Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 13:1-22

NUHE E BẸHẸN LẸ

  • Plọnji sunnu lẹpo yin Jehovah tọn (1, 2)

  • Hùnwhẹ Akla Madotọ́n tọn (3-10)

  • Plọnji sunnu lẹpo yin kinklandovo na Jehovah (11-16)

  • Islaeli yin anadena hlan Ohù Vẹẹ waji (17-20)

  • Dòtin aslọ po miyọ́n po tọn (21, 22)

13  Jehovah sọ dọhona Mose whladopo dogọ dọmọ:  “Klan visunnu plọnji* lẹpo do wiwe* na mi sọn Islaelivi lẹ mẹ. Ṣie wẹ visunnu plọnji gbẹtọ tọn lẹ po kanlin asu plọnji lẹ po na yin.”+  Mose sọ dọna mẹlọ lẹ dọmọ: “Mì flin azán ehe, he gbè mì tọ́n sọn Egipti,+ sọn kanlinmọgbenu, na gbọn alọ huhlọnnọ de dali wẹ Jehovah de mì tọ́n sọn fi.+ Enẹwutu, nuhe mẹ yè do otọ́n depope ma dona yin dùdù.  Mìwlẹ to yìyì sọn fi to egbé to osun Abibi*+ tọn mẹ.  To whenue Jehovah na ko hẹn mì jẹ aigba Kenaninu lẹ, Hetinu lẹ, Amolinu lẹ, Hivinu lẹ po Jẹbusinu lẹ po tọn lọ ji,+ yèdọ aigba he e ko whlé na tọgbo mìtọn lẹ nado na mì,+ aigba de he ji anọ́sin po owín po to sisà te,+ whenẹnu mìwlẹ dona nọ basi hùnwhẹ ehe to osun ehe mẹ.  Azán ṣinawe wẹ mì na nọ dù akla madotọ́n+ lẹ na, podọ to azán ṣinawetọ lọ gbè, hùnwhẹ de na nọ yin bibasi na Jehovah.  Mì na nọ dù akla madotọ́n lẹ na azán ṣinawe;+ podọ nuhe mẹ otọ́n yin dido depope ma dona yin mimọ to mì dè,+ podọ linfin he mẹ otọ́n yin dido depope ma dona yin mimọ to aigba* mìtọn lẹpo ji.  Hiẹ nasọ dọna visunnu towe to azán enẹ gbè dọ, ‘Na nuhe Jehovah wà na mi to whenue yẹn tọ́n sọn Egipti wutu wẹ.’+  Ehe nasọ tin taidi ohia de to alọ towe go podọ taidi oflin* de to nukọn towe,*+ na osẹ́n Jehovah tọn nido tin to onù towe mẹ, na gbọn alọ huhlọnnọ de dali wẹ Jehovah de we tọ́n sọn Egipti. 10  Hiẹ dona nọ payi osẹ́ndoai ehe go to ojlẹ sisọ etọn mẹ sọn owhe de mẹ jẹ devo mẹ.+ 11  “To whenue Jehovah na plan mì jẹ aigba Kenaninu lẹ tọn ji, ehe e ko whlé nado na mìwlẹ po tọgbo mìtọn lẹ po,+ 12  mì dona klan visunnu plọnji* lẹpo dovo na Jehovah gọna kanlin-yìnyìn asu plọnji he mì bẹpli lẹpo. Jehovah tọn wẹ plọnji gbẹtọ po kanlin lẹ po tọn.+ 13  Plọnji kẹtẹkẹtẹ mìtọn tọn lẹpo wẹ mì na nọ yí lẹngbọ do fligọ, podọ eyin hiẹ ma fli i gọ̀, to whenẹnu hiẹ dona linú okọ̀ na ẹn nado hù i. Podọ visunnu plọnji mìtọn lẹpo wẹ mì dona nọ fligọ.+ 14  “Eyin e wá jọ bọ visunnu towe kanse we dọ, ‘Etẹwẹ ehe zẹẹmẹdo?’ to whenẹnu hiẹ na dọna ẹn dọ, ‘Gbọn alọ huhlọnnọ de dali wẹ Jehovah de mí tọ́n sọn aigba Egipti tọn ji, sọn kanlinmọgbenu.+ 15  To whenue Falo gbọn tasinsinyẹn dali gbẹ́ nado tún mí dote,+ Jehovah hù plọnji he to aigba Egipti tọn ji lẹpo, yèdọ bẹsọn plọnji gbẹtọ tọn ji jẹ plọnji kanlin tọn ji.+ Enẹwutu wẹ yẹn to kanlin asu plọnji* lẹpo yí do sanvọ́ hlan Jehovah bọ yẹn sọ nọ fli visunnu plọnji ṣie lẹpo gọ̀.’ 16  Ehe dona tin taidi ohia de to alọ towe go podọ taidi ota-blanú de to nukọn towe,*+ na gbọn alọ huhlọnnọ de dali wẹ Jehovah de mí tọ́n sọn Egipti.” 17  To whenue Falo tún mẹlọ lẹ dote, Jiwheyẹwhe ma plan yé gbọn aigba Filistinu lẹ tọn ji dile etlẹ yindọ aliho enẹ wẹ yá hugan. Na Jiwheyẹwhe dọmọ: “Mẹlọ lẹ sọgan diọlinlẹn eyin yè tọ́nawhàn yé bo na lẹkọyi Egipti.” 18  Enẹwutu, Jiwheyẹwhe hẹn gbẹtọ lọ lẹ nado lẹ́ gbọn danfafa Ohù Vẹẹ tọn ji.+ Islaelivi lẹ sọ hẹji tọ́n sọn aigba Egipti tọn ji to kannukannu di awhànfuntọ lẹ nkọ. 19  Mose sọ bẹ ohú Josẹfu tọn lẹ hẹn, na Josẹfu ko hẹn visunnu Islaeli tọn lẹ whlé sinsinyẹn dọmọ: “Jiwheyẹwhe ma na gboawupo nado lẹ́ ayidonugo etọn hlan mì, enẹwutu mì dona bẹ ohú ṣie lẹ yì sọn fi.”+ 20  Yé sọ dedo sọn Sukoti bo whèsla do Ẹtami to bẹbẹnu danfafa lọ tọn. 21  Nado sọgan deanana yé, Jehovah nọ to yìyì to nukọn yetọn to okle gbọn dòtin aslọ tọn de dali+ podọ to zánmẹ gbọn dòtin miyọ́n tọn de dali nado na yé hinhọ́n, na yé nido sọgan zingbejizọnlin to okle podọ to zánmẹ.+ 22  Dòtin aslọ tọn lọ ma nọ yì sọn mẹlọ lẹ nukọn to okle, mọdopolọ dòtin miyọ́n tọn lọ ma nọ yì sọn nukọn yetọn to zánmẹ.+

Nudọnamẹ Odò Tọn

To paa mẹ, “plọnji he hùn adọ̀.”
Kavi “De visunnu plọnji lẹpo dovo.”
Pọ́n Nud. B15.
To paa mẹ, “dogbó.”
Kavi “nuflinmẹ.”
To paa mẹ, “to nukun towe lẹ ṣẹnṣẹn.”
To paa mẹ, “mẹhe hùn adọ̀.”
To paa mẹ, “nuhe hùn adọ̀.”
To paa mẹ, “to nukun towe lẹ ṣẹnṣẹn.”