Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 16:1-36

NUHE E BẸHẸN LẸ

  • Yé hlunnudọ gando núdùdù go (1-3)

  • Jehovah sè nuhlundọ yetọn (4-12)

  • Asọkle po manna po yin nina yé (13-21)

  • Manna ma tin to Gbọjẹzangbe (22-30)

  • Manna yin sisẹdo di nuflinmẹ (31-36)

16  Whenue Islaelivi lẹpo sẹtẹn sọn Elimi, yé wá jẹ danfafa Sini tọn ji,+ ehe tin to Elimi po Sinai po ṣẹnṣẹn to azán 15tọ osun awetọ tọn sọn whenue yé ko tọ́n sọn Egipti godo.  Islaelivi lẹpo sọ jẹ nuhlundọ ji gando Mose po Aalọn po go to danfafa lọ ji.+  Islaelivi lẹ sọ to didọna yé dọmọ: “E na ko pọnte na mí nado kú to alọ Jehovah tọn mẹ to aigba Egipti tọn ji to whenue mí nọ sinai to olàn-zẹ́n lẹ kọ̀n+ bosọ nọ dùnú gọ́ho. Todin, mìwlẹ ko plan mí wá danfafa ehe ji nado yí huvẹ do hù gbẹtọgun ehe pete.”+  Whenẹnu wẹ Jehovah dọna Mose dọmọ: “Yẹn na hẹn núdùdù ja kọnyinai na mì sọn olọn,+ podọ mẹdopodopo dona tọ́njẹgbonu nado ṣinyan ehe na pé e to azán dopodopo ji,+ na yẹn nido tẹ́n yé pọ́n nado yọnẹn eyin yé na yìn osẹ́n ṣie kavi lala.+  Ṣigba, to azán ṣidopotọ gbè,+ to whenue yé na to awuwlena nuhe yé ko ṣinyan pli, e dona yin donu awe dehe yé ko nọ bẹpli to azán diẹ lẹ dopodopo ji tọn.”+  Enẹwutu, Mose po Aalọn po dọna Islaelivi lẹpo dọmọ: “To whèjai, mìwlẹ na yọnẹn hezeheze dọ Jehovah wẹ hẹn mì tọ́n sọn aigba Egipti tọn ji.+  To afọnnu, mì na mọ gigo Jehovah tọn, na Jehovah ko sè nuhlundọ mìtọn sọta ẹ. Mẹnu wẹ míwlẹ yin, bọ mì nado hlunnudọ do mí go?”  Mose sọ yidogọ dọmọ: “To whenue Jehovah na na mì olàn nado dù to whèjai bo nasọ na mì akla nado dù gọ́ho to afọnnu, mìwlẹ na mọdọ Jehovah ko sè nuhlundọ mìtọn sọta ewọ. Ṣigba, mẹnu wẹ míwlẹ yin? Mì ma to nuhlundọ sọta míwlẹ gba, amọ́ sọta Jehovah.”+  Enẹgodo, Mose dọna Aalọn dọmọ: “Dọna Islaelivi lẹpo dọ, ‘Mì sẹwá Jehovah nukọn, na ewọ ko sè nuhlundọ mìtọn.’”+ 10  Tlolo he Aalọn dọhona Islaelivi lẹpo, yé lilẹ́ bo pannukọn danfafa lọ, podọ pọ́n! gigo Jehovah tọn sọawuhia to aslọ lọ mẹ.+ 11  Jehovah sọ dọna Mose dogọ dọmọ: 12  “Yẹn ko sè nuhlundọ Islaelivi lẹ tọn.+ Dọna yé dọ, ‘To whèjai plẹplẹ,* mì na dù olàn podọ to afọnnu mì na dù akla gọ́ho,+ mìwlẹ nasọ yọnẹn hezeheze dọ yẹn wẹ Jehovah Jiwheyẹwhe mìtọn.’”+ 13  Enẹwutu, to whèjai enẹ, asọkle lẹ wá bo gọ́ osla lọ mẹ,+ podọ ahun ko ja lẹdo osla lọ pé to afọnnu. 14  To whenue ahun lọ hú, onú dagbedagbe he taidi osin-agó lẹ sọawuhia to danfafa lọ nukunmẹ,+ bo to wọ́dọ́wọ́dọ́ taidi ahun to kọmẹ. 15  To whenue Islaelivi lẹ mọ onú ehelẹ, yé jẹ didọna ode awetọ ji dọ, “Etẹ die?” na yé ma yọ́n nuhe e yin wutu. Mose sọ dọna yé dọmọ: “Akla he Jehovah na mì nado dù wẹ.+ 16  Nuhe Jehovah degbe etọn die, ‘Mẹdopodopo dona bẹ dehe e sọgan dù pli. Ojlẹnu omẹli* tọn+ wẹ mì na yí do jlẹ na mẹdopodopo sọgbe hẹ sọha mẹhe* tin to gòhọ mìtọn mẹ tọn.’” 17  Islaelivi lẹ sọ jẹ mọwà ji; yé sọ nọ yì ṣinyan pli, mẹdelẹ nọ bẹ susu pli bọ mẹdevo lẹ nọ bẹ vude pli. 18  Eyin yé yí omẹli do jlẹ, mẹhe bẹ susu pli ma nọ tindo lánkan podọ mẹhe bẹ vude pli tọn ma nọ whè hú.+ Mẹdopodopo nọ bẹpli sọgbe hẹ nuhe e na dù. 19  Mose sọ dọna yé dọmọ: “Mẹdepope ma dona pò depope dai jẹ afọnnu.”+ 20  Ṣigba, yé ma dotoaina Mose. Eyin mẹde pò e dai jẹ afọnnu, e nọ jiwé bo nọ lunwán, Mose sọ nọ gblehomẹ do yé go. 21  Yé sọ nọ ṣinyan to aihọngbè aihọngbè, mẹdopodopo sọgbe hẹ nuhe e sọgan dù. Eyin owhè hùn, e nọ yọ́. 22  To azán ṣidopotọ gbè, yé ṣinyan donu awe etọn,+ yèdọ ojlẹnu omẹli tọn awe na mẹdopodopo. Enẹwutu, ahọvi agun pipli lọ tọn lẹpo wá bo dọ ẹ na Mose. 23  To whenẹnu, e dọna yé dọmọ: “Nuhe Jehovah ko dọ niyẹn. Azán gbọjẹ tọn* wẹ osọ na yin na mì, yèdọ gbọjẹzan wiwe de hlan Jehovah.+ Mì hì nuhe mì dona hì lẹ podọ mì sọakusìn nuhe mì dona sọakusìn lẹ;+ enẹgodo mì na bẹ dehe pò lẹ pli bosọ sẹ̀ yé do kakajẹ afọnnu.” 24  Enẹwutu, yé sẹ̀ yé do jẹ afọnnu kẹdẹdile Mose ko degbe etọn na yé do bọ e ma lunwán mọjanwẹ e masọ jiwé do niyẹn. 25  Enẹgodo, Mose dọmọ: “Mì dù i to egbé, na gbọjẹzan de wẹ egbé yin hlan Jehovah. To egbé, mì ma na mọ yé to kọmẹ. 26  Azán ṣidopo wẹ mì na nọ ṣinyan na, ṣigba to azán ṣinawetọ gbè, yèdọ to Gbọjẹzangbe,+ depope ma na tin.” 27  Etomọṣo, delẹ to gbẹtọ lọ lẹ mẹ sọ tọ́nyi nado yì ṣinyan to azán ṣinawetọ gbè, amọ́ yé ma mọ depope ṣinyan. 28  Enẹwutu, Jehovah dọna Mose dọmọ: “Nawẹ e na dẹnsọ bọ mìwlẹ na gbẹ́ pò to gbigbẹ́ nado setonuna gbedide ṣie lẹ po osẹ́n ṣie lẹ po?+ 29  Mì hẹn do ayiha mẹ dọ Jehovah ko na mì Gbọjẹzan+ lọ. Enẹwutu wẹ e do nọ na mì núdùdù azán awe tọn to azán ṣidopotọ gbè. Mẹdopodopo dona gbọṣi fihe e nọ nọ̀; mẹdepope ma dona tọ́n sọn lẹdo etọn mẹ to azán ṣinawetọ gbè.” 30  Enẹwutu, gbẹtọ lọ lẹ yìn Gbọjẹzan lọ* to azán ṣinawetọ gbè.+ 31  Omẹ Islaeli tọn lẹ sọ ylọ akla lọ dọ “manna.”* E taidi okún wewe pẹvi de* bosọ vivi taidi akla hìhì plẹ́bẹ́ owínnọ.+ 32  Mose sọ dọmọ: “Nuhe Jehovah ko degbe etọn die, ‘Jlẹ omẹli etọn dopo bo sẹ̀ ẹ do sọn whẹndo de ji jẹ whẹndo de ji,+ na yé nido nọ mọ akla he yẹn na mì to danfafa ji to whenue yẹn plan mì sọn aigba Egipti tọn ji.’” 33  Enẹwutu, Mose dọna Aalọn dọmọ: “Ze ozẹ́n de bo jlẹ manna omẹli dopo do e mẹ bosọ ze e do Jehovah nukọn, na e nido yin sisẹdo sọn whẹndo de ji jẹ whẹndo de ji.”+ 34  Kẹdẹdile Jehovah ko degbe etọn na Mose do, Aalọn ze e do apotin vonọtaun*+ lọ nukọn, na e nido yin whiwhla dai. 35  Islaelivi lẹ sọ dù manna na owhe 40,+ kakajẹ whenue yé jẹ aigba he ji gbẹtọ lẹ nọ nọ̀.+ Manna wẹ yé nọ dù kakajẹ whenue yé wá dogbó aigba Kenani tọn ji.+ 36  Podọ omẹli dopo yin mado-ao ojlẹnu efa tọn dopo.*

Nudọnamẹ Odò Tọn

To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
Nudi L 2,2. Pọ́n Nud. B14.
Kavi “alindọn he.”
Kavi “Hùnwhẹ gbọjẹzan tọn.”
Kavi “gbẹtọ lọ lẹ gbọjẹ.”
Vlavo ehe wá sọn hogbe Heblugbe tọn lọ mẹ he zẹẹmẹdo “Etẹ die?”
To paa mẹ, “okún atin he nọ yin yiylọdọ kolianda tọn.”
To paa mẹ, “kunnudenu.” Vlavo, apotin de he mẹ kandai vonọtaun lẹ nọ yin sisẹdo.
Ojlẹnu efa tọn dopo sọzẹn hẹ L 22. Pọ́n Nud. B14.