Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 21:1-22

NUHE E BẸHẸN LẸ

  • Gibeọninu lẹ yiahọsu to whédo Sauli tọn go (1-14)

  • Awhànfunfun hẹ Filistinu lẹ (15-22)

21  Todin, huvẹ+ de tọ́n to azán Davidi tọn lẹ gbè na owhe debọdo-dego atọ̀n, enẹwutu Davidi kanhose Jehovah bọ Jehovah dọmọ: “Hùnhọ́ de to okọ̀ na Sauli po whédo etọn po, na ewọ ko hù Gibeọninu lẹ wutu.”+  Enẹwutu, ahọlu ylọ Gibeọninu+ lẹ bo dọho hẹ yé. (Nalete, Gibeọninu lẹ ma yin Islaelivi, amọ́ Amolinu+ he pò lẹ wẹ yé, podọ Islaelivi lẹ ko whlé dai nado jo yé dogbẹ̀,+ ṣigba Sauli ko tẹnpọn nado hù yé, na zohunhun agọ̀ he e tindo na omẹ Islaeli po Juda po tọn lẹ wutu.)  Davidi dọna Gibeọninu lẹ dọmọ: “Etẹwẹ n’na wà na mì, podọ nawẹ n’gán basi ovẹsè gbọn, na mìwlẹ nido dona ogú Jehovah tọn?”  Gibeọninu lẹ dọna ẹn dọmọ: “Na míwlẹ, whẹho he gando Sauli po whédo etọn po go ma yin whẹho fataka kavi sika tọn;+ mọdopolọ míwlẹ ma sọgan hù mẹdepope to Islaeli.” Enẹwutu, e dọmọ: “Nudepope he mìwlẹ dọ wẹ yẹn na wà na mì.”  Yé dọna ahọlu dọmọ: “Dawe lọ he hù mí sudo bo kàn ayiha gigẹdẹ nado sukúndona mí sọn aigba Islaeli tọn pete ji+  gbọ ṣinawe to visunnu etọn lẹ mẹ ni yin nina mí. Míwlẹ nasọ plá oṣiọ yetọn lẹ do núgo*+ to Jehovah nukọn to Gibea+ Sauli tọn, yèdọ mẹdide Jehovah tọn.”+ Ahọlu sọ dọmọ: “Yẹn na jo yé na mì.”  Ṣigba, ahọlu do awuvẹmẹ hia Mẹfiboṣẹti,+ yèdọ visunnu Jonatani he yin visunnu Sauli tọn, na whiwhle he Davidi po Jonatani+ visunnu Sauli tọn po ko basi to Jehovah nukọn wutu.  Enẹwutu, ahọlu plan Almọni po Mẹfiboṣẹti po, yèdọ visunnu awe he Lizpa+ viyọnnu Aia tọn ji na Sauli lẹ, gọna visunnu atọ́n he Mikali*+ viyọnnu Sauli tọn ji na Adliẹli+ visunnu Balzilai Mẹholatinu lọ tọn lẹ.  Enẹgodo, e bẹ yé do alọmẹ na Gibeọninu lẹ, yé sọ ze oṣiọ yetọn lẹ plá do núgo to osó lọ ji to Jehovah nukọn.+ Yé omẹ ṣinawe lọ lẹpo kú dopọ; yé yin hùhù to azán tintan jibẹwawhé tọn gbè, yèdọ to bẹjẹeji jibẹwawhé balekun tọn. 10  To whenẹnu, Lizpa+ viyọnnu Aia tọn ze odẹ́vọ̀ de bo tẹ́ ẹ do osé ji sọn bẹjẹeji jibẹwawhé lọ tọn kakajẹ whenue jikun ja sọn olọn mẹ do oṣiọ lọ lẹ ji; e ma dike ohẹ̀ agahomẹ tọn lẹ ni jẹte do yé ji to okle kavi gbekanlin danji tọn lẹ ni sẹpọ yé to zánmẹ. 11  Nuhe asimọwhlá Sauli tọn, yèdọ Lizpa viyọnnu Aia tọn wà sọ yin didọna Davidi. 12  Enẹwutu, Davidi yì bẹ ohú Sauli po visunnu etọn Jonatani po tọn lẹ sọn nukọntọ* Jabẹṣi-giliadi tọn lẹ si,+ yèdọ mẹhe ko fìn yé sọn tòplitẹn Bẹti-ṣani tọn, fie Filistinu lẹ ko ze yé plá do to azán he gbè Filistinu lẹ hù Sauli to Gilboa.+ 13  E bẹ ohú Sauli tọn lẹ po ohú Jonatani visunnu etọn tọn lẹ po hẹji yì sọn finẹ, yé sọ bẹ ohú sunnu he ko yin hùhù*+ lọ lẹ lọsu tọn pli ga. 14  Enẹgodo, yé dì ohú Sauli po visunnu etọn Jonatani po tọn lẹ do yọdò Kiṣi+ otọ́ etọn tọn mẹ to Zela+ to aigba Bẹnjamini tọn ji. To whenue yé wà nuhe ahọlu ko degbe etọn lẹpo godo, Jiwheyẹwhe dotoaina ovẹvivẹ yetọn lẹ gando aigba lọ go.+ 15  Awhàn sọ vọ́ fọ́n to Filistinu lẹ po Islaeli po ṣẹnṣẹn.+ Enẹwutu, Davidi po devizọnwatọ etọn lẹ po jẹte nado hoavùn hẹ Filistinu lẹ, amọ́ nuṣikọna Davidi. 16  Kúnkan Lefaimi+ tọn de he nọ yin Iṣbi-benọbi, mẹhe tindo owhán gànvẹẹ tọn de he pẹ̀n sọ ṣekẹli 300*+ bosọ hẹn ohí yọyọ de, jlo na hù Davidi. 17  To afọdopolọji, Abiṣai+ visunnu Zeluia tọn wá gọalọna Davidi+ bo linú Filistinu lọ bosọ hù i. To ojlẹ enẹ mẹ, sunnu Davidi tọn lẹ whlé na ẹn dọmọ: “E ma jẹ dọ hiẹ nisọ yì funawhàn hẹ mí ba!+ E ma jẹ dọ hiẹ ni ṣí miyọ́ngbán Islaeli tọn!”+ 18  Enẹgodo, awhàn devo sọ yin fùnfùn hẹ Filistinu+ lẹ to Gọbi. To ojlẹ enẹ mẹ, Sibekai+ Huṣanu lọ hù Safi he yin kúnkan Lefaimi+ lẹ tọn de. 19  Awhàn devo sọ yin fùnfùn hẹ Filistinu+ lẹ to Gọbi, bọ Ẹlhanani visunnu Jaale-olẹgimi Bẹtlẹhẹminu lọ tọn hù Goliati Gatinu lọ, mẹhe akún owhán etọn tọn klo taidi dòtin avọ̀lọ̀ntọ lẹ tọn.+ 20  Whladopo dogọ, awhàn devo sọ yin fùnfùn to Gati, fie dawe he tọ́nalùn tlala de te, e sọ tindo alọvi 6 to alọ dopodopo go podọ afọvi 6 to afọ dopodopo go, bọ popolẹpo yin 24; ewọ lọsu yin dopo to kúnkan Lefaimi lẹ tọn+ mẹ. 21  E sọ to Islaeli vlẹko mapote.+ Enẹwutu, Jonatani visunnu Ṣimei+ he yin nọvisunnu Davidi tọn hù i. 22  Omẹ ẹnẹ ehelẹ yin kúnkan Lefaimi lẹ tọn to Gati, yé sọ yin hùhù gbọn Davidi po devizọnwatọ etọn lẹ po dali.+

Nudọnamẹ Odò Tọn

To paa mẹ, “nasọ do yé hia to gbangba,” enẹ wẹ, whenue awà po afọ yetọn lẹ po na ko yin winwẹ́n.
Kavi vlavo, “Mẹlabi.”
Kavi vlavo, “aigbanọ.”
To paa mẹ, “yin didohia to gbangba.”
Nudi kg 3,42. Pọ́n Nud. B14.