Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 15:1-27

NUHE E BẸHẸN LẸ

  • Mose po Islaeli po jihàn (1-19)

  • Miliami yihàn na yé (20, 21)

  • Osin vivẹ́ lẹzun vivi (22-27)

15  Enẹgodo, Mose po Islaelivi lẹ po kehàn ehe hlan Jehovah dọmọ:+ “Gbọ yẹn ni jihàn hlan Jehovah, na ewọ ko yin zizedaga petepete.+ Osọ́ po kùnkùntọ etọn po wẹ e ko sisẹ́ dlan hùmẹ.+   Jah* wẹ huhlọn ṣie po hlọnhlọn ṣie po, na ewọ ko lẹzun whlẹngán ṣie.+ Ewọ wẹ Jiwheyẹwhe ṣie, yẹn nasọ nọ pà ẹ;+ Jiwheyẹwhe otọ́ ṣie tọn,+ yẹn nasọ nọ pagigona ẹn.+   Awhànfuntọ huhlọnnọ+ de wẹ Jehovah. Podọ Jehovah wẹ e nọ yin.+   Osọ́-kẹkẹ Falo tọn lẹ po awhànpa etọn lẹ po wẹ E ko dlan do hùmẹ,+ Podọ awhànfuntọ azọ́nyọnẹntọ hugan etọn lẹ wẹ ko siọ do Ohù Vẹẹ mẹ.+   Agbówhẹn osin tọn lẹ gbaṣinyọ́n yé; yé siọ do hùzànmẹ taidi zannu de.+   Jehovah E, adusilọ towe dohuhlọn tlala;+ Jehovah E, adusilọ towe sọgan gbà kẹntọ hányán.   To gigo daho towe mẹ, hiẹ sọgan zín mẹhe diọnukunsọ we lẹ do odò;+ Hiẹ do adi sinsinyẹn towe hia bọ e fiọ yé di zinkán.   Gbọn gbigbọ dopo sọn awọntinslo towe lẹ mẹ dali, osin lẹ hòplidopọ; Yé ṣite guun bo hẹn otọ̀ gigọ́ dote; Agbówhẹn osin tọn lẹ lẹzun osin-agó to ohù ṣẹnṣẹn.   Kẹntọ dọmọ: ‘Yẹn na dómọna yé! Yẹn na plá yé! Yẹn na má ogblànnu lẹ kakajẹ whenue yẹn* nado tindo pekọ! Yẹn na sún ohí ṣie! Alọ ṣie nasọ duto yé ji!’+ 10  Hiẹ gbọ gbọfufu towe, ohù sọ gbaṣinyọ́n yé;+ Yé siọ taidi odọ̀-pẹ́n to osin daho-gbó lẹ mẹ. 11  Jehovah E, yẹwhe tẹwẹ taidi hiẹ?+ Mẹnu wẹ taidi hiẹ, he do dewe hia di huhlọnnọ to wiwe-yinyin mẹ?+ Hiẹ Mẹhe dona nọ yin budisi bo na nọ yin pipà, yèdọ hiẹ Mẹhe to nujiawu lẹ wà.+ 12  Hiẹ dlẹn adusilọ towe jẹgbonu, aigba sọ ze yé mì.+ 13  To owanyi nugbo towe mẹ, hiẹ ko deanana mẹhe a fligọ lẹ;+ Hiẹ na yí huhlọn towe do deanana yé yì fininọ wiwe towe. 14  Gbẹtọ lẹ dona sè;+ yé nasọ sisọ; Mẹhe nọ nọ̀ Filisti lẹ na gọ́ na awufiẹsa.* 15  To ojlẹ enẹ mẹ, obu na jẹ ṣeiki* Edomi tọn lẹ ji; Ogán huhlọnnọ* Moabi tọn lẹ+ nasọ jẹ sisọsisọ ji. Ahun mẹhe nọ nọ̀ Kenani lẹpo tọn nasọ gbàdo.+ 16  Obu po sisọsisọ po nasọ jẹ yé ji.+ Na kiklo-yinyin awà towe tọn wutu, yé na ṣite guun taidi zannu Kakajẹ whenue omẹ towe lẹ na juwayi, Jehovah E, Kakajẹ whenue mẹhe yin nutindo towe lẹ+ na juwayi.+ 17  Hiẹ na plan yé wá bosọ dotẹnna yé do osó he yin ogú towe ji,+ Yèdọ nọtẹn he hiẹ ko wleawu etọn na dewe nado nọ nọ̀, Jehovah E, Fiwiwe de he alọ towe lẹ ko hẹn lodo, Jehovah E. 18  Jehovah na duahọlu kakadoi podọ doidoi.+ 19  To whenue osọ́ Falo tọn lẹ po osọ́-kẹkẹ etọn lẹ po gọna awhànfuntọ osọ́ ji tọn etọn lẹ dlí biọ hùmẹ,+ Whenẹnu wẹ Jehovah hẹn osin ohù tọn lẹ ṣinyọ́n yé ji,+ Ṣigba, Islaelivi lẹ zinzọnlin to aigba-klo ji gbọn hùzànmẹ.”+ 20  Miliami, yẹwhegán-yọnnu lọ, yèdọ nọviyọnnu Aalọn tọn, ze ohún de bọ yọnnu lẹpo hodo e bo to húnhò bosọ to wedu. 21  Miliami sọ yihàn na sunnu lẹ dọmọ: “Mì jihàn hlan Jehovah, na ewọ ko yin zizedaga petepete.+ Osọ́ po kùnkùntọ etọn po wẹ e ko sisẹ́ dlan hùmẹ.”+ 22  Enẹgodo, Mose plan Islaelivi lẹ sọn Ohù Vẹẹ kọ̀n dedo danfafa Ṣuli tọn ji, yé sọ zingbejizọnlin na azán atọ̀n to danfafa lọ ji, ṣigba yé ma mọ osin. 23  Yé sọ wá Mala,*+ ṣigba yé ma penugo nado nù osin he tin to Mala, na e vẹ́ wutu. Enẹ wẹ zọ́n bọ e do ylọ oyín filọ tọn dọ Mala. 24  Enẹwutu, mẹlọ lẹ jẹ nuhlundọ do Mose go ji+ dọmọ: “Etẹwẹ mí na nù?” 25  Ewọ sọ dawhá ylọ Jehovah,+ bọ Jehovah deanana ẹn yì atin de kọ̀n. To whenue e ze e dlan do osin lọ mẹ, osin lọ vivi. To finẹ, Ewọ na yé aṣẹdai po dodonu whẹdida tọn de po bosọ tẹ́n yé pọ́n.+ 26  E sọ dọmọ: “Eyin mìwlẹ na yí sọwhiwhe do dotoaina ogbè Jehovah Jiwheyẹwhe mìtọn tọn bo nasọ wà nuhe sọgbe to nukun etọn mẹ bo payi gbedide etọn lẹ go bosọ setonuna aṣẹdai etọn lẹpo,+ yẹn ma na hẹn depope to azọ̀nylankan he yẹn yí do hò Egiptinu lẹ mẹ wá mì ji,+ na yẹn Jehovah wẹ to azọ̀nhẹngbọna mì.”+ 27  Enẹgodo, yé jẹ Elimi, fie asisa osin tọn 12 po odétin 70 po tin te. Yé sọ whèsla do otọ̀ lọ tó.

Nudọnamẹ Odò Tọn

“Jah” yin sándogli yinkọ lọ Jehovah tọn.
Kavi “alindọn ṣie.”
To paa mẹ, “awufiẹsa ajipanu tọn.”
Ṣeiki yin nukọntọ hẹnnu tọn.
Kavi “Aṣẹpanamẹtọ.”
Zẹẹmẹdo “Vivẹ́.”