Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 14:1-31

NUHE E BẸHẸN LẸ

  • Islaeli jẹ ohù lọ kọ̀n (1-4)

  • Falo dómọna Islaeli (5-14)

  • Islaeli dasá Ohù Vẹẹ (15-25)

  • Egiptinu lẹ siọ do ohù mẹ (26-28)

  • Islaeli tindo yise to Jehovah mẹ (29-31)

14  Jehovah sọ dọna Mose dọmọ:  “Dọna Islaelivi lẹ dọ yé ni lẹkọ bo yì whèsla do Pihahiloti nukọn, to Migdoli po ohù lọ po ṣẹnṣẹn, pannukọn Baali-zefoni.+ Mì na whèsla do huto pannukọn Baali-zefoni.  To whenẹnu, Falo na dọ gando Islaelivi lẹ go dọ, ‘Yé to bẹwlu mẹ bo to fuflupé to aigba lọ ji. Yé sọ to lèlèsà to danfafa ji.’  Yẹn nasọ dike ahun Falo tọn ni sinyẹn,+ ewọ nasọ dómọna yé, yẹn nasọ pagigona dee gbọn Falo po awhànpa etọn lẹpo po gblamẹ;+ Egiptinu lẹ nasọ yọnẹn hezeheze dọ yẹn wẹ Jehovah.”+ Islaelivi lẹ sọ wà domọ.  Enẹgodo, e yin didọna ahọlu Egipti tọn dọ mẹlọ lẹ ko họnyi. To afọdopolọji, Falo po devizọnwatọ etọn lẹ po diọlinlẹn gando mẹlọ lẹ go,+ yé sọ dọmọ: “Etẹ die he mí wà bo tún Islaelivi lẹ dote bọ yé ma nasọ yin afanumẹ lẹ na mí ba?”  Enẹwutu, e wleawuna osọ́-kẹkẹ awhàn tọn etọn lẹ bosọ plan omẹ etọn lẹ hẹn.+  E ṣinyan osọ́-kẹkẹ 600 bosọ hẹn osọ́-kẹkẹ he pò to Egipti lẹpo bọ awhànfuntọ lẹ sọ to dopodopo yetọn ji.  Jehovah sọ dike ahun Falo ahọlu Egipti tọn ni sinyẹn, ewọ sọ dómọna Islaelivi lẹ dile yé to yìyì po jidide* po.+  Egiptinu lẹ sọ dómọna yé,+ podọ osọ́-kẹkẹ Falo tọn lẹpo gọna awhànfuntọ osọ́ ji tọn etọn lẹ po awhànpa etọn lẹ po jẹ dindọnsẹpọ yé ji dile yé whèsla do huto, sẹpọ Pihahiloti, pannukọn Baali-zefoni. 10  To whenuena Falo dọnsẹpọ, Islaelivi lẹ ze nukun yetọn lẹ daga bo mọdọ Egiptinu lẹ to mọdona yé. Obu sọ jẹ Islaelivi lẹ ji bọ yé jẹ awhádo ylọ Jehovah ji.+ 11  Yé sọ dọna Mose dọmọ: “Be ṣiọditẹn de ma to Egipti wẹ zọ́n bọ hiẹ do plan mí wáfi nado wá kú do danfafa ji ya?+ Etẹ die he hiẹ wà do mí gbọn pinplan mí tọ́n sọn Egipti dali? 12  Be e ma yin nuhe mí dọna we to Egipti niyẹn, to whenue mí dọ dọ, ‘Jo mí do, na mí ni sẹ̀n Egiptinu lẹ’? Na e pọnte na mí nado sẹ̀n Egiptinu lẹ hugan nado kú do danfafa ji.”+ 13  Mose sọ dọna gbẹtọ lọ lẹ dọmọ: “Mì dibu blo.+ Mì nọtegli bo mọ whlẹngán Jehovah tọn, he ewọ na basi do ota mìtọn mẹ to egbehe.+ Na Egiptinu he mì to mimọ to egbehe lẹ, mì ma nasọ mọ yé gbedegbede ba.+ 14  Jehovah lọsu wẹ na hoavùn na mì,+ bọ mìwlẹ nasọ gbọṣi whii.” 15  Jehovah sọ dọna Mose dọmọ: “Naegbọn hiẹ do to awhádo ylọ mi mapote? Dọna Islaelivi lẹ nado sẹtẹn bo zindonukọn to gbejizọnlin yetọn mẹ. 16  Na hiẹ tọn, dlẹn opò he to alọ towe mẹ jẹgbonu do ohù lọ ji bo má ẹn do awe, na Islaelivi lẹ nido jugbọn ohù lọ ṣẹnṣẹn to aigba-klo ji. 17  Na yẹn tọn, yẹn na dike ahun Egiptinu lẹ tọn ni sinyẹn, na yé nido dómọna yé; gbọnmọ dali yẹn na pagigona dee gbọn Falo, awhànpa etọn lẹpo, osọ́-kẹkẹ awhàn tọn etọn lẹ po awhànfuntọ osọ́ ji tọn etọn lẹ po gblamẹ.+ 18  Egiptinu lẹ nasọ yọnẹn hezeheze dọ yẹn wẹ Jehovah to whenue yẹn na pagigona dee gbọn Falo, osọ́-kẹkẹ awhàn tọn etọn lẹ po awhànfuntọ osọ́ ji tọn etọn lẹ po gblamẹ.”+ 19  To whenẹnu, angẹli Jiwheyẹwhe nugbo lọ tọn+ he to yìyì to Islaelivi lẹ nukọn sẹtẹn bo wá yì godo na yé bọ dòtin aslọ tọn he tin to nukọnna yé lọ sẹ̀ wá yì godo yetọn bosọ gbọṣi finẹ.+ 20  E sọ sẹtẹn wá osla Egiptinu lẹ tọn po osla Islaeli tọn po ṣẹnṣẹn.+ Zinvlu gọ́ngọ́n sọ tin to awà dopo ji. Hinhọ́n sọ tin to zánmẹ+ to awà awetọ ji. Enẹwutu, awhànpa de ma sẹpọ awetọ to ozán lọ blebu mẹ. 21  Mose sọ dlẹnalọ etọn jẹgbonu do ohù lọ ji;+ Jehovah sọ yí jẹhọn sinsinyẹn whèzẹtẹn tọn de do sisẹ́ ohù lọ hlan nukọn to ozán lọ blebu mẹ, bosọ diọ ohù sabọ zun aigba-klo,+ osin lẹ sọ má do awe.+ 22  Whenẹnu, Islaelivi lẹ jugbọn ohù lọ ṣẹnṣẹn to aigba-klo ji+ dile osin lẹ mlindopọ taidi adó to adusiwhé podọ to amiyọnwhé.+ 23  Egiptinu lẹ sọ dómọna yé, osọ́ Falo tọn lẹpo, osọ́-kẹkẹ awhàn tọn etọn lẹ po awhànfuntọ osọ́ ji tọn etọn lẹ po sọ jẹgodona yé biọ ohù lọ ṣẹnṣẹn.+ 24  To zánmẹ jei afọnnu* gblamẹ, Jehovah lẹ́ ayidonugo etọn hlan awhànpa Egiptinu lẹ tọn sọn dòtin miyọ́n po aslọ po tọn lọ ṣẹnṣẹn,+ e sọ hẹn awhànpa Egiptinu lẹ tọn biọ bẹwlu mẹ. 25  E sọ jẹ kẹkẹfọ lẹ desẹ sọn osọ́-kẹkẹ yetọn lẹ glọ ji sọmọ bọ po awusinsinyẹn po wẹ yé to kẹkẹ lọ lẹ kùn, Egiptinu lẹ sọ to didọ dọmọ: “Mì gbọ mí ni họ̀n sọn Islaelivi lẹ godo, na Jehovah wẹ to avùnho na yé sọta Egiptinu lẹ.”+ 26  Enẹgodo wẹ Jehovah dọna Mose dọmọ: “Dlẹnalọ towe jẹgbonu do ohù lọ ji, na osin lọ nido gbaṣinyọ́n Egiptinu lẹ, osọ́-kẹkẹ awhàn tọn yetọn lẹ po awhànfuntọ osọ́ ji tọn yetọn lẹ po.” 27  To afọdopolọji, Mose dlẹnalọ etọn jẹgbonu do ohù lọ ji bọ whẹpo ai nido họ́n, ohù lọ ko gọjẹ otẹn etọn mẹ. Dile Egiptinu lẹ jlo na họ̀n sọn e mẹ, Jehovah siọ yé do ṣẹnṣẹn ohù lọ tọn.+ 28  Osin he to gigọjẹ otẹn etọn mẹ lọ sọ gbaṣinyọ́n osọ́-kẹkẹ awhàn tọn Falo tọn lẹ, awhànfuntọ osọ́ ji tọn etọn lẹ po awhànpa etọn he ko dómọna yé biọ ohù lọ mẹ lẹpo po.+ Dotẹnmẹ ma yin nina dopo tata to yé mẹ nado họ̀ngán.+ 29  Ṣigba, Islaelivi lẹ zinzọnlin to aigba-klo ji gbọn hùzànmẹ,+ osin lọ lẹ sọ mlindopọ taidi adó to adusiwhé podọ to amiyọnwhé yetọn.+ 30  Gbọnmọ dali, Jehovah whlẹn Islaeli sọn alọ Egiptinu lẹ tọn mẹ+ to azán enẹ gbè bọ Islaelivi lẹ mọ oṣiọ Egiptinu lẹ tọn to huto. 31  Islaeli sọ mọ huhlọn* daho he Jehovah yizan sọta Egiptinu lẹ, akọta lọ sọ jẹ budisi Jehovah ji bosọ tindo yise to Jehovah po devizọnwatọ etọn Mose po mẹ.+

Nudọnamẹ Odò Tọn

To paa mẹ, “alọ dindlẹn daga.”
Enẹ wẹ, sọn nudi ogàn 2 zánmẹ tọn jẹ ogàn 6 afọnnu tọn.
To paa mẹ, “alọ.”