Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 9:1-13

NUHE E BẸHẸN LẸ

  • Davidi do owanyi nugbo hia Mẹfiboṣẹti (1-13)

9  Enẹgodo, Davidi dọmọ: “Be mẹdepope gbẹ́ pò to owhé Sauli tọn gbè he n’sọgan do owanyi nugbo hia, na Jonatani tọn wutu ya?”+  Todin, devizọnwatọ de tin to owhé Sauli tọn gbè he nọ yin Ziba.+ Enẹwutu, yé ylọ ẹ wá Davidi dè bọ ahọlu kanse e dọmọ: “Hiẹ wẹ yin Ziba ya?” Ewọ sọ gblọn dọmọ: “Yẹn wẹ devizọnwatọ towe.”  Ahọlu sọ zindonukọn dọmọ: “Be mẹdepope gbẹ́ pò to owhé Sauli tọn gbè he n’sọgan dlẹnkan owanyi nugbo Jiwheyẹwhe tọn hlan ya?” Ziba gblọnna ahọlu dọmọ: “Visunnu Jonatani tọn dopo gbẹ́ pò; afọ etọn awe lẹpo wẹ kúsẹ́.”*+  Ahọlu sọ kanse e dọmọ: “Fie wẹ e te?” Ziba gblọnna ahọlu dọmọ: “E tin to owhé Makili+ visunnu Amiẹli tọn gbè to Lo-debali.”  To afọdopolọji, Ahọlu Davidi domẹhlan ẹn bo plan ẹn wá sọn owhé Makili visunnu Amiẹli tọn gbè to Lo-debali.  Whenue Mẹfiboṣẹti visunnu Jonatani he yin visunnu Sauli tọn wá Davidi dè, e họ́jai to afọdopolọji bo ṣinyọ́n nukunmẹ ai. Whenẹnu, Davidi dọmọ: “Mẹfiboṣẹti!” bọ ewọ gblọn dọmọ: “Devizọnwatọ towe die.”  Davidi dọna ẹn dọmọ: “A dibu blo, na yẹn dona do owanyi nugbo+ hia we, na otọ́ towe Jonatani tọn wutu, yẹn nasọ gọ̀ aigba Sauli baba-daho towe tọn lẹpo jo na we, podọ tafo ṣie ji wẹ hiẹ na nọ dùnú* te to whepoponu.”+  Whenẹnu, e ṣinyọ́n nukunmẹ ai bo dọmọ: “Etẹwẹ devizọnwatọ towe yin, bọ hiẹ do lẹ́ ayidonugo* towe hlan avún kúkú+ de taidi yẹn nkọ?”  Todin, ahọlu dowẹn hlan Ziba, devizọnwatọ Sauli tọn bo dọna ẹn dọmọ: “Nuhe yin Sauli tọn lẹpo gọna nuhe yin whédo etọn tọn pete wẹ yẹn yí na ovivi klunọ towe tọn.+ 10  Hiẹ na nọ lẹ̀ ogle lọ lẹ na ẹn—yèdọ hiẹ, visunnu towe lẹ po devizọnwatọ towe lẹ po—bọ hiẹ nasọ nọ bẹ jinukun etọn lẹ pli nado nọ na núdùdù mẹhe to whẹndo ovivi klunọ towe tọn mẹ lẹ nado nọ dù. Ṣigba, tafo ṣie ji wẹ Mẹfiboṣẹti, ovivi klunọ towe tọn na nọ dùnú te to whepoponu.”+ Todin, Ziba tindo visunnu 15 podọ devizọnwatọ 20.+ 11  Whenẹnu, Ziba dọna ahọlu dọmọ: “Devizọnwatọ towe na wà nuhe oklunọ ṣie ahọlu ko degbe etọn na devizọnwatọ etọn nado wà lẹpo.” Enẹwutu, Mẹfiboṣẹti nọ dùnú to tafo Davidi tọn* ji taidi dopo to visunnu ahọlu tọn lẹ mẹ. 12  Mẹfiboṣẹti lọsu sọ tindo visunnu pẹvi de he nọ yin Mikka;+ mẹhe nọ nọ̀ owhé Ziba tọn gbè lẹpo sọ lẹzun devizọnwatọ Mẹfiboṣẹti tọn lẹ. 13  Mẹfiboṣẹti sọ nọ nọ̀ Jelusalẹm, na tafo ahọlu tọn ji wẹ e nọ dùnú te to whepoponu;+ podọ afọ etọn awe lẹpo wẹ kúsẹ́.+

Nudọnamẹ Odò Tọn

Kavi “ewọ yin pòtẹnnọ.”
To paa mẹ, “dù akla.”
To paa mẹ, “nukunmẹ.”
Kavi vlavo, “tafo ṣie.”