Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 2:1-25

NUHE E BẸHẸN LẸ

  • Mose yin jiji (1-4)

  • Viyọnnu Falo tọn yí Mose di ovi (5-10)

  • Mose họnyi Midiani bo dà Zipola (11-22)

  • Jiwheyẹwhe sè hunwinwẹn Islaeli tọn (23-25)

2  To ojlẹ enẹ mẹ, dawe de sọn kúnkan Levi tọn mẹ dà viyọnnu Levi tọn de.+  Yọnnu lọ sọ mọhò bo ji visunnu de. Whenuena e mọdọ ovi lọ yọnwhanpẹ taun, e whlá ẹ na osun atọ̀n.+  To whenue ewọ masọ sọgan whlá ẹ ba,+ e yí ohà* he yè yí ofán papilus tọn do lọ̀n de bo yí osẹ̀n pinpẹn do tlẹ́ ẹ bosọ ze ovi lọ do e mẹ bo ze e yì do ofánkan lẹ ṣẹnṣẹn to Tọ̀sisa Nile tọn tó.  Ṣigba, nọviyọnnu etọn+ nọte to olá nado pọ́n nuhe na jọ do e go.  Whenue viyọnnu Falo tọn jẹte wá nado lawu to Tọ̀sisa Nile tọn mẹ, deviyọnnu etọn lẹ to zọnlinzin gbọn Nile lọ tó. E sọ mọ ohà lọ hlan to ofánkan lẹ ṣẹnṣẹn. To afọdopolọji, e do afanumẹ yọnnu etọn hlan nado yì ze e.+  To whenue e hùn in, e mọ visunnu lọ bọ e to avivi. Onú ovi lọ tọn sọ wàlẹblanuna ẹn, ṣigba e dọmọ: “Dopo to ovi Heblu lẹ tọn lẹ mẹ die.”  Nọviyọnnu etọn sọ dọna viyọnnu Falo tọn dọmọ: “Be yẹn sọgan yì ylọ yọnnu nukunpedomẹgotọ de wá sọn Heblu lẹ mẹ nado penukundo ovi lọ go na we ya?”  Viyọnnu Falo tọn sọ dọna ẹn dọmọ: “Yì!” To afọdopolọji, viyọnnu lọ yì bosọ ylọ onọ̀ ovi lọ tọn+ wá.  Viyọnnu Falo tọn sọ dọna ẹn dọmọ: “Ze ovi ehe bo penukundo e go na mi, yẹn nasọ suahọ we.” Enẹwutu, nawe lọ ze ovi lọ bo penukundo e go. 10  To whenuena ovi lọ whẹ́n, e plan ẹn wá na viyọnnu Falo tọn bọ e sọ lẹzun visunnu etọn.+ E sọ ylọ oyín etọn dọ Mose* bo dọmọ: “Na osin mẹ wẹ yẹn ze e sọn wutu.”+ 11  Todin, to whenuena Mose ko whẹ́n mẹho,* e disa yì nọvisunnu etọn lẹ dè nado pọ́n lehe yè to hinhẹn yé gánnugánnu nado wazọ́n sinsinyẹn do,+ e sọ mọ bọ Egiptinu de to Heblu de hò, yèdọ dopo to nọvisunnu etọn lẹ mẹ. 12  To whenue e pọ́n adusi po amiyọn po bo ma mọ mẹde, e hù Egiptinu lọ bo whlá ẹ do okọ́ glọ.+ 13  Ṣigba to aihọngbè, e sọ tọ́nyi bo mọ sunnu Heblu awe to avùnho. Enẹwutu, e dọna mẹhe hùwhẹ lọ dọmọ: “Naegbọn hiẹ do to nuli nọvisunnu towe?”+ 14  E sọ dọmọ: “Mẹnu wẹ de we taidi ahọvi podọ whẹdatọ do mí ji? A jlo na hù mi dile a hù Egiptinu lọ do wẹ ya?”+ Mose sọ dibu bo dọmọ: “E họnwun dọ nuhe jọ lọ ko zun yinyọnẹn!” 15  Enẹgodo, Falo sè nujijọ lọ bo tẹnpọn nado hù Mose; ṣigba Mose họnyi sọn Falo dè bo yì nado nọ nọ̀ aigba Midiani tọn ji,+ e sọ sinai to dotọ̀ de tó. 16  Yẹwhenọ Midiani tọn+ sọ tindo viyọnnu ṣinawe, yé sọ wá nado dọ̀n osin do otò lẹ mẹ na lẹngbọpa otọ́ yetọn tọn. 17  Ṣigba, lẹngbọhọtọ lọ lẹ wá bo yàn yé, dile e ko yin aṣa yetọn do. Whenẹnu wẹ Mose fọ́n bo gọalọna* viyọnnu lọ lẹ bosọ na osin lẹngbọ yetọn lẹ. 18  Whenue yé wá whégbè to Leuẹli*+ otọ́ yetọn dè, e paṣa ẹ bọ e dọmọ: “Naegbọn mì do yawu wá whégbè domọ to egbé?” 19  Yé sọ gblọn dọmọ: “Dawe Egiptinu de+ wẹ whlẹn mí sọn lẹngbọhọtọ lọ lẹ si bo tlẹ dọ̀n osin na mí bosọ na osin lẹngbọ mítọn lẹ.” 20  E sọ dọna viyọnnu etọn lẹ dọmọ: “Bọ fie wẹ dawe lọ te? Naegbọn mì jo e do dọ́n? Mì ylọ ẹ, na e ni wá dùnú hẹ mí.” 21  Enẹgodo, Mose yigbe nado nọ dawe lọ dè, e sọ yí Zipola+ viyọnnu etọn na Mose taidi asi. 22  To nukọn mẹ, Zipola ji visunnu de bọ Mose ylọ oyín etọn dọ Gẹlṣọmi,*+ na e dọ dọ, “N’ko lẹzun mẹhe to jonọ-gbéji de to aigba jonọ tọn de ji.”+ 23  To ojlẹ dindẹn de* godo, ahọlu Egipti tọn kú,+ ṣigba Islaelivi lẹ gbẹ́ pò to hunwẹn na afanumẹ-yinyin wutu, yé sọ nọ to lewu po ogbè lélé po, bọ awhágbe yetọn na alọgọ, na afanumẹ-yinyin wutu nọ to jihẹ yì Jiwheyẹwhe nugbo lọ dè mapote.+ 24  To ojlẹ vude godo, Jiwheyẹwhe sè hunwinwẹn yetọn,+ Jiwheyẹwhe sọ flin alẹnu etọn hẹ Ablaham, Isaki po Jakọbu po.+ 25  Enẹwutu, Jiwheyẹwhe lẹ́ ayidonugo etọn hlan Islaelivi lẹ; Jiwheyẹwhe sọ doayi ninọmẹ yetọn go.

Nudọnamẹ Odò Tọn

Kavi “aki; apotin.”
Zẹẹmẹdo “Mẹhe Yin Dindọn Jẹgbonu,” enẹ wẹ, mẹhe yin whinwhlẹn sọn osin mẹ.
Kavi “dile Mose to lilẹzun huhlọnnọ.”
Kavi “yiavùnlọna.”
Enẹ wẹ, Jẹtlo.
Zẹẹmẹdo “Mẹhe to Jonọ-Gbéji de to Finẹ.”
To paa mẹ, “To azán susu.”