọ̀n.+  Hiẹ na basi azò+ lẹ do agosu etọn ẹnẹ lẹ ji; azò lọ lẹ na yin apadewhe agbà lọ tọn, hiẹ nasọ và gànvẹẹ na agbà lọ.+  Hiẹ na basi panu lẹ nado nọ bẹ afín* etọn lẹ sẹ̀, gọna fẹli lẹ, agbán lẹ, ṣivi-fẹ̀nnọ lẹ po miyọ́n-hẹnnú lẹ po, gànvẹẹ wẹ hiẹ na yí do basi nuyizan etọn lẹpo.+  Hiẹ na basi agbájẹ́ de na agbà lọ, yèdọ agbájẹ́ gànvẹẹ tọn, hiẹ nasọ basi alọkẹ gànvẹẹ tọn dopodopo do agosu ẹnẹ lẹ mẹ.  Hiẹ na ze e do agbà lọ homẹ sẹpọ tónu aga tọn etọn bọ agbájẹ́ lọ na yìdo jẹ nudi odaa agbà lọ tọn to homẹ.  Hiẹ na yí owhlẹ akasia tọn do basi opò lẹ na agbà lọ bosọ và gànvẹẹ na yé.  Opò lọ lẹ na yin hinhẹn gbọn alọkẹ lọ lẹ mẹ bọ yé na nọ tin to adà agbà lọ tọn awe lẹ ji to zize whenu.+  Hiẹ na basi agbà lọ taidi apotin owhlẹ tọn he ma tindo nùsu de. E dona yin bibasi kẹdẹdile Ewọ ko do e hia we do to osó lọ ji.+  “Hiẹ na basi awánu+ gòhọtúntún lọ tọn. Na adà hùwaji tọn lọ, yèdọ fie pannukọn hùwaji, awánu lọ na tindo alavọ linlọ̀n dagbedagbe he yin dido lẹdo gòhọtúntún lọ, tedidi etọn to adà dopo mẹ na yin awagbà 100.+ 10  E nasọ tindo dòtin 20 po oslò dodonu tọn gànvẹẹ tọn 20 po. Fataka wẹ yè na yí do basi oplá dòtin lọ lẹ tọn po opò aga tọn* yetọn lẹ po. 11  Avọ̀ he nọ yin dido lẹdo gòhọtúntún lọ, ehe na nọ agewaji lọ lọsu na dite na awagbà 100, gọna dòtin etọn 20 lẹ po oslò dodonu tọn gànvẹẹ tọn etọn 20 lẹ po, gọna oplá fataka tọn lẹ po opò aga tọn* dòtin lọ lẹ tọn po. 12  Avọ̀ he na yin dido do adà whèyihọ tọn gbọn gbigblo awánu lọ tọn ji na yin awagbà 50, gọna dòtin ao po oslò dodonu tọn ao po. 13  Gbigblo awánu lọ tọn to whèzẹtẹn-waji, pànta whèzẹtẹn, na yin awagbà 50. 14  Avọ̀ he na yin dido do adà tintan ji na dite na awagbà 15, gọna dòtin atọ̀n po oslò dodonu tọn atọ̀n po.+ 15  Podọ avọ̀ he yin dido do adà awetọ ji na dite na awagbà 15, gọna dòtin atọ̀n po oslò dodonu tọn atọ̀n po. 16  “Avọ̀* he dite na awagbà 20 na yin dido do họngbo awánu lọ tọn nù, bọ yè na yí sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po do basi i,+ gọna dòtin ẹnẹ po oslò dodonu tọn yetọn ẹnẹ lẹ po.+ 17  Dòtin he lẹdo awánu lọ pé lẹpo na tindo opò aga tọn lẹ po oplá lẹ po he yè yí fataka do basi, ṣigba oslò dodonu tọn yetọn lẹ na yin gànvẹẹ tọn.+ 18  Tedidi awánu lọ tọn na yin awagbà 100,+ gbigblo etọn awagbà 50 podọ jiyiyi etọn awagbà 5, alavọ linlọ̀n dagbedagbe wẹ yè na yí do basi i podọ oslò dodonu tọn etọn lẹ na yin gànvẹẹ tọn. 19  Nuyizan voovo he nọ yin yiyizan nado wadevizọn to gòhọtúntún lọ mẹ lẹpo, gọna opò tlọ́ntlọ́n gòhọ tọn etọn lẹ po opò tlọ́ntlọ́n awánu tọn etọn lẹpo po dona yin gànvẹẹ tọn.+ 20  “Hiẹ na degbena Islaelivi lẹ nado nọ hẹn amì olivie tọn akú wá na miyọ́ngbán lọ lẹ, na miyọ́n lọ lẹ nido to titá to whepoponu.+ 21  To gòhọ opli tọn mẹ, to họmẹgbòvọ̀ he sẹpọ Kunnudenu lọ+ nukọn, Aalọn po visunnu etọn lẹ po na basi tito nado nọ hẹn miyọ́n lọ lẹ do titá sọn whèjai jẹ afọnnu to Jehovah nukọn.+ Osẹ́ndoai he na dẹn-to-aimẹ de wẹ ehe yin na whẹndo yetọn lẹpo, ehe Islaelivi lẹ dona nọ yìn.+

Nudọnamẹ Odò Tọn

Awagbà dopo sọzẹn hẹ cm 44,5. Pọ́n Nud. B14.
Kavi “afín he gọ́ na ojó,” enẹ wẹ, afín he ojó avọ́sinsan lẹ tọn ko hẹn yọ̀n.
Kavi “alọkẹ; okàn” he na blanú.
Kavi “alọkẹ; okàn” he na blanú.
Kavi “Họmẹgbòvọ̀.”