Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 18:1-27

NUHE E BẸHẸN LẸ

  • Jẹtlo po Zipola po wá (1-12)

  • Ayinamẹ Jẹtlo tọn nado de whẹdatọ lẹ (13-27)

18  Todin, Jẹtlo he yin yẹwhenọ Midiani tọn, asi-tọ́ Mose tọn+ sè nulẹpo he Jiwheyẹwhe ko wà na Mose podọ na Islaeli omẹ etọn lẹ, yèdọ gando lehe Jehovah hẹn Islaelivi lẹ tọ́n sọn Egipti do go.+  Jẹtlo, asi-tọ́ Mose tọn dè wẹ Mose do asi etọn Zipola hlan nado yì nọ,  gọna visunnu etọn awe lẹ.+ Dopo to visunnu lọ lẹ mẹ nọ yin Gẹlṣọmi,*+ na Mose dọ dọ, “N’ko lẹzun mẹhe to jonọ-gbéji de to aigba jonọ tọn de ji,”  podọ visunnu awetọ nọ yin Eliezẹli,* na e dọ dọ, “Jiwheyẹwhe otọ́ ṣie tọn wẹ alọgọtọ ṣie, mẹhe ko whlẹn mi gán sọn ohí Falo tọn nù.”+  Jẹtlo, asi-tọ́ Mose tọn gọna asi po visunnu Mose tọn lẹ po wá Mose dè to danfafa ji fie ewọ whèsla do to osó Jiwheyẹwhe nugbo lọ tọn ji.+  Ewọ sọ dowẹn hlan Mose dọmọ: “Yẹn Jẹtlo, asi-tọ́ towe+ gọna asi towe po visunnu towe awe lẹ po ja dè we.”  To afọdopolọji, Mose tọ́n nado yì pé asi-tọ́ etọn bo dẹ́ do odò bosọ donùnùgo na ẹn. Dopodopo yetọn sọ kàn dagbemẹninọ yedelẹ tọn biọ, enẹgodo yé yì gòhọ mẹ.  Mose sọ dọ nuhe Jehovah ko wà hẹ Falo po Egipti po do ota Islaelivi lẹ tọn mẹ+ lẹpo na asi-tọ́ etọn, podọ avùnnukundiọsọmẹnu he yé ko pehẹ to aliji lẹpo+ gọna lehe Jehovah ko whlẹn yé do.  Jẹtlo sọ jaya na dagbe he Jehovah ko wà na Islaeli gbọn whinwhlẹn yé sọn Egipti* dali. 10  Whenẹnu, Jẹtlo dọmọ: “Opẹ́ wẹ na Jehovah, mẹhe ko whlẹn mì sọn Egipti podọ sọn alọ Falo tọn mẹ bosọ whlẹn akọta lọ sọn kọgbidinamẹ Egipti tọn glọ. 11  Todin, yẹn yọnẹn dọ Jehovah klohugan yẹwhe lẹpo+ na nuhe e ko wà hẹ mẹhe gbọn sakla dali diọnukunsọ omẹ etọn lẹ wutu.” 12  Whenẹnu wẹ Jẹtlo, asi-tọ́ Mose tọn hẹn avọ́nunina mimẹ̀ po avọ́sannu lẹ po wá na Jiwheyẹwhe, Aalọn po mẹho Islaeli tọn lẹpo po sọ wá nado dùnú hẹ asi-tọ́ Mose tọn to Jiwheyẹwhe nugbo lọ nukọn. 13  To wunkẹngbe, dile e ko yin aṣa Mose tọn do, e sinai nado dawhẹna mẹlọ lẹ, yé sọ to ote to nukọn etọn sọn afọnnu kakajẹ whèjai. 14  To whenue asi-tọ́ Mose tọn mọ nuhe wà e te do akọta lọ tamẹ lẹpo, e dọmọ: “Etẹ die he a to wiwà na gbẹtọ lọ lẹ? Naegbọn a do nọ sinai tofi hiẹ ṣo bọ mẹlọ lẹpo nọ to ote to nukọn towe sọn afọnnu jẹ whèjai?” 15  Mose sọ dọna asi-tọ́ etọn dọmọ: “Na mẹlọ lẹ nọ to dè e wá mapote nado sè sọn Jiwheyẹwhe dè wutu wẹ. 16  Eyin whẹho de fọ́n, e nọ yin hinhẹnwa dè e podọ yẹn dona dawhẹ to omẹ awe ṣẹnṣẹn, yẹn sọ nọ hẹn nudide Jiwheyẹwhe tọn po osẹ́n etọn lẹ po zun yinyọnẹn.”+ 17  Asi-tọ́ Mose tọn sọ dọna ẹn dọmọ: “Nuhe wà a te ma yọ́n. 18  E họnwun dọ agbọ́ na pé hiẹ po mẹhe to dè we ehelẹ po, na agbàn lọ ko klo gbau na we nado hẹn, podọ hiẹ ṣo ma sọgan hẹn ẹn. 19  Todin, dotoaina mi. Yẹn na na we ayinamẹ, podọ Jiwheyẹwhe nasọ tin hẹ we.+ Hiẹ na nọ yinuwa taidi nukunmọnu na mẹlọ lẹ to Jiwheyẹwhe nugbo lọ nukọn,+ hiẹ nasọ nọ hẹn whẹho lẹ wá Jiwheyẹwhe nugbo lọ dè.+ 20  Hiẹ nasọ nọ na avase yé gando aṣẹdai po osẹ́n lẹ po go,+ bo nasọ nọ hẹn lehe yé na nọ zinzọnlin do po azọ́n he yé dona nọ wà lẹ po zun yinyọnẹn na yé. 21  Amọ́, hiẹ dona ṣinyan sunnu nugopetọ+ he nọ dibusi Jiwheyẹwhe lẹ sọn gbẹtọ lẹ mẹ, sunnu he go yè sọgan dejido lẹ he gbẹwanna ale mawadodo tọn,+ bo de omẹ ehelẹ taidi ogán do omẹ fọtọ́n lẹ, omẹ kanweko lẹ, omẹ kandeao lẹ ji podọ do omẹ ao lẹ ji.+ 22  Yé na nọ dawhẹna gbẹtọ lẹ eyin whẹho lẹ fọ́n,* yé nasọ nọ hẹn whẹho sinsinyẹn lẹpo wá dè we,+ ṣigba yé na nọ penukundo whẹho flinflin lẹpo go. Hẹn ẹn bọawuna dewe gbọn agbàn lọ mimá hẹ yé+ dali. 23  Eyin hiẹ wà ehe, bọ Jiwheyẹwhe sọ nọgodona, hiẹ na penugo nado hẹn agbàn lọ bọ mẹlẹpo nasọ nọ lẹkọyi owhé yetọn lẹ gbè po pekọ po.” 24  To afọdopolọji, Mose dotoaina asi-tọ́ etọn bo wà nuhe e dọ lẹpo. 25  Mose sọ de sunnu nugopetọ lẹ sọn Islaelivi lẹpo mẹ bo de yé di ogán do gbẹtọ lọ lẹ ji, yèdọ do omẹ fọtọ́n lẹ, omẹ kanweko lẹ, omẹ kandeao lẹ ji podọ do omẹ ao lẹ po ji. 26  Yé sọ nọ dawhẹna mẹlọ lẹ to whenue whẹho lẹ fọ́n. Whẹho sinsinyẹn lẹ wẹ yé nọ hẹnwa Mose dè,+ ṣigba bo nọ penukundo whẹho flinflin lẹpo go. 27  Enẹgodo, Mose yìn asi-tọ́ etọn jẹ aliji,+ bọ ewọ wleali dedo otò etọn mẹ.

Nudọnamẹ Odò Tọn

Zẹẹmẹdo “Mẹhe to Jonọ-Gbéji de to Finẹ.”
Zẹẹmẹdo “Jiwheyẹwhe Ṣie Wẹ Alọgọtọ.”
To paa mẹ, “sọn alọ Egipti tọn mẹ.”
To paa mẹ, “to ojlẹ lẹpo mẹ.”