Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 11:1-27

NUHE E BẸHẸN LẸ

  • Davidi deayọ hẹ Bati-ṣeba (1-13)

  • Davidi basi tito nado hù Ulia (14-25)

  • Davidi yí Bati-ṣeba di asi (26, 27)

11  To bẹjẹeji owhe tọn,* to ojlẹ he mẹ ahọlu lẹ nọ yì awhàn te, Davidi do Joabi po devizọnwatọ etọn lẹ po hlan gọna awhànpa Islaeli tọn pete nado yì hù Amọninu lẹ sudo, yé sọ dosla lẹdo Laba,+ amọ́ Davidi gbọṣi Jelusalẹm.+  To whèjai dopo,* Davidi fọ́n sọn adọzan etọn ji bo to sadi pé gbọn họta owhé* ahọlu tọn. Ewọ sọ mọ yọnnu de hlan sọn họta bọ e to awulẹ, yọnnu lọ sọ yọnwhanpẹ taun.  Davidi domẹhlan nado yì dindona mẹhe yọnnu lọ yin, mẹlọ sọ hẹn linlin wá na ẹn dọmọ: “Be e ma yin Bati-ṣeba+ viyọnnu Eliami+ tọn, yèdọ asi Ulia+ Hetinu+ lọ tọn wẹ?”  Whenẹnu, Davidi do wẹnsagun lẹ hlan nado yì plan ẹn wá.+ Yọnnu lọ sọ wá e dè bọ e zanhẹ ẹ.+ (Ehe jọ to whenue yọnnu lọ to ede hẹn zun wiwe sọn mawé* etọn mẹ.)+ Enẹgodo, yọnnu lọ lẹkọyi whé.  Yọnnu lọ sọ mọhò bo dowẹn hlan Davidi dọmọ: “N’mọhò.”  Whenẹnu, Davidi dowẹn hlan Joabi dọmọ: “Do Ulia Hetinu lọ hlan mi.” Joabi sọ do Ulia hlan Davidi.  Whenue Ulia wá Davidi dè, Davidi kàn lehe Joabi te do, lehe awhànpa lọ lẹ te do podọ lehe awhàn lọ to yìyì do biọ ẹ.  Enẹgodo, Davidi dọna Ulia dọmọ: “Jẹte yì owhé towe gbè bo yì gbọjẹ.”* Whenue Ulia tlọ́n owhé ahọlu tọn gbè, ahọlu do nunina homẹdagbe tọn* de hlan ẹn.  Ṣigba, họntonu owhé ahọlu tọn wẹ Ulia dọ́ po devizọnwatọ oklunọ etọn tọn he pò lẹpo po, bo ma jẹte yì owhé etọn titi gbè. 10  Ehe sọ yin didọna Davidi dọmọ: “Ulia ma jẹte yì owhé etọn titi gbè gba.” Whenẹnu, Davidi dọna Ulia dọmọ: “Be e ma yin din wẹ a ṣẹṣẹ lẹkọwa sọn gbejizọnlin de ya? Naegbọn a ma do jẹte yì owhé towe titi gbè?” 11  Ulia gblọnna Davidi dọmọ: “Apotin+ lọ gọna Islaeli po Juda po tin to fibẹtado ojlẹ gli tọn lẹ mẹ, bọ Joabi oklunọ ṣie po devizọnwatọ oklunọ ṣie tọn lẹ po dosla do gbonu to danji. Todin, be yẹn na yì owhé ṣie titi gbè bo dù bo nù bosọ mlọnai hẹ asi ṣie wẹ?+ Dile e họnwun dọ hiẹ togbẹ̀ bo zindonukọn nado togbẹ̀,* yẹn ma gán wà onú mọnkọtọn!” 12  Whenẹnu, Davidi dọna Ulia dọmọ: “Nọfi to egbé ga, yẹn nasọ do we hlan to osọ he ja.” Enẹwutu, Ulia gbọṣi Jelusalẹm to gbenẹgbe po wunkẹngbe po. 13  Davidi sọ dowẹn hlan ẹn nado wá dù bo nù hẹ ẹ, e sọ na ẹn ahànnu bọ e mú. Ṣigba, to whèjai, Ulia tọ́nyi mlọnai to adọzan etọn ji hẹ devizọnwatọ oklunọ etọn tọn lẹ bo ma jẹte yì owhé etọn gbè. 14  To wunkẹngbe afọnnu, Davidi kàn wekanhlanmẹ de hlan Joabi bo do e hlan gbọn alọ Ulia tọn mẹ. 15  E wlan do wekanhlanmẹ lọ mẹ dọmọ: “De Ulia do awhàn nukọn fihe awhànfunfun sinyẹn te hugan. Enẹgodo, lẹkọ sọn godo na ẹn, na ewọ nido yin hùhù.”+ 16  Joabi ko yí sọwhiwhe do to tòdaho lọ ṣọ́, ewọ sọ de Ulia do fihe e yọnẹn dọ awhànfuntọ huhlọnnọ lẹ te. 17  Whenue sunnu tòdaho lọ tọn lẹ tọ́n wá bo hoavùn hẹ Joabi, delẹ to devizọnwatọ Davidi tọn lẹ mẹ yin hùhù bọ Ulia Hetinu lọ tin to mẹhe yin hùhù lẹ mẹ.+ 18  Todin, Joabi na linlin lẹpo Davidi gando awhàn lọ go. 19  E sọ dọna wẹnsagun lọ dọmọ: “To whenue a ko dọhona ahọlu gando linlin awhàn lọ tọn lẹpo go godo, 20  adi sọgan do ahọlu bọ ewọ na dọna we dọ, ‘Naegbọn mì do sẹpọ tòdaho lọ sọmọ nado hoavùn? Mì ma yọnẹn dọ yé sọgan de ogá do mì sọn adó ji aga wẹ ya? 21  Mẹnu wẹ hù Abimẹlẹki+ visunnu Jelubeṣẹti tọn?+ Be e ma yin yọnnu de wẹ bli gilisé de dlan e ji sọn adó ji aga, bo yí i do hù i to Tebẹzi ya? Naegbọn mìwlẹ do sẹpọ adó lọ sọmọ?’ Whenẹnu, dọna ẹn dọ, ‘Devizọnwatọ towe Ulia Hetinu lọ lọsu kú ga.’” 22  Enẹwutu, wẹnsagun lọ yì bo dọ nuhe Joabi ko do e hlan nado dọ lẹpo na Davidi. 23  Enẹgodo, wẹnsagun lọ dọna Davidi dọmọ: “Sunnu yetọn lẹ dohuhlọn hú mí, yé sọ tọ́n wá mí ji to danji; ṣigba mí yàn yé lẹkọ kaka yì họngbo tòdaho lọ tọn kọ̀n. 24  Ogádetọ lẹ sọ jẹ ogá de do devizọnwatọ towe lẹ ji sọn adó ji aga bọ delẹ to devizọnwatọ ahọlu tọn lẹ mẹ yin hùhù; devizọnwatọ towe Ulia Hetinu lọ lọsu kú ga.”+ 25  Whenẹnu, Davidi dọna wẹnsagun lọ dọmọ: “Dọna Joabi dọ: ‘A dike ehe dotukla we blo, na mẹdepope wẹ ohí sọgan hù. Hẹn awhàn lọ sinyẹn deji sọta tòdaho lọ bo yí i.’+ Enẹgodo, na ẹn tuli.” 26  Whenue asi Ulia tọn sè dọ asu etọn Ulia ko yin hùhù, e biọ aluẹmẹ na asu etọn. 27  Tlolo he ojlẹ aluẹmẹninọ tọn etọn wá vivọnu, Davidi dowẹn hlan ẹn bo plan ẹn wá whégbè, bọ e sọ lẹzun asi etọn+ bo ji visunnu de na ẹn. Ṣigba, nuhe Davidi wà hẹn homẹgble* Jehovah taun.+

Nudọnamẹ Odò Tọn

Enẹ wẹ, to amakikọ-whenu.
Kavi “To whèlẹkọ dopo.”
Kavi “họ̀nmẹ.”
Vlavo mawé lajijẹ tọn.
To paa mẹ, “bo klọ́ afọ towe lẹ.”
Kavi “mimá ahọlu tọn,” enẹ wẹ, mimá he jonọyitọ nọ dohlan jonọ vonọtaun etọn.
Kavi “podọ dile alindọn towe togbẹ̀.”
To paa mẹ, “ylan to nukun.”