Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 18:1-33

NUHE E BẸHẸN LẸ

  • Absalọmi ṣíawhàn bo kú (1-18)

  • Davidi sè okú Absalọmi tọn (19-33)

18  Enẹgodo, Davidi hia sunnu he to e dè lẹ bo de ogán omẹ fọtọ́n lẹ tọn po ogán omẹ kanweko lẹ tọn po do yé ji.+  Davidi sọ do mado atọ̀n sunnu lọ lẹ tọn hlan to anademẹ* Joabi tọn glọ,+ mado atọ̀n devo to anademẹ nọvisunnu Joabi tọn Abiṣai+ he yin visunnu Zeluia tọn+ glọ, podọ mado atọ̀n devo to anademẹ Ittai+ Gatinu lọ tọn glọ. Ahọlu sọ dọna sunnu lọ lẹ dọmọ: “Yẹnlọsu na tọ́nyi hẹ mì ga.”  Ṣigba, yé dọmọ: “E ma jẹ dọ hiẹ ni tọ́nyi,+ na eyin e wá jọ bọ míwlẹ họ̀n, yé ma na pọ́n mí dè;* podọ eyin mado-awe mítọn tlẹ kú, yé ma na pọ́n mí dè, na hiẹ dopo họakuẹ hú mí omẹ 10 000.+ Enẹwutu, e na pọnte hugan eyin a nọ do alọgọ hlan mí sọn tòdaho lọ mẹ.”  Ahọlu sọ dọna yé dọmọ: “Nudepope he yọ́n to nukun mìtọn mẹ wẹ n’na wà.” Enẹwutu, ahọlu nọte to họngbo tòdaho lọ tọn kọ̀n, bọ sunnu lọ lẹpo tọ́nyi sọgbe hẹ pipli omẹ kanweko tọn po pipli omẹ fọtọ́n tọn yetọn lẹ po.  Whenẹnu, ahọlu na gbedide ehe Joabi, Abiṣai po Ittai po dọmọ: “Mì wà dẹẹdẹ hẹ jọja sunnu lọ, yèdọ Absalọmi, na yẹn tọn wutu.”+ Sunnu lọ lẹpo wẹ sè whenue ahọlu na gbedide ehe ogán lọ lẹpo gando Absalọmi go.  Sunnu lọ lẹ sọ tọ́nyi danji nado pé omẹ Islaeli tọn lẹ, bọ yé funawhàn to zungbo Eflaimi tọn mẹ.+  Devizọnwatọ Davidi tọn lẹ sọ gbawhàn omẹ Islaeli tọn lẹ+ tọn to finẹ,+ gbẹtọ susu wẹ yin hùhù to gbenẹgbe—yèdọ sunnu 20 000.  Awhàn lọ sọ dlẹnkan gbọn lẹdo lọ pete mẹ. Humọ, mẹhe zungbo lọ hù lẹ sù hugan mẹhe yin hùhù gbọn ohí dali to gbenẹgbe lẹ.  To godo mẹ, Absalọmi wá mọ ede to devizọnwatọ Davidi tọn lẹ nukọn tlọlọ. Otlò* de wẹ Absalọmi to kùnkùn, bọ otlò* lọ biọ atin daho he vùn alà taun de glọ, ota etọn sọ ján do atin daho lọ mẹ, sọmọ bọ e to gblẹgblẹ to jẹhọn mẹ* bọ otlò* he ji e te lọ yì sọn oglọ na ẹn. 10  To whenẹnu, mẹde mọ nujijọ lọ bo dọna Joabi+ dọmọ: “Pọ́n! N’mọ Absalọmi to sẹ́gẹ́sẹgẹ to atin daho de mẹ.” 11  Joabi gblọnna sunnu he wá dọhona ẹn lọ dọmọ: “Whenue a mọ ẹn, naegbọn a ma do hù i dlan aigba hadopo? Whenẹnu, yẹn na ko yí homẹhunhun do na we fataka-kuẹ ao po gbànnú de po.” 12  Ṣigba, sunnu lọ dọna Joabi dọmọ: “Eyin fataka-kuẹ 1 000 tlẹ yin nina* mi, n’ma sọgan ze alọ ṣie daga do visunnu ahọlu tọn ji, na mí ko sè bọ ahọlu degbena hiẹ, Abiṣai po Ittai po dọ, ‘Mẹdepope he mìwlẹ yin, mì saa payi jọja sunnu lọ, yèdọ Absalọmi go na mi.’+ 13  Eyin n’ko vẹtoli bo hù i* wẹ, e ma na whlá do ahọlu kakadoi, podọ hiẹ lọsu ma na basi hihọ́na mi.” 14  To whenẹnu, Joabi dọna ẹn dọmọ: “N’ma nasọ hẹn whenu gú humọ to dè we!” Enẹwutu, e bẹ opò tlọ́ntlọ́n* atọ̀n do alọmẹ, bo sọ́ ahun mẹ na Absalọmi luntọ́n dile ewọ gbẹ́ pò togbẹ̀ to atin daho lọ ṣẹnṣẹn. 15  Enẹgodo, devizọnwatọ ao he nọ hẹn awhànfunnu Joabi tọn lẹ wá bo linú Absalọmi kaka bọ e kú.+ 16  Todin, Joabi kún azò, bọ sunnu lọ lẹ lẹkọ bo masọ dómọna Islaeli ba; Joabi biọ to yé si nado doalọte. 17  Yé ze oṣiọ Absalọmi tọn bo dlan ẹn do odò daho de mẹ to zungbo lọ mẹ bosọ bẹ okiti zannu lẹ tọn daho de pli do e ji.+ Omẹ Islaeli tọn lẹpo sọ họnyi whé. 18  To whenue Absalọmi gbẹ́ pò togbẹ̀, e ko ze zannu de tùnte na ede do Agbàdo Ahọlu tọn+ mẹ, na e dọ dọ: “N’ma tindo visunnu de he na hẹn oyín ṣie dote.”+ Enẹwutu, e do oyín ede tọn na zannu lọ, bọ e nọ yin yiylọdọ Zannu Oflin tọn Absalọmi tọn kakajẹ egbé. 19  Ahimaazi+ visunnu Zadọki tọn dọmọ: “Jaale, gbọ ma họ̀nwezun bo yì dowẹn ahọlu, na Jehovah ko hẹn whẹdida dodo ṣẹ do ota etọn mẹ gbọn túntún in dote sọn alọ kẹntọ etọn lẹ tọn mẹ dali.”+ 20  Ṣigba, Joabi dọna ẹn dọmọ: “A ma na yin wẹnsagun to egbé. A gán wá dowẹn to whedevonu, amọ́ a ma gán do owẹ̀n lọ to egbé, na visunnu ahọlu tọn titi wẹ kú.”+ 21  Enẹgodo, Joabi dọna Kuṣinu+ de dọmọ: “Yì bo dọ nuhe a ko mọ lẹ na ahọlu.” To whenẹnu, Kuṣinu lọ dẹ́ do odò na Joabi bo họ̀nwezun dedo. 22  Ahimaazi visunnu Zadọki tọn sọ vọ́ dọna Joabi dọmọ: “Depope he e yin, saa jaale bo gbọ yẹnlọsu ni họ̀nwezun to godona Kuṣinu lọ.” Ṣigba, Joabi dọmọ: “Visunnu ṣie, naegbọn hiẹ nado họ̀nwezun yì to whenue owẹ̀n he a na do de ma tin?” 23  Ṣogan, e dọmọ: “Depope he e yin, gbọ ma họ̀nwezun yì.” Enẹwutu, Joabi dọna ẹn dọmọ: “Họ̀nwezun yì!” Ahimaazi sọ họ̀nwezun gbọn aliho agbegbe Jọdani tọn lọ tọn* ji bo wá jẹnukọnna Kuṣinu lọ to godo mẹ. 24  Todin, Davidi to aisinsin to họngbo tòdaho lọ tọn awe lẹ ṣẹnṣẹn,+ bọ nuhọ́tọ+ de hẹji yì họta to adó họngbo lọ tọn ji. Dile e to nupọn hlan nukọn, e mọ sunnu de to wezunhọ̀n ja edeṣo. 25  Enẹwutu, nuhọ́tọ lọ dawhá bo dọ nuhe e mọ na ahọlu. Ahọlu sọ dọmọ: “Eyin ewọ ṣo wẹ, be owẹ̀n de wẹ e hẹn ja.” Dile ewọ to dindọnsẹpọ, 26  nuhọ́tọ lọ sọ mọ sunnu devo to wezunhọ̀n ja. To whenẹnu, e dawhá hlan họ̀njinọtọ lọ dọmọ: “Pọ́n! Sunnu devo to wezunhọ̀n ja edeṣo!” Ahọlu sọ dọmọ: “Owẹ̀n de wẹ omẹ enẹ lọsu hẹn ja.” 27  Nuhọ́tọ lọ dọmọ: “N’mọdọ sunnu tintan lọ to wezunhọ̀n di Ahimaazi+ visunnu Zadọki tọn,” enẹwutu ahọlu dọmọ: “Mẹdagbe de wẹ ewọ, podọ wẹndagbe de wẹ e na ko hẹn ja.” 28  Enẹgodo, Ahimaazi dawhá hlan ahọlu dọmọ: “Nude ma jọ!” To whenẹnu, e ṣinyọ́n nukunmẹ ai to ahọlu nukọn. E sọ dọmọ: “Pipà ni tin hlan Jehovah Jiwheyẹwhe towe he jo mẹhe ṣiatẹ* do oklunọ ṣie ahọlu go lẹ do alọ ahọlu tọn mẹ!”+ 29  Ṣigba, ahọlu kanse dọmọ: “Nudepope ma jọ do jọja sunnu lọ, yèdọ Absalọmi go nẹ?” To whenẹnu, Ahimaazi dọmọ: “N’mọ zinhihò daho de to whenue Joabi to devizọnwatọ ahọlu tọn po yẹn devizọnwatọ towe po dohlan, amọ́ n’ma yọ́n nuhe jọ.”+ 30  Enẹwutu, ahọlu dọmọ: “Sẹ̀ jẹ apadopo bo nọte tofi.” E sọ sẹ̀ jẹ apadopo bo nọte to finẹ. 31  Enẹgodo, Kuṣinu lọ wá+ bo dọmọ: “Oklunọ ṣie ahọlu ni sè owẹ̀n ehe: Jehovah ko hẹn whẹdida dodo ṣẹ to egbé gbọn túntún we dote sọn alọ mẹhe ṣiatẹ do gowe lẹpo tọn mẹ dali.”+ 32  Ṣigba, ahọlu kanse Kuṣinu lọ dọmọ: “Nudepope ma jọ do jọja sunnu lọ, yèdọ Absalọmi go nẹ?” Whenẹnu, Kuṣinu lọ dọmọ: “Na kẹntọ oklunọ ṣie ahọlu tọn lẹpo gọna mẹhe nọ ṣiatẹ do gowe nado wà danú do we lẹpo ni taidi jọja sunnu enẹ!”+ 33  Ehe hẹn ahọlu jẹflumẹ, bọ e hẹji yì abò he to họta to họngbo lọ ji mẹ bo to avivi bosọ to didọ dile e to zọnlinzin dọmọ: “Ṣo visunnu ṣie Absalọmi, visunnu ṣie, visunnu ṣie Absalọmi! Yẹn wẹ na ko kú do otẹn towe mẹ, Absalọmi visunnu ṣie, ṣo visunnu ṣie!”+

Nudọnamẹ Odò Tọn

To paa mẹ, “alọ.”
To paa mẹ, “ma na ze ahun yetọn do mí ji.”
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
To paa mẹ, “bọ e to olọn po aigba po ṣẹnṣẹn.”
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
To paa mẹ, “tlẹ yin jijlẹ do alọpahomẹ na.”
Kavi “Eyin n’ko yí oklọ do yinuwa hẹ alindọn etọn.”
Kavi vlavo, “dludlu pẹvi; owhán.” To paa mẹ, “opò.”
To paa mẹ, “aliho agbegbe lọ tọn.”
To paa mẹ, “mẹhe ze alọ yetọn daga.”