Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Daniẹli 6:1-28

NUHE E BẸHẸN LẸ

  • Ahọluzọnwatọ Pẹlsianu lẹ blasé do Daniẹli go (1-9)

  • Daniẹli ma doalọtena dẹ̀hiho (10-15)

  • Daniẹli to odò kinnikinni tọn mẹ (16-24)

  • Daliusi gbògbéna Jiwheyẹwhe (25-28)

6  Daliusi de agbegbe-gán 120 do ahọluduta lọ pete ji.+  E de ahọluzọnwatọ nukundeji atọ̀n do yé nù bọ Daniẹli yin dopo to yé mẹ;+ agbegbe-gán+ lọ lẹ sọ nọ dogbè na yé, na ahọlu nikaa hẹn nudepope gú.  Daniẹli sọ do ede hia taidi mẹhe gbọnvona ahọluzọnwatọ nukundeji he pò lẹ po agbegbe-gán lọ lẹ po, na gbigbọ vonọtaun de tin to ewọ mẹ,+ ahọlu sọ to linlẹn nado ze e daga do ahọluduta lọ blebu ji.  To ojlẹ enẹ mẹ, ahọluzọnwatọ nukundeji lọ lẹ po agbegbe-gán lọ lẹ po to dodonu de dín nado sawhẹdokọna Daniẹli gando whẹho otò* tọn lẹ go, ṣigba yé ma mọ dodonu kavi oklọ depope nado sawhẹdokọna ẹn, na e yin gbẹtọ dejidego de bọ vọdonanu kavi oklọ depope ma yin mimọ to ewọ mẹ.  Enẹwutu, dawe ehelẹ dọmọ: “Míwlẹ ma na mọ dodonu whẹsadokọnamẹ tọn depope gando Daniẹli ehe go, adavo mí dín nude sọta ẹ to osẹ́n Jiwheyẹwhe etọn tọn mẹ.”+  Whenẹnu, ahọluzọnwatọ nukundeji po agbegbe-gán ehelẹ po doawhàn yì ahọlu dè bosọ dọna ẹn dọmọ: “Ahọlu Daliusi E, hiẹ ni nọgbẹ̀ kakadoi.  Ahọluzọnwatọ họ̀nmẹ tọn lẹ, kọmẹ-gán lẹ, agbegbe-gán lẹ, ahọluzọnwatọ nukundeji họ̀nmẹ tọn lẹ po ayimatẹn-gán lẹpo po ko dewe dopọ nado de gbedide ahọlu tọn po osẹ́ndoai* de po tọ́n, dọ to azán 30 gblamẹ, mẹdepope he basi obiọ de hlan yẹwhe kavi gbẹtọ devo de gbọnvona hiẹ ahọlu, dona yin zizedlan odò kinnikinni lẹ tọn mẹ.+  Todin ahọlu E, hiẹ ni hẹn gbedide lọ lodo bo doalọ e mẹ,+ na e nikaa yin didiọ, kẹdẹdile osẹ́n Medianu po Pẹlsianu lẹ po tọn ma sọgan yin hùzẹdeji do.”+  Enẹwutu, Ahọlu Daliusi doalọ gbedide lọ po osẹ́ndoai lọ po mẹ. 10  Ṣigba, tlolo he Daniẹli yọnẹn dọ yè ko doalọ gbedide lọ mẹ, e yì owhé etọn gbè, yèdọ owhé he fleṣe abò aga tọn etọn lẹ tọn yin hùnhùn pànta Jelusalẹm.+ Ewọ sọ nọ jẹklo bo nọ hodẹ̀ bosọ nọ pà Jiwheyẹwhe etọn whla atọ̀n to gbèdopo, dile e ko nọ wà do gbọzangbọzan jẹnukọnna ehe. 11  To ojlẹ enẹ mẹ, dawe enẹlẹ biọ họmẹ po zingidi po bo mọ Daniẹli to obiọ basi bosọ to vẹvẹ nado biọ nukundagbe Jiwheyẹwhe etọn tọn. 12  Enẹgodo, yé dọnsẹpọ ahọlu bo flinnu in gando osẹ́ndoai lọ go dọmọ: “Be hiẹ ma doalọ osẹ́ndoai de mẹ dọ to azán 30 gblamẹ, mẹdepope he basi obiọ hlan yẹwhe kavi gbẹtọ de gbọnvona hiẹ ahọlu, dona yin zizedlan odò kinnikinni lẹ tọn mẹ ya?” Ahọlu gblọn dọmọ: “Whẹho lọ ko yin hinhẹn lodo gligli, kẹdẹdile osẹ́n Medianu po Pẹlsianu lẹ po tọn ma sọgan yin hùzẹdeji do.”+ 13  Yé sọ dọna ahọlu to afọdopolọji dọmọ: “Daniẹli, he yin hinhẹnwa sọn Juda taidi kanlinmọ,+ ma tindo sisi depope na hiẹ ahọlu, kavi na osẹ́ndoai he hiẹ ko doalọ e mẹ lọ, ṣigba whla atọ̀n wẹ ewọ nọ hodẹ̀ to gbèdopo.”+ 14  Tlolo he ahọlu sè ehe, e blawuna ẹn taun bọ e tẹnpọn nado dín ayiha de nado whlẹn Daniẹli; podọ e wà nulẹpo kakajẹ whèjai nado whlẹn ẹn. 15  To godo mẹ, dawe enẹlẹ doawhàn yì ahọlu dè bo dọna ẹn dọmọ: “Ahọlu E, doayi e go dọ osẹ́n Medianu po Pẹlsianu lẹ po tọn wẹ yindọ osẹ́ndoai kavi gbedide depope he ahọlu ko hẹn lodo ma sọgan yin didiọ.”+ 16  Enẹwutu, ahọlu degbe bọ yé hẹn Daniẹli wá bo ze e dlan odò kinnikinni lẹ tọn mẹ.+ Ahọlu sọ dọna Daniẹli dọmọ: “Jiwheyẹwhe towe he a to sinsẹ̀n madoalọte lọ na whlẹn we.” 17  Enẹgodo, zannu de yin hinhẹnwa bo yin zizedo odò lọ nù, ahọlu sọ yí alọkẹ hiadonugo tọn etọn po omẹ nukundeji etọn lẹ tọn po do dohiagona zannu lọ, na nudepope nikaa diọ gando Daniẹli go. 18  Enẹgodo, ahọlu lẹkọyi họ̀nmẹ. E sọ yí ozán lọ blebu do blanù bo gbẹ́ ayidedai lẹpo,* e masọ mọ amlọndọ.* 19  To godo mẹ, tlolo he owùn jẹ kinkẹ̀n ji, ahọlu fọ́n bo yawu yì odò kinnikinni lẹ tọn lọ tó. 20  Dile e dọnsẹpọ odò lọ, e dawhá ylọ Daniẹli po kọnugbè awubla tọn de po. Ahọlu sọ kanse Daniẹli dọmọ: “Daniẹli E, hiẹ devizọnwatọ Jiwheyẹwhe ogbẹ̀nọ lọ tọn, be Jiwheyẹwhe towe he hiẹ nọ to sinsẹ̀n madoalọte penugo nado whlẹn we sọn kinnikinni lẹ si ya?” 21  To afọdopolọji, Daniẹli dọna ahọlu dọmọ: “Ahọlu E, hiẹ ni nọgbẹ̀ kakadoi. 22  Jiwheyẹwhe ṣie do angẹli etọn hlan bo bọnùdo na kinnikinni lẹ+ bọ yé ma gbleawuna mi,+ na yẹn yin homẹvọnọ to nukọn etọn; mọdopolọ yẹn ma wà nudepope jẹagọdo hiẹ ahọlu.” 23  Homẹ hùn ahọlu tlala, e sọ degbe dọ Daniẹli ni yin didetọn sọn odò lọ mẹ. To whenue Daniẹli yin didetọn sọn odò lọ mẹ, awugble depope ma tin to e go, na ewọ ko dejido Jiwheyẹwhe etọn go wutu.+ 24  Whenẹnu, ahọlu degbe bọ dawe he ko sawhẹdokọna* Daniẹli lọ lẹ yin pinplan wá, yé sọ yin bibẹ dlan odò kinnikinni lẹ tọn lọ mẹ, to pọmẹ hẹ visunnu po asi yetọn lẹ po. Yé ma ko jẹ odò lọ mẹ pete whẹpo kinnikinni lẹ do jẹ yé ji bo gbà ohú yetọn lẹpo hányán.+ 25  Enẹgodo, Ahọlu Daliusi kanwehlan gbẹtọ lẹ, akọta lẹ po akọ̀ he nọ nọ̀ aigba ji lẹpo po+ dọmọ: “Jijọho susu ni tin hlan mì! 26  Yẹn to gbedide de detọ́n dọ to fihe ahọluduta ṣie paṣẹ gbọn lẹpo, gbẹtọ lẹ dona nọ dibu to Jiwheyẹwhe Daniẹli tọn nukọn.+ Na ewọ wẹ Jiwheyẹwhe ogbẹ̀nọ lọ bosọ tin kakadoi. Ahọluduta etọn ma na yin vivasudo gbede podọ gandudu madopodo de wẹ gandudu* etọn.+ 27  Ewọ nọ họ́ omẹ etọn lẹ+ bo nọ whlẹn yé bosọ nọ basi ohia lẹ po azọ́njiawu lẹ po to olọn mẹ podọ to aigba ji,+ na e whlẹn Daniẹli sọn ofẹ̀n kinnikinni lẹ tọn mẹ wutu.” 28  Enẹwutu, Daniẹli tindo kọdetọn dagbe to ahọluduta Daliusi+ tọn mẹ podọ to ahọluduta Kilusi Pẹlsianu lọ tọn mẹ.+

Nudọnamẹ Odò Tọn

To paa mẹ, “ahọluduta.”
Kavi “alọhẹndotenamẹ.”
Kavi vlavo, “bọ hànjitọ depope ma yin hinhẹnwa.”
To paa mẹ, “amlọn etọn họ̀nna ẹn.”
Kavi “dọho mẹhẹngble tọn sọta.”
Kavi “nupojipetọ-yinyin.”