Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Avigbè Jelemia tọn 2:1-22

NUHE E BẸHẸN LẸ

  • Homẹgble Jehovah tọn sọta Jelusalẹm

    • Awuvẹmẹ ma yin didohia (2)

    • Jehovah taidi kẹntọ de na ẹn (5)

    • Yè viavi na Ziọni (11-13)

    • Aligbọntọ vlẹ tòdaho whanpẹnọ dai tọn kò (15)

    • Kẹntọ lẹ jaya na aijijẹ Ziọni tọn (17)

א [Alẹfi] 2  Lehe Jehovah ko yí aslọ súyu do ṣinyọ́n viyọnnu Ziọni tọn to homẹgble etọn mẹ do! Ewọ ko ze whanpẹ Islaeli tọn dlan sọn olọn mẹ hlan aigba.+ Ewọ ma flin tokloafọligbe etọn+ to azán homẹgble etọn tọn gbè. ב [Bẹti]   Jehovah ko ze fininọ Jakọbu tọn lẹpo mì matin awuvẹmẹ. Ewọ ko họ́ figángán viyọnnu Juda tọn lẹ liai to adi etọn mẹ.+ E ko hẹn ahọluduta+ po ahọvi etọn lẹ po wá kọmẹ bo ko sọ hẹn yé flu.+ ג [Gimẹli]   E ko sán huhlọn* Islaeli tọn lẹpo liai to homẹgble sinsinyẹn etọn mẹ. E dọ̀n adusilọ etọn dogodo to whenue kẹntọ dọnsẹpọ,+ E sọ to zoji to Jakọbu mẹ taidi miyọ́n he nọ fiọ nuhe lẹdo e pé lẹpo.+ ד [Dalẹti]   E ko dlẹn ogá etọn* taidi kẹntọ de; adusilọ etọn ko wleawufo taidi kẹntọ de;+ E to mẹhe yọ́npọ́n lẹpo hù mapote.+ E sọ kọ̀n adi etọn jẹgbonu do gòhọ viyọnnu Ziọni tọn mẹ+ taidi miyọ́n de.+ ה [He]   Jehovah ko wá tin taidi kẹntọ de;+ E ko ze Islaeli mì. E ko ze atọ̀họ̀ etọn lẹpo mì; E ko họ́ figángán etọn lẹpo liai. E sọ hẹn aluẹmẹninọ po avigbè po sudeji to viyọnnu Juda tọn ṣẹnṣẹn. ו [Wau]   E yinuwa hẹ gòhọ etọn to aliho sinsinyẹn mẹ+ taidi azava de to jipa de mẹ. Ewọ ko doalọtena hùnwhẹ etọn.*+ Jehovah ko hẹn hùnwhẹ po gbọjẹzan po nado yin winwọn to Ziọni, Podọ to homẹgble sinsinyẹn etọn mẹ, ewọ ma do lẹblanu depope hia ahọlu po yẹwhenọ po.+ ז [Zayini]   Jehovah ko gbẹ́ agbà etọn dai; Ewọ ko gbẹkọ fiwiwe etọn go.+ E ko jo adó atọ̀họ̀ gángán etọn lẹ tọn do alọ kẹntọ tọn mẹ.+ Yé ko ze ogbè yetọn daga to ohọ̀ Jehovah tọn mẹ+ taidi to azán hùnwhẹ de tọn gbè. ח [Hẹti]   Jehovah ko magbe nado họ́ adó viyọnnu Ziọni tọn liai.+ Ewọ ko dlẹn nujlẹkàn lọ.+ E ma dọ̀n alọ etọn dogodo nado hẹn vasudo wá.* E sọ hẹn osla po adó po nado biọ aluẹmẹ. Yé ko yin hinhẹn zun madogánnọ to pọmẹ. ט [Teti]   Họngbo etọn lẹ ko tlọ biọ kọmẹ.+ E ko họ́ dòtin etọn lẹ liai bo ko gbà yé do flinflin. Ahọlu etọn podọ ahọvi etọn lẹ tin to akọta lẹ ṣẹnṣẹn.+ Osẹ́n* de ma tin; yẹwhegán etọn lẹ lọsu ma tlẹ sọ nọ mọ numimọ sọn Jehovah dè ba.+ י [Yodi] 10  Mẹho viyọnnu Ziọni tọn lẹ sinai do kọmẹ bo gbọṣi abọẹ.+ Yé ba kọ́gudu do ota yetọn bosọ do odẹ́vọ̀.+ Awhli Jelusalẹm tọn lẹ ko dẹ́ ota yetọn lẹ do odò. כ [Kafi] 11  Agbọ́ ko pé nukun ṣie lẹ nado to dasin ja.+ Homẹ* ṣie to wuwlu. Otù ṣie ko yin kinkọnjẹgbonu do kọmẹ, na aijijẹ viyọnnu* omẹ ṣie lẹ tọn wutu,+ Na ovi po ovivu lẹ po he to didaku to tòplitẹn tòpẹvi lọ tọn lẹ wutu.+ ל [Lamẹdi] 12  Yé nọ to kinkanse onọ̀ yetọn mapote dọ, “Fie wẹ núdùdù po ovẹn po te?”+ Dile yé to didaku taidi mẹhe gbleawu to tòplitẹn tòdaho lọ tọn lẹ, Podọ dile yé* to kúkú jei to awà onọ̀ yetọn tọn mẹ. מ [Memi] 13  Etẹwẹ yẹn sọgan yí do na we kunnudenu, Kavi etẹ go wẹ yẹn sọgan yí we jlẹdo, hiẹ viyọnnu Jelusalẹm tọn E? Etẹwẹ yẹn na hẹn we sọzẹn hẹ nado miọnhomẹna we, hiẹ viyọnnu Ziọni tọn E? Na gbakija towe gblo sọ ohù.+ Mẹnu wẹ sọgan hẹn we jẹgangan?+ נ [Nuni] 14  Numimọ lalo po ovọ́ po wẹ yẹwhegán towe lẹ mọ na we,+ Yé masọ de nuṣiwa towe gbà nado whlẹn we sọn kanlinmọgbenu yìyì mẹ,+ Ṣigba, nulila lalo po oklọ po tọn lẹ kẹdẹ wẹ yé nọ to mimọ na we.+ ס [Samẹki] 15  Mẹhe jugbọn aliji wá jei lẹpo wẹ nọ gbọn vlẹko dali hopẹ́ do ji we.+ Yé nọ gbọn nupaṣamẹ dali kẹ̀hẹli+ bo nọ mimí ota yetọn, na viyọnnu Jelusalẹm tọn wutu bosọ nọ dọmọ: “Be ehe wẹ tòdaho he go yé nọ dọ gando dọ, ‘E yọnwhanpẹ taun bo nọ hẹn aigba blebu jaya’ ya?”+ פ [Pe] 16  Kẹntọ towe lẹpo ko kẹ̀ onù yetọn do ji we. Yé nọ kẹ̀hẹli bo nọ dù adúkúnkún bosọ nọ dọmọ: “Mí ko ze e mì.+ Azán he míwlẹ to tenọpọn lọ die!+ E ko wá bọ mí ko sọ mọ ẹn!”+ ע [Ayini] 17  Jehovah ko wà nuhe e lẹn;+ e ko hẹn ohó etọn di,+ Yèdọ nuhe e ko degbe etọn sọn ojlẹ dindẹn die.+ Ewọ ko họliai matin awuvẹmẹ.+ E ko dike kẹntọ ni jaya do ji we; ewọ ko ze huhlọn* kẹntọ towe lẹ tọn daga. צ [Tisade] 18  Ahun yetọn dawhá hlan Jehovah, hiẹ viyọnnu Ziọni tọn E. Gbọ dasin ni to sisà taidi tọ̀sisa to okle po ozán po. A na dewe agbọ́ depope blo, a sọ na gbọjẹ nukun towe* blo. ק [Kọfi] 19  Fọ́n! Dawhá to zánmẹ, yèdọ to zánmẹ jei afọnnu. Kọ̀n ahun towe jẹgbonu taidi osin to Jehovah nukọn. Dlẹnalọ towe lẹ hlan ẹn, na ogbẹ̀* ovi towe, He to didaku to aliklan tòhomẹ-liho* lẹpo tọn ji na huvẹ tọn wutu lẹ.+ ר [Lẹṣi] 20  Jehovah E, pọ́n bo lẹ́ ayidonugo towe hlan mẹhe hiẹ ko yinuwa hẹ to aliho sinsinyẹn mẹ. Be yọnnu lẹ na zindonukọn nado to kúnkan* yetọn titi lẹ dù, yèdọ ovi yetọn titi he to jogún-jogún lẹ wẹ,+ Kavi be yẹwhenọ po yẹwhegán lẹ po na yin hùhù to fiwiwe Jehovah tọn mẹ wẹ ya?+ ש [Ṣini] 21  Oṣiọ yọpọ sunnu po mẹhomẹ po tọn nọ to kọmẹ to tòhomẹ-liho lẹ ji.+ Awhli* po jọja sunnu ṣie lẹ po ko yin hùhù gbọn ohí dali.+ Hiẹ ko hù yé to azán homẹgble towe tọn gbè; hiẹ ko hù yé matin awuvẹmẹ.+ ת [Tau] 22  Hiẹ ylọ obu sọn awà lẹpo ji taidi to azán hùnwhẹ de tọn gbè.+ To azán homẹgble Jehovah tọn gbè, mẹde ma họ̀ngán kavi luntọ́n;+ Kẹntọ ṣie ko sukúndona mẹhe yẹn ji* bo penukundego lẹ.+

Nudọnamẹ Odò Tọn

To paa mẹ, “azò.”
To paa mẹ, “ko tùnafọ ogá etọn ji.”
Kavi “ko và hùnwhẹ etọn sudo.”
To paa mẹ, “nado ze mì.”
Kavi “Anademẹ.”
To paa mẹ, “Adọ̀vi.”
Hogbe milomilo de wẹ ehe yin, vlavo nado do lẹblanu kavi awuvẹmẹ hia.
Kavi “alindọn yetọn.”
To paa mẹ, “azò.”
To paa mẹ, “viyọnnu nukun towe tọn.”
Kavi “alindọn.”
To paa mẹ, “to alihota.”
Kavi “sinsẹ́n.”
Kavi “Jọja yọnnu.”
Kavi “ji awuyẹyẹ-afọyẹyẹ.”