Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 26:1-37

NUHE E BẸHẸN LẸ

  • Gòhọtúntún (1-37)

    • Avọ̀ gòhọ tọn (1-14)

    • Owhlẹ ote tọn po oslò dodonu tọn lẹ po (15-30)

    • Họmẹgbòvọ̀ po avọ̀ họntonu tọn po (31-37)

26  “Hiẹ na yí avọ̀ gòhọ tọn ao, yèdọ alavọ linlọ̀n dagbedagbe, gọna sekan juju, sekan sopẹ́-sinmẹnọ po sekan vẹẹ ṣẹ́ṣẹ́ po do basi gòhọtúntún+ lọ. Hiẹ na kó yẹdide+ kelubimi+ lẹ tọn do yé go.  Avọ̀ gòhọ tọn dopodopo na dite na awagbà* 28 bo gblo na awagbà 4. Avọ̀ gòhọ tọn lọ lẹpo dona sọzẹn.+  Atọ́n to avọ̀ gòhọ lọ tọn lẹ mẹ na yin ṣiṣá dopọ debọdo-dego, podọ atọ́n he pò lẹ lọsu na yin ṣiṣá dopọ ga.  Hiẹ na yí sekan juju do basi ogblà lẹ do tónu na avọ̀ gòhọ tọn tintan to fie e yin ṣiṣá dopọ te, podọ hiẹ na wà nudopolọ do tónu pete na awetọ lọ to fie e na yin ṣiṣá dopọ te.  Hiẹ na basi ogblà 50 do avọ̀ gòhọ tọn tintan go, podọ ogblà 50 do tónu na avọ̀ gòhọ tọn awetọ bọ fie yé yin ṣiṣá dopọ te lọ na pannukọn yede.  Hiẹ na basi oplánú sika tọn 50 bo na yí oplánú lọ lẹ do ṣá avọ̀ gòhọ tọn lọ lẹ dopọ bọ gòhọtúntún lọ na yin dopo.+  “Hiẹ na yí gbọgbọẹ-fún do basi avọ̀+ he na nọ gòhọtúntún lọ ji lẹ. Avọ̀ gòhọ tọn 11 wẹ hiẹ na basi.+  Avọ̀ gòhọ tọn dopodopo na dite na awagbà 30 bo gblo na awagbà 4. Avọ̀ gòhọ tọn 11 lọ lẹpo dona sọzẹn.  Hiẹ na ṣá atọ́n to avọ̀ gòhọ tọn lọ lẹ mẹ dopọ bosọ ṣá avọ̀ gòhọ tọn ṣidopo he pò lẹ dopọ ga, hiẹ nasọ mlán avọ̀ gòhọ tọn ṣidopotọ to gòhọ lọ nukọn. 10  Hiẹ na basi ogblà 50 do tónu na avọ̀ gòhọ tọn tintan, yèdọ dehe to tónu pete, podọ ogblà 50 do tónu na avọ̀ gòhọ tọn he tin to awà awetọ ji, to fie yé yin ṣiṣá dopọ te. 11  Hiẹ na basi oplánú gànvẹẹ tọn 50 bo na plá yé do ogblà lọ lẹ go bo nasọ ṣá avọ̀ gòhọ tọn lọ lẹ dopọ, e nasọ lẹzun dopo. 12  Avọ̀ gòhọ tọn he lán lọ lẹ na yin dido lẹdo gòhọtúntún lọ. Podọ odaa to avọ̀ gòhọ tọn he lán lọ lẹ mẹ na kọnyin gòhọtúntún lọ ji to godo. 13  Podọ pipotọ avọ̀ gòhọ lọ tọn he lán lẹ na yin dido lẹdo gòhọtúntún lọ bọ e na kọnyin e ji na awagbà dopo to adà dopodopo ji nado ṣinyọ́n e ji. 14  “Hiẹ na yí agbò-yú vẹẹ do basi avọ̀ he na ṣinyọ́n gòhọ lọ ji bosọ yí kanlin-yú* devo ṣinyọ́n enẹ lọ ji aga.+ 15  “Hiẹ na yí owhlẹ akasia tọn do basi owhlẹ ote tọn+ lẹ na gòhọtúntún lọ bọ yé dona jlọ.+ 16  Owhlẹ ote tọn lọ lẹ dopodopo na dite na awagbà ao bọ gbigblo etọn na yin awagbà dopo daa. 17  Owhlẹ ote tọn dopodopo na tindo osó* awe-awe to oglọ bọ yé na to apá na yede. Lehe hiẹ na basi owhlẹ ote tọn gòhọtúntún lọ tọn lẹpo do niyẹn. 18  Owhlẹ ote tọn 20 wẹ hiẹ na basi do adà hùwaji tọn gòhọtúntún lọ tọn, pànta hùwaji. 19  “Hiẹ na yí fataka do basi oslò* dodonu tọn+ 40 do oglọ na owhlẹ ote tọn 20 lọ lẹ: oslò dodonu tọn awe wẹ na tin to oglọ na owhlẹ ote tọn dopo he mẹ osó etọn lẹ na biọ, bọ oslò dodonu tọn awe na to oglọ na owhlẹ ote tọn dopodopo na osó yetọn awe-awe lẹ.+ 20  Hiẹ na basi owhlẹ ote tọn 20 na adà awetọ gòhọtúntún lọ tọn, yèdọ adà agewaji tọn 21  podọ oslò fataka tọn 40, yèdọ oslò dodonu tọn awe to owhlẹ ote tọn dopo glọ podọ oslò dodonu tọn awe-awe to oglọ na owhlẹ ote tọn dopodopo. 22  Hiẹ na basi owhlẹ ote tọn ṣidopo na adà gòhọtúntún lọ tọn he pànta whèyihọ.+ 23  Hiẹ na yí owhlẹ ote tọn awe do basi dòtin awe do agosu gòhọtúntún lọ tọn he to godo lẹ mẹ. 24  Yé dona yin awe topọ sọn odò jẹ alọkẹ tintan kọ̀n to aga. Ehe wẹ dona yin bibasi na awe lẹ, bọ yé nado wleawuna dòtin agosu mẹ tọn awe lẹ. 25  Owhlẹ ote tọn ṣinatọ̀n wẹ na yin awuwlena gọna oslò dodonu tọn yetọn 16 lẹ he yè yí fataka do basi, yèdọ oslò awe to oglọ na owhlẹ ote tọn podọ oslò awe-awe to oglọ na owhlẹ ote tọn dopodopo. 26  “Hiẹ na yí owhlẹ akasia tọn do basi dòtin lẹ, yèdọ dòtin atọ́n na owhlẹ ote tọn he to adà tintan gòhọtúntún lọ tọn ji lẹ,+ 27  dòtin atọ́n na owhlẹ ote tọn he to adà awetọ gòhọtúntún lọ tọn ji lẹ, podọ dòtin atọ́n na owhlẹ ote tọn lẹ to adà godo tọn gòhọtúntún lọ tọn he pànta whèyihọ ji. 28  Dòtin ṣẹnṣẹn tọn he gbọn ṣẹnṣẹn na owhlẹ ote tọn lọ lẹ dona dite bo gbòplá. 29  “Hiẹ na và sika na owhlẹ ote tọn lọ lẹ+ bo yí sika do basi alọkẹ yetọn lẹ he mẹ dòtin lọ lẹ na gbọn, hiẹ nasọ và sika na dòtin lọ lẹ. 30  Hiẹ dona basi gòhọtúntún lọ sọgbe hẹ ohia he yin didohia we to osó ji.+ 31  “Hiẹ na yí sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po do basi họmẹgbòvọ̀ de.+ Yẹdide kelubimi lẹ tọn na yin kikó do e go. 32  Hiẹ na plá ẹ do dòtin ẹnẹ akasia tọn he yè và sika na lẹ go. Sika wẹ hiẹ na yí do basi oplá yetọn lẹ. Dòtin lọ lẹ na yin tùntùnte do oslò dodonu tọn ẹnẹ he yè yí fataka do basi lẹ mẹ. 33  Hiẹ na plá họmẹgbòvọ̀ lọ do odò na oplánú lọ lẹ bo nasọ hẹn apotin Kunnudenu tọn lọ+ yì họmẹgbòvọ̀ lọ godo. Họmẹgbòvọ̀ lọ nasọ gbò Fiwiwe lọ+ dovo na Fiwiwe Gbaugbau lọ.+ 34  Hiẹ dona ṣinyọ́n nùsu lọ do apotin Kunnudenu tọn lọ nù to Fiwiwe Gbaugbau lọ. 35  “Hiẹ na ze tafo lọ do họmẹgbòvọ̀ lọ nukọn, bọ miyọ́ngbán-tin+ lọ na pannukọn tafo lọ to adà hùwaji tọn gòhọtúntún lọ tọn; hiẹ nasọ ze tafo lọ do agewaji. 36  Hiẹ na yí sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po do basi avọ̀* he nọ yin dido do họntonu gòhọ lọ tọn.+ 37  Hiẹ na basi dòtin akasia tọn atọ́n na avọ̀* he nọ yin dido do họntonu lọ bo na và sika na yé. Sika wẹ hiẹ na yí do basi oplá yetọn, hiẹ nasọ yí gànvẹẹ do basi oslò dodonu tọn atọ́n na yé.

Nudọnamẹ Odò Tọn

Awagbà dopo sọzẹn hẹ cm 44,5. Pọ́n Nud. B14.
Enẹ wẹ, ayú kanlin he nọ nọ̀ hùmẹ de tọn.
Enẹ wẹ, ofi tlọ́ntlọ́n he nọ yin bibasi do owhlẹ go nado ṣá ẹ do nude go.
Enẹ wẹ, nùvo he nọ yin dide do nuyizan de go he mẹ osó owhlẹ tọn sọgan biọ.
Kavi “họmẹgbòvọ̀.”
Kavi “họmẹgbòvọ̀.”