Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Eksọdusi 10:1-29

NUHE E BẸHẸN LẸ

  • Azọ̀nylankan 8: owẹ̀n (1-20)

  • Azọ̀nylankan 9: zinvlu (21-29)

10  Enẹgodo, Jehovah dọna Mose dọmọ: “Yì Falo dè, na yẹn ko dike ahun etọn po devizọnwatọ etọn lẹ po tọn ni tliji,+ na yẹn nido basi ohia ṣie ehelẹ to nukọn etọn tlọlọ,+  podọ na hiẹ nido dọna visunnu po ovivi towe lẹ po lehe yẹn ko yinuwa hẹ Egipti to aliho sinsinyẹn de mẹ do po ohia he yẹn ko basi to ṣẹnṣẹn yetọn lẹ po;+ mìwlẹ nasọ yọnẹn hezeheze dọ yẹn wẹ Jehovah.”  Enẹwutu, Mose po Aalọn po yì Falo dè bo dọna ẹn dọmọ: “Nuhe Jehovah Jiwheyẹwhe Heblu lẹ tọn dọ die, ‘Nawẹ e na dẹnsọ bọ hiẹ na gbẹ́ pò to gbigbẹ́ nado litaina mi?+ Tún omẹ ṣie lẹ dote, na yé nido yì sẹ̀n mi.  Na eyin hiẹ gbẹ́ pò to gbigbẹ́ ma nado tún omẹ ṣie lẹ dote, yẹn na hẹn owẹ̀n lẹ wá aigba towe ji to osọ.  Yé nasọ ṣinyọ́n nukunmẹ aigba lọ tọn ji bọ e ma na yọnbasi nado mọ kọmẹ. Yé na dù nuhe kẹ́njikun ko pò dai na mì lẹ, yé nasọ dù atin mìtọn he to whinwhẹ́n to danji lẹpo.+  Yé na gọ́ owhé towe lẹ gbè, owhé devizọnwatọ towe lẹpo tọn gbè podọ owhé Egiptinu lẹpo tọn gbè jẹ obá he mẹ otọ́ towe lẹ po tọgbo towe lẹ po ma ko mọ pọ́n gbede, yèdọ sọn whenue gbọ́n yé ko tin to aigba ehe ji kakajẹ egbehe.’”+ Whenẹnu, e tọ́nyi sọn Falo nukọn.  Enẹgodo, devizọnwatọ Falo tọn lẹ dọna ẹn dọmọ: “Nawẹ e na dẹnsọ bọ dawe ehe na zindonukọn nado to yasana* mí? Tún mẹlọ lẹ dote, na yé nido yì sẹ̀n Jehovah Jiwheyẹwhe yetọn. Be hiẹ ma ko yọnẹn kakajẹ din dọ Egipti ko to yinyin hinhẹngble wẹ?”  Enẹwutu, Mose po Aalọn po yin hinhẹn lẹkọwa Falo dè, e sọ dọna yé dọmọ: “Mì yì bo sẹ̀n Jehovah Jiwheyẹwhe mìtọn. Amọ́, mẹnu lẹ wẹ jei taun?”  Whenẹnu wẹ Mose dọmọ: “Míwlẹ na yì po yọpọ mítọn lẹ po, gọna mẹhomẹ mítọn lẹ, visunnu mítọn lẹ, viyọnnu mítọn lẹ, lẹngbọ mítọn lẹ po kanlin whégbè tọn mítọn lẹ po,+ na mí na basi hùnwhẹ de na Jehovah.”+ 10  E sọ dọna yé dọmọ: “Eyin yẹn tún mìwlẹ po ovi mìtọn lẹ po dote gbede, be Jehovah tin hẹ mì nugbonugbo!+ E họnwun dọ nuylankan de wẹ mì tindo to ayiha mẹ. 11  Paali! Sunnu mìtọn lẹ kẹdẹ wẹ sọgan yì nado yì sẹ̀n Jehovah, na nuhe mì biọ niyẹn.” Enẹwutu, yé yin yinyan jẹgbonu sọn Falo nukọn. 12  Todin, Jehovah dọna Mose dọmọ: “Dlẹnalọ towe jẹgbonu do aigba Egipti tọn ji, na owẹ̀n lẹ nido wá aigba lọ ji bo dù ogbé-mú aigba lọ tọn lẹpo, yèdọ nudepope he kẹ́njikun lọ ko pò dai.” 13  To afọdopolọji, Mose dlẹn opò etọn do aigba Egipti tọn ji bọ Jehovah hẹn jẹhọn whèzẹtẹn tọn de nado yìn do aigba lọ ji to okle enẹ po ozán lọ blebu po mẹ. To whenue ai họ́n, jẹhọn whèzẹtẹn tọn lọ ko hẹn owẹ̀n lẹ wá. 14  Owẹ̀n lẹ sọ wá aigba Egipti tọn lẹpo ji bo ṣinyọ́n aigba lọ pete ji.+ E sọ sinyẹnawu tlala;+ owẹ̀n lẹ ma ko sù sọmọ pọ́n, mọjanwẹ yé ma nasọ sù sọmọ pọ́n gbede do niyẹn. 15  Yé ṣinyọ́n nukunmẹ aigba lọ tọn pete ji, aigba lọ sọ dózin na yetọn wutu; yé sọ dù ogbé-mú aigba lọ tọn lẹpo po atin-sinsẹ́n he kẹ́njikun lọ ko pò dai lẹpo po; amamú depope ma yin pipò dai do atin lẹ ji kavi do ogbé danji tọn lẹ ji to aigba Egipti tọn pete ji. 16  Enẹwutu, Falo yawu ylọ Mose po Aalọn po bo dọmọ: “Yẹn ko waylando do Jehovah Jiwheyẹwhe mìtọn podọ do mìwlẹ. 17  Todin, mì jaale bo jo ylando ṣie na mi whladopo ehe poun bosọ vẹ̀ Jehovah Jiwheyẹwhe mìtọn, na e ni saa de azọ̀nylankan mẹhusudo tọn ehe sẹ̀ sọn ji e.” 18  Ewọ* sọ tọ́n sọn Falo nukọn bo yì vẹ̀ Jehovah.+ 19  Jehovah sọ diọ jẹhọn lọ zun jẹhọn sinsinyẹn whèyihọ tọn de, bo plọ́ owẹ̀n lẹ yì dlan Ohù Vẹẹ mẹ. Owẹ̀n dopo tata ma gbọṣi aigba Egipti tọn blebu ji. 20  Ṣigba, Jehovah dike ahun Falo tọn ni sinyẹn,+ ewọ masọ tún Islaelivi lẹ dote. 21  Jehovah sọ dọna Mose dọmọ: “Dlẹnalọ towe hlan olọn, na zinvlu nido ṣinyọ́n aigba Egipti tọn ji, yèdọ zinvlu gọ́ngọ́n titli de.” 22  To afọdopolọji, Mose dlẹnalọ etọn hlan olọn, zinvlu gọ́ngọ́n de sọ ṣinyọ́n aigba Egipti tọn pete ji na azán atọ̀n.+ 23  Yé ma mọ ode awetọ, podọ depope to yé mẹ ma fọ́n sọn otẹn etọn mẹ na azán atọ̀n; ṣigba Islaelivi lẹpo tindo hinhọ́n to owhé yetọn lẹ gbè.+ 24  Whenẹnu, Falo ylọ Mose bo dọmọ: “Mì yì sẹ̀n Jehovah.+ Lẹngbọ mìtọn lẹ po kanlin whégbè tọn mìtọn lẹ po kẹdẹ wẹ mì ma na plan yì. Ovi mìtọn lẹ lọsu tlẹ sọgan hodo mì yì.” 25  Ṣigba, Mose dọmọ: “Hiẹ lọsu wẹ na na mí* avọ́sannu lẹ po avọ́nunina mimẹ̀ lẹ po bọ míwlẹ na yí yé do sanvọ́ hlan Jehovah Jiwheyẹwhe mítọn.+ 26  Kanlin-yìnyìn mítọn lẹ nasọ yì hẹ mí ga. Kanlin* dopo tata ma na gbọṣi ai, na mí na yí delẹ to yé mẹ zan nado basi sinsẹ̀n hlan Jehovah Jiwheyẹwhe mítọn, podọ mí ma ko yọ́n nuhe mí na yí do sanvọ́ to sinsẹ̀n-bibasi mítọn hlan Jehovah whenu kakajẹ whenue mí na jẹ dọ́n.” 27  Jehovah sọ dike ahun Falo tọn ni sinyẹn, e masọ yigbe nado tún yé dote.+ 28  Falo sọ dọna ẹn dọmọ: “Tọ́n sọn nukọnna mi! A sọ tẹnpọn nado mọ nukun ṣie mẹ ba blo, na gbeegbe hiẹ mọ nukunmẹ ṣie, hiẹ na kú.” 29  Mose sọ gblọn dọmọ: “Kẹdẹdile hiẹ ko dọ do, yẹn ma nasọ tẹnpọn nado mọ nukunmẹ towe ba.”

Nudọnamẹ Odò Tọn

To paa mẹ, “to omọ̀ de yin na.”
Ehe na ko to alọdlẹndo Mose.
Kavi “na dike mí ni tindo.”
To paa mẹ, “Ofẹ̀n.”