Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 14:1-33

NUHE E BẸHẸN LẸ

  • Joabi po nawe Tekoanu lọ po (1-17)

  • Davidi wle ayikinkan Joabi tọn (18-20)

  • Yè nagbè Absalọmi nado lẹkọ (21-33)

14  Todin, Joabi visunnu Zeluia+ tọn sè dọ ahọlu to jijlo vẹkuvẹku to ahun etọn mẹ nado mọ Absalọmi.+  Enẹwutu, Joabi domẹhlan Tekoa+ bo ylọ nawe zinzintọ de wá sọn dọ́n bosọ dọna ẹn dọmọ: “Jaale, yinuwa di mẹhe to aluẹmẹ, do awù aluẹmẹninọ tọn lẹ bo ma sá amì depope blo.+ Yinuwa di yọnnu he ko to aluẹmẹ sọn whenu dindẹn die na mẹhe ko kú de.  Enẹgodo, biọ họmẹ yì ahọlu dè bo dọ ohó ehelẹ na ẹn.” Joabi sọ plọn ẹn ohó he e na dọ lẹ.  Nawe Tekoanu lọ biọ họmẹ yì ahọlu dè bo dẹ́ do odò pete bosọ ṣinyọ́n nukunmẹ ai bo dọmọ: “Ahọlu E, gọalọna mi!”  Ahọlu gblọnna ẹn dọmọ: “Etẹwẹ jọ?” Yọnnu lọ sọ dọmọ: “Ṣo, asuṣiọsi de wẹ yẹn; asu ṣie ko kú.  Podọ visunnu awe wẹ yẹn devizọnwatọ towe tindo, yé omẹ awe lẹ sọ hoavùn hẹ yede to danji. Mẹdepope ma to finẹ bo na dá yé, mẹdopo sọ linú omẹ awetọ bo hù i.  Todin, whẹndo lọ blebu ko fọ́n do yẹn devizọnwatọ towe ji bo to didọmọ, ‘De visunnu he hù nọvisunnu etọn lọ jo, na mí nido hù i na ogbẹ̀* nọvisunnu etọn he e ko hù lọ tọn wutu,+ mahopọnna dọ ehe na tlẹ zẹẹmẹdo gudutọ lọ didesẹ sọn aimẹ!’ Miyọ́nkán ṣie godo tọn he gbẹ́ pò to jiji* lọ wẹ yé jlo na ṣí, bo ma na pò oyín kavi luntọ́ntọ* depope dai na asu ṣie to aigba ji.”  To whenẹnu, ahọlu dọna nawe lọ dọmọ: “Yì owhé towe gbè, yẹn na de gbedide de tọ́n gando gowe.”  Enẹwutu, nawe Tekoanu lọ dọna ahọlu dọmọ: “Oklunọ ṣie ahọlu E, gbọ whẹgbledomẹ lọ ni to okọ̀ na yẹn po whédo otọ́ ṣie tọn po, na ahọlu po ofìn etọn po ni yin homẹvọnọ.” 10  Ahọlu sọ dọna ẹn dọmọ: “Eyin mẹde sọ dọho de na we, plan mẹlọ wá na mi, bọ ewọ ma nasọ dotukla we gbede ba.” 11  Ṣigba, nawe lọ dọmọ: “Jaale, gbọ ahọlu ni flin Jehovah Jiwheyẹwhe towe, na ahọsuyitọ ohùn tọn+ lọ nikaa hẹn husudo wá bo hù visunnu ṣie.” Enẹwutu, ahọlu dọmọ: “Dile Jehovah togbẹ̀,+ dopo tata to oda visunnu towe tọn lẹ mẹ ma na flẹ jai.” 12  Todin, nawe lọ dọmọ: “Jaale, gbọ devizọnwatọ towe ni dọho de na oklunọ ṣie ahọlu.” Enẹwutu, e dọmọ: “Dọho!” 13  Nawe lọ sọ dọmọ: “Eyin mọ wẹ, naegbọn a do lẹn nado wà onú ehe nkọ do omẹ Jiwheyẹwhe tọn lẹ?+ Eyin ahọlu dọho to aliho ehe mẹ, be e hẹn ede zun whẹhutọ, na ahọlu lọsu ma hẹn visunnu etọn titi he yin yinyan dogbé lọ lẹkọwa whé gba.+ 14  Ayihaawe ma tin dọ mímẹpo wẹ na kú bo na taidi osin he yin kinkọnyinai bo ma sọgan yin gigọ̀ bẹ. Ṣigba, Jiwheyẹwhe ma nọ hù mẹdepope,* podọ e nọ lẹnnupọndo whẹwhinwhẹ́n lọ lẹ ji, ehe wutu mẹhe yin yinyan dogbé ma dona yin yinyan dogbé kakadoi sọn ewọ dè. 15  N’biọ họmẹ wá nado dọ ehe na oklunọ ṣie ahọlu, na gbẹtọ lẹ to budona mi. Enẹwutu wẹ devizọnwatọ towe do dọ dọ, ‘Jaale, gbọ ma dọhona ahọlu. Vlavo ahọlu na yinuwa sọgbe hẹ obiọ afanumẹ etọn tọn. 16  Ahọlu sọgan dotoai bo whlẹn afanumẹ etọn sọn alọ dawe lọ tọn mẹ, yèdọ mẹhe to dindin nado sukúndona yẹn po visunnu ṣie dopo akàn lọ po sọn ogú he Jiwheyẹwhe na mí lọ kọ̀n.’+ 17  To whenẹnu, devizọnwatọ towe dọmọ, ‘Jaale, gbọ ohó oklunọ ṣie ahọlu tọn ni hẹn kọgbọ wá na mi,’ na oklunọ ṣie ahọlu taidi angẹli Jiwheyẹwhe nugbo lọ tọn de bo yọ́n dagbe dovo na oylan. Na Jehovah Jiwheyẹwhe towe ni tin hẹ we.” 18  Todin, ahọlu dọna nawe lọ dọmọ: “Jaale, a whlá nuhe n’na kanbiọ we depope do mi blo.” Nawe lọ gblọn dọmọ: “Oklunọ ṣie ahọlu ni jaale bo dọho.” 19  Whenẹnu, ahọlu kanbiọ ẹ dọmọ: “Joabi wẹ blá ehe lẹpo dọ hẹ we ya?”+ Nawe lọ sọ gblọn dọmọ: “Dile e họnwun dọ hiẹ* togbẹ̀, oklunọ ṣie ahọlu E, lehe e yì do pẹpẹ wẹ oklunọ ṣie ahọlu dọ,* na Joabi devizọnwatọ towe wẹ deanana mi bo plọn ohó ehe lẹpo yẹn devizọnwatọ towe. 20  Joabi devizọnwatọ towe wẹ wà ehe nado sọgan hẹn whẹho lọ sọawuhia to aliho devo mẹ, ṣigba oklunọ ṣie yọnnuin di angẹli Jiwheyẹwhe nugbo lọ tọn bo yọ́n nuhe to jijọ to aigba lọ ji lẹpo.” 21  Enẹgodo, ahọlu dọna Joabi dọmọ: “Eyọn, n’na wàmọ.+ Yì plan jọja sunnu lọ, yèdọ Absalọmi lẹkọ.”+ 22  To whenẹnu, Joabi dẹ́ do odò pete bo ṣinyọ́n nukunmẹ ai bosọ pà ahọlu. Joabi dọmọ: “Oklunọ ṣie ahọlu E, devizọnwatọ towe yọnẹn to egbé dọ n’ko mọ nukundagbe towe, na ahọlu ko yinuwa sọgbe hẹ obiọ devizọnwatọ etọn tọn.” 23  Enẹgodo, Joabi fọ́n bo yì Gẹṣuli+ bosọ plan Absalọmi wá Jelusalẹm. 24  Ṣigba, ahọlu dọmọ: “Gbọ ewọ ni lẹkọyi owhé etọn titi gbè, ṣigba e ma na mọ nukunmẹ ṣie.” Enẹwutu, Absalọmi lẹkọyi owhé etọn titi gbè bo ma mọ nukunmẹ ahọlu tọn. 25  Todin, to Islaeli pete, sunnu depope ma nọ yin pipà na whanpẹ etọn sọ Absalọmi. Oblọ depope ma to e go, sọn afọpahomẹ kaka yì ahọ̀ndòmẹ. 26  Vivọnu owhe dopodopo tọn wẹ e nọ pà oda etọn, na e nọ pẹ̀n ẹn taun wutu. Eyin e pà oda he to ota na ẹn, e nọ pẹ̀n sọ ṣekẹli 200* sọgbe hẹ zannu nujlẹgàn họ̀nmẹ tọn.* 27  Visunnu atọ̀n yin jiji na Absalọmi+ gọna viyọnnu dopo he nọ yin Tamali. Viyọnnu lọ yọnwhanpẹ taun. 28  Absalọmi sọ nọ Jelusalẹm na owhe awe blebu, amọ́ e ma mọ nukunmẹ ahọlu tọn.+ 29  Enẹwutu, Absalọmi ylọ Joabi nado do e hlan ahọlu dè, ṣigba Joabi ma wá e dè. Enẹgodo, e sọ domẹhlan ẹn whladopo dogọ, yèdọ whla awetọ, bọ Joabi sọ gbẹ́ nado wá e dè. 30  To godo mẹ, e dọna devizọnwatọ etọn lẹ dọmọ: “Ogle Joabi tọn tin to ogle ṣie pá, bọ balekun to e ji na ẹn. Mì yì bo domiyọ́n ogle lọ.” Enẹwutu, devizọnwatọ Absalọmi tọn lẹ domiyọ́n ogle lọ. 31  To whenẹnu, Joabi fọ́n bo wá owhé Absalọmi tọn gbè bo dọna ẹn dọmọ: “Naegbọn devizọnwatọ towe lẹ do domiyọ́n ogle ṣie?” 32  Absalọmi gblọnna Joabi dọmọ: “Pọ́n! N’do owẹ̀n ehe hlan we dọ, ‘Wá ma do we hlan ahọlu dè nado kanse dọ: “Naegbọn n’do lẹkọwa sọn Gẹṣuli?+ E na ko pọnte na mi hugan nado gbọṣi finẹ. Todin, gbọ ma mọ nukunmẹ ahọlu tọn, podọ eyin owhẹ̀ de wẹ n’hù, ewọ ni bo hù mi.”’” 33  Enẹwutu, Joabi biọ họmẹ yì ahọlu dè bo dowẹn na ẹn. Whenẹnu, ahọlu ylọ Absalọmi, bọ ewọ biọ họmẹ yì ahọlu dè bo dẹ́ do odò pete to nukọn etọn bosọ ṣinyọ́n nukunmẹ ai to ahọlu nukọn. Ahọlu sọ donùnùgo na Absalọmi.+

Nudọnamẹ Odò Tọn

Kavi “alindọn.”
Enẹ wẹ, todido godo tọn nado tindo kúnkan lẹ.
To paa mẹ, “pipotọ.”
Kavi “alindọn depope.”
Kavi “alindọn towe.”
Kavi “mẹde ma gán yì amiyọn kavi adusi sọn nuhe oklunọ ṣie ahọlu dọ kọ̀n.”
Nudi kg 2,3. Pọ́n Nud. B14.
Ehe sọgan ko yin nujlẹnu tangan de to họ̀nmẹ kavi ṣekẹli “họ̀nmẹ” tọn de he gbọnvona ṣekẹli paa lẹ.