Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 24:1-25

NUHE E BẸHẸN LẸ

  • Ylando mẹhihia tọn Davidi tọn (1-14)

  • Azọ̀nylankan hù omẹ 70 000 (15-17)

  • Davidi do agbà de (18-25)

    • Yẹn ma na basi avọ́sinsan vọnu (24)

24  Jehovah sọ vọ́ gblehomẹ do Islaeli go sinsinyẹn+ to whenue mẹde fọ́n Davidi* do yé ji dọmọ: “Yì, bo hia+ omẹ Islaeli po Juda po tọn lẹ.”+  Enẹwutu, ahọlu dọna awhàngán Joabi+ he tin to e dè dọmọ: “Jaale, gbọn hẹnnu Islaeli tọn lẹpo mẹ, sọn Dani kaka yì Beẹli-ṣeba,+ bo basi todohukanji gbẹtọ lọ lẹ tọn, na yẹn nido yọ́n sọha gbẹtọ lọ lẹ tọn.”  Ṣigba, Joabi dọna ahọlu dọmọ: “Na Jehovah Jiwheyẹwhe towe ni hẹn gbẹtọ lọ lẹ jideji whla 100, podọ na nukun oklunọ ṣie ahọlu tọn lẹ ni mọ enẹ, ṣigba naegbọn oklunọ ṣie ahọlu do jlo na wà onú ehe nkọ?”  Ṣigba, ohó ahọlu tọn duto Joabi po ogán awhànpa lọ tọn lẹ po ji. Enẹwutu, Joabi po ogán awhànpa lọ tọn lẹ po tọ́nyi sọn ahọlu nukọn nado basi lẹndopọ omẹ Islaeli tọn lẹ tọn.+  Yé dasá Jọdani bo dosla do Aloeli,+ to adusiwhé* tòdaho he to agbàdo* lọ ṣẹnṣẹn tọn, bosọ yì awà Gadinu lẹ tọn ji, podọ Jazẹli.+  Enẹgodo, yé dedo Giliadi+ po aigba Tatimi-họdṣi po tọn ji bo zindonukọn yì Dani-jaani bosọ lilẹ́ pànta Sidoni.+  Bọdo enẹ go, yé yì tòdaho gángán Tile tọn+ gọna tòdaho Hivinu+ lẹ po Kenaninu lẹ po tọn lẹpo mẹ, bo wá yì Negẹb+ Juda tọn to Beẹli-ṣeba+ to godo mẹ.  Gbọnmọ dali, yé gbọn aigba lọ lẹpo ji bo lẹkọwa Jelusalẹm to osun ṣinẹnẹ e lán azán 20 godo.  Joabi sọ dọ sọha gbẹtọ he yin linlẹn dopọ lọ lẹ tọn na ahọlu. Sọha awhànfuntọ Islaeli tọn he nọ hẹn ohí lẹ tọn yin 800 000 bọ sunnu Juda tọn lẹ tọn yin 500 000.+ 10  Ṣigba, ahun* Davidi tọn jẹ avùnho hẹ ẹ ji+ to whenue e ko hia gbẹtọ lọ lẹ godo. Whenẹnu, Davidi dọna Jehovah dọmọ: “N’ko waylando+ sinsinyẹn gbọn ehe wiwà dali. Podọ todin, Jehovah E, jaale bo jo nuṣiwa devizọnwatọ towe tọn na ẹn,+ na yẹn ko yinuwa po nulú po tlala.”+ 11  To whenue Davidi fọ́n to afọnnu, ohó Jehovah tọn wá Gad+ yẹwhegán lọ, yèdọ numọtọ Davidi tọn dè dọmọ: 12  “Yì, bo dọna Davidi dọ, ‘Nuhe Jehovah dọ die: “N’to onú atọ̀n zedonukọnna we. Hiẹ lọsu ni de dehe n’na hẹnwa ji we.”’”+ 13  Enẹwutu, Gad biọ họmẹ yì Davidi dè bo dọna ẹn dọmọ: “Huvẹ ni tọ́n to aigba lọ ji na owhe ṣinawe wẹ ya?+ Kavi hiẹ ni to hinhọ̀n sọn kẹntọ towe lẹ nukọn na osun atọ̀n dile yé na to mọdona we wẹ ya?+ Kavi azọ̀nylankan ni tin to aigba towe ji na azán atọ̀n wẹ ya?+ Todin, yí sọwhiwhe do lẹnnupọndo nuhe n’na gblọnna Mẹhe do mi hlan lọ ji.” 14  Enẹwutu, Davidi dọna Gad dọmọ: “Yẹn jẹflumẹ taun. Jaale, gbọ mí ni jai jẹ alọ Jehovah tọn mẹ,+ na lẹblanu etọn klo;+ amọ́ a dike n’jai jẹ alọ gbẹtọ tọn mẹ blo.”+ 15  Whenẹnu, Jehovah hẹn azọ̀nylankan+ de wá Islaeli ji sọn afọnnu kakajẹ ojlẹ dide lọ mẹ, sọmọ bọ gbẹtọ 70 000 kú+ sọn Dani kaka yì Beẹli-ṣeba.+ 16  Whenue angẹli lọ dlẹnalọ etọn hlan Jelusalẹm nado và ẹ sudo, Jehovah diọlinlẹn* gando nugbajẹmẹji lọ go+ bo dọna angẹli he to husudo hẹnwa mẹlọ lẹ ji lọ dọmọ: “E pé! Todin, alọ towe ni yìdo.” Angẹli Jehovah tọn ko sẹpọ likun-flétẹn Alauna+ Jẹbusinu+ lọ tọn to whenẹnu. 17  Whenue Davidi mọ angẹli he to gbẹtọ lẹ hù lọ, e dọna Jehovah dọmọ: “Yẹn wẹ waylando, yẹn wẹ sọ ṣinuwa; amọ́ lẹngbọ ehelẹ+—etẹwẹ yewlẹ wà? Jaale, gbọ alọ towe ni yinuwa sọta yẹn po whédo otọ́ ṣie tọn po.”+ 18  Enẹwutu, Gad biọ họmẹ yì Davidi dè to gbenẹgbe bo dọna ẹn dọmọ: “Hẹji yì bo do agbà de na Jehovah to likun-flétẹn Alauna Jẹbusinu lọ tọn.”+ 19  Davidi sọ hẹji dedo sọgbe hẹ ohó he Gad dọ, dile Jehovah ko degbe etọn do. 20  Whenue Alauna dekọ pọ́n odò bo mọdọ ahọlu po devizọnwatọ etọn lẹ po ja fihe ewọ te, Alauna tọ́njẹgbonu to afọdopolọji bo dẹ́ do odò pete na ahọlu. 21  Alauna kanse dọmọ: “Etẹwẹ hẹn oklunọ ṣie ahọlu wá devizọnwatọ etọn dè?” Davidi gblọn dọmọ: “Likun-flétẹn towe wẹ n’jlo na họ̀ sọn asi we nado sọgan do agbà de na Jehovah, na azọ̀nylankan he wá gbẹtọ lẹ ji lọ nido doalọte.”+ 22  Ṣigba, Alauna dọna Davidi dọmọ: “Gbọ oklunọ ṣie ahọlu ni yí i vọnu bo yí nuhe yọ́n to nukun etọn mẹ do basi nunina. Oyìn lẹ die na avọ́nunina mimẹ̀ lọ podọ nuyizan jinukun fiflé tọn po zẹgẹ oyìn lọ lẹ tọn po die taidi nake. 23  Ahọlu E, onú ehe lẹpo wẹ yẹn Alauna to nina ahọlu.” Enẹgodo, Alauna dọna ahọlu dọmọ: “Na Jehovah Jiwheyẹwhe towe ni do nukundagbe hia we.” 24  Ṣigba, ahọlu dọna Alauna dọmọ: “Lala, n’dona yí akuẹ do họ̀ ẹ sọn asi we. N’ma na basi avọ́sinsan mimẹ̀ lẹ vọnu hlan Jehovah Jiwheyẹwhe ṣie.” Enẹwutu, Davidi họ̀ likun-flétẹn lọ po oyìn lọ lẹ po yin ṣekẹli* fataka tọn 50.+ 25  Davidi sọ do agbà de+ do finẹ na Jehovah bo basi avọ́sinsan mimẹ̀ lẹ po avọ́sinsan jijọho tọn lẹ po. Whenẹnu wẹ Jehovah sè vẹvivẹ yetọn do aigba lọ tamẹ+ bọ azọ̀nylankan he wá Islaeli ji lọ doalọte.

Nudọnamẹ Odò Tọn

Kavi “whenue Davidi yin hinhẹn nado fọ́n.”
Kavi “hùwaji.”
Kavi “agbàdo tọ̀sisa tọn.” Pọ́n Zẹm.
Kavi “ayihadawhẹnamẹnu.”
Kavi “e vẹna Jehovah.”
Ṣekẹli dopo sọzẹn hẹ g 11,4. Pọ́n Nud. B14.