Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Daniẹli 1:1-21

NUHE E BẸHẸN LẸ

  • Babilọni yangbé Jelusalẹm tọn (1, 2)

  • Azọ́nplọnmẹ vonọtaun na jọja kanlinmọ lẹ (3-5)

  • Yè tẹ́n nugbonọ-yinyin Heblu 4 lẹ tọn pọ́n (6-21)

1  To owhe atọ̀ntọ gandudu Ahọlu Jehoiakimi+ Juda tọn mẹ, Ahọlu Nẹbukadnẹzali Babilọni tọn wá Jelusalẹm bo dosla lẹdo e.+  To ojlẹ de godo, Jehovah jo Ahọlu Jehoiakimi Juda tọn do alọ etọn mẹ,+ to pọmẹ hẹ nuyizan ohọ̀* Jiwheyẹwhe nugbo lọ tọn delẹ, ewọ sọ hẹn yé wá aigba Ṣinali* tọn ji+ to ohọ̀* yẹwhe etọn tọn mẹ. E bẹ nuyizan lọ lẹ do adọkunnu sẹdotẹn yẹwhe etọn tọn.+  Enẹgodo, ahọlu degbena Aṣpenazi ahọluzọnwatọ-gán họ̀nmẹ tọn nado hẹn delẹ to Islaelivi* lẹ mẹ wá, gọna mẹhe wá sọn whẹndo ahọlu po omẹ nukundeji po tọn mẹ lẹ.+  Yé dona yin jọja* he ma tindo oblọ depope, he tindo awusọhia dagbe, nuyọnẹn, oyọnẹn po wuntuntun po,+ bosọ penugo nado sẹ̀n to họ̀nmẹ. E dona plọn yé wekinkan po ogbè Kaldeanu lẹ tọn po.  Humọ, ahọlu de núdùdù egbesọegbesọ tọn na yé sọn onú dojó ahọlu tọn lẹ mẹ podọ sọn ovẹn he ewọ nọ nù mẹ. Yé dona yin azọ́nplọn* na owhe atọ̀n bọ to vivọnu ojlẹ enẹ tọn, yé na jẹ sinsẹ̀nzọn wà na ahọlu ji.  Amọ́, delẹ to yé mẹ wá sọn hẹnnu* Juda tọn mẹ: Daniẹli,*+ Hanania,* Miṣaẹli* po Azalia* po.+  Ahọluzọnwatọ nukundeji họ̀nmẹ tọn lọ sọ na yinkọ* dopodopo yetọn; e do Bẹlteṣazali+ na Daniẹli, Ṣadlaki na Hanania, Meṣaki na Miṣaẹli, podọ Abẹdinẹgo na Azalia.+  Ṣigba, Daniẹli magbe to ahun etọn mẹ ma nado yí onú dojó ahọlu tọn lẹ kavi ovẹn he e nọ nù do hẹn ede flu. Enẹwutu, e biọgbè ahọluzọnwatọ nukundeji họ̀nmẹ tọn lọ ma nado hẹn ede flu to aliho ehe mẹ.  Jiwheyẹwhe nugbo lọ sọ hẹn ahọluzọnwatọ nukundeji họ̀nmẹ tọn lọ nado do nukundagbe* po lẹblanu po hia Daniẹli.+ 10  Ṣigba, ahọluzọnwatọ nukundeji họ̀nmẹ tọn lọ dọna Daniẹli dọmọ: “Obu oklunọ ṣie ahọlu tọn wẹ to dìdì mi, yèdọ mẹhe ko de núdùdù po ahàn po na mì. Eyin e ka wá jọ bọ e mọdọ mì gblekàn hú jọja* ogbẹ́ mìtọn he pò lẹ lo? Mìwlẹ na hẹn mi* nado hùwhẹ to ahọlu nukọn.” 11  Ṣigba, Daniẹli dọna mẹgopọntọ he ahọluzọnwatọ nukundeji họ̀nmẹ tọn lọ ko de do Daniẹli, Hanania, Miṣaẹli po Azalia po ji dọmọ: 12  “Jaale, tẹ́n devizọnwatọ towe lẹ pọ́n na azán ao bo dike omá ni nọ yin nina mí nado dù podọ osin nado nù; 13  enẹgodo yí awusọhia mítọn jlẹdo awusọhia jọja* he nọ dù onú dojó ahọlu tọn lẹ go bo yinuwa hẹ devizọnwatọ towe lẹ sọgbe hẹ nuhe a na mọ.” 14  E sọ kẹalọyi nuzedonukọnnamẹ yetọn bo tẹ́n yé pọ́n na azán ao. 15  To vivọnu azán ao lọ lẹ tọn, awusọhia yetọn pọnte bọ yé sọ tindo agbasalilo dagbe* hú jọja* he nọ dù onú dojó ahọlu tọn lẹpo. 16  Enẹwutu, mẹgopọntọ lọ nọ na yé omá kakati nido yin onú dojó lẹ po ovẹn po. 17  Jiwheyẹwhe nugbo lọ sọ na jọja* ẹnẹ ehelẹ oyọnẹn po zinzin po gando wekinkan po nuyọnẹn wunmẹ lẹpo po go; nukunnumọjẹnumẹ sọ yin nina Daniẹli gando numimọ po odlọ wunmẹ lẹpo po go.+ 18  To vivọnu ojlẹ he ahọlu ko de nado plan yé wá lọ tọn,+ ahọluzọnwatọ nukundeji họ̀nmẹ tọn lọ plan yé wá Nẹbukadnẹzali nukọn. 19  To whenue ahọlu dọho hẹ yé, mẹdevo de ma yin mimọ to pipli lọ blebu mẹ he taidi Daniẹli, Hanania, Miṣaẹli po Azalia po;+ yé sọ zindonukọn nado to sinsẹ̀nzọnwa to ahọlu nukọn. 20  Eyin ahọlu kanhose yé gando whẹho depope he biọ nuyọnẹn po nukunnumọjẹnumẹ po go, e nọ mọdọ yé pọnte whla ao hú yẹwhenọ nujlẹtọ po afinyọnnọ+ he to fidugando etọn pete mẹ lẹpo po. 21  Daniẹli sọ gbọṣi finẹ kakajẹ owhe tintan Ahọlu Kilusi tọn mẹ.+

Nudọnamẹ Odò Tọn

Kavi “tẹmpli.”
Enẹ wẹ, Babilọnia.
Kavi “tẹmpli.”
To paa mẹ, “visunnu Islaeli tọn.”
To paa mẹ, “ovi.”
Kavi vlavo, “yin núdùdù na.”
To paa mẹ, “visunnu.”
Zẹẹmẹdo “Jiwheyẹwhe Wẹ Whẹdatọ Ṣie.”
Zẹẹmẹdo “Jehovah Ko Do Nukundagbe Hia.”
Vlavo zẹẹmẹdo “Mẹnu Wẹ Taidi Jiwheyẹwhe?”
Zẹẹmẹdo “Jehovah Ko Gọalọ.”
Enẹ wẹ, yinkọ Babilọninu tọn lẹ.
Kavi “homẹdagbe.”
To paa mẹ, “ovi he yin.”
To paa mẹ, “ota ṣie.”
To paa mẹ, “ovi.”
To paa mẹ, “tindo ojó agbasalan tọn.”
To paa mẹ, “ovi.”
To paa mẹ, “ovi.”