Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Pita 2:1-22

NUHE E BẸHẸN LẸ

  • Mẹplọntọ lalo lẹ na sọawuhia (1-3)

  • Whẹdida mẹplọntọ lalo lẹ tọn (4-10a)

    • Angẹli lẹ yin zizedlan Taltalu mẹ (4)

    • Singigọ; Sodọmi po Gomọla po (5-7)

  • Nuhe nọ do mẹplọntọ lalo lẹ hia (10b-22)

2  Etomọṣo, yẹwhegán lalo lẹ sọ wá tin to akọta lọ ṣẹnṣẹn, kẹdẹdile mẹplọntọ lalo lẹ na wá tin to mì ṣẹnṣẹn do ga.+ Omẹ ehelẹ na gbọn yẹwiwa dali hẹn plọngiglọ mẹvasudo tọn lẹ wá, yé na tlẹ sọ mọ́n klunọ lọ he họ̀ yé+ bo na to vasudo niyaniya tọn hẹnwa yedelẹ ji.  Humọ, mẹsusu na hodo walọ gblezọn tasinsinyẹn tọn* yetọn lẹ,+ podọ na yewlẹ tọn wutu, aliho nugbo tọn lọ na nọ yin nùzan dego.+  Mọdopolọ, yé na gbọn nukunkẹn dali yí ohó oklọ tọn lẹ do hò mì dù. Ṣigba, owhẹ̀ yetọn he ko yin didá sọn whenu dindẹn die+ ma to gbàndọn, podọ vasudo yetọn ma to na gọ̀n.+  Na taun tọn, Jiwheyẹwhe ma whleawu nado sayana angẹli he waylando lẹ,+ ṣigba e bẹ yé dlan Taltalu* mẹ,+ bosọ bẹ yé do gẹdẹ* zinvlu gọ́ngọ́n tọn lẹ mẹ nado yin hihla dai na whẹdida.+  E masọ whleawu nado sayana aihọn hohowhenu tọn de,+ ṣigba bo whlẹn Noa, yẹwhehodọtọ dodo tọn+ po omẹ ṣinawe devo lẹ po+ gán to whenuena e hẹn singigọ wá aihọn omẹ jijọ-madi-Jiwheyẹwhe tọn lẹ tọn de ji.+  Podọ gbọn hinhẹn tòdaho Sodọmi po Gomọla po tọn zun afín dali, e gblewhẹdo yé+ bo ze ohia nuhe na wá jọ lẹ tọn de dai na omẹ jijọ-madi-Jiwheyẹwhe tọn lẹ.+  Humọ, e whlẹn Lọti dodonọ lọ,+ he walọ gblezọn tasinsinyẹn tọn* sẹ́nhẹngbatọ lẹ tọn nọ dotukla tlala—  na walọ sẹ́nhẹngba tọn lẹ he dawe dodonọ enẹ nọ mọ bo nọ sè dile e to gbẹnọ to ṣẹnṣẹn yetọn nọ sayana alindọn* dodonọ etọn egbesọegbesọ wutu.  Enẹwutu, Jehovah* yọ́n lehe e nọ whlẹn mẹhe ze yede jo na Jiwheyẹwhe lẹ sọn whlepọn mẹ do,+ ṣigba bo nọ hlá gbẹtọ mawadodonọ lẹ dai nado yin vivasudo* to azán whẹdida tọn gbè,+ 10  yèdọ titengbe mẹhe nọ tẹnpọn nado hẹn agbasalan mẹdevo lẹ tọn flu+ bo nọ yí nukunpẹvi do pọ́n aṣẹpipa* lẹ.+ Yé yin adọgbotọ podọ ojlo mẹdetiti tọn watọ lẹ, yé masọ nọ dibu nado zánnu do omẹ gigonọ lẹ go, 11  to whenuena e yindọ angẹli lẹ, mahopọnna dọ yé klohu yé to nugopipe po huhlọn po mẹ, yé ma hẹn whẹsadokọnamẹ wá sọta yé to hogbe mẹzunzun tọn lẹ mẹ, na sisi he yé tindo na Jehovah* wutu.+ 12  Ṣigba, taidi kanlin he ma nọ lẹnnupọn, he nọ yinuwa to jọwamọ-liho bo yin jiji* nado yin wiwle bosọ yin hùhù lẹ, omẹ ehelẹ nọ zánnu do nuhe yé ma yọnẹn lẹ go.+ Yé na jiya vasudo he aliho vasudo tọn yetọn titi nọ hẹnwa tọn 13  bo na jiya taidi ale de na aliho ylankan yetọn. Yé nọ mọ awuvivi to gbẹzan fẹẹmẹninọ tọn zinzan mẹ,+ etlẹ yin to okle. Dihó po oblọ lẹ po wẹ yé, bọ yé nọ mọ awuvivi zẹjlẹgo to nuplọnmẹ mẹhẹn buali tọn yetọn lẹ mẹ dile yé to núdù dopọ po mì po.+ 14  Nukun yetọn lẹ gọ́ na ayọdide+ bo ma sọgan nọla na ylando, podọ yé nọ do omọ̀ na mẹhe* ma lodo lẹ. Yé tindo ahun he yin pinplọn to nukunkẹn mẹ. Ovi hodẹ̀do lẹ wẹ yé. 15  Gbọn ali jijlọ lọ gbigbẹdai dali, yé ko yin hinhẹn buali. Yé ko hodo ali Balaami,+ visunnu Beoli tọn, he yiwanna ale ylanwiwa tọn,+ 16  ṣigba e mọ wọhẹ yí na afọ he ewọ lọsu tùn nuhe sọgbe ji wutu.+ Kẹtẹkẹtẹ he ma nọ dọho de yí ogbè gbẹtọ tọn do dọho bo glọnalina aliho nuyiwa alẹdida yẹwhegán lọ tọn.+ 17  Asisa osin tọn he ma tindo osin lẹ po avìvì he yujẹhọn sinsinyẹn to hinhẹn dánpe lẹ po wẹ omẹ ehelẹ, podọ zinvlu gọ́ngọ́n ko yin hihla dai na yé.+ 18  Yé nọ dọho gboogbo he yin ovọ́ lẹ. Yé nọ yí ojlo agbasalan tọn lẹ+ po walọ gblezọn tasinsinyẹn tọn* lẹ po do dó omọ̀ na mẹhe ṣẹṣẹ tọ́n sọn mẹhe nọ nọgbẹ̀ to alibubu mẹ lẹ ṣẹnṣẹn lẹ.+ 19  To whenuena yé to opagbe mẹdekannujẹ tọn do na yé, yelọsu lẹ gbẹ́ yin afanumẹ walọ gblezọn tọn lẹ;+ na eyin mẹdepope yin dududeji gbọn mẹdevo* dali, ewọ nọ lẹzun afanumẹ etọn.+ 20  Na taun tọn, to whenuena yé ko họ̀ngán sọn hẹnflu aihọn tọn lẹ mẹ+ gbọn oyọnẹn he pegan Oklunọ po Mẹwhlẹngántọ lọ Jesu Klisti po tọn gblamẹ godo, eyin yé sọ vọ́ tlọ biọ onú ehelẹ dopolọ mẹ bo yin dududeji, ninọmẹ godo mẹ tọn yetọn na ylanhu tintan tọn.+ 21  E na ko pọnte na yé ma nado ko yọ́n ali dodowiwa tọn lọ hezeheze hú dọ to whenuena yé ko yọ́n ẹn godo, yé ni lẹkọ sọn gbedide wiwe he yé ko mọyi lọ kọ̀n.+ 22  Nuhe howhinwhẹn nugbo lọ dọ ko jọ do yé go: “Avún ko lẹkọ do oslú edetiti tọn kọ̀n, podọ ohàn asi he yè ko lawu na sọ lẹkọyi blu ogbọ̀n.”+

Nudọnamẹ Odò Tọn

Kavi “walọ he huwinyan.” Glẹki, asẹlgeia. Pọ́n Zẹm.
Pọ́n Zẹm.
Kavi “odò.”
Kavi “walọ he huwinyan.” Glẹki, asẹlgeia. Pọ́n Zẹm.
Pọ́n Zẹm.
Pọ́n Nud. A5.
To paa mẹ, “sinsánsẹ.”
Kavi “oklunọ-yinyin.”
Pọ́n Nud. A5.
Kavi “yin jiji to jọwamọ-liho.”
Kavi “alindọn he.”
Kavi “walọ he huwinyan.” Glẹki, asẹlgeia. Pọ́n Zẹm.
Kavi “nude.”