Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 5:1-25

NUHE E BẸHẸN LẸ

  • Davidi duahọlu do Islaeli pete ji (1-5)

  • Jelusalẹm yin yíyí (6-16)

    • Ziọni, Tòdaho Davidi tọn (7)

  • Davidi gbawhàn Filistinu lẹ tọn (17-25)

5  To nukọn mẹ, hẹnnu Islaeli tọn lẹpo wá Davidi dè to Heblọni+ bo dọmọ: “Pọ́n! Ohú towe podọ agbasalan towe* wẹ mí yin.+  To ojlẹ he wayi lẹ mẹ, to whenue Sauli gbẹ́ yin ahọlu mítọn, hiẹ wẹ nọ deanana Islaeli yì awhàn.*+ Jehovah ko sọ dọna we dọ: ‘Hiẹ wẹ na yin lẹngbọhọtọ Islaeli omẹ ṣie lẹ tọn, podọ hiẹ wẹ na lẹzun nukọntọ do Islaeli ji.’”+  Enẹwutu, mẹho Islaeli tọn lẹpo wá ahọlu dè to Heblọni, bọ Ahọlu Davidi sọ basi alẹnu de hẹ yé+ to Heblọni to Jehovah nukọn. Enẹgodo, yé yiamisisadode Davidi taidi ahọlu do Islaeli ji.+  Owhe 30 wẹ Davidi tindo to whenue e lẹzun ahọlu, e sọ dugán na owhe 40.+  E dugán do Juda ji to Heblọni na owhe 7 e lán osun 6, podọ e dugán do Islaeli pete po Juda po ji to Jelusalẹm+ na owhe 33.  Ahọlu lọ po sunnu etọn lẹ po sọ dedo Jelusalẹm nado yì tọ́nawhàn Jẹbusinu+ he nọ nọ̀ aigba lọ ji lẹ. Yewlẹ ko vlẹ Davidi kò dọmọ: “Hiẹ ma gán wáfi gbede! Nukuntọ́nnọ po sẹkunọ tata lẹ po wẹ na yàn we.” Yé lẹndọ, ‘Davidi ma gán wáfi gbede.’+  Ṣigba, Davidi yí figángán Ziọni tọn lọ, ehe lẹzun Tòdaho Davidi tọn+ todin.  Enẹwutu, Davidi dọ to azán enẹ gbè dọmọ: “Mẹhe tọ́nawhàn Jẹbusinu lẹ ni gbọn osinwhín lọ mẹ tọ́n nado hù ‘sẹkunọ po nukuntọ́nnọ lẹ po,’ yèdọ mẹhe Davidi* gbẹwanna!” Enẹ wẹ zọ́n bọ e do nọ yin didọ dọmọ: “Nukuntọ́nnọ po sẹkunọ lẹ po ma na biọ owhé lọ gbè gbede.”  Enẹgodo, Davidi jẹ figángán lọ mẹ nọ ji bọ e nọ yin yiylọdọ* Tòdaho Davidi tọn; Davidi sọ jẹ ohọ̀ gbá ji lẹdo pé sọn Pópló*+ lọ kọ̀n to homẹ.+ 10  Gbọnmọ dali, huhlọn Davidi tọn fọ́n bo to jijẹ e ji mapote,+ Jehovah Jiwheyẹwhe awhànpa lẹ tọn sọ tin hẹ ẹ.+ 11  Ahọlu Hilami+ Tile tọn do wẹnsagun lẹ hlan Davidi bosọ do owhlẹ kedali tọn lẹ,+ atin-zọ́nwatọ lẹ po zannu-dótọ lẹ po hlan na adó lẹ dido bọ yé jẹ owhé* de gbá na Davidi ji.+ 12  Davidi sọ yọnẹn dọ Jehovah ko hẹn ahọlu-yinyin emitọn lodo gligli do Islaeli ji+ bo ko sọ ze ahọluduta emitọn+ daga, na Islaeli omẹ Etọn lẹ tọn wutu.+ 13  To whenue Davidi ko tọ́n sọn Heblọni wá Jelusalẹm godo, e de asimọwhlá+ lẹ bo dà asi lẹ dogọ, bọ visunnu po viyọnnu devo lẹ po yin jiji na Davidi.+ 14  Oyín ovi he yin jiji na ẹn to Jelusalẹm lẹ tọn die: Ṣamua, Ṣobabi, Natani,+ Sọlomọni,+ 15  Ibhali, Eliṣua, Nefẹgi, Jafia, 16  Eliṣama, Eliada po Elifelẹti po. 17  Whenue Filistinu lẹ sè dọ Davidi ko yin amisisayidode taidi ahọlu do Islaeli ji,+ Filistinu lẹpo hẹji wá nado dín Davidi mọ.+ Whenue Davidi sè ehe, e jẹte yì figángán lọ mẹ.+ 18  Filistinu lẹ sọ wá bo gbàpe gbọn Agbàdo Lefaimi tọn mẹ.+ 19  Davidi sọ kanhose Jehovah+ dọmọ: “Ma hẹji yì hoavùn hẹ Filistinu lẹ ya? Be hiẹ na jo yé do alọ ṣie mẹ ya?” Jehovah sọ gblọnna Davidi dọmọ: “Hẹji yì, na yẹn na jo Filistinu lẹ do alọ towe mẹ dandan.”+ 20  Enẹwutu, Davidi wá Baali-pelazimi bo hù yé to finẹ. Whenẹnu, e dọmọ: “Jehovah ko gbà kẹntọ ṣie lẹ do+ to nukọn ṣie kẹdẹdile osin nọ zẹ̀ adó do.” Enẹwutu wẹ e do ylọ oyín filọ tọn dọ Baali-pelazimi.*+ 21  Filistinu lẹ sọ họ̀n jo boṣiọ yetọn lẹ do finẹ, bọ Davidi po sunnu etọn lẹ po bẹ yé yì. 22  To nukọn mẹ, Filistinu lẹ sọ vọ́ hẹji wá bo gbàpe gbọn Agbàdo Lefaimi+ tọn mẹ. 23  Davidi sọ kanhose Jehovah, ṣigba Ewọ dọna ẹn dọmọ: “A hẹji yì tlọlọ blo. Kakatimọ, gbọn godo na yé bo tọ́n do yé ji to zunkan baka tọn lẹ nukọn. 24  Podọ whenue hiẹ na sè afọgbè zọnlinzinzin tọn gbọn zunkan baka tọn lẹ ji, whenẹnu hiẹ ni yawu yinuwa, na Jehovah na ko tọ́nyi jẹnukọnna we nado hù awhànpa Filistinu lẹ tọn.” 25  Enẹwutu, Davidi basi kẹdẹdile Jehovah ko degbena ẹn do bo hù Filistinu+ lẹ sọn Geba+ kaka yì Gezẹli.+

Nudọnamẹ Odò Tọn

Kavi “hẹnnumẹ towe tlọlọ.”
To paa mẹ, “nọ plan Islaeli tọ́nyi bosọ nọ plan ẹn wá.”
Kavi “alindọn Davidi tọn.”
Kavi vlavo, “bọ ewọ ylọ ẹ dọ.”
Kavi “Milo.” Hogbe Heblugbe tọn de he zẹẹmẹdo “gọ́.”
Kavi “họ̀nmẹ.”
Zẹẹmẹdo “Ogán Gbigbàdo Tọn.”