Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Samuẹli 1:1-27

NUHE E BẸHẸN LẸ

  • Davidi sè dọ Sauli kú (1-16)

  • Avihàn Davidi tọn do Sauli po Jonatani po ji (17-27)

1  To okú Sauli tọn godo, whenue Davidi lẹkọwa sọn awhàngbigba do Amalẹkinu lẹ ji,* Davidi nọ Ziklagi+ na azán awe.  To azán atọ̀ntọ gbè, dawe de wá sọn osla Sauli tọn mẹ po awù tintlẹ́n po to okọ̀ bọ kọ́gudu to ota na ẹn. Whenue e dọnsẹpọ Davidi, e họ́jai bo ṣinyọ́n nukunmẹ ai.  Davidi sọ kanse e dọmọ: “Fie wẹ a wá sọn?” E sọ gblọn dọmọ: “Osla Islaeli tọn mẹ wẹ n’họ̀ngán sọn.”  Davidi sọ kanse e dọmọ: “Nawẹ nulẹ yì do to dọ́n? Jaale dọna mi.” Ewọ sọ gblọn dọmọ: “Gbẹtọ lẹ ko họ̀n sọn awhàngbenu bọ mẹsusu ko yin hùhù. Sauli po visunnu etọn Jonatani po tlẹ kú ga.”+  Whenẹnu, Davidi kanse jọja sunnu he hẹn linlin wá na ẹn lọ dọmọ: “Nawẹ a wagbọn do yọnẹn dọ Sauli po visunnu etọn Jonatani po ko kú?”  Jọja sunnu lọ gblọn dọmọ: “Gbọn kosọ dali, n’to Osó Gilboa ji+ bo mọ bọ Sauli dẹ́ do owhán etọn ji bọ osọ́-kẹkẹ lẹ po osọ́nọ lẹ po ko dibla plá ẹ.+  Whenue e lilẹ́ bo mọ mi, e ylọ mi bọ n’yigbe na ẹn dọ, ‘Yẹn die!’  Ewọ sọ kanse mi dọ, ‘Mẹnu wẹ hiẹ?’ N’sọ gblọnna ẹn dọ, ‘Amalẹkinu+ de wẹ n’yin.’  Whenẹnu, ewọ dọna mi dọ, ‘Jaale, sẹwá bo hù mi, na awufiẹsa sinsinyẹn mẹ wẹ n’te, ṣogan bo gbẹ́ pò togbẹ̀.’* 10  Enẹwutu, n’sẹyì bo hù i,+ na n’yọnẹn dọ e ma sọgan gán ba, na e ko gbleawu bo ko họ́jai. Enẹgodo, n’ze jẹgbakun he to ota na ẹn po alọgàn he to awà na ẹn po bo hẹn yé wá na oklunọ ṣie tofi.” 11  Whenẹnu, Davidi hẹn awù ede tọn lẹ go bo tlẹ́n yé, bọ sunnu he to e dè lẹpo sọ wà nudopolọ. 12  Yé sọ doavihàn bo viavi bosọ blanù+ kakajẹ whèjai na Sauli, visunnu etọn Jonatani, omẹ Jehovah tọn lẹ po owhé Islaeli tọn po,+ na yé ko yin hùhù gbọn ohí dali wutu. 13  Davidi sọ kanse jọja sunnu he hẹn linlin wá na ẹn lọ dọmọ: “Fie wẹ a wá sọn?” Ewọ sọ dọmọ: “Visunnu Amalẹkinu he to jonọ-gbéji de tọn wẹ n’yin.” 14  Whenẹnu, Davidi dọna ẹn dọmọ: “Naegbọn hiẹ ma do dibu nado ze alọ towe daga nado hù mẹyiamisisadode Jehovah tọn?”+ 15  Enẹwutu, Davidi ylọ dopo to jọja sunnu lọ lẹ mẹ bo dọna ẹn dọmọ: “Sẹwá fi bo hù i.” Ewọ sọ hù i.+ 16  Davidi sọ dọna ẹn dọmọ: “Ohùn towe tin to ota towe titi, na onù towe titi wẹ dekunnu sọta we gbọn didọ dali dọ, ‘Yẹn wẹ hù mẹyiamisisadode Jehovah tọn.’”+ 17  Enẹgodo, Davidi ji avihàn* ehe do Sauli po visunnu etọn Jonatani po ji+ 18  bo biọ dọ avihàn lọ he nọ yin yiylọdọ “Ogá Lọ,” bo yin kinkandai do owe Jaṣali+ tọn mẹ, ni yin pinplọn omẹ Juda tọn lẹ: 19  “Islaeli E, whanpẹnọ lẹ ko yin hùhù liai to ofi yiaga towe lẹ.+ Lehe huhlọnnọ lẹ ko jai do! 20  Mì dọ ẹ tọ́n to Gati blo;+ Mì lá ẹ to tòhomẹ-liho Aṣikelọni tọn lẹ ji blo, E ma yinmọ, viyọnnu Filistinu lẹ tọn lẹ na jaya, E ma yinmọ, viyọnnu sunnu he ma gboadà lẹ tọn lẹ na jẹaglin. 21  Mì osó Gilboa tọn lẹ emi,+ Na ahun kavi jikun depope ni ma ja do mì ji blo, Mọ ogle he na de nunina wiwe tọ́n lẹ ni ma tin to mì ji blo,+ Na finẹ wẹ awọ̀yinu omẹ huhlọnnọ lẹ tọn yin hinhẹnflu te, Awọ̀yinu Sauli tọn masọ yin amisisayidode ba. 22  Sọn ohùn mẹhe yin hùhù lẹ tọn mẹ, yèdọ sọn ojó omẹ huhlọnnọ lẹ tọn mẹ, Ogá Jonatani tọn ma lẹkọwa godo,+ Podọ ohí Sauli tọn ma nasọ lẹkọwa matin kọdetọn dagbe.+ 23  Sauli po Jonatani+ po yin mẹyiwanna po mẹvivẹ lẹ po to gbẹwhenu yetọn, Bo masọ klan to okú yetọn whenu.+ Yé yawu hú akùn,+ Bo dohuhlọn hú kinnikinni.+ 24  Viyọnnu Islaeli tọn lẹ emi, mì viavi na Sauli, Mẹhe do avọ̀ vẹẹ ṣẹ́ṣẹ́ po aṣọ́donu lẹ po na mì, Mẹhe to aṣọ́donu sika tọn lẹ do avọ̀ mìtọn go. 25  Lehe huhlọnnọ lẹ ko jai to awhàngbenu do! Jonatani yin hùhù liai to ofi yiaga towe lẹ!+ 26  Nọvisunnu ṣie Jonatani E, yẹn jẹflumẹ na hiẹ tọn wutu; N’yiwanna we taun.+ Owanyi towe na mi jiawu hú owanyi yọnnu tọn.+ 27  Lehe huhlọnnọ lẹ ko jai Bọ adánwanu awhàn tọn lẹ ko dọ̀n do!”

Nudọnamẹ Odò Tọn

Kavi “sọn Amalẹkinu lẹ hùhù mẹ.”
Kavi “na alindọn ṣie pete gbẹ́ pò to yẹn mẹ.”
Kavi “ohàn aluẹmẹninọ tọn.”