Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Amọsi 7:1-17

NUHE E BẸHẸN LẸ

  • Numimọ dọ opodo Islaeli tọn ko sẹpọ (1-9)

    • Owẹ̀n lẹ (1-3), miyọ́n (4-6), nujlẹkàn (7-9)

  • Yè dọna Amọsi nado doalọtena dọdai didọ (10-17)

7  Nuhe Oklunọ Nupojipetọ Jehovah dohia mi die: Pọ́n! E wleawuna ogbẹ́ owẹ̀n lẹ tọn de to whenue jinukun he yin dido to avivọ-whenu* lẹ jẹ wúwú ji. Jinukun dido avivọ-whenu tọn ehe wá aimẹ to whenue ogbé húhú ahọlu tọn ko yin sinsán godo.  Whenue ogbẹ́ owẹ̀n lẹ tọn lọ ko dù ogbé-mú aigba lọ tọn pó, n’dọmọ: “Oklunọ Nupojipetọ Jehovah E, jaale bo jona yé!+ Nawẹ Jakọbu na luntọ́n* gbọn? Na madogánnọ wẹ ewọ!”+  Enẹwutu, Jehovah diọlinlẹn gando nudide ehe go.*+ “Enẹ ma na jọ,” wẹ Jehovah dọ.  Nuhe Oklunọ Nupojipetọ Jehovah dohia mi die: Pọ́n! Oklunọ Nupojipetọ Jehovah hẹn yasanamẹ de wá gbọn miyọ́n dali. Miyọ́n lọ hẹn osin daho-gbó he siso taun lẹ hú bosọ fiọ adà aigba lọ tọn de.  Whenẹnu, n’dọmọ: “Oklunọ Nupojipetọ Jehovah E, jaale bo doalọtena ehe.+ Nawẹ Jakọbu na luntọ́n* gbọn? Na madogánnọ wẹ ewọ!”+  Enẹwutu, Jehovah diọlinlẹn gando nudide ehe go.*+ “Enẹ lọsu ma na jọ,” wẹ Oklunọ Nupojipetọ Jehovah dọ.  Nuhe e dohia mi die: Pọ́n! Jehovah ṣite to adó he yè yí nujlẹkàn do basi de ji, nujlẹkàn de sọ to alọ etọn mẹ.  Whenẹnu wẹ Jehovah dọna mi dọmọ: “Amọsi, etẹwẹ hiẹ mọ?” Yẹn sọ gblọn dọmọ: “Nujlẹkàn de.” Jehovah sọ dọmọ: “Yẹn na dlẹn nujlẹkàn de do omẹ ṣie Islaelivi lẹ ṣẹnṣẹn. Yẹn ma nasọ jona yé ba.+  Ofi yiaga Isaki tọn lẹ+ na yin hinhẹn jẹvọ́ bọ fiwiwe Islaeli tọn lẹ nasọ yin gbigbakija;+ yẹn nasọ wá owhé Jeloboami tọn ji po ohí de po.”+ 10  Amazia yẹwhenọ Bẹtẹli tọn+ sọ dowẹn ehe hlan Ahọlu Jeloboami+ Islaeli tọn dọmọ: “Amọsi to sébla do gowe to owhé Islaeli tọn ṣẹnṣẹn tlọlọ.+ Aigba lọ masọ sọgan doakọnna ohó etọn lẹpo ba.+ 11  Na nuhe Amọsi nọ dọ die, ‘Jeloboami na kú gbọn ohí dali bọ e sọ họnwun dọ Islaeli na yì kanlinmọgbenu sọn aigba etọn ji.’”+ 12  Enẹwutu, Amazia dọna Amọsi dọmọ: “Hiẹ numọtọ E, yì, họnyi aigba Juda tọn ji, nọ dín núdùdù* towe to dọ́n podọ hiẹ sọ sọgan nọ dọ dọdai to finẹ.+ 13  Ṣigba, hiẹ masọ dona dọ dọdai to Bẹtẹli ba,+ na fiwiwe ahọlu de tọn+ wẹ bosọ yin owhé ahọluduta de tọn.” 14  Whenẹnu wẹ Amọsi gblọnna Amazia dọmọ: “N’ma yin yẹwhegán de kavi visunnu yẹwhegán de tọn dai; ṣigba kanlinyìntọ de wẹ yẹn+ podọ ovòtin sikomoli tọn lẹ go wẹ n’nọ penukundo.* 15  Ṣigba, Jehovah de mi sọn lẹngbọ lẹ godo, Jehovah sọ dọna mi dọ, ‘Yì, dọ dọdai na Islaeli omẹ ṣie lẹ.’+ 16  Enẹwutu, dotó ohó Jehovah tọn todin: ‘Hiẹ to didọ dọ, “A dọ dọdai sọta Islaeli blo,+ a sọ dọyẹwheho+ sọta owhé Isaki tọn blo.” 17  Enẹwutu, nuhe Jehovah dọ die: “Asi towe na lẹzun galọtọ to tòdaho lọ mẹ, visunnu towe lẹ po viyọnnu towe lẹ po nasọ jai gbọn ohí dali. Yè na yí nujlẹkàn do má aigba towe, podọ hiẹ lọsu na kú to aigba mawé de ji; e họnwun dọ Islaeli nasọ yì kanlinmọgbenu sọn aigba etọn ji.”’”+

Nudọnamẹ Odò Tọn

Enẹ wẹ, janvier po février po gblamẹ.
To paa mẹ, “fọnṣite.”
Kavi “nudide ehe vẹna Jehovah.”
To paa mẹ, “fọnṣite.”
Kavi “nudide ehe vẹna Jehovah.”
To paa mẹ, “nọ dù akla.”
Kavi “podọ mẹhe nọ de alà na ovòtin sikomoli tọn lẹ.”