Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 12:1-51

NUHE E BẸHẸN LẸ

  • Juwayi yin didoai (1-28)

    • Yè dona mimí ohùn do dòtin go (7)

  • Azọ̀nylankan 10: plọnji lẹ kú (29-32)

  • Islaelivi lẹ jẹ tintọ́n yì ji (33-42)

    • Owhe 430 lẹ wá vivọnu (40, 41)

  • Anademẹ lẹ na Juwayi dùdù (43-51)

12  Jehovah sọ dọna Mose po Aalọn po to aigba Egipti tọn ji dọmọ:  “Osun ehe wẹ na yin bẹjẹeji osun lẹ tọn na mì. E na yin osun tintan owhe lọ tọn na mì.+  Dọhona akọta Islaeli tọn blebu dọ, ‘To azán aotọ osun ehe tọn, dopodopo yetọn ni yí lẹngbọ + dopo na owhé otọ́ yetọn tọn, lẹngbọ dopo na owhé dopo.  Ṣigba, eyin whédo lọ ma sọgan dù lẹngbọ dopo blebu pó, yé* na má ẹn hẹ kọmẹnu yetọn he sẹpọ yé hugan, sọgbe hẹ sọha mẹlọ* lẹ tọn. Lẹngbọ lọ na yin mimá sọgbe hẹ sọha mẹhe na dù i lẹ tọn.  Lẹngbọ towe dona yin lẹngbọ asu he ma tindo oblọ+ bo tindo owhe dopo. Hiẹ sọgan de e sọn agbò winyanwinyan kavi gbọgbọẹ lẹ mẹ.  A dona penukundo e go kakajẹ azán 14tọ osun ehe tọn,+ podọ agun omẹ Islaeli tọn lẹ tọn pete nasọ hù i to whèjai plẹplẹ.*+  Yé dona yí sọn ohùn lọ mẹ bo mimí in do dòtin ohọ̀n tọn awe lẹ go podọ do aga ohọ̀n ohọ̀ he mẹ yé na dù i te tọn lẹ go.+  “‘Yé dona dù olàn lọ to ozán ehe mẹ.+ Yé na hì i to miyọ́n nù bo yí akla madotọ́n+ po amà vivẹ́+ po do dù i.  Mì ma dona dù omú etọn, sọakusìn in kavi yí osin do dà ẹ, ṣigba mì na hì ota etọn, afọ etọn po homẹnú etọn lẹ po to miyọ́n nù. 10  Hiẹ ma dona pò depope dai jẹ afọnnu, ṣigba eyin depope pò jẹ afọnnu, mì na yí miyọ́n do fiọ ẹ.+ 11  Lehe mì na dù i do die, mì na sìn gbànnú mìtọn do alinkàn* bo do afọpa mìtọn lẹ bosọ hẹn opò mìtọn do alọmẹ; whlẹndo ji wẹ mì dona nọ do dù i. Juwayi Jehovah tọn wẹ. 12  Na yẹn na jugbọn aigba Egipti tọn ji to ozán ehe mẹ bo na hù plọnji lẹpo to aigba Egipti tọn ji, bẹsọn gbẹtọ ji jẹ kanlin ji;+ yẹn nasọ dawhẹna yẹwhe Egipti tọn lẹpo.+ Yẹn wẹ Jehovah. 13  Ohùn lọ na yin ohia de he na do ohọ̀ he mẹ mì tin te lẹ hia; yẹn nasọ mọ ohùn lọ bo juwayi, azọ̀nylankan lọ ma nasọ wá mì ji nado và mì sudo to whenue yẹn na hò aigba Egipti tọn.+ 14  “‘Azán oflin tọn de wẹ azán ehe na yin na mì, mìwlẹ nasọ nọ basi hùnwhẹ etọn hlan Jehovah sọn whẹndo de ji jẹ whẹndo de ji. Mì dona nọ basi hùnwhẹ ehe taidi osẹ́ndoai he na dẹn-to-aimẹ de. 15  Azán ṣinawe wẹ mì na dù akla madotọ́n+ lẹ na. Mọwẹ, to azán tintan gbè, mì na de linfin he mẹ otọ́n yin dido lẹ sọn owhé mìtọn lẹ gbè, na mẹdepope he dù nuhe mẹ otọ́n yin dido, sọn azán tintan gbè jẹ azán ṣinawetọ gbè, omẹ* enẹ dona yin sinsánsẹ* sọn Islaeli. 16  To azán tintan gbè, mì na basi opli wiwe de, podọ to azán ṣinawetọ gbè, mì na basi opli wiwe devo. Azọ́n depope ma dona yin wiwà to azán ehelẹ gbè.+ Adavo nuhe mẹdopodopo* tindo nuhudo etọn nado dù kẹdẹ wẹ yè sọgan wleawu etọn na mì. 17  “‘Mì dona nọ basi Hùnwhẹ Akla Madotọ́n tọn lọ,+ na to azán ehe gbè wẹ yẹn na de susugege* mìtọn tọ́n sọn aigba Egipti tọn ji. Mìwlẹ dona nọ flin azán ehe taidi osẹ́ndoai he na dẹn-to-aimẹ de sọn whẹndo de ji jẹ whẹndo de ji. 18  Bẹsọn whèjai azán 14tọ osun tintan lọ tọn, mì na nọ dù akla madotọ́n lẹ kakajẹ whèjai+ azán 21tọ osun lọ tọn. 19  Linfin he mẹ otọ́n yin dido depope ma dona yin mimọ to owhé mìtọn lẹ gbè kaka na azán ṣinawe, na eyin mẹdepope dù nuhe mẹ otọ́n yin dido, vlavo e yin jonọ kavi tòvi,+ omẹ* enẹ dona yin sinsánsẹ* sọn omẹ Islaeli tọn lẹ mẹ.+ 20  Mì ma dona dù nudepope he mẹ otọ́n yin dido. Akla madotọ́n lẹ wẹ mì na dù to owhé mìtọn lẹpo gbè.’” 21  Mose sọ ylọ mẹho Islaeli tọn lẹ+ to afọdopolọji bo dọna yé dọmọ: “Mì ṣinyan kanlin winyanwinyan* lẹ na whẹndo mìtọn lẹ dopodopo bo hù kanlin Juwayi tọn lọ. 22  Mì nasọ ylọn okọ̀ atin hisọpu tọn de do ohùn he tin to basia mẹ de mẹ bo mimí ohùn lọ do aga ohọ̀n tọn podọ do dòtin awe ohọ̀n lọ tọn lẹ go; mẹdepope to mì mẹ ma dona tọ́njẹgbonu gbọn họntonu ohọ̀ etọn tọn kakajẹ afọnnu. 23  To whenue Jehovah na juwajei nado yí azọ̀nylankan do hò Egiptinu lẹ bo na mọ ohùn to aga ohọ̀n lọ tọn podọ to dòtin awe lọ lẹ go, e họnwun dọ Jehovah na jugbọn họntonu lọ wayi, bo ma na dike azọ̀nylankan mẹhusudo tọn* lọ ni biọ owhé mìtọn lẹ gbè.+ 24  “Mìwlẹ po visunnu mìtọn lẹ po dona nọ flin nujijọ ehe taidi aṣẹdai de he na dẹn-to-aimẹ.+ 25  Eyin mì jẹ aigba he Jehovah na na mì lọ ji, kẹdẹdile ewọ ko dọ do, mì dona nọ basi hùnwhẹ ehe.+ 26  Podọ eyin visunnu mìtọn lẹ kanse mì dọ, ‘Etẹwutu mì do nọ basi hùnwhẹ ehe?’+ 27  mì na dọ dọ, ‘Avọ́sinsan Juwayi tọn wẹ e yin hlan Jehovah, mẹhe jugbọn owhé Islaelivi lẹ tọn ji to Egipti to whenuena e yí azọ̀nylankan do hò Egiptinu lẹ, ṣigba bo ma doalọ owhé mítọn lẹ go.’” Whenẹnu wẹ mẹlọ lẹ dẹ́ do odò bo ṣinyọ́n nukunmẹ ai. 28  Islaelivi lẹ sọ yì bo wà kẹdẹdile Jehovah ko degbe etọn na Mose po Aalọn po+ do. Yé wà domọ pẹpẹ. 29  To zánhomẹ, Jehovah hù plọnji he to aigba Egipti tọn ji lẹpo,+ bẹsọn plọnji Falo he to ofìn ji tọn ji jẹ plọnji kanlinmọ he to gànpamẹ* lẹ tọn ji, po plọnji kanlin tọn lẹpo po.+ 30  Falo sọ fọ́n to ozán enẹ mẹ, ewọ po devizọnwatọ etọn lẹpo po gọna Egiptinu he pò lẹpo, avigbè daho de sọ tin to Egiptinu lẹ ṣẹnṣẹn, na owhé de ma tin he gbè mẹde ma kú te.+ 31  To afọdopolọji, Falo ylọ Mose po Aalọn po+ to zánmẹ bo dọmọ: “Mì fọ́n, bo tọ́n sọn omẹ ṣie lẹ ṣẹnṣẹn, mìwlẹ po Islaelivi he pò lẹ po. Mì yì sẹ̀n Jehovah, kẹdẹdile mì ko dọ do.+ 32  Mì plan lẹngbọpa po kanlinpa mìtọn lẹ po yì ga kẹdẹdile mì ko dọ do.+ Ṣigba, mìwlẹ dona sọ dona mi.” 33  Egiptinu lẹ sọ jẹ mẹlọ lẹ vẹ̀ ji nado yawu tọ́n sọn+ otò yetọn mẹ “na,” dile yé dọ do, “mímẹpo wẹ taidi mẹhe ko kú dote!”+ 34  Enẹwutu, gbẹtọ lọ lẹ ze linfin yinyan yetọn he mẹ otọ́n ma yin dido lẹ po aklahònú* yetọn he yin búbú do avọ̀ mẹ lẹ po do abọ́ yetọn lẹ ji. 35  Islaelivi lẹ sọ wà nuhe Mose ko dọna yé bo biọ Egiptinu lẹ núzinzan fataka tọn lẹ, sika tọn lẹ po avọ̀ po.+ 36  Jehovah sọ hẹn akọta lọ nado mọ nukundagbe Egiptinu lẹ tọn, sọmọ bọ yé na Islaelivi lẹ nuhe yé biọ lẹpo, yé sọ bẹ adọkunnu Egiptinu lẹ tọn yì.+ 37  Islaelivi lẹ sọ dedo sọn Lamesesi+ pànta Sukoti,+ yèdọ nudi sunnu 600 000, ma hia ovi lẹ.+ 38  Podọ gbẹtọgun daho flusọ́*+ de sọ yì hẹ yé ga, gọna lẹngbọpa lẹ po kanlinpa lẹ po, yèdọ kanlin-yìnyìn susugege de. 39  Yé sọ jẹ linfin yinyan he yé hẹn sọn Egipti lẹ yí do jẹ akla madotọ́n mimlin lẹ sọ̀ ji. Otọ́n ma yin dido yé mẹ na ajiji mẹ wẹ yé yin yinyan sọn Egipti te sọmọ bọ yé ma penugo nado doagban núdùdù tọn.+ 40  Owhe 430+ wẹ Islaelivi lẹ nọ Egipti+ na. 41  To vivọnu owhe 430 lọ lẹ tọn, yèdọ to azán ehe lọ gbè wẹ omẹ susugege* Jehovah tọn lẹpo tọ́n sọn aigba Egipti tọn ji. 42  Ehe yin ozán de he yé dona nọ basi hùnwhẹ etọn nado nọ flindọ Jehovah wẹ de yé tọ́n sọn aigba Egipti tọn ji. Hùnwhẹ ozán ehe tọn dona nọ yin bibasi hlan Jehovah gbọn omẹ Islaeli tọn lẹpo dali sọn whẹndo de ji jẹ whẹndo de ji.+ 43  Jehovah sọ dọna Mose po Aalọn po dọ, “Osẹ́ndoai Juwayi lọ tọn die: Jonọ depope ma dona dù núdùdù juwayi tọn lọ.+ 44  Ṣigba, eyin mẹde tindo afanumẹ sunnu de he yè yí akuẹ do họ̀, mì dona gboadà na ẹn.+ To whenẹnu kẹdẹ wẹ e sọgan dù sọn e mẹ. 45  Gbéjinọtọ po pakanọ de po ma sọgan dù sọn e mẹ. 46  Lẹngbọvu lọ dona nọ yin dùdù to owhé dopo gbè. Depope to olàn lọ mẹ ma dona yin dide tọ́njẹgbonu sọn owhé lọ gbè, podọ ohú etọn depope ma dona yin gbigbà.+ 47  Omẹ Islaeli tọn lẹpo wẹ dona nọ basi hùnwhẹ lọ. 48  Eyin jonọ de tin to mì dè bo jlo na basi hùnwhẹ Juwayi tọn lọ hlan Jehovah, sunnu he to yé mẹ lẹpo wẹ dona yin adàgbona. Whenẹnu kẹdẹ wẹ e sọgan tindo mahẹ to hùnwhẹ lọ mẹ, ewọ nasọ lẹzun tòvi jọnun. Ṣigba, sunnu depope he ma gboadà ma dona dù sọn e mẹ.+ 49  Osẹ́n dopolọ wẹ na tin na tòvi po jonọ he tin to ṣẹnṣẹn mìtọn lẹ po.”+ 50  Islaelivi lẹpo sọ wà kẹdẹdile Jehovah ko degbe etọn na Mose po Aalọn po do. Yé wà domọ pẹpẹ. 51  To azán ehe gbè wẹ Jehovah de Islaelivi lẹ po omẹ susugege* he gọna yé lẹ po tọ́n sọn aigba Egipti tọn ji.

Nudọnamẹ Odò Tọn

To paa mẹ, “ewọ.”
Kavi “alindọn lọ.”
To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
To paa mẹ, “mì na blagbajana alinkàn mìtọn.”
Kavi “alindọn.”
Kavi “hùhù.”
Kavi “alindọn dopodopo.”
To paa mẹ, “awhànpa.”
Kavi “alindọn.”
Kavi “hùhù.”
Enẹ wẹ, lẹngbọvu kavi gbọgbọẹvu.
To paa mẹ, “dike vasudo.”
To paa mẹ, “ohọ̀ osindò tọn mẹ.”
Kavi “agbán.”
Enẹ wẹ, gbẹtọgun he bẹ mẹhe ma yin Islaelivi lẹ hẹn, he mẹ Egiptinu lẹ tin te ga.
To paa mẹ, “awhànpa.”
To paa mẹ, “awhànpa.”