Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 23:1-33

NUHE E BẸHẸN LẸ

  • Nudide whẹdida tọn lẹ na Islaeli (1-19)

    • Nugbodidọ po walọ jijlọ po (1-9)

    • Gbọjẹzan po hùnwhẹ lẹ po (10-19)

  • Anademẹ angẹli de tọn na Islaeli (20-26)

  • Aigba mimá po dogbó lẹ po (27-33)

23  “Hiẹ ma dona hẹn linlin lalo gbayipe.*+ A kọnawudopọ hẹ mẹylankan gbọn kunnu ylankan dide+ dali blo.  Hiẹ ma dona hodo gbẹtọgun nado waylan, hiẹ masọ dona slokọna dodo gbọn kunnu lalo dide dali, na mẹsusu wàmọ* wutu blo.  Hiẹ ma dona homẹnukuntapọn to whẹho he gando wamọnọ de go mẹ.+  “Eyin hiẹ mọ oyìnsú kavi kẹtẹkẹtẹ kẹntọ towe tọn to dindanbu, hiẹ dona plan ẹn yì jo na ẹn.+  Eyin hiẹ mọ kẹtẹkẹtẹ mẹhe gbẹwanna we de tọn jai po agbàn po, hiẹ ma dona gbẹkọ e go bo yì gba. Hiẹ dona gọalọna ẹn nado de agbàn lọ sẹ̀ sọn kanlin lọ ji.+  “Hiẹ ma dona sọtadona whẹdida wamọnọ he to ṣẹnṣẹn mìtọn de tọn to owhẹ̀ nukọn.+  “A sawhẹ* lalo dokọnamẹ blo, a sọ hù homẹvọnọ po dodonọ po blo, na yẹn ma na lá mẹylankan di dodonọ.*+  “Hiẹ ma dona kẹalọyi alọgodo-kuẹ, na alọgodo-kuẹ sọgan yinuwado mẹhe nọ yí nuyọnẹn do dawhẹ lẹ ji bo tlẹ sọgan hẹn gbẹtọ dodonọ nado diọ nudide etọn.+  “Hiẹ ma dona gbidikọna mẹhe to jonọ-gbéji de. Mìwlẹ yọ́n nuhe e zẹẹmẹdo nado yin jonọ,* na mì ko nọ jonọ-gbéji pọ́n to aigba Egipti tọn ji.+ 10  “Hiẹ na do jinukun do aigba towe ji bosọ bẹ sinsẹ́n etọn pli na owhe ṣidopo.+ 11  Ṣigba, to owhe ṣinawetọ mẹ, hiẹ ma dona pọ̀ ẹ, a dona jo e do bọ wamọnọ he tin to omẹ towe lẹ ṣẹnṣẹn lẹ na dù sọn e mẹ, podọ gbekanlin lẹ na dù nuhe yé jodo lẹ. Nuhe hiẹ na nọ wà gando vẹngle po olivie-gle towe po go niyẹn. 12  “Azán ṣidopo wẹ hiẹ na wazọ́n na; ṣigba to azán ṣinawetọ gbè, hiẹ na gbọjẹ sọn tuklajijẹ towe lẹ mẹ, na oyìnsú towe po kẹtẹkẹtẹ towe po nido mọ agbọ́, podọ na visunnu afanumẹ yọnnu towe tọn po mẹhe to jonọ-gbéji lẹ po nido gbọjẹ.+ 13  “Mì dona payi nado nọ wà nuhe yẹn dọna mì lẹpo,+ mì masọ dona nọ ylọ oyín yẹwhe devo lẹ tọn; hiẹ ma dona nọ dọho gando yé go.+ 14  “Whla atọ̀n wẹ hiẹ dona nọ basi hùnwhẹ hlan mi to whemẹwhemẹ.+ 15  Hiẹ dona nọ basi Hùnwhẹ Akla Madotọ́n tọn.+ Azán ṣinawe wẹ a na dù akla madotọ́n na, kẹdẹdile yẹn ko degbe etọn na we do, yèdọ to ojlẹ dide lọ mẹ to osun Abibi*+ tọn mẹ, na to ojlẹ enẹ mẹ wẹ hiẹ tọ́n sọn Egipti. Mẹdepope ma dona sọawuhia to nukọn ṣie asigbá-alọgbá.+ 16  Humọ, hiẹ dona basi Hùnwhẹ Jibẹwawhé* sinsẹ́n bibia tintan tuklajijẹ towe lẹ tọn, yèdọ nuhe hiẹ do dó glemẹ lẹ tọn;+ podọ Hùnwhẹ Nubẹpli tọn* to vivọnu owhe tọn, to whenue hiẹ bẹ kọdetọn tuklajijẹ towe tọn lẹ pli sọn glemẹ.+ 17  Whla atọ̀n wẹ sunnu towe lẹpo dona nọ sọawuhia to Oklunọ nugbo lọ, Jehovah nukọn to whemẹwhemẹ.+ 18  “Hiẹ ma dona yí nudepope he mẹ otọ́n tin te do ohùn he a na yí do sanvọ́ hlan mi mẹ. Ojó he hiẹ na yizan nado basi avọ́sinsan lẹ hlan mi to hùnwhẹ ṣie lẹ whenu ma dona pò jẹ wunkẹngbe. 19  “Hiẹ dona hẹn sinsẹ́n bibia tintan aigba towe tọn lẹ he yin dagbe hugan wá ohọ̀ Jehovah Jiwheyẹwhe towe tọn mẹ.+ “Hiẹ ma dona sọakusìn gbọgbọẹvu de to anọ́sin onọ̀ etọn tọn mẹ.+ 20  “Yẹn to angẹli de dohlan nukọn towe+ nado basi hihọ́na we to aliji podọ nado plan we yì fihe yẹn ko wleawu etọn dai na we.+ 21  Dotoaina ẹn bo setonuna ogbè etọn. A ṣiatẹ sọta ẹ blo, na ewọ ma na jo sẹ́nhẹngba towe lẹ na we,+ na oyín ṣie mẹ wẹ e to nuyiwa te wutu. 22  Ṣigba, eyin hiẹ setonu mlẹnmlẹn na ogbè etọn bosọ wà nuhe yẹn dọ lẹpo, yẹn na gbẹwanna kẹntọ towe lẹ bo na diọnukunsọ mẹhe diọnukunsọ we lẹ. 23  Na angẹli ṣie na jẹnukọnna we bo na plan we yì Amolinu lẹ, Hetinu lẹ, Pelizinu lẹ, Kenaninu lẹ, Hivinu lẹ po Jẹbusinu lẹ po dè, yẹn nasọ sukúndona yé.+ 24  Hiẹ ma na dẹ́ do odò na yẹwhe yetọn lẹ kavi yin linlẹndiọna nado sẹ̀n yé, podọ hiẹ ma dona hodo aṣa yetọn lẹ.+ Kakatimọ, hiẹ dona họ́ yé liai bo gídí dòtin wiwe zannu tọn yetọn lẹ.+ 25  Jehovah Jiwheyẹwhe mìtọn wẹ mì dona sẹ̀n,+ ewọ nasọ dona akla po osin mìtọn po.+ Yẹn nasọ de azọ̀n sẹ̀ sọn ṣẹnṣẹn mìtọn.+ 26  Ohò ma na gble do yọnnu he tin to aigba towe ji lẹ, mọdopolọ yé ma na yin wẹnsinọ,+ yẹn nasọ hẹn ogbẹ̀ towe dite.* 27  “Whẹpo hiẹ nado wá, yé na ko sè gando go e+ bo nasọ jọsi, yẹn na hẹn mẹhe hiẹ na dukosọ hẹ lẹpo biọ bẹwlu mẹ, yẹn nasọ hẹn kẹntọ towe lẹpo ṣíawhàn+ bọ yé na họnyi.* 28  Whẹpo hiẹ nado wá, yẹn na ko hẹn yé tindo numọtolanmẹ flumẹjijẹ* tọn+ bọ Hivinu lẹ, Kenaninu lẹ po Hetinu lẹ po na ko họnyi sọn nukọn towe.+ 29  Yẹn ma na yàn yé sẹ̀ sọn nukọn towe to owhe dopo gblamẹ, na aigba lọ nikaa gbọgbé bọ gbekanlin he na gbleawuna we lẹ na jideji.+ 30  Vudevude wẹ yẹn na to yé yàn sọn nukọn towe kaka hiẹ nado lẹzun sinsẹ́nnọ bo na yí aigba lọ.+ 31  “Yẹn na hẹn dogbó aigba towe tọn gblodeji sọn Ohù Vẹẹ kọ̀n jẹ ohù Filistinu lẹ tọn kọ̀n podọ sọn danfafa ji jẹ Tọ̀sisa*+ kọ̀n; na yẹn na jo tòmẹnu aigba lọ tọn lẹ do alọ mìtọn mẹ, bọ hiẹ nasọ yàn yé sọn nukọn towe.+ 32  Hiẹ ma dona basi alẹnu de hẹ yé kavi hẹ yẹwhe yetọn lẹ.+ 33  Yé ma dona nọ aigba towe ji, na yé nikaa hẹn we waylando do mi. Eyin hiẹ na sẹ̀n yẹwhe yetọn lẹ, e họnwun dọ ehe na yin omọ̀ de na we.”+

Nudọnamẹ Odò Tọn

To paa mẹ, “ma dona kẹalọyi linlin lalo.”
Kavi “na kunnudide lọ gbayipe.”
To paa mẹ, “dọho.”
Kavi “ma na de mẹylankan sọn owhẹ̀ mẹ.”
Kavi “yọ́n gbẹzan (alindọn) jonọ tọn.”
Pọ́n Nud. B15.
E sọ nọ yin yiylọdọ Hùnwhẹ Osẹ lẹ Tọn, kavi Pẹntikọsti.
E sọ nọ yin yiylọdọ Hùnwhẹ Gòhọtúntún Tọn.
Kavi “hẹn sọha azán towe lẹ tọn zun gigọ́.”
Kavi “hẹn kẹntọ towe lẹpo nado dogodo we.”
Kavi vlavo, “obu; sijọsijọ.”
Enẹ wẹ, Euflate.