Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Daniẹli 3:1-30

NUHE E BẸHẸN LẸ

  • Boṣiọ sika tọn Nẹbukadnẹzali tọn (1-7)

    • E biọ dọ yè ni sẹ̀n boṣiọ lọ (4-6)

  • Yè sawhẹ tolivivẹ tọn dokọna Heblu 3 lẹ (8-18)

    • “Míwlẹ ma na sẹ̀n yẹwhe towe lẹ” (18)

  • Yé yin bibẹ dlan zòhọ mẹ (19-23)

  • Yin whinwhlẹn sọn zòhọ lọ mẹ (24-27)

  • Ahọlu pagigona Jiwheyẹwhe (28-30)

3  Nẹbukadnẹzali ahọlu basi boṣiọ sika tọn de he jiyiyi etọn yin awagbà 60* bọ gbigblo etọn yin awagbà 6.* E sọ ze e tùnte do dankló Dula tọn ji to agbegbe* Babilọni tọn ji.  Enẹgodo, Ahọlu Nẹbukadnẹzali dowẹn hlan nado bẹ agbegbe-gán, kọmẹ-gán, ayimatẹn-gán, ayinamẹtọ, akuẹbẹhẹntọ, whẹdatọ, whẹdọtọ po anadenanutọ agbegbe* lọ lẹ tọn lẹpo po pli nado wá hùnwhẹ didoai boṣiọ he Ahọlu Nẹbukadnẹzali ko ze tùnte lọ tọn.  Enẹwutu, agbegbe-gán, kọmẹ-gán, ayimatẹn-gán, ayinamẹtọ, akuẹbẹhẹntọ, whẹdatọ, whẹdọtọ po anadenanutọ agbegbe* lọ lẹ tọn lẹpo po bẹ yede pli na hùnwhẹ didoai boṣiọ he Ahọlu Nẹbukadnẹzali ko ze tùnte lọ tọn. Yé sọ ṣite to boṣiọ he Nẹbukadnẹzali ko ze tùnte lọ nukọn.  Nulátọ sọ yí ogbè lélé do lá dọmọ: “Mì gbẹtọ lẹ, akọta lẹ po akọ̀ lẹpo po emi, mì yin gbedena,  dọ eyin mì sè nudidọ azò, ován, kete, ajalẹn, hànjinu okànnọ, opẹ̀n po hànjinu wunmẹ devo lẹpo po tọn, mì dona ṣinyọ́n nukunmẹ ai bo basi sinsẹ̀n hlan boṣiọ sika tọn he Ahọlu Nẹbukadnẹzali ko ze tùnte.  Mẹdepope he ma ṣinyọ́n nukunmẹ ai bo basi sinsẹ̀n na yin zizedlan zòhọ he to jiji lọ mẹ to afọdopolọji.”+  Enẹwutu, to whenue gbẹtọ lẹpo sè nudidọ azò, ován, kete, ajalẹn, hànjinu okànnọ po hànjinu wunmẹ devo lẹpo po tọn, gbẹtọ lẹ, akọta lẹ po akọ̀ lẹpo po ṣinyọ́n nukunmẹ ai bo basi sinsẹ̀n hlan boṣiọ sika tọn he Ahọlu Nẹbukadnẹzali ko ze tùnte lọ.  To ojlẹ enẹ mẹ, Kaldeanu delẹ tọ́n wá bo sawhẹdokọna* Ju lẹ.  Yé dọna Ahọlu Nẹbukadnẹzali dọmọ: “Ahọlu E, hiẹ ni nọgbẹ̀ kakadoi. 10  Ahọlu E, hiẹ na gbedide lọ dọ mẹdepope he sè nudidọ azò, ován, kete, ajalẹn, hànjinu okànnọ, opẹ̀n po hànjinu wunmẹ devo lẹpo po tọn dona ṣinyọ́n nukunmẹ ai bo basi sinsẹ̀n hlan boṣiọ sika tọn lọ; 11  podọ mẹdepope he ma ṣinyọ́n nukunmẹ ai bo basi sinsẹ̀n dona yin zizedlan zòhọ he to jiji lọ mẹ.+ 12  Ṣigba, Ju delẹ tin he hiẹ de taidi anadenanutọ to agbegbe* Babilọni tọn ji: Ṣadlaki, Meṣaki po Abẹdinẹgo po.+ Ahọlu E, sunnu ehelẹ ma tindo sisi depope na we. Yewlẹ ma to yẹwhe towe lẹ sẹ̀n bosọ gbẹ́ nado basi sinsẹ̀n hlan boṣiọ sika tọn he a ko ze tùnte lọ.” 13  Whenẹnu, Nẹbukadnẹzali yí adi sinsinyẹn do degbe dọ Ṣadlaki, Meṣaki po Abẹdinẹgo po ni yin pinplan wá. Dawe lọ lẹ sọ yin pinplan wá ahọlu nukọn. 14  Nẹbukadnẹzali sọ dọna yé dọmọ: “Be nugbo wẹ dọ mìwlẹ, Ṣadlaki, Meṣaki po Abẹdinẹgo po, ma to yẹwhe ṣie lẹ sẹ̀n+ bosọ gbẹ́ nado basi sinsẹ̀n hlan boṣiọ sika tọn he n’ko ze tùnte lọ ya? 15  Todin, eyin mì sè nudidọ azò, ován, kete, ajalẹn, hànjinu okànnọ, opẹ̀n po hànjinu wunmẹ devo lẹpo po tọn, bọ mì saa ṣinyọ́n nukunmẹ ai bo basi sinsẹ̀n hlan boṣiọ he n’ko basi lọ, be hó fó. Ṣigba, eyin mì gbẹ́ nado basi sinsẹ̀n, whenẹnu mì na yin zizedlan zòhọ he to jiji lọ mẹ to afọdopolọji. Podọ yẹwhe tẹwẹ sọgan whlẹn mì sọn alọ ṣie mẹ?”+ 16  Ṣadlaki, Meṣaki po Abẹdinẹgo po sọ gblọnna ahọlu dọmọ: “Nẹbukadnẹzali E, e ma yin dandan dọ mí ni gblọn nude na we to whẹho ehe mẹ. 17  Ahọlu E, eyin e biọ domọ, Jiwheyẹwhe mítọn he sẹ̀n mí te penugo nado whlẹn mí sọn zòhọ he to jiji lọ mẹ podọ nado whlẹn mí sọn alọ towe mẹ.+ 18  Ṣigba, eyin ewọ ma tlẹ wàmọ, ahọlu E, gbọ e ni họnwun na we dọ, míwlẹ ma na sẹ̀n yẹwhe towe lẹ kavi basi sinsẹ̀n hlan boṣiọ sika tọn he a ko ze tùnte.”+ 19  Whenẹnu, adi Ṣadlaki, Meṣaki po Abẹdinẹgo po tọn do Nẹbukadnẹzali sọmọ bọ awusọhia nukunmẹ etọn tọn diọ* gando yé go, ewọ sọ degbe dọ zòhọ lọ ni yin hinhẹn hùnmiyọ́n whla ṣinawe hú dai tọn. 20  E sọ degbena sunnu huhlọnnọ delẹ sọn awhànfuntọ etọn lẹ mẹ nado blá Ṣadlaki, Meṣaki po Abẹdinẹgo po bo bẹ yé dlan zòhọ he to jiji lọ mẹ. 21  Enẹwutu, yé yin biblá po awù daho yetọn lẹ po to okọ̀, gọna awù, gbakun po avọ̀ devo he yé do lẹpo po to okọ̀, yé sọ yin bibẹ dlan zòhọ he to jiji lọ mẹ. 22  Na gbedide ahọlu tọn lọ sinyẹn sọmọ bọ zòhọ lọ yin hinhẹn hùnmiyọ́n zẹjlẹgo wutu, sunnu he ze Ṣadlaki, Meṣaki po Abẹdinẹgo po lọ lẹ wẹ yin hùhù gbọn miyọ́n he to jiji lọ dali. 23  Ṣigba, sunnu atọ̀n ehelẹ, yèdọ Ṣadlaki, Meṣaki po Abẹdinẹgo po, nọ biblá do jai jẹ zòhọ he to jiji lọ mẹ. 24  Whenẹnu, obu jẹ Ahọlu Nẹbukadnẹzali ji bọ e yawu fọ́n bo dọna ahọluzọnwatọ nukundeji etọn lẹ dọmọ: “E ma yin sunnu atọ̀n wẹ mí blá bo bẹ dlan miyọ́n lọ mẹ ya?” Yé sọ gblọnna ahọlu dọmọ: “Mọwẹ, ahọlu E.” 25  Ewọ sọ dọmọ: “Pọ́n! Sunnu ẹnẹ wẹ n’to mimọ hlan bọ yé to túntún bo to zọnlinzin pé to miyọ́n lọ ṣẹnṣẹn, mọ nudepope ma wà yé, podọ awusọhia omẹ ẹnẹtọ tọn taidi visunnu yẹwhe lẹ tọn de.” 26  Nẹbukadnẹzali sọ dọnsẹpọ họntonu zòhọ he to jiji lọ tọn bo dọmọ: “Ṣadlaki, Meṣaki po Abẹdinẹgo po, mì devizọnwatọ Jiwheyẹwhe Gigogán lọ+ tọn lẹ, mì tọ́njẹgbonu bo wá!” Ṣadlaki, Meṣaki po Abẹdinẹgo po sọ tọ́njẹgbonu sọn miyọ́n lọ ṣẹnṣẹn. 27  Agbegbe-gán, kọmẹ-gán, ayimatẹn-gán po ahọluzọnwatọ nukundeji he pli dopọ to finẹ lẹ po+ sọ mọdọ miyọ́n lọ ma yí nudepope wà* do agbasa sunnu ehelẹ tọn ji;+ miyọ́n ma tlẹ wlá dopo tata to oda he to ota na yé lẹ mẹ, nude masọ wà awù daho yetọn lẹ podọ miyọ́n ma tlẹ lunwán to yé go tata. 28  Whenẹnu, Nẹbukadnẹzali lá dọmọ: “Pipà wẹ na Jiwheyẹwhe Ṣadlaki, Meṣaki po Abẹdinẹgo po tọn,+ mẹhe do angẹli etọn hlan bo whlẹn devizọnwatọ etọn lẹ. Yé dejido ewọ go bo vẹtolina gbedide ahọlu tọn bosọ jlo nado kú* kakati nado sẹ̀n bo litaina yẹwhe devo depope adavo Jiwheyẹwhe yetọn titi.+ 29  Enẹwutu, yẹn to gbedide ehe detọ́n dọ gbẹtọ kavi akọta kavi akọ̀ depope he dọ nudepope sọta Jiwheyẹwhe Ṣadlaki, Meṣaki po Abẹdinẹgo po tọn dona yin jijá do flinflin bọ owhé yetọn na lẹzun adàdo otò tọn;* na yẹwhe devo de ma tin he penugo nado whlẹnmẹ taidi ehe.”+ 30  Enẹgodo, Ṣadlaki, Meṣaki po Abẹdinẹgo po yin zizedaga* gbọn ahọlu dali to agbegbe* Babilọni tọn ji.+

Nudọnamẹ Odò Tọn

Nudi m 27. Pọ́n Nud. B14.
Nudi m 2,7. Pọ́n Nud. B14.
Kavi “agbegbe fidugando.”
Kavi “agbegbe fidugando.”
Kavi “agbegbe fidugando.”
Kavi “dọho mẹhẹngble tọn sọta.”
Kavi “agbegbe fidugando.”
Kavi “bọ nuyiwa etọn diọ pete.”
Kavi “tindo huhlọn.”
Kavi “jo agbasa yetọn.”
Kavi vlavo, “ogbóji; afọdaitẹn.”
To paa mẹ, “yin hinhẹn tindo kọdetọn dagbe.”
Kavi “agbegbe fidugando.”