Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Avigbè Jelemia tọn 1:1-22

NUHE E BẸHẸN LẸ

  • Yè do Jelusalẹm hia di asuṣiọsi

    • E sinai edeṣo bo yin kọgbẹ́ e go (1)

    • Ylando sinsinyẹn Ziọni tọn lẹ (8, 9)

    • Jiwheyẹwhe gbẹ́ Ziọni dai (12-15)

    • Mẹde ma tin nado miọnhomẹna Ziọni (17)

א [Alẹfi]* 1  Lehe tòdaho he mẹ gbẹtọ gọ́ dai wá sinai edeṣo todin do!+ Lehe ewọ he mẹ gbẹtọ sù te hú akọta devo lẹ dai wá taidi asuṣiọsi de do!+ Lehe ewọ he ko yin ahọvi-yọnnu to ayimatẹn* lẹ ṣẹnṣẹn dai ko yin hinhẹn gánnugánnu nado nọ wazọ́n sinsinyẹn do!+ ב [Bẹti]   E viavi badabada to zánmẹ+ bọ dasin sà gbọn alaka etọn lẹ ji. Dopo tata to mẹyiwanna etọn lẹ mẹ ma tin to finẹ nado miọnhomẹna ẹn.+ Gbẹdohẹmẹtọ etọn lẹpo ko klọ ẹ;+ yé ko lẹzun kẹntọ etọn lẹ. ג [Gimẹli]   Juda ko yin hinhẹn yì kanlinmọgbenu+ to awufiẹsa po afanumẹ-yinyin sinsinyẹn po glọ.+ E dona nọ nọ̀ akọta lẹ ṣẹnṣẹn;+ ewọ ma mọ gbọjẹtẹn depope. Homẹkẹndomẹtọ etọn lẹpo ko plá ẹ to ayimajai etọn mẹ. ד [Dalẹti]   Aliho he yì Ziọni lẹ to aluẹmẹ, na mẹdepope ma ja hùnwhẹ lọ.+ Họngbo etọn lẹpo wẹ jẹvọ́;+ yẹwhenọ etọn lẹ to azọ̀nwẹn. Awhli* etọn lẹ to awubla mẹ, ewọ sọ to awufiẹsa sinsinyẹn mẹ. ה [He]   Kẹntọ etọn lẹ wẹ lẹzun klunọ* etọn todin; kẹntọ etọn lẹ to vivò mẹ.+ Na Jehovah ko hẹn awubla wá e ji, na sẹ́nhẹngba susugege etọn lẹ wutu.+ Ovi etọn lẹ ko yì kanlinmọgbenu to kẹntọ nukọn.+ ו [Wau]   Whanpẹ daho viyọnnu Ziọni tọn lẹpo ko yì sọn e dè.+ Ahọvi etọn lẹ taidi agbanlin he ma mọ kanlindugbo lẹ, Yé sọ to zọnlinzin di mẹhe ma tindo huhlọn to homẹkẹndomẹtọ* nukọn. ז [Zayini]   To ojlẹ he mẹ Jelusalẹm to awufiẹsa mẹ bo ma tindo fininọ, e flin Nuhọakuẹ etọn he e tindo to ojlẹ hoho tọn mẹ lẹpo.+ To whenue omẹ etọn lẹ jai jẹ alọ kẹntọ tọn mẹ bọ ewọ masọ tindo alọgọtọ de,+ Kẹntọ lẹ mọ ẹn bo kò e,* na aijijẹ etọn wutu.+ ח [Hẹti]   Jelusalẹm ko waylando sinsinyẹn.+ Enẹ wẹ zọ́n bọ e lẹzun awuhiọnu de. Mẹhe nọ gbògbéna ẹn dai lẹpo wẹ nọ yinuwa hẹ ẹ todin po wangbẹna po, na yé ko mọ omẹ́ etọn wutu.+ Ewọ lọsu wẹnhùn+ bo lẹkọ dedo po winyan po. ט [Teti]   Mawé etọn tin to yẹli etọn mẹ.+ Ewọ ma nọ lẹnnupọndo sọgodo etọn ji. Aijijẹ etọn sẹhundaga; e ma tindo mẹde nado miọnhomẹna ẹn. Jehovah E, pọ́n awufiẹsa ṣie, na kẹntọ ko ze ede daga.+ י [Yodi] 10  Kẹntọ ko ṣinyọ́nalọ adọkunnu etọn lẹpo ji.+ Na e ko mọ bọ akọta lẹ biọ fiwiwe etọn mẹ,+ Yèdọ yé mẹhe hiẹ dosẹ́n na ma nado biọ gbẹtọgun towe lẹ mẹ. כ [Kafi] 11  Omẹ etọn lẹpo wẹ to azọ̀nwẹn; yé to akla dín.+ Yé ko bẹ nuhọakuẹ yetọn lẹ jo nado mọ nuhe yé na dù, na yé nido nọgbẹ̀* poun. Jehovah E, pọ́n lehe n’ko wá tin taidi yọnnu nuvọ́nọ* de do. ל [Lamẹdi] 12  Be e ma di nude na mì mẹhe jugbọn aliho lọ ji wá jei lẹpo wẹ ya? Mì pọ́n bo doayi e go! Be awufiẹsa de tin taidi dehe yin hinhẹnwa ji e wẹ, Yèdọ dehe Jehovah hẹnwa ji e to azán adi sinsinyẹn etọn tọn gbè?+ מ [Memi] 13  Sọn oji aga wẹ ewọ ko do miyọ́n hlan ohú ṣie lẹ mẹ,+ e sọ yí huhlọn to dopodopo yetọn si. E ko tá odọ̀ de dai na afọ ṣie lẹ; ewọ ko hẹn mi gánnugánnu nado lẹgodo. E ko hẹn mi zun yọnnu he yin kọgbẹ́ e go de. Azán lẹpo ji wẹ n’nọ to azọ̀njẹ. נ [Nuni] 14  Sẹ́nhẹngba ṣie lẹ yin bibladopọ taidi zẹgẹ de, alọ etọn wẹ e yí do sìn yé dopọ. Yé ko yin zize plá okọ̀ na mi, yé sọ húagbọ́ mi. Jehovah ko jo mi do alọ mẹhe yẹn ma sọgan nọavùnte sọta lẹ tọn mẹ.+ ס [Samẹki] 15  Jehovah ko ze sunnu huhlọnnọ ṣie lẹpo dlan sọn dè e.+ E ko bẹ gbẹtọgun de pli do ji e nado gídí jọja sunnu ṣie lẹ.+ Jehovah ko finyọ́n awhli Juda tọn to ovẹn-finyọ́ndo mẹ.+ ע [Ayini] 16  Yẹn to avivi na onú ehelẹ wutu;+ nukun ṣie lẹ gọ́ na dasin. Na mẹhe sọgan miọnhomẹna mi kavi fahomẹna mi* lẹpo wẹ dẹn do mi. Visunnu ṣie lẹ yin kọgbẹ́ e go, na kẹntọ ko dudeji wutu. פ [Pe] 17  Ziọni ko dlẹnalọ etọn lẹ;+ mẹde ma tin nado miọnhomẹna ẹn. Jehovah ko degbena kẹntọ he lẹdo Jakọbu pé lẹpo nado yinuwa sọta ẹ.+ Jelusalẹm ko lẹzun awuhiọnu de na yé.+ צ [Tisade] 18  Dodonọ wẹ Jehovah,+ na gbedide etọn lẹ* wẹ n’ṣiatẹ sọta.+ Mì akọta lẹpo emi, mì dotó bo mọ awufiẹsa ṣie. Awhli* ṣie lẹ po jọja sunnu ṣie lẹ po ko yì kanlinmọgbenu.+ ק [Kọfi] 19  N’dawhá ylọ mẹyiwanna ṣie lẹ, ṣigba yé ko klọ mi.+ Yẹwhenọ ṣie lẹ po mẹho ṣie lẹ po ko dọ̀n to tòdaho lọ mẹ, Dile yé to núdùdù dín nado sọgan nọgbẹ̀.*+ ר [Lẹṣi] 20  Pọ́n, Jehovah E, na yẹn to ayimajai sinsinyẹn mẹ. Homẹ* ṣie to wuwlu. Ahun ṣie tin to awufiẹsa mẹ to ohò ṣie mẹ, na n’ko lẹzun atẹṣitọ pete.+ Ohí to mẹhù to gbonu;+ họmẹ sọ tin taidi okú. ש [Ṣini] 21  Gbẹtọ lẹ sè azọ̀nwinwẹn ṣie; mẹde masọ tin nado miọnhomẹna mi. Kẹntọ ṣie lẹpo ko sè gando nugbajẹmẹji ṣie go. Yé to ayajẹ, na hiẹ wẹ hẹn ẹn wá ji e wutu.+ Ṣigba, hiẹ na hẹn azán he a lá lọ wá,+ whenue yelọsu na wá taidi yẹn.+ ת [Tau] 22  Na ylanwiwa yetọn lẹpo ni wá nukọn towe, na hiẹ nisọ yinuwa hẹ yé to aliho sinsinyẹn mẹ,+ Kẹdẹdile hiẹ ko yinuwa hẹ mi to aliho sinsinyẹn mẹ do, na sẹ́nhẹngba ṣie lẹpo wutu. Na azọ̀nwinwẹn ṣie sù bọ ahun ṣie to azọ̀njẹ.

Nudọnamẹ Odò Tọn

Weta 1 jẹ 4 yin avihàn lẹ he yin kinkan sọgbe hẹ wekun Heblugbe tọn lẹ, kavi to aliho debọdo-dego tọn mẹ.
Kavi “agbegbe fidugando.”
Kavi “Jọja yọnnu.”
To paa mẹ, “ota.”
Kavi “mẹgbeyantọ.”
Kavi “bo jẹaglin do e ji.”
Kavi “nido hẹn alindọn yetọn gọwá.”
Hogbe milomilo de he to alọdlẹndo Jelusalẹm.
Kavi “alindọn ṣie.”
To paa mẹ, “na onù etọn.”
Kavi “Jọja yọnnu.”
Kavi “nado hẹn alindọn yetọn gọwá.”
To paa mẹ, “Adọ̀vi.”