Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 2:1-32

NUHE E BẸHẸN LẸ

  • Davidi duahọlu do Juda ji (1-7)

  • Iṣi-boṣẹti duahọlu do Islaeli ji (8-11)

  • Awhàn to whédo Davidi tọn po Sauli tọn po ṣẹnṣẹn (12-32)

2  Enẹgodo, Davidi kanhose Jehovah+ dọmọ: “Ma hẹji yì dopo to tòdaho Juda tọn lẹ mẹ ya?” Jehovah sọ dọna ẹn dọmọ: “Hẹji yì.” Davidi sọ kanse dọmọ: “Fie wẹ n’dona yì?” E gblọnna ẹn dọ: “Yì Heblọni.”+  Enẹwutu, Davidi hẹji yì dọ́n po asi etọn awe lẹ po, yèdọ Ahinoami+ he wá sọn Jezleẹli po Abigaili+ he yin asuṣiọsi Nabali Kalmẹlinu lọ tọn po.  Davidi sọ plan sunnu he topọ hẹ ẹ lẹ yì ga,+ yèdọ dopodopo yetọn po whédo etọn po bọ yé sawhé do tòdaho he lẹdo Heblọni pé lẹ mẹ.  Enẹgodo, sunnu Juda tọn lẹ wá bo yiamisisadode Davidi taidi ahọlu do whédo Juda tọn ji+ to finẹ. Yé sọ dọna Davidi dọmọ: “Sunnu Jabẹṣi-giliadi tọn lẹ wẹ dì Sauli.”  Enẹwutu, Davidi do wẹnsagun lẹ hlan sunnu Jabẹṣi-giliadi tọn lẹ bo dọna yé dọmọ: “Jehovah ni dona mì, na mìwlẹ ko do owanyi nugbo hia oklunọ mìtọn Sauli gbọn dìdì i dali.+  Jehovah ni do owanyi nugbo po nugbonọ-yinyin po hia mì. Yẹnlọsu na do homẹdagbe hia mì, na enẹ he mìwlẹ ko wà wutu.+  Todin, mì yin huhlọnnọ bosọ yin adọgbotọ, na oklunọ mìtọn Sauli ko kú, podọ whédo Juda tọn ko yiamisisadode mi taidi ahọlu do yede ji.”  Ṣigba, Abneli+ visunnu Neli tọn, yèdọ ogán awhànpa Sauli tọn ko ze Iṣi-boṣẹti+ visunnu Sauli tọn bo ko hẹn ẹn dasá wá Mahanaimi+  bo ko sọ yí i do doahọlu do Giliadi,+ Aṣulinu lẹ, Jezleẹli,+ Eflaimi,+ Bẹnjamini po Islaeli pete po ji. 10  Owhe 40 wẹ visunnu Sauli tọn, Iṣi-boṣẹti tindo to whenue e lẹzun ahọlu do Islaeli ji, e sọ dugán na owhe awe. Ṣigba, Davidi wẹ whédo Juda tọn kẹalọyi.+ 11  Ojlẹ* he Davidi yí do duahọlu do whédo Juda tọn ji to Heblọni yin owhe ṣinawe po osun ṣidopo po.+ 12  To nukọn mẹ, Abneli visunnu Neli tọn po devizọnwatọ Iṣi-boṣẹti visunnu Sauli tọn tọn lẹ po tọ́n sọn Mahanaimi+ yì Gibeọni.+ 13  Joabi+ visunnu Zeluia tọn+ po devizọnwatọ Davidi tọn lẹ po sọ tọ́nyi bo pé yé to osindò Gibeọni tọn kọ̀n; pipli dopo sọ sinai to awà osindò lọ tọn ehe ji bọ pipli awetọ to awà osindò lọ tọn awetọ ji. 14  To godo mẹ, Abneli dọna Joabi dọmọ: “Gbọ jọja sunnu lẹ ni fọ́n bo jẹ awhànfun* ji to nukọn mítọn.” Joabi sọ dọmọ: “Gbọ yé ni fọ́n.” 15  Enẹwutu, yé fọ́n bo dasá, yèdọ dopodopo yetọn po sọha etọn po, enẹ wẹ omẹ 12 na Bẹnjamini po Iṣi-boṣẹti visunnu Sauli tọn po, podọ omẹ 12 sọn devizọnwatọ Davidi tọn lẹ mẹ. 16  Yé wle ota ode awetọ tọn hẹn bọ dopodopo yetọn sọ́ ohí adà mẹ na awetọ etọn, yemẹpo sọ họ́jai dopọ. Enẹwutu, ofi enẹ he tin to Gibeọni yin yiylọdọ Hẹlkati-hazulimi. 17  Avùnhiho lọ wá sinyẹn to gbenẹgbe taun, bọ to godo mẹ Abneli po sunnu Islaeli tọn lẹ po ṣíawhàn to devizọnwatọ Davidi tọn lẹ nukọn. 18  Visunnu Zeluia tọn+ atọ̀n lẹ sọ tin to finẹ—yèdọ Joabi,+ Abiṣai+ po Asahẹli+ po; Asahẹli sọ bí-ge to wezun mẹ taidi otẹgbọẹ de to danji. 19  Asahẹli sọ dómọna Abneli bo ma vì yì adusi kavi yì amiyọn dile e to mọdona Abneli. 20  Whenue Abneli yìnkọpọ́n godo, e kanse dọmọ, “Hiẹ wẹ ya, Asahẹli?” bọ ewọ gblọn dọ, “Mọwẹ, yẹn wẹ.” 21  Whenẹnu, Abneli dọna ẹn dọmọ: “Vì yì adusi kavi yì amiyọn bo wle dopo to jọja sunnu lẹ mẹ bosọ yí nudepope he jlo we sọn e si.” Amọ́, Asahẹli ma jlo na lẹkọ sọn godo na ẹn. 22  Enẹwutu, Abneli sọ vọ́ dọna Asahẹli dọmọ: “Gbọ yinyan mi. Naegbọn yẹn nado hù we? Nawẹ yẹn na pọ́n nukun Joabi nọvisunnu towe tọn mẹ gbọn?” 23  Ṣigba, ewọ gbẹ́ nado gbọ yinyan ẹn, enẹwutu Abneli yí yonu owhán etọn tọn do sọ́ adọ̀mẹ na ẹn+ bọ owhán lọ luntọ́n gbọn nẹgbé na ẹn; ewọ sọ họ́jai do finẹ bo kú to afọdopolọji. Mẹdepope he jẹ fihe Asahẹli họ́jai bo kú do nọ nọte vude to finẹ. 24  Enẹgodo, Joabi po Abiṣai po dómọna Abneli. Dile owhè to họyì, yé wá okọ́ta Amma tọn ji, ehe pannukọn Gia to aliho he yì danfafa Gibeọni tọn ji. 25  Bẹnjamininu lẹ bẹ yede pli dopọ do Abneli godo to finẹ bọ yé kọngbedopọ taidi awhànfun-gbẹ́ dopo bosọ nọte do okọ́ta de ji aga. 26  Whenẹnu, Abneli dawhá hlan Joabi dọmọ: “Be ohí na to vasudo hẹnwa mapote wẹ ya? Be a ma yọnẹn dọ kọdetọn vẹadi kẹdẹ wẹ e na hẹnwa to godo mẹ ya? Enẹwutu, nawẹ e na dẹnsọ whẹpo hiẹ nado dọna gbẹtọ lọ lẹ nado gbọ mọdona mẹmẹsunnu yetọn lẹ?” 27  Joabi sọ dọmọ: “Dile e họnwun dọ Jiwheyẹwhe nugbo lọ togbẹ̀, eyin hiẹ ma ko dọho wẹ, be osọ afọnnu janwẹ gbẹtọ lọ lẹ na wá doalọtena mọdidona mẹmẹsunnu yetọn lẹ.” 28  Todin, Joabi kún azò lọ bọ sunnu etọn lẹ doalọtena mọdidona Islaeli bọ avùnhiho lọ doalọte. 29  Enẹgodo, Abneli po sunnu etọn lẹ po zinzọnlin gbọn Alaba+ to ozán lọ pete mẹ bo dasá Jọdani bosọ zinzọnlin gbọn agbàdo lọ* pete mẹ bo wá Mahanaimi+ to godo mẹ. 30  To whenue Joabi ko lẹkọ sọn Abneli godo, e bẹ gbẹtọ lọ lẹpo pli. Omẹ 19 wẹ whè sọn devizọnwatọ Davidi tọn lẹ mẹ, gọna Asahẹli. 31  Ṣigba, devizọnwatọ Davidi tọn lẹ ko gbawhàn Bẹnjamininu lẹ po sunnu Abneli tọn lẹ po tọn bọ omẹ 360 wẹ kú to sunnu yetọn lẹ mẹ. 32  Yé sọ ze Asahẹli+ bo dì i do yọdò otọ́ etọn tọn mẹ, to Bẹtlẹhẹm.+ Enẹgodo, Joabi po sunnu etọn lẹ po zinzọnlin to ozán lọ pete mẹ bo wá Heblọni+ to wunkẹngbe afọnnu.

Nudọnamẹ Odò Tọn

To paa mẹ, “Sọha azán.”
Kavi “agbàwhlẹn.”
Kavi vlavo, “gbọn Bitilọni.”