Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Daniẹli 8:1-27

NUHE E BẸHẸN LẸ

  • Numimọ agbò po gbọgbọẹ asu de po tọn (1-14)

    • Azò pẹvi de ze ede daga (9-12)

    • Kaka whèjai po afọnnu 2 300 po nado juwayi (14)

  • Gabliẹli detana numimọ lọ (15-27)

    • Zẹẹmẹ agbò po gbọgbọẹ asu lọ po tọn (20, 21)

    • Ahọlu he dobu de fọ́n (23-25)

8  To owhe atọ̀ntọ gandudu Ahọlu Bẹlṣazali+ tọn mẹ, yẹn Daniẹli mọ numimọ de he gbọnvona numimọ he n’ko mọ dai.+  Dile n’to numimọ lọ mọ, n’mọdọ n’tin to Ṣuṣani*+ figángán* lọ, to agbegbe* Elami+ tọn ji; to numimọ lọ mẹ, n’tin to tọ̀sisa Ulai tọn tó.  Dile n’ze nukun daga, pọ́n! agbò+ de ṣite to tọ̀sisa lọ tó bo tindo azò awe.+ Azò awe lọ lẹ dite, ṣigba ode dite hú awetọ podọ nukọn mẹ wẹ dehe dite lọ wá sọawuhia.+  N’mọ agbò lọ bọ e to mẹgbeyan hlan whèyihọ-waji, hlan agewaji podọ hlan hùwaji, bọ gbekanlin depope ma sọgan nọte to nukọn etọn, mọ mẹde ma tin he sọgan whlẹnmẹ sọn e si.*+ E to nuhe jlo e wà bo to ede zedaga.  Dile n’to nupọn, doayi e go! gbọgbọẹ asu+ de ja sọn whèyihọ-waji bo to jujugbọn nukunmẹ aigba lọ tọn pete, bo masọ jẹ kọmẹ. Gbọgbọẹ lọ sọ tindo azò he sọawuhia gànna-gànna de to nukun etọn lẹ ṣẹnṣẹn.+  E to dindọnsẹpọ agbò he tindo azò awe lọ, yèdọ agbò he n’ko mọ dai bọ e ṣite to tọ̀sisa lọ tó; e yí adi sinsinyẹn do to wezunhọ̀n jei e dè.  N’mọ bọ e to sisẹpọ agbò lọ bo ja e ji po homẹgble sinsinyẹn po. E zìn agbò lọ dai bo wẹ́n azò etọn awe lẹ, agbò lọ masọ penugo nado nọte to nukọn etọn. E zìn agbò lọ dai bo tùnafọ e ji bọ mẹde ma tin nado whlẹn ẹn sọn e si.*  Enẹgodo, gbọgbọẹ asu lọ ze ede daga zẹjlẹgo, ṣigba tlolo he e lẹzun huhlọnnọ, azò daho lọ yin winwẹ́n sẹ̀; azò ẹnẹ he sọawuhia gànna-gànna sọ wujẹgbonu do otẹn dopo tọn mẹ, hlan jẹhọn ẹnẹ olọn tọn lẹ.+  Azò devo, yèdọ azò pẹvi de, wujẹgbonu sọn dopo to azò lọ lẹ mẹ go bo wá klo taun hlan hùwaji, hlan whèzẹtẹn-waji podọ hlan aigba Gigonọ* lọ.+ 10  E klo sọmọ bo yì sọ́ awhànpa olọn tọn bosọ hẹn delẹ to awhànpa lọ po sunwhlẹvu lẹ po mẹ nado flẹ jẹ kọmẹ bo tùnafọ yé ji. 11  E tlẹ ze ede daga sọta Ahọvi awhànpa lọ tọn, podọ avọ́nunina gbesisọ mẹ tọn* lọ yin didesẹ sọn e dè bọ nọtẹn fiwiwe etọn tọn he ko yin didoai lọ yin hihọliai.+ 12  Awhànpa de sọ yin zizejo na ẹn, to pọmẹ hẹ avọ́nunina gbesisọ mẹ tọn* lọ, na sẹ́nhẹngba wutu; e sọ to nugbo zedlan kọmẹ bo to nuyiwa bosọ to kọdetọn dagbe tindo. 13  Yẹn sọ sè bọ omẹ wiwe de to hodọ bọ omẹ wiwe devo to didọna mẹhe to hodọ lọ dọmọ: “Nawẹ e na dẹnsọ bọ numimọ avọ́nunina gbesisọ mẹ tọn* lọ tọn po sẹ́nhẹngba he to vọjijẹ hẹnwa lọ po tọn na zindonukọn,+ nado hẹn fiwiwe lọ po awhànpa lọ po zun nuhe ji yè nọ tùnafọ?” 14  E sọ dọna mi dọmọ: “Kaka whèjai po afọnnu 2 300 po nado juwayi; podọ e họnwun dọ fiwiwe lọ na yin hinhẹngọwa ninọmẹ dagbe etọn mẹ.” 15  Dile yẹn, Daniẹli, to numimọ lọ pọ́n bo to tintẹnpọn nado mọnukunnujẹemẹ, n’mọ mẹde he awusọhia etọn taidi gbẹtọ de tọn ṣite to nukọn ṣie to ajiji mẹ. 16  N’sọ sè ogbè dawe de tọn to Ulai+ ṣẹnṣẹn bọ e dawhá dọmọ: “Gabliẹli E,+ hẹn dawe enẹ nado mọnukunnujẹ nuhe e mọ lọ mẹ.”+ 17  Enẹwutu, e sẹpọ fihe n’ṣite te lọ, ṣigba to whenue e wá, budi mi sọmọ bọ n’ṣinyọ́n nukunmẹ ai. E sọ dọna mi dọmọ: “Visunnu gbẹtọ tọn E, hiẹ ni mọnukunnujẹemẹ dọ ojlẹ opodo tọn mẹ wẹ numimọ lọ na mọ hẹndi te.”+ 18  Ṣigba, dile e gbẹ́ to hodọ hẹ mi, amlọn yìkànmẹ de yí mi dile n’gbẹ́ ṣinyọ́n nukunmẹ ai. Enẹwutu, e doalọ go e bo hẹn mi fọnṣite to fie n’ṣite te dai lọ.+ 19  E sọ dọna mi dọmọ: “Yẹn na hẹn we nado yọ́n nuhe na jọ to adà godo tọn ojlẹ whẹgbledomẹ tọn lọ tọn mẹ, na ojlẹ dide opodo lọ tọn mẹ wẹ e na mọ hẹndi te.+ 20  “Agbò azò awenọ he hiẹ mọ lọ nọtena ahọlu Media po Pẹlsia po tọn lẹ.+ 21  Gbọgbọẹ asu ofúnnọ lọ nọtena ahọlu Glẹki tọn;+ podọ azò daho he tin to nukun etọn lẹ ṣẹnṣẹn lọ nọtena ahọlu tintan lọ.+ 22  Na nuhe dù azò he yin winwẹ́n sẹ̀ bọ ẹnẹ wujẹgbonu do otẹn etọn mẹ lọ,+ ahọluduta ẹnẹ wẹ na fọ́n sọn akọta etọn mẹ, ṣigba e ma na yin po huhlọn etọn po. 23  “Podọ to adà godo tọn ahọluduta yetọn tọn mẹ, to whenue sẹ́nhẹngbatọ lẹ na ko yinuwa to gigọ́ mẹ pó godo,* ahọlu he awusọhia etọn dobu de, he nọ mọnukunnujẹ ohó he gẹdẹ lẹ mẹ* na fọ́n. 24  Huhlọn etọn na wá klo, ṣigba e ma na yin gbọn huhlọn etọn titi gblamẹ. E na hẹn husudo wá to aliho he jiawu de mẹ* bo na tindo kọdetọn dagbe to nudepope he e na wà mẹ. E na hẹn husudo wá huhlọnnọ lẹ ji podọ wá mẹwiwe lẹ ji ga.+ 25  Podọ gbọn ayiha gigẹdẹ etọn gblamẹ, e na yí oklọ zan nado tindo kọdetọn dagbe; e nasọ ze ede daga to ahun ede tọn mẹ; podọ to ojlẹ hihọ́ tọn mẹ,* e na hù mẹsusu sudo. E na tlẹ fọ́n do Ahọvi ahọvi lẹ tọn ji, ṣigba e na yin winwẹ́n sẹ̀ matin alọ gbẹtọvi tọn. 26  “Nuhe yin didọ to numimọ lọ mẹ gando whèjai po afọnnu lọ lẹ po go yin nugbo, ṣigba hiẹ dona hẹn numimọ lọ taidi aṣli, na ojlẹ dindẹn* de go wẹ e gando.”+ 27  Na yẹn Daniẹli tọn, agbọ́ pé mi bọ n’jẹazọ̀n na azán delẹ.+ Enẹgodo, n’fọ́n bo wà sinsẹ̀nzọn na ahọlu;+ ṣigba nuhe n’mọ lọ hẹn awuji mi, mẹde masọ sọgan mọnukunnujẹemẹ.+

Nudọnamẹ Odò Tọn

Kavi “Susa.”
Kavi “họ̀nmẹ; fibẹtado.”
Kavi “agbegbe fidugando.”
To paa mẹ, “sọn alọ etọn mẹ.”
To paa mẹ, “sọn alọ etọn mẹ.”
Kavi “Whanpẹnọ.”
Kavi “avọ́sinsan tẹgbẹ tọn.”
Kavi “avọ́sinsan tẹgbẹ tọn.”
Kavi “avọ́sinsan tẹgbẹ tọn.”
Kavi “ko jẹ dogbó yetọn kọ̀n.”
Kavi “he yin azọ́nyọnẹntọ to mẹkiklọ mẹ.”
Kavi “hẹn vasudo sinsinyẹn wá.”
Kavi vlavo, “podọ matin avase.”
Kavi “na sọgodo dindẹn.”