Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 19:1-43

NUHE E BẸHẸN LẸ

  • Davidi nọ aluẹmẹ na Absalọmi (1-4)

  • Joabi wọhẹ Davidi (5-8a)

  • Davidi lẹkọyi Jelusalẹm (8b-15)

  • Ṣimei biọ jona (16-23)

  • Mẹfiboṣẹti do homẹvọ etọn hia (24-30)

  • Yè doyẹyigona Balzilai (31-40)

  • Nudindọn to hẹnnu lẹ ṣẹnṣẹn (41-43)

19  Linlin yin nina Joabi dọmọ: “Ahọlu to avivi bo to aluẹmẹ na Absalọmi.”+  Enẹwutu, awhàngbigba* gbenẹgbe tọn yin didiọ zun aluẹmẹninọ na gbẹtọ lẹpo, na yé sè dọ ahọlu to awubla na visunnu etọn wutu.  Gbẹtọ lẹ sọ lẹkọ abọẹ wá tòdaho+ lọ mẹ to gbenẹgbe taidi mẹhe họ̀n sọn awhàn nukọn bọ winyan to hùhù lẹ nkọ.  Ahọlu ṣinyọnnudo nukunmẹ bo yí ogbé lélé do to avivi mapote dọmọ: “Ṣo visunnu ṣie, Absalọmi! Absalọmi visunnu ṣie, ṣo visunnu ṣie!”+  Whenẹnu, Joabi biọ họmẹ yì ahọlu dè bo dọmọ: “To egbehe, hiẹ ko dowinyan devizọnwatọ towe lẹpo he whlẹn ogbẹ̀* towe gọna ogbẹ̀* visunnu towe lẹ,+ viyọnnu towe lẹ,+ asi towe lẹ po asimọwhlá towe lẹ+ po tọn gán to egbé.  Hiẹ yiwanna mẹhe gbẹwanna we lẹ bo gbẹwanna mẹhe yiwanna we lẹ, na hiẹ ko hẹn ẹn họnwun to egbé dọ ogán po devizọnwatọ towe lẹ po ma yin nude na we, na n’kudeji dọ eyin mímẹpo wẹ ko kú to egbé bọ Absalọmi kẹdẹ pò togbẹ̀, enẹ na ko hẹn homẹ towe hùn.  Todin, fọ́n bo tọ́njẹgbonu bosọ vọ́ jide na* devizọnwatọ towe lẹ, na Jehovah wẹ n’yí do whlé dọ eyin a ma tọ́njẹgbonu, sunnu dopo tata ma na pò to dè we to egbé whèjai. Ehe ka na ylan na we hú nugbajẹmẹji he ko wá ji we sọn jọja whenu towe kakajẹ din lẹpo.”  Enẹwutu, ahọlu fọ́n bo sinai do họngbo tòdaho lọ tọn ji, bọ e yin didọna gbẹtọ lẹpo dọmọ: “Todin, ahọlu ko wá sinai do họngbo ji.” Whenẹnu, gbẹtọ lẹpo wá ahọlu nukọn. Ṣigba, Islaeli ko họnyi, yèdọ mẹdopodopo yì owhé etọn gbè.+  Gbẹtọ lẹpo to hẹnnu Islaeli tọn lẹpo mẹ sọ to nudọn dọmọ: “Ahọlu wẹ whlẹn mí sọn alọ kẹntọ mítọn lẹ tọn mẹ,+ bosọ whlẹn mí sọn alọ Filistinu lẹ tọn mẹ; amọ́ todin e ko họnyi sọn aigba lọ ji na Absalọmi tọn wutu.+ 10  Podọ Absalọmi he mí yiamisisadode do mí+ ji ko sọ kú to awhàngbenu.+ Todin, naegbọn mì ma do to nudepope yiwà nado hẹn ahọlu lẹkọwa?” 11  Ahọlu Davidi sọ do owẹ̀n ehe hlan Zadọki+ po Abiatali+ po he yin yẹwhenọ lẹ dọmọ: “Mì dọhona mẹho Juda tọn lẹ,+ bo dọna yé dọ, ‘Naegbọn mìwlẹ nado yin omẹ godo tọn lẹ nado hẹn ahọlu lẹkọwa owhé etọn gbè, to whenuena e yindọ owẹ̀n Islaeli pete tọn ko wá ahọlu dè to owhé etọn gbè? 12  Nọvisunnu ṣie lẹ wẹ mìwlẹ; ohú ṣie podọ agbasalan ṣie* wẹ mì. Naegbọn mìwlẹ nado yin omẹ godo tọn lẹ nado hẹn ahọlu lẹkọwa?’ 13  Mì nisọ dọna Amasa+ dọ, ‘Be e ma yin ohú ṣie podọ agbasalan ṣie wẹ hiẹ yin ya? Enẹwutu, Jiwheyẹwhe ni sayana mi sinsinyẹn eyin hiẹ ma lẹzun awhàngán ṣie sọn din to otẹn Joabi+ tọn mẹ.’” 14  Gbọnmọ dali, e duto* ahun sunnu Juda tọn lẹpo tọn ji taidi dọ mẹdopo wẹ, bọ yé dowẹn hlan ahọlu dọmọ: “Lẹkọwa, yèdọ hiẹ po devizọnwatọ towe lẹpo po.” 15  To whenue ahọlu lẹkọja bo jẹ Jọdani, omẹ Juda tọn lẹ wá Gilgali+ nado pé ahọlu bo plan ẹn dasá Jọdani. 16  Whenẹnu, Ṣimei+ visunnu Gela tọn, yèdọ Bẹnjamininu lọ he wá sọn Bahulimi, yawu jẹte wá po sunnu Juda tọn lẹ po nado wá pé Ahọlu Davidi, 17  bọ sunnu 1 000 hodo e wá sọn Bẹnjamini. Humọ, Ziba+ devizọnwatọ owhé Sauli tọn, gọna visunnu etọn 15 lẹ po devizọnwatọ etọn 20 lẹ po, whlẹndo bo jẹte yì Jọdani jẹnukọnna ahọlu. 18  E* dasá gbọn fie tọ̀sisa lọ ma siso te nado wá plan whédo ahọlu tọn dasá podọ nado wà nudepope he yin ojlo ahọlu tọn. Ṣigba, Ṣimei visunnu Gela tọn dẹ́ do odò to ahọlu nukọn to whenue ahọlu jlo na dasá Jọdani. 19  Ewọ sọ dọna ahọlu dọmọ: “Oklunọ ṣie ni ma gblewhẹdo mi blo, podọ a flin oylan he yẹn devizọnwatọ towe wà+ to azán he gbè oklunọ ṣie ahọlu to tintọ́njẹgbonu sọn Jelusalẹm blo. Ahọlu ni ma ze ahun etọn do ehe ji blo, 20  na yẹn devizọnwatọ towe lọsu yọnẹn dọ n’ko waylando; enẹwutu wẹ n’do yin omẹ tintan sọn whédo Josẹfu tọn pete mẹ nado jẹte wá pé oklunọ ṣie ahọlu to egbé.” 21  To afọdopolọji, Abiṣai+ visunnu Zeluia+ tọn dọmọ: “Be e ma jẹ dọ Ṣimei ni yin hùhù na ehe wutu ya, na mẹyiamisisadode Jehovah tọn+ wẹ ewọ zun?” 22  Ṣigba, Davidi dọmọ: “Etẹwẹ dù mì to ehe mẹ, mì visunnu Zeluia tọn lẹ,+ bọ mìwlẹ nado yinuwa jẹagọdo mi to egbé? Be e jẹ dọ mẹdepope ni yin hùhù to Islaeli to egbehe wẹ ya? Na be n’ma yọnẹn to egbehe dọ yẹn wẹ yin ahọlu do Islaeli ji wẹ ya?” 23  Enẹgodo, ahọlu dọna Ṣimei dọmọ: “Hiẹ ma na yin hùhù gba.” Ahọlu sọ whlé+ na ẹn. 24  Mẹfiboṣẹti,+ yèdọ ovivi Sauli tọn lọsu jẹte wá pé ahọlu. E ma ko klọ́ afọ* kavi pà atán etọn kavi yàn avọ̀ etọn lẹ sọn azán he gbè ahọlu ko tọ́nyi kakajẹ azán he gbè e lẹkọwa to jijọho mẹ. 25  Whenue e wá* Jelusalẹm nado pé ahọlu, ahọlu dọna ẹn dọmọ: “Mẹfiboṣẹti, naegbọn a ma do hodo mi yì?” 26  Ewọ sọ gblọn dọmọ: “Oklunọ ṣie ahọlu E, devizọnwatọ ṣie+ wẹ klọ mi be. Na yẹn devizọnwatọ towe ko dọ dọ, ‘Gbọ ma wleawuna kẹtẹkẹtẹ ṣie, na yẹn nido sọgan zọ̀n e ji hodo ahọlu yì,’ na sẹkunọ de wẹ devizọnwatọ towe.+ 27  Ṣigba, ewọ yì hẹn yẹn devizọnwatọ towe gble to oklunọ ṣie ahọlu dè.+ Amọ́, oklunọ ṣie ahọlu taidi angẹli Jiwheyẹwhe nugbo lọ tọn de, enẹwutu wà nudepope he yọ́n to nukun towe mẹ. 28  Whédo otọ́ ṣie tọn pete wẹ sọgan ko yin hùhù gbọn oklunọ ṣie ahọlu dali, ṣogan hiẹ hẹn yẹn devizọnwatọ towe zun dopo to mẹhe nọ dùnú to tafo towe ji lẹ mẹ.+ Enẹwutu, jlọjẹ tẹwẹ n’tindo nado vọ́ to awhádo hlan ahọlu?” 29  Ṣigba, ahọlu dọna ẹn dọmọ: “Naegbọn a zindonukọn nado to hodọ dole? N’ko basi dide dọ hiẹ po Ziba po ni má ogle lọ to mìde ṣẹnṣẹn.”+ 30  Whenẹnu, Mẹfiboṣẹti gblọnna ahọlu dọmọ: “Gbọ ewọ ni yí popolẹpo, todin he oklunọ ṣie ahọlu ko lẹkọwa owhé etọn gbè to jijọho mẹ.” 31  Enẹgodo, Balzilai+ Giliadinu lọ jẹte sọn Logelimi wá Jọdani nado plan ahọlu jẹ Jọdani. 32  Balzilai ko poyọnho taun, yèdọ owhe 80 mẹho, podọ ewọ wẹ na núdùdù ahọlu to whenue ahọlu to Mahanaimi,+ na adọkunnọ daho de wẹ ewọ. 33  Enẹwutu, ahọlu dọna Balzilai dọmọ: “Dasá wayi hẹ mi, yẹn nasọ nọ na we núdùdù to Jelusalẹm.”+ 34  Ṣigba, Balzilai dọna ahọlu dọmọ: “Azán* nẹmu wẹ pò na mi to gbẹ̀mẹ bọ yẹn nado hẹji yì Jelusalẹm hẹ ahọlu? 35  N’ko tindo owhe 80 todin.+ Be n’gán gbẹ́ yọ́n dagbe dovo na oylan ya? Be yẹn devizọnwatọ towe gán gbẹ́ sè vivi nuhe n’dù bo nù lẹ tọn ya? Be n’gán gbẹ́ dotoaina ogbè hànjitọ sunnu po yọnnu lẹ po tọn wẹ?+ Enẹwutu, naegbọn devizọnwatọ towe nado lẹzun agbàn pinpẹn devo na oklunọ ṣie ahọlu? 36  E ko pé dọ yẹn devizọnwatọ towe ni plan ahọlu jẹ Jọdani poun. Naegbọn ahọlu nado yí dagbe ehe do suahọ mi? 37  Jaale, gbọ yẹn devizọnwatọ towe ni lẹkọ bo yì kú do tòdaho ṣie mẹ sẹpọ ṣiọditẹn otọ́ ṣie po onọ̀ ṣie po tọn.+ Ṣigba, devizọnwatọ towe Kimhami+ die. Gbọ ewọ ni dasá hodo oklunọ ṣie ahọlu yì, na hiẹ nido wà nudepope he yọ́n to nukun towe mẹ na ẹn.” 38  Enẹwutu, ahọlu dọmọ: “Kimhami na dasá hodo mi yì, bọ yẹn na wà nudepope he yọ́n to nukun towe mẹ na ẹn; nudepope he a biọ mi, yẹn na wà ẹ na we.” 39  Todin, gbẹtọ lọ lẹpo jẹ Jọdani dasá ji, bọ whenue ahọlu ko dasá pó godo, e donùnùgo na Balzilai+ bo dona ẹn; Balzilai sọ lẹkọyi whé. 40  Whenue ahọlu dasá yì Gilgali,+ Kimhami dasá hodo e yì. Omẹ Juda tọn lẹpo po mado-awe omẹ Islaeli tọn lẹ tọn po wẹ plan ahọlu dasá.+ 41  Enẹgodo, sunnu Islaeli tọn lẹpo dọnsẹpọ ahọlu bo dọna ẹn dọmọ: “Naegbọn mẹmẹsunnu mítọn lẹ, yèdọ sunnu Juda tọn lẹ do fìn we yì bo plan ahọlu po whédo etọn po dasá Jọdani, gọna sunnu Davidi tọn lẹpo?”+ 42  Sunnu Juda tọn lẹpo sọ gblọnna sunnu Islaeli tọn lẹ dọmọ: “Na ahọlu yin hẹnnumẹ mítọn wutu wẹ.+ Naegbọn mì do to homẹgble na ehe wutu? Be mí dù nudepope sọn ahọlu si wẹ ya, kavi be nunina de yin nina mí wẹ ya?” 43  Ṣigba, sunnu Islaeli tọn lẹ gblọnna sunnu Juda tọn lẹ dọmọ: “Mimá ao wẹ míwlẹ tindo to ahọluduta lọ mẹ, enẹwutu mí tindo jlọjẹ susu to Davidi mẹ hú mìwlẹ. Todin, naegbọn mì do yinuwa hẹ mí po vlẹko po? Be e ma yin míwlẹ wẹ dona yin omẹ tintan nado plan ahọlu mítọn lẹkọwa ya?” Ṣigba, ohó sunnu Juda tọn lẹ tọn duto* ohó sunnu Islaeli tọn lẹ tọn ji.

Nudọnamẹ Odò Tọn

Kavi “whlẹngán.”
Kavi “alindọn.”
Kavi “alindọn.”
To paa mẹ, “bosọ dọhona ahun.”
Kavi “hẹnnumẹ ṣie tlọlọ.”
To paa mẹ, “dẹ́.”
Kavi vlavo, “Yé.”
Hogbe Heblugbe tọn lọ sọgan sọ bẹ ofẹ̀n pipà hẹn.
Kavi vlavo, “wá sọn.”
To paa mẹ, “Azán owhe lẹ tọn.”
Kavi “sinyẹn hú.”