Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Daniẹli 5:1-31

NUHE E BẸHẸN LẸ

  • Bẹlṣazali basi hùnwhẹ de (1-4)

  • Alọviyẹyẹ de kannu do adó go (5-12)

  • Daniẹli detana nukinkan lọ (13-25)

  • Tadena: Babilọni na jai (26-31)

5  Na nuhe dù Ahọlu Bẹlṣazali,+ e basi hùnwhẹ daho de na fọtọ́n omẹ nukundeji etọn lẹ tọn, bọ ewọ sọ to ovẹn nù to nukọn yetọn.+  Dile ovẹn jẹ múmú Bẹlṣazali ji, e degbe dọ núzinzan sika tọn po fataka tọn lẹ po he otọ́ etọn Nẹbukadnẹzali ko bẹ wá sọn tẹmpli Jelusalẹm tọn mẹ ni yin hinhẹnwa,+ na ahọlu nido sọgan yí yé do nùahàn dopọ hẹ omẹ nukundeji etọn lẹ, asimọwhlá etọn lẹ po asi etọn devo lẹ po.  Yé sọ hẹn núzinzan sika tọn he ko yin bibẹ sọn tẹmpli ohọ̀ Jiwheyẹwhe tọn mẹ to Jelusalẹm lẹ wá bọ ahọlu yí yé do nùahàn dopọ hẹ omẹ nukundeji etọn lẹ, asimọwhlá etọn lẹ po asi etọn devo lẹ po.  Yé nù ovẹn bosọ na pipà yẹwhe sika po fataka po tọn, gànvẹẹ tọn, gànyuu tọn, atin tọn po zannu tọn lẹ po.  To ojlẹ enẹ mẹ pẹẹ wẹ alọviyẹyẹ sunnu de tọn lẹ sọawuhia bo jẹ nukan ji do adó titlẹ́ họ̀nmẹ tọn lọ go pannukọn miyọ́ngbán-tin lọ, bọ ahọlu to alọgodo alọ he to nukan lọ tọn mọ.  Whenẹnu, nukunmẹ ahọlu tọn kúṣiọ* bọ linlẹn etọn lẹ jẹ tuklado e ji, alinmẹ etọn jẹ sisọsisọ ji+ bọ kligonu etọn ode jẹ hihò do awetọ go ji.  Ahọlu sọ dawhá jẹgbonu nado ylọ afinyọnnọ lẹ, Kaldeanu lẹ* po sunwhlẹvu-pọntọ lẹ po wá.+ Ewọ sọ dọna nuyọnẹntọ Babilọni tọn lẹ dọmọ: “Eyin mẹdepope sọgan hia nukinkan ehe bo dọ tadena etọn na mi, sopẹ́-vọ̀ na yin yíyí do doaṣọ́na ẹn, kọnú sika tọn de nasọ yin didona ẹn+ bọ ewọ na dugán taidi omẹ atọ̀ntọ to ahọluduta lọ mẹ.”+  Whenẹnu, nuyọnẹntọ ahọlu tọn lẹpo biọ họmẹ wá, ṣigba yé ma penugo nado hia nukinkan lọ kavi hẹn tadena lọ zun yinyọnẹn na ahọlu.+  Enẹwutu, obu jẹ Ahọlu Bẹlṣazali ji tlala bọ nukunmẹ etọn kúṣiọ; omẹ nukundeji etọn lẹ sọ jẹflumẹ.+ 10  Na ahọsi sè nuhe ahọlu po omẹ nukundeji etọn lẹ po dọ wutu, e biọ ohọ̀ hùnwhẹ tọn lọ mẹ. Ewọ sọ dọmọ: “Ahọlu E, hiẹ ni nọgbẹ̀ kakadoi. A dike linlẹn towe dotukla we blo, mọ a dike nukunmẹ towe kúṣiọ blo. 11  Dawe* de tin to ahọluduta towe mẹ he tindo gbigbọ yẹwhe wiwe lẹ tọn. To ojlẹ otọ́ towe tọn mẹ, wuntuntun, zinzin po nuyọnẹn he taidi nuyọnẹn yẹwhe lẹ tọn po yin mimọ to ewọ mẹ.+ Otọ́ towe, Ahọlu Nẹbukadnẹzali, ko sọ de e taidi ogán yẹwhenọ nujlẹtọ lẹ, afinyọnnọ lẹ, Kaldeanu lẹ* po sunwhlẹvu-pọntọ lẹ po tọn;+ otọ́ towe ko wàmọ, hiẹ ahọlu E. 12  Na Daniẹli, mẹhe ahọlu ylọdọ Bẹlteṣazali,+ tindo gbigbọ vonọtaun de gọna oyọnẹn po zinzin po nado detana odlọ lẹ, nado detana oló lẹ podọ nado mọ pọngbọ na nuhahun he gẹdẹ lẹ.*+ Enẹwutu, dike Daniẹli ni yin yiylọ wá, ewọ nasọ dọ tadena lọ na we.” 13  Enẹwutu, Daniẹli yin hinhẹnwa ahọlu nukọn. Ahọlu sọ kanse Daniẹli dọmọ: “Hiẹ wẹ Daniẹli he yin hinhẹnwa sọn Juda taidi kanlinmọ,+ yèdọ mẹhe otọ́ ṣie ahọlu hẹnwa sọn Juda lọ ya?+ 14  N’ko sè gando gowe dọ gbigbọ yẹwhe lẹ tọn tin to hiẹ mẹ+ bọ wuntuntun, zinzin po nuyọnẹn vonọtaun po ko sọ yin mimọ to hiẹ mẹ.+ 15  Nuyọnẹntọ lẹ po afinyọnnọ lẹ po ko yin hinhẹnwa nukọn ṣie nado hia nukinkan ehe bo hẹn tadena etọn zun yinyọnẹn na mi, amọ́ yé ma penugo nado dọ tadena owẹ̀n lọ tọn.+ 16  Ṣigba, n’ko sè gando hiẹ go dọ a penugo nado dọ tadena lẹ+ podọ nado mọ pọngbọ na nuhahun he gẹdẹ lẹ.* Todin, eyin hiẹ penugo nado hia nukinkan lọ bo hẹn tadena etọn zun yinyọnẹn na mi, sopẹ́-vọ̀ na yin yíyí do doaṣọ́na we, kọnú sika tọn de nasọ yin didona we bọ hiẹ na dugán taidi omẹ atọ̀ntọ to ahọluduta lọ mẹ.”+ 17  Whenẹnu, Daniẹli gblọnna ahọlu dọmọ: “Hẹn nunina towe lẹ go bo yí nunina towe lẹ na mẹdevo lẹ. Ṣigba, yẹn na hia nukinkan lọ na ahọlu bo nasọ hẹn tadena etọn zun yinyọnẹn na ẹn. 18  Na hiẹ tọn, ahọlu E, Jiwheyẹwhe Gigogán lọ wẹ na ahọluduta lọ, kiklo-yinyin, gbégbò po gigo daho po Nẹbukadnẹzali otọ́ towe.+ 19  Na kiklo-yinyin he Ewọ na ẹn wutu, gbẹtọ lẹ, akọta lẹ po akọ̀ lẹpo po nọ dibu to nukọn etọn.+ Mẹdepope he jlo e wẹ e nọ hù kavi pò dogbẹ̀ podọ mẹdepope he jlo e wẹ e nọ zedaga kavi dowinyan.+ 20  Ṣigba, whenue ahun etọn lẹzun saklanọ bọ ewọ lẹzun tasinyẹntọ bo nọ yinuwa po sakla po,+ e yin hinhẹnwa odò sọn ofìn ahọluduta etọn tọn ji bọ gigo etọn yin yíyí sọn e si. 21  Ewọ sọ yin yinyan dogbé sọn gbẹtọ lẹ ṣẹnṣẹn bọ ahun etọn yin didiọ zun kanlin de tọn nkọ, fininọ etọn sọ tin hẹ kẹtẹkẹtẹ gbémẹ tọn lẹ. Ogbé wẹ nọ yin nina ẹn nado dù taidi oyìnsú lẹ bọ ahun agahomẹ tọn wẹ nọ hẹn agbasa etọn yọ̀n kaka e do wá yọnẹn dọ Jiwheyẹwhe Gigogán lọ wẹ yin Ogán to ahọluduta gbẹtọvi tọn mẹ podọ mẹdepope he jlo e wẹ e nọ zedaga nado dugán do e ji.+ 22  “Ṣigba, hiẹ visunnu etọn Bẹlṣazali ma whiwhẹ ahun towe, dile etlẹ yindọ a yọ́n ehe lẹpo. 23  Kakatimọ, a ze dewe daga sọta Oklunọ olọn tọn+ bosọ biọ dọ núzinzan ohọ̀ etọn mẹ tọn lẹ ni yin hinhẹnwa na we.+ Enẹgodo, hiẹ yí yé do nù ovẹn dopọ hẹ omẹ nukundeji towe lẹ, asimọwhlá towe lẹ po asi towe devo lẹ po bosọ na pipà yẹwhe sika po fataka po tọn, gànvẹẹ tọn, gànyuu tọn, atin tọn po zannu tọn lẹ po, yèdọ yẹwhe he ma nọ mọ nudepope, sè nudepope kavi yọ́n nudepope.+ Ṣigba, hiẹ ma pagigona Jiwheyẹwhe he sin alọmẹ gbigbọ towe po aliho towe lẹpo po tin te.+ 24  Enẹwutu wẹ alọ lọ do yin didohlan sọn ewọ dè bọ onú ehe do yin kinkan.+ 25  Nuhe sọ yin kinkan lọ lẹ die: MENE, MENE, TEKẸLI podọ PALSINI. 26  “Tadena hogbe lọ lẹ tọn die: MENE, Jiwheyẹwhe ko hia azán gandudu towe tọn lẹ bo ko hẹn ẹn wá vivọnu.*+ 27  “TEKẸLI, hiẹ ko yin jijlẹ pọ́n to nujlẹgàn lẹ mẹ bọ a ma pegan. 28  “PELẸSI, ahọluduta towe ko yin mimá bo ko yin jijona Medianu lẹ po Pẹlsianu lẹ po.”*+ 29  Whenẹnu, Bẹlṣazali degbe bọ yé yí sopẹ́-vọ̀ do doaṣọ́na Daniẹli bo yí kọnú sika tọn de do na ẹn; yé sọ lá gando ewọ go dọ ewọ wẹ na lẹzun omẹ atọ̀ntọ to ahọluduta lọ mẹ.+ 30  To ozán enẹ mẹ pẹẹ wẹ Bẹlṣazali ahọlu Kaldeanu lọ yin hùhù.+ 31  Daliusi+ Medianu lọ sọ yí ahọluduta lọ; nudi owhe 62 wẹ e tindo.

Nudọnamẹ Odò Tọn

Kavi “awusọhia ahọlu tọn diọ.”
Enẹ wẹ, pipli de he yin azọ́nyọnẹntọ to dọṣẹdidọ po sunwhlẹvu-pinpọn po mẹ.
Kavi “Sunnu nugopetọ.”
Enẹ wẹ, pipli de he yin azọ́nyọnẹntọ to dọṣẹdidọ po sunwhlẹvu-pinpọn po mẹ.
To paa mẹ, “nado tún agó lẹ.”
To paa mẹ, “nado tún agó lẹ.”
Kavi “bo ko gbẹ́ ẹ dai.”
“PELẸSI, ahọluduta towe ko yin mimá.” Pelẹsi yin hogbe dopolọ hẹ Palsini bo dlẹnalọdo onú dopo.