Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 25:1-40

NUHE E BẸHẸN LẸ

  • Nunina lẹ na gòhọtúntún lọ (1-9)

  • Aki (10-22)

  • Tafo (23-30)

  • Miyọ́ngbán-tin (31-40)

25  Whenẹnu wẹ Jehovah dọna Mose dọmọ:  “Dọna omẹ Islaeli tọn lẹ nado de nunina de dovo na mi; mì ṣinyan nunina ṣie sọn mẹhe ahun yetọn whàn yé nado na lẹpo dè.+  Nunina he mì na kẹalọyi sọn yé dè lẹ die: sika,+ fataka,+ gànvẹẹ,+  sekan juju, sekan sopẹ́-sinmẹnọ,* sekan vẹẹ ṣẹ́ṣẹ́, alavọ dagbedagbe, gbọgbọẹ-fún,  agbò-yú vẹẹ, kanlin-yú,* owhlẹ akasia tọn,+  amì na miyọ́ngbán+ lẹ, balsami* na amì mẹdide tọn+ po nuyọnwan owán gblingblinnọ+ po,  zannu onizi tọn gọna zannu devo he na yin tito do efọdi*+ po apò akọ́nnu tọn*+ lọ po go lẹ.  Yé na basi fiwiwe de na mi bọ yẹn nasọ nọ nọ̀* ṣẹnṣẹn yetọn.+  Mìwlẹ na basi i, yèdọ gòhọtúntún lọ po núzinzan etọn lẹpo po sọgbe hẹ ohia* he yẹn to didohia we pẹpẹ.+ 10  “Yé dona yí owhlẹ akasia tọn do basi apotin de, tedidi etọn na yin awagbà* awe daa, gbigblo etọn awagbà dopo daa podọ jiyiyi etọn awagbà dopo daa.+ 11  Hiẹ nasọ và sika akú na ẹn.+ Hiẹ na và ẹ na ẹn to homẹ po gbonu po, hiẹ nasọ yí aṣọ́donu sika tọn do gbá* tónu etọn lẹdo pé.+ 12  Hiẹ nasọ basi alọkẹ sika tọn ẹnẹ na ẹn bo na tùn yé do aga na afọ etọn ẹnẹ lẹ, yèdọ alọkẹ awe to adà dopo ji podọ alọkẹ awe to adà awetọ ji. 13  Hiẹ nasọ yí owhlẹ akasia tọn do basi opò lẹ bo na và sika na yé.+ 14  Hiẹ nasọ hẹn opò lọ lẹ gbọn alọkẹ he to adà Apotin lọ tọn go lẹ mẹ bọ yé na nọ yin yiyizan nado ze Apotin lọ. 15  Opò lọ lẹ na gbọṣi alọkẹ Apotin lọ tọn lẹ mẹ; yé ma dona nọ yin didesẹ sọn e mẹ.+ 16  Hiẹ na ze Kunnudenu he yẹn na na we lọ do Apotin lọ mẹ.+ 17  “Hiẹ na yí sika akú do basi nùsu de, tedidi etọn na yin awagbà awe daa podọ gbigblo etọn awagbà dopo daa.+ 18  Hiẹ dona yí sika do basi kelubimi awe; hiẹ nasọ tùn yé* do tónu awe nùsu lọ tọn lẹ ji aga.+ 19  Basi kelubimi lọ lẹ do tónu awe lọ lẹ, yèdọ kelubimi dopo to tónu nùsu lọ tọn lẹ dopodopo ji. 20  Kelubimi lọ lẹ na dlẹn awà yetọn awe lẹ hlan aga bo yí yé ṣinyọ́n nùsu lọ ji,+ yé nasọ pannukọn yede. Nukunmẹ kelubimi lọ lẹ tọn na yin lilẹ́ pànta nùsu lọ. 21  Hiẹ na sú nùsu+ lọ do Apotin lọ, podọ Apotin lọ mẹ wẹ hiẹ na ze Kunnudenu he yẹn na na we lọ do. 22  Yẹn na nọ do dee hia we to finẹ bo nasọ dọho hẹ we sọn nùsu lọ ji aga.+ To kelubimi awe he to apotin Kunnudenu lọ tọn ji lẹ ṣẹnṣẹn wẹ yẹn na nọ hẹn gbedide lẹpo he yẹn na na Islaelivi lẹ zun yinyọnẹn hlan we te. 23  “Hiẹ nasọ yí owhlẹ akasia tọn do basi tafo de,+ tedidi etọn na yin awagbà awe, gbigblo etọn awagbà dopo podọ jiyiyi etọn awagbà dopo daa.+ 24  Hiẹ na và sika akú na ẹn bo na yí aṣọ́donu sika tọn do gbá* tónu etọn lẹdo pé. 25  Hiẹ na basi tónu de dego he na gblo sọ alọpahomẹ dopo* lẹdo e pé bo na yí aṣọ́donu sika tọn do gbá* tónu lọ lẹdo pé. 26  Hiẹ na basi alọkẹ sika tọn ẹnẹ na ẹn bo nasọ ze alọkẹ lọ lẹ do agosu ẹnẹ fie afọ ẹnẹ lọ lẹ tin te lẹ go. 27  Alọkẹ lọ lẹ dona sẹpọ tónu lọ nado hẹn opò lọ lẹ he na ze tafo lọ. 28  Hiẹ na yí owhlẹ akasia tọn do basi opò lọ lẹ bo na và sika na yé bo nasọ nọ yí yé do ze tafo lọ. 29  “Hiẹ nasọ basi agbánvla lẹ, kọfo lẹ, tọ̀zẹ́n lẹ po agbán lẹ po, ehe mẹ yé na nọ kọ̀n avọ́nunina nùnù lẹ sọn. Sika akú wẹ hiẹ na yí do basi yé.+ 30  Hiẹ nasọ nọ yí akla sọhia tọn lọ do tafo lọ ji to nukọn ṣie whepoponu.+ 31  “Hiẹ nasọ yí sika akú do basi miyọ́ngbán-tin+ de. Miyọ́ngbán-tin lọ dona yin tùntùn.* Dodonu etọn, gotò etọn, alà etọn lẹ, agó etọn lẹ, osẹ́pò etọn lẹ po osẹ́ etọn lẹ po na zẹ̀ jẹgbonu sọn e go.+ 32  Podọ alà ṣidopo na zẹ̀ jẹgbonu sọn miyọ́ngbán-tin lọ go, alà atọ̀n sọn adà dopo ji podọ alà atọ̀n devo lẹ sọn adà awetọ ji. 33  Agó atọ̀n he taidi vounvoun almọndi tọn lẹ na tin to alà dopodopo go to adà dopo ji bọ osẹ́pò po osẹ́ lọ lẹ po na bọdo yede go, podọ agó atọ̀n he taidi vounvoun almọndi tọn lẹ na tin to adà awetọ ji bọ osẹ́pò po osẹ́ lọ lẹ po nasọ bọdo yede go. Lehe alà ṣidopo lọ lẹ na zẹ̀ jẹgbonu sọn gotò miyọ́ngbán-tin lọ tọn go do niyẹn. 34  Agó ẹnẹ he taidi vounvoun almọndi tọn lẹ, osẹ́pò po osẹ́ lẹ po he bọdo yede go na tin to gotò miyọ́ngbán-tin lọ tọn go. 35  Osẹ́pò de na tin to alà awe tintan he zẹ̀ jẹgbonu sọn gotò lọ go lẹ glọ, osẹ́pò de nasọ tin to alà awe devo he bọdego lẹ glọ, podọ osẹ́pò de na tin to alà awe devo lẹ glọ, na alà ṣidopo he zẹ̀ jẹgbonu sọn gotò lọ go lẹ. 36  Sika akú wẹ na yin yiyizan nado tùn osẹ́pò lọ lẹ,* alà lọ lẹ podọ miyọ́ngbán-tin lọ blebu.+ 37  Miyọ́ngbán ṣinawe wẹ hiẹ na basi do e ji, podọ eyin miyọ́ngbán lọ lẹ yin titá, yé na nọ họ́n do nukọn etọn.+ 38  Miyọ́n-denú etọn po miyọ́n-hẹnnú etọn lẹ po dona yin sika akú.+ 39  Sika akú talẹnti* dopo wẹ na yin yiyizan nado basi miyọ́ngbán-tin lọ po nuyizan ehelẹ po. 40  Hẹn ẹn diun dọ a basi yé sọgbe hẹ ohia* he yin didohia we to osó lọ ji.+

Nudọnamẹ Odò Tọn

Kavi “sekan he yè do sopẹ́ vẹẹ.”
Enẹ wẹ, ayú kanlin he nọ nọ̀ hùmẹ de tọn.
Pọ́n Zẹm.
Pọ́n Zẹm.
Enẹ wẹ, apò he nọ yin kikó he Yẹwhenọ Daho nọ zedo akọ́nnu.
Kavi “nọ basi gòhọtúntún de do.”
Kavi “yẹdide.”
Awagbà dopo sọzẹn hẹ cm 44,5. Pọ́n Nud. B14.
Kavi “hiẹ nasọ kọ̀n sika do.”
Enẹ wẹ, nado yí núwhènú de do wà anazọ́n yetọn.
Kavi “bo na kọ̀n sika do.”
Nudi cm 7,4. Pọ́n Nud. B14.
Kavi “bo na kọ̀n sika do.”
Enẹ wẹ, nado yí núwhènú de do wà anazọ́n etọn.
Enẹ wẹ, nado yí núwhènú de do wà anazọ́n osẹ́pò lọ lẹ tọn.
Talẹnti dopo sọzẹn hẹ kg 34,2. Pọ́n Nud. B14.
Kavi “yẹdide.”