Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 12:1-31

NUHE E BẸHẸN LẸ

  • Natani wọhẹ Davidi (1-15a)

  • Visunnu Bati-ṣeba tọn kú (15b-23)

  • Bati-ṣeba ji Sọlomọni (24, 25)

  • Tòdaho Amọni tọn, Laba yin yíyí (26-31)

12  Enẹwutu, Jehovah do Natani+ hlan Davidi dè. Natani sọ biọ họmẹ yì e dè+ bo dọmọ: “Dawe awe delẹ tin to tòdaho de mẹ, mẹdopo yin adọkunnọ bọ omẹ awetọ yin wamọnọ.  Dawe adọkunnọ lọ tindo lẹngbọ po oyìn susugege po;+  ṣigba dawe wamọnọ lọ ma tindo nude hú lẹngbọvu asi pẹvi dopo he e họ̀.+ E nọ penukundego, bọ e to whinwhẹ́n to ewọ po visunnu etọn lẹ po dè. Lẹngbọvu lọ nọ dù sọn núdùdù vude he dawe lọ tindo mẹ, bo nọ nù sọn kọfo etọn mẹ bosọ nọ mlọnai to awà etọn mẹ. E wá taidi viyọnnu de na dawe lọ.  To godo mẹ, jonọ wá na dawe adọkunnọ lọ, amọ́ ewọ ma jlo na yí depope to lẹngbọ po oyìn etọn lẹ po mẹ nado wleawu núdùdù tọn na mẹhe zingbejizọnlin wá e dè lọ. Kakatimọ, e wle lẹngbọvu dawe wamọnọ lọ tọn bo dà ẹ na dawe he wá e dè.”+  To whenẹnu, Davidi gblehomẹ sinsinyẹn do dawe lọ go bo dọna Natani dọmọ: “Dile Jehovah togbẹ̀,+ dawe he wà ehe jẹna okú!  Podọ e dona suahọ lẹngbọvu lọ tọn do whla ẹnẹ ji,+ na e ko wà ehe bo masọ do awuvẹmẹ depope hia wutu.”  Whenẹnu, Natani dọna Davidi dọmọ: “Hiẹ wẹ dawe lọ! Nuhe Jehovah, Jiwheyẹwhe Islaeli tọn dọ die: ‘Yẹnlọsu wẹ yiamisisadode we taidi ahọlu do Islaeli ji+ bo ko sọ whlẹn we sọn alọ Sauli tọn mẹ.+  N’tlẹ jlo na na we whédo klunọ towe tọn+ bo bẹ asi klunọ towe tọn lẹ+ do awà towe mẹ, n’ko sọ na we whédo Islaeli tọn po Juda tọn po.+ Podọ eyin ehelẹ ma tlẹ pé, n’sọ jlo na wà nususu na we dogọ.+  Naegbọn hiẹ do vlẹ ohó Jehovah tọn kò bo wà nuhe ylan to nukun etọn mẹ? A yí ohí do hù Ulia Hetinu lọ!+ A sọ yí asi+ etọn to whenue hiẹ ko yí ohí Amọninu lẹ tọn do hù i godo.+ 10  Todin, ohí ma na tọ́n sọn owhé towe gbè gbede,+ na hiẹ ko vlẹ mi kò gbọn asi Ulia Hetinu lọ tọn yíyí dali.’ 11  Nuhe Jehovah dọ die: ‘Pọ́n, yẹn na hẹn nugbajẹmẹji wá ji we sọn owhé towe titi gbè;+ podọ yẹn na yí asi towe lẹ bo na bẹ yé na sunnu devo*+ to nukun towe titi mẹ, ewọ nasọ zanhẹ asi towe lẹ to kléwhète.*+ 12  Dile etlẹ yindọ nuglọ+ wẹ hiẹ yinuwa te, nukun Islaeli pete tọn mẹ wẹ yẹn na wà ehe te to kléwhète.’”* 13  Davidi sọ dọna Natani dọmọ: “N’ko waylando do Jehovah.”+ Natani gblọnna Davidi dọmọ: “Jehovah lọsu ko jo ylando towe na we.*+ Hiẹ ma na kú.+ 14  Etomọṣo, na hiẹ ko yinuwa hẹ Jehovah po mẹmasi daho po to whẹho ehe mẹ wutu, visunnu he ṣẹṣẹ yin jiji na we lọ na kú dandan.” 15  Enẹgodo, Natani yì owhé etọn titi gbè. Jehovah sọ linú ovi he asi Ulia tọn ji na Davidi lọ, bọ e bẹ awutu. 16  Davidi sọ vẹvẹna Jiwheyẹwhe nugbo lọ do visunnu lọ tamẹ. Davidi blanù sinsinyẹn bo nọ biọ họmẹ bosọ nọ dọ́ kọmẹ to zánmẹ.+ 17  Enẹwutu, mẹho he to owhé etọn gbè lẹ wá e dè bo tẹnpọn nado fọ́n ẹn sọn kọmẹ, ṣigba e gbẹ́ bo ma jlo na dùnú hẹ yé. 18  To azán ṣinawetọ gbè, ovi lọ kú, ṣigba devizọnwatọ Davidi tọn lẹ to budi nado dọna ẹn dọ ovi lọ ko kú. Yé dọmọ: “Whenue ovi lọ pò togbẹ̀, mí dọhona ẹn bọ e ma sè. Enẹwutu, nawẹ mí gán dọna ẹn dọ ovi lọ ko kú do? E sọgan wà nuylankan de.” 19  To whenue Davidi mọdọ devizọnwatọ etọn lẹ to páde to yedelẹ ṣẹnṣẹn, e họnwun na ẹn dọ ovi lọ ko kú. Davidi sọ dọna devizọnwatọ etọn lẹ dọmọ: “Ovi lọ ko kú wẹ ya?” Yé gblọn dọmọ: “E ko kú.” 20  Enẹwutu, Davidi fọ́n sọn kọmẹ. E lawu bo sá amì na ede+ bosọ diọ avọ̀, e sọ yì ohọ̀+ Jehovah tọn mẹ bo ṣinyọ́n nukunmẹ ai. Enẹgodo, e lẹkọyi whégbè* bo biọ núdùdù bosọ dùnú. 21  Devizọnwatọ etọn lẹ sọ kanse e dọmọ: “Naegbọn a do yinuwa to aliho ehe mẹ? To whenue ovi lọ pò togbẹ̀, a blanù bo to avivi mapote; amọ́ tlolo he ovi lọ kú, a fọnṣite bo dùnú.” 22  E gblọn dọmọ: “Whenue ovi lọ pò togbẹ̀, n’blanù+ bo to avivi mapote, na n’dọna dee dọ, ‘Mẹnu wẹ yọnẹn, vlavo Jehovah gán do nukundagbe hia mi bo pò ovi lọ dogbẹ̀?’+ 23  Todin he e ko kú, naegbọn n’nasọ to nùbla? Be n’sọgan hẹn ẹn gọwá ogbẹ̀ wẹ ya?+ Yẹn wẹ na wá yì e dè,+ amọ́ ewọ ma gán lẹkọwa dè e.”+ 24  Enẹgodo, Davidi miọnhomẹna asi etọn Bati-ṣeba.+ E sọ biọ họmẹ yì e dè bo zanhẹ ẹ. To nukọn mẹ, yọnnu lọ ji visunnu de, oyín etọn sọ yin yiylọdọ Sọlomọni.*+ Jehovah sọ yiwanna ẹn,+ 25  bo dowẹn hlan gbọn Natani+ yẹwhegán lọ gblamẹ nado ylọ oyín etọn dọ Jedidia,* na Jehovah tọn wutu. 26  Joabi zindonukọn nado to avùnho hẹ Laba+ Amọninu+ lẹ tọn, e sọ yí tòdaho ahọlu tọn lọ.*+ 27  Enẹwutu, Joabi do wẹnsagun lẹ hlan Davidi bo dọmọ: “N’ko hoavùn hẹ Laba+ bo ko yí tòdaho osin lẹ tọn lọ.* 28  Todin, bẹ awhànfuntọ he pò lẹ pli bo dosla nado tọ́nawhàn tòdaho lọ bo yí i. E ma yinmọ, yẹn wẹ na yí tòdaho lọ, bọ gigo lọ na yin ṣie.”* 29  Enẹwutu, Davidi bẹ awhànfuntọ lọ lẹpo pli bo yì Laba bosọ hoavùn hẹ ẹ bo yí i. 30  Enẹgodo, e de jẹgbakun Malkami tọn sọn ota na ẹn. E pẹnzin sọ talẹnti* sika tọn dopo, gọna zannu akuẹgegenu tọn lẹ, bọ e yin ṣinṣinyọn na Davidi. Humọ, ewọ bẹ ogblànnu susugege+ sọn tòdaho lọ mẹ.+ 31  E sọ bẹ mẹhe to e mẹ lẹ tọ́n bo hẹn yé nado nọ wazọ́n zannu pipà tọn, nado nọ yí azọ́nwanu gànyuu tọn didá lẹ po asiọvi gànyuu tọn lẹ po do wazọ́n, podọ nado nọ sún bliki. Nuhe e wà hẹ tòdaho Amọninu lẹ tọn lẹpo niyẹn. To godo mẹ, Davidi po awhànfuntọ etọn lẹpo po lẹkọwa Jelusalẹm.

Nudọnamẹ Odò Tọn

Kavi “na hatọ towe.”
To paa mẹ, “to nukun owhè ehe tọn mẹ.”
To paa mẹ, “to owhè nukọn.”
Kavi “ko dike ylando towe ni juwayi.”
Kavi “họ̀nmẹ.”
Sọn hogbe Heblugbe tọn de mẹ he zẹẹmẹdo “Jijọho.”
Zẹẹmẹdo “Mẹyiwanna Jah Tọn.”
Kavi “tòdaho ahọluduta lọ tọn.”
Vlavo ehe to alọdlẹndo asisa osin tọn tòdaho lọ tọn lẹ.
To paa mẹ, “bọ oyín ṣie na yin yiylọ do e ji.”
Talẹnti dopo sọzẹn hẹ kg 34,2. Pọ́n Nud. B14.