Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Daniẹli 9:1-27

NUHE E BẸHẸN LẸ

  • Daniẹli hodẹ̀ gbeyina ylando tọn (1-19)

    • Owhe 70 vọjijẹ tọn (2)

  • Gabliẹli wá Daniẹli dè (20-23)

  • Dọdai osẹ 70 lẹ tọn (24-27)

    • Mẹsia na sọawuhia to osẹ 69 godo (25)

    • Mẹsia na yin sinsánsẹ (26)

    • Yè na và tòdaho po fiwiwe lọ po sudo (26)

9  To owhe tintan Daliusi+ visunnu Ahasuelusi tọn mẹ—yèdọ mẹhe wá sọn kúnkan Medianu lẹ tọn mẹ he yè ko yí do doahọlu do ahọluduta Kaldeanu lẹ tọn ji+  to owhe tintan gandudu etọn tọn mẹ wẹ yẹn, Daniẹli, tunwun gbọn owe lẹ* dali dọ sọha owhe he yin nùdego to ohó Jehovah tọn mẹ na yẹwhegán Jelemia nado hẹn vọjijẹ Jelusalẹm tọn wá vivọnu+ lẹ tọn wẹ owhe 70.+  Enẹwutu, yẹn lẹ́ nukunmẹ ṣie hlan Jehovah Jiwheyẹwhe nugbo lọ bo to vivẹ̀ ẹ to odẹ̀ mẹ dile n’to nùbla+ bo do odẹ́vọ̀ bosọ sinai do afín mẹ.  N’hodẹ̀ hlan Jehovah Jiwheyẹwhe ṣie bo yigbe ylando mítọn lẹ tọn bosọ dọmọ: “Jehovah E, Jiwheyẹwhe nugbo lọ, Mẹhe klo bo dobu, he nọ yin nugbonọ na alẹnu etọn bo nọ do owanyi nugbo+ hia mẹhe yiwanna ẹn bo nọ yìn gbedide etọn lẹ,+  míwlẹ ko waylando bo ṣinuwa bosọ yinuwa po kanyinylan po bo ṣiatẹ;+ podọ mí ko zẹ̀ sọn gbedide po whẹdida towe lẹ po kọ̀n.  Mí ma dotoaina devizọnwatọ towe yẹwhegán lẹ,+ he dọho to oyín towe mẹ na ahọlu mítọn lẹ, ahọvi mítọn lẹ, tọgbo mítọn lẹ po mẹhe tin to aigba lọ ji lẹpo po.  Jehovah E, towe wẹ dodowiwa, ṣigba míwlẹ ko duwinyan* dile e te do to egbehe na omẹ Juda tọn lẹ, mẹhe nọ nọ̀ Jelusalẹm lẹ po Islaeli pete po, yèdọ mẹhe to yakẹ po mẹhe to fidindẹn lẹ po, to aigba he ji hiẹ ko vúnvún yé pé gbọn lẹpo, na yé ko yinuwa po nugbonọ-mayin po hlan we wutu.+  “Jehovah E, míwlẹ ko duwinyan,* gọna ahọlu mítọn lẹ, ahọvi mítọn lẹ po tọgbo mítọn lẹ po, na mí ko waylando do we.  Lẹblanu po jona po tin to Jehovah Jiwheyẹwhe mítọn dè,+ na míwlẹ ko ṣiatẹ sọta ẹ wutu.+ 10  Mí ma setonuna ogbè Jehovah Jiwheyẹwhe mítọn tọn nado hodo osẹ́n etọn lẹ he ewọ na mí gbọn devizọnwatọ etọn yẹwhegán lẹ gblamẹ.+ 11  Islaeli pete wẹ ko gbà Osẹ́n towe bo lẹhlan apadopo gbọn tolivivẹ na ogbè towe dali, sọmọ bọ hiẹ kọ̀n dẹ̀hodo po whiwhle he yin kinkandai to Osẹ́n Mose devizọnwatọ Jiwheyẹwhe nugbo lọ tọn mẹ lẹ po do mí ji,+ na míwlẹ ko waylando do Hiẹ wutu. 12  Hiẹ ko hẹn ohó he a dọ sọta mí+ podọ sọta gandutọ mítọn he dugán do mí ji* lẹ di, gbọn nugbajẹmẹji daho hinhẹnwa mí ji dali; nuhe yin wiwà to Jelusalẹm ehe nkọ ma ko jọ pọ́n to olọn pete glọ.+ 13  Kẹdẹdile e ko yin kinkandai to Osẹ́n Mose tọn mẹ do, nugbajẹmẹji ehe lẹpo ko wá mí ji,+ ṣogan mí ma vẹvẹ na nukundagbe Jehovah Jiwheyẹwhe mítọn tọn* gbọn lilẹ́ sọn nuṣiwa mítọn mẹ dali+ podọ gbọn didohia dọ hiẹ nọ hẹn ohó towe di* dali. 14  “Enẹwutu, Jehovah to aṣeji bo hẹn nugbajẹmẹji wá mí ji, na dodonọ wẹ Jehovah Jiwheyẹwhe mítọn to azọ́n he ewọ ko wà lẹpo mẹ; ṣogan míwlẹ ma setonuna ogbè etọn.+ 15  “Todin, Jehovah Jiwheyẹwhe mítọn E, hiẹ Mẹhe hẹn omẹ towe lẹ tọ́njẹgbonu sọn aigba Egipti tọn ji gbọn alọ huhlọnnọ de dali+ bo wleawuna yinkọ de na dewe kakajẹ egbé,+ míwlẹ ko waylando bo ko yinuwa po kanyinylan po. 16  Jehovah E, to gbesisọ mẹ hẹ nuyiwa dodo tọn towe lẹpo,+ jaale, gbọ homẹgble towe po adi towe po ni lẹ́ sọn tòdaho towe Jelusalẹm ji, yèdọ osó wiwe towe; na ylando mítọn lẹ po nuṣiwa tọgbo mítọn lẹ tọn po wutu, Jelusalẹm po omẹ towe lẹ po ko lẹzun aṣagbọ́nu de na mẹhe lẹdo mí pé lẹpo.+ 17  Todin, hiẹ Jiwheyẹwhe mítọn E, dotoaina odẹ̀ devizọnwatọ towe tọn podọ na ovẹvivẹ etọn lẹ bo hẹn nukunmẹ towe họ́n do fiwiwe towe+ he jẹvọ́ lọ ji,+ na oyín towe titi tọn wutu, Jehovah E. 18  Jiwheyẹwhe ṣie E, tuntoai bo sè! Hùn nukun towe lẹ bo mọ ninọmẹ vọjijẹ tọn mítọn po tòdaho he ji yinkọ towe ko yin yiylọ do lọ po; na míwlẹ ma to vẹvẹna we na nuyiwa dodo tọn mítọn lẹ wutu gba, ṣigba na lẹblanu daho towe wutu.+ 19  Jehovah E, sè. Jehovah E, jona mí.+ Jehovah E, na ayidonugo mí bo yinuwa! A dọngbàn blo, na oyín towe titi tọn wutu, hiẹ Jiwheyẹwhe ṣie E, na oyín towe titi ko yin yiylọ do tòdaho towe ji podọ do omẹ towe lẹ ji.”+ 20  Dile n’gbẹ́ pò to hodọ bo to dẹ̀ho bosọ to gbeyina ylando ṣie po ylando omẹ ṣie Islaeli tọn lẹ po tọn bo to vẹvẹ nado biọ nukundagbe Jehovah Jiwheyẹwhe ṣie tọn gando osó wiwe Jiwheyẹwhe ṣie tọn go,+ 21  mọwẹ, dile n’gbẹ́ pò to dẹ̀ho, dawe lọ Gabliẹli,+ he n’ko mọ to numimọ mẹ dai lọ,+ wá dè e to whenue agbọ́ ko pé mi pete to nudi ojlẹ avọ́nunina whèjai tọn whenu. 22  E sọ na mi nukunnumọjẹnumẹ dọmọ: “Daniẹli E, todin yẹn ko wá nado na we zinzin po nukunnumọjẹnumẹ po. 23  To whenue hiẹ ko bẹ ovẹvivẹ towe jẹeji wẹ yẹn ko mọ nudọnamẹ lọ yí, yẹn sọ tọ́n wá nado dowẹn na we, na omẹ họakuẹ tlala*+ de wẹ hiẹ. Enẹwutu, lẹnnupọndo whẹho lọ ji bo mọnukunnujẹ numimọ lọ mẹ. 24  “Osẹ* 70 ko yin dide na omẹ towe lẹ podọ na tòdaho wiwe towe,+ nado dotana sẹ́nhẹngba, nado doalọtena ylando,+ nado basi ovẹsè na nuṣiwa,+ nado hẹn dodowiwa madopodo wá,+ nado yí hiadonu do tlẹ́ numimọ lọ po dọdai* lọ po+ podọ nado yiamisisadode Fiwiwe Fiwiwe lẹ tọn lọ.* 25  Hiẹ dona yọnẹn bo mọnukunnujẹemẹ dọ sọn whenue yè ko degbe nado hẹngọwa bo vọ́ Jelusalẹm gbá+ kakajẹ wiwá Mẹsia*+ Nukọntọ lọ+ tọn, osẹ 7 po osẹ 62 po na juwayi.+ E na yin hinhẹngọwa bo yin vivọgbá, gọna tòplitẹn po osindò po, ṣigba to ojlẹ ayimajai tọn lẹ mẹ. 26  “Podọ to osẹ 62 lọ lẹ godo, Mẹsia na yin sinsánsẹ,*+ bọ nudepope ma na pò na ẹn.+ “Omẹ nukọntọ de he ja tọn lẹ nasọ và tòdaho lọ po fiwiwe lọ po sudo.+ Opodo etọn nasọ yin gbọn singigọ dali. Podọ awhàn na tin kakajẹ opodo; nudide he yin bibasi do e ji wẹ vọjijẹ lẹ.+ 27  “E nasọ hẹn alẹnu lọ lodo na mẹsusu na osẹ dopo; podọ to odaa osẹ lọ tọn mẹ, ewọ na hẹn avọ́sinsan po avọ́nunina po nado doalọte.+ “Podọ to awà awuhiọnu lọ lẹ tọn de ji wẹ mẹhe nọ hẹn vọjijẹ wá na tin te;+ podọ nudide he yin bibasi lọ nasọ yin kinkọnjẹgbonu do nuhe jẹvọ́ lọ ji kakajẹ whenue e na yin kúnsúdona.”

Nudọnamẹ Odò Tọn

Enẹ wẹ, owe wiwe lẹ.
To paa mẹ, “mọ winyan nukunta tọn.”
To paa mẹ, “mọ winyan nukunta tọn.”
To paa mẹ, “sọta whẹdatọ mítọn he nọ dawhẹna mí.”
Kavi “mí ma hẹn nukunmẹ Jehovah Jiwheyẹwhe mítọn tọn bọ̀.”
Kavi “hiẹ yin nugbonọ.”
Kavi “mẹhe yè yiwanna taun; mẹhe yè nọ gbògbéna tlala.”
Enẹ wẹ, Osẹ owhe tọn.
To paa mẹ, “yẹwhegán.”
Kavi “Fiwiwe Gbaugbau lọ.”
Kavi “Mẹyiamisisadode.”
Kavi “hùhù.”