Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 21:1-36

NUHE E BẸHẸN LẸ

  • Nudide whẹdida tọn lẹ na Islaeli (1-36)

    • Gando afanumẹ Heblu lẹ go (2-11)

    • Gando danuwiwa do hatọ go (12-27)

    • Gando kanlin lẹ go (28-36)

21  “Nudide whẹdida tọn he hiẹ na hẹn zun yinyọnẹn na yé+ lẹ die:  “Eyin hiẹ họ̀ afanumẹ sunnu Heblu de,+ ewọ na sẹ̀n we di afanumẹ na owhe ṣidopo, ṣigba to owhe ṣinawetọ mẹ, ewọ na jẹ mẹdekannu ma suahọ depope.+  Eyin ewọ kẹdẹ wẹ wá, e nasọ yì edeṣo. Eyin e tindo asi, asi etọn dona yì hẹ ẹ ga.  Eyin klunọ etọn na ẹn asi bọ yọnnu lọ ji visunnu lẹ kavi viyọnnu lẹ, yọnnu lọ po ovi etọn lẹ po na lẹzun klunọ etọn tọn bọ ewọ na yì edeṣo.+  Amọ́, eyin afanumẹ lọ tẹkudeji bo dọ, ‘Yẹn yiwanna klunọ ṣie, asi ṣie po ovi ṣie lẹ po; enẹwutu yẹn ma jlo na yì,’+  klunọ etọn na hẹn ẹn wá Jiwheyẹwhe nugbo lọ nukọn. Ewọ nasọ plan ẹn wá ohọ̀n kavi dòtin ohọ̀n tọn kọ̀n, bo na yí nútọ́nnú do tọ́n otó etọn bọ ewọ na lẹzun afanumẹ etọn kakadoi.  “Eyin sunnu de sà viyọnnu etọn taidi afanumẹ, viyọnnu lọ ma na jẹ mẹdekannu dile e nọ yindo na afanumẹ sunnu lẹ.  Eyin klunọ etọn ma yiwanna ẹn bo ma yí i do basi asimọwhlá, ṣigba bo jlo dọ ni yin hihọ̀ gbọn mẹdevo dali,* ewọ ma tindo jlọjẹ nado sà ẹ na jonọ lẹ gba, na e ko yinuwa hẹ ẹ po oklọ po wutu.  Eyin e yí i na visunnu etọn, e dona na ẹn jlọjẹ viyọnnu tọn lẹ. 10  Eyin e dà asi devo, núdùdù, avọ̀ po jlọjẹ alọwle tọn+ asi tintan lọ tọn po ma dona depò. 11  Eyin ewọ ma na ẹn onú atọ̀n ehelẹ, whenẹnu yọnnu lọ sọgan yì ma suahọ depope. 12  “Mẹdepope he linú mẹdevo bọ e kú dona yin hùhù.+ 13  Ṣigba, eyin ewọ ma wàmọ sọn ojlo mẹ, bọ Jiwheyẹwhe nugbo lọ dike bọ e jọ, yẹn na de fide he ewọ sọgan họnyi+ na mì. 14  Eyin mẹde gblehomẹ sinsinyẹn do gbẹtọ hatọ etọn go bo hù i sọn ojlo mẹ wá,+ mẹlọ dona kú, eyin etlẹ biọ dọ yè ni yì dọ̀n ẹn sọn agbà ṣie kọ̀n.+ 15  Mẹhe linú otọ́ etọn kavi onọ̀ etọn dona yin hùhù.+ 16  “Eyin mẹde fìn gbẹtọ+ bo sà ẹ kavi yè mọ ẹn to alọ etọn mẹ,+ e dona yin hùhù.+ 17  “Mẹdepope he donù* otọ́ etọn kavi onọ̀ etọn dona yin hùhù.+ 18  “Nuhe na jọ die eyin whẹgbè de wá aimẹ bọ mẹde dlan zannu do gbẹtọ hatọ etọn kavi lì akotokún in* bọ e ma kú, ṣigba bo yin ginglọndo adọzan ji: 19  Eyin ewọ penugo nado fọ́n bo zinzọnlin pé po opò po, whenẹnu mẹhe linú in lọ ma na yin yasana. Ewọ na suahọ whenu he mẹhe gbleawu lọ hẹngu sọn azọ́n etọn kọ̀n tọn kakajẹ whenue azọ̀n etọn na gbọ mlẹnmlẹn. 20  “Eyin mẹde lì opò afanumẹ sunnu kavi afanumẹ yọnnu etọn bọ e kú gbọn alọ etọn mẹ, yè dona víhlọ̀n+ etọn. 21  Ṣigba, eyin ewọ nọgbẹ̀ na azán dopo kavi awe dogọ, yè ma na víhlọ̀n etọn, na mẹhe klunọ etọn yí akuẹ do họ̀ de wẹ ewọ. 22  “Eyin mẹde to ahidi hẹ mẹdevo bọ yé gbleawu yọnnu hohonọ de bọ e jivi azán mapemape,*+ ṣigba bọ awugble lọ ma hẹn okú wá,* mẹhe gbleawunamẹ lọ dona suahọ he asu yọnnu lọ tọn gbò na ẹn; podọ ewọ dona sú i gbọn alọ whẹdatọ lẹ tọn mẹ.+ 23  Ṣigba, eyin awugble lọ hẹn okú wá, whenẹnu hiẹ dona yí ogbẹ̀ na ogbẹ̀,*+ 24  nukun na nukun, adú na adú, alọ na alọ, afọ na afọ,+ 25  apà na apà, awugble na awugble, akotokún na akotokún. 26  “Eyin mẹde linú nukun na afanumẹ sunnu kavi afanumẹ yọnnu etọn bọ nukun lọ tọ́n, e na jo afanumẹ lọ vọnu taidi ahọsumẹ de na nukun etọn.+ 27  Eyin e linú adú na afanumẹ sunnu kavi afanumẹ yọnnu etọn bọ adú lọ sún, e na jo afanumẹ lọ vọnu taidi ahọsumẹ de na adú etọn. 28  “Eyin oyìnsú de sọ́ azò sunnu de kavi yọnnu de bọ e kú, oyìnsú lọ dona yin zannu dlan do hù+ bọ olàn etọn ma na yin dùdù; ṣigba klunọ oyìnsú lọ tọn ma na yin yasana. 29  Amọ́, eyin aṣa oyìnsú lọ tọn wẹ e yin nado nọ sọ́ azò mẹ bọ klunọ etọn ko yin avase na, bọ e ma glọn ẹn, eyin oyìnsú lọ wá hù sunnu kavi yọnnu de, oyìnsú lọ na yin zannu dlan do hù podọ klunọ etọn lọsu dona yin hùhù ga. 30  Eyin ofligọ-kuẹ* de yin bibiọ to e si, e dona sú mẹfligọ-kuẹ lọ na ogbẹ̀* etọn sọgbe hẹ nuhe na yin bibiọ to e si lẹpo. 31  Vlavo visunnu de kavi viyọnnu de wẹ e sọ́ azò, nuhe na yin wiwà hẹ klunọ oyìnsú lọ tọn dona sọgbe hẹ nudide whẹdida tọn lọ. 32  Eyin afanumẹ sunnu kavi afanumẹ yọnnu de wẹ oyìnsú lọ sọ́ azò, klunọ oyìnsú lọ tọn na na ṣekẹli* 30 klunọ afanumẹ lọ tọn bọ oyìnsú lọ na yin zannu dlan do hù. 33  “Eyin mẹde hùnnú sọn odò de nù kavi kùn odò de bo ma ṣinyọnnudo e bọ oyìnsú kavi kẹtẹkẹtẹ de jẹ e mẹ, 34  mẹhe tindo odò lọ wẹ na suahọ etọn.+ Ewọ na suahọ lọ na klunọ kanlin lọ tọn bọ kanlin kúkú lọ nasọ lẹzun etọn. 35  Eyin oyìnsú mẹde tọn gbleawu oyìnsú mẹdevo tọn bọ e kú, whenẹnu yé dona sà oyìnsú gbẹ̀te lọ bo má akuẹ etọn; yé nasọ má kanlin kúkú lọ. 36  Kavi eyin oyìnsú de ko yin yinyọnẹn nado nọ sọ́ azò mẹ bọ klunọ etọn ma glọn ẹn, e dona yí oyìnsú do suahọ oyìnsú tọn podọ kanlin kúkú lọ na lẹzun etọn.

Nudọnamẹ Odò Tọn

To paa mẹ, “ni yin fifligọ.”
Kavi “hodẹ̀do.”
Kavi vlavo, “lì azọ́nwanu in.”
To paa mẹ, “bọ ovi etọn lẹ tọ́njẹgbonu.”
Kavi “ma sinyẹn.”
Kavi “alindọn na alindọn.”
Kavi “vọjlado.”
Kavi “alindọn.”
Ṣekẹli dopo sọzẹn hẹ g 11,4. Pọ́n Nud. B14.