Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 30:1-27

NUHE E BẸHẸN LẸ

  • Hẹzekia dù Juwayi (1-27)

30  Hẹzekia dowẹn hlan Islaeli+ po Juda po pete bo tlẹ sọ kàn wekanhlanmẹ lẹ hlan Eflaimi po Manasse+ po nado wá ohọ̀ Jehovah tọn mẹ to Jelusalẹm nado basi hùnwhẹ Juwayi tọn na Jehovah Jiwheyẹwhe Islaeli tọn.+  Ṣigba, ahọlu lọ, ahọvi lẹ po agun he to Jelusalẹm pete po de dide nado basi hùnwhẹ Juwayi tọn lọ to osun awetọ mẹ,+  na yé ma ko penugo nado basi i to ojlẹ dide etọn mẹ wutu,+ na yẹwhenọ susu ma ko klan yede do wiwe,+ mọ gbẹtọ lọ lẹ ma ko pli yede do Jelusalẹm.  Tito ehe taidi nuhe sọgbe to nukun ahọlu po agun lọ pete po tọn mẹ.  Enẹwutu, yé de dide nado basi nulila de gbọn Islaeli pete, yèdọ sọn Beẹli-ṣeba kaka yì Dani,+ dọ gbẹtọ lẹ dona wá basi hùnwhẹ Juwayi tọn na Jehovah Jiwheyẹwhe Islaeli tọn to Jelusalẹm, na yé ma ko basi hùnwhẹ lọ dai taidi pipli de dile e ko yin kinkandai do.+  Whenẹnu, wẹndotọ* lẹ gbọn Islaeli po Juda po pete bo hẹn wekanhlanmẹ ahọlu po ahọvi lẹ po tọn lẹ, dile ahọlu ko degbe etọn do, dọmọ: “Omẹ Islaeli tọn lẹ emi, mì lẹkọ do Jehovah Jiwheyẹwhe Ablaham, Isaki po Islaeli po tọn dè, na ewọ nido lẹkọwa pipotọ he họ̀ngán sọn alọ ahọlu Asilia tọn lẹ+ tọn mẹ lọ dè.  Mì yinuwa taidi tọgbo mìtọn lẹ po nọvisunnu mìtọn he yinuwa hẹ Jehovah Jiwheyẹwhe tọgbo yetọn lẹ tọn po nugbonọ-mayin po lẹ blo, sọmọ bọ ewọ hẹn yé zun nudobu, kẹdẹdile mìwlẹ to mimọ do.+  Todin, mì yin tasinyẹntọ di tọgbo mìtọn lẹ blo.+ Mì litaina Jehovah bo wá fiwiwe etọn+ he ewọ ko klandowiwe kakadoi lọ, podọ mì sẹ̀n Jehovah Jiwheyẹwhe mìtọn, na homẹgble sinsinyẹn etọn nido lẹ́ sọn mì ji.+  Na eyin mì lẹkọ do Jehovah dè, mẹhe wle+ nọvisunnu mìtọn lẹ po visunnu mìtọn lẹ po na do lẹblanu hia yé bọ dotẹnmẹ na yin nina yé nado lẹkọwa aigba ehe ji,+ na Jehovah Jiwheyẹwhe mìtọn, awuvẹmẹtọ* podọ lẹblanunọ wẹ,+ ewọ ma nasọ lẹ́ nukunmẹ etọn sọn mì dè eyin mì lẹkọ do e dè.”+ 10  Enẹwutu, wẹndotọ* lọ lẹ yì sọn tòdaho de mẹ jẹ devo mẹ gbọn aigba Eflaimi po Manasse po tọn pete ji,+ kaka yì Zebuluni, ṣigba gbẹtọ lẹ to yé vlẹko bo to yé ṣanko.+ 11  Etomọṣo, mẹdelẹ sọn Aṣeli, Manasse po Zebuluni po whiwhẹ yede bo wá Jelusalẹm.+ 12  Alọ Jiwheyẹwhe nugbo lọ tọn sọ to omẹ Juda tọn lẹ ji nado kọ̀n yé dopọ,* na yé nido hẹn nuhe ahọlu po ahọvi lẹ po ko degbe etọn gbọn ohó Jehovah tọn dali lọ di. 13  Gbẹtọ susugege pli dopọ to Jelusalẹm nado basi Hùnwhẹ Akla Madotọ́n tọn+ lọ to osun awetọ mẹ;+ agun daho tlala de wẹ. 14  Yé fọ́n bo de agbà he to Jelusalẹm lẹ sẹ̀+ bosọ de agbà nuyọnwan tọn lẹpo sẹ̀+ bo bẹ yé dlan Agbàdo Kidlọni tọn mẹ. 15  Enẹgodo, yé hù kanlin Juwayi tọn lọ to azán 14tọ gbè to osun awetọ mẹ. Winyan hù yẹwhenọ lẹ po Levinu lẹ po bọ yé klan yede do wiwe bo hẹn avọ́nunina mimẹ̀ lẹ wá ohọ̀ Jehovah tọn mẹ. 16  Yé nọte to otẹn he mẹ yé ko nọ nọ̀ lẹ sọgbe hẹ Osẹ́n Mose omẹ Jiwheyẹwhe nugbo lọ tọn; yẹwhenọ lẹ sọ mimí ohùn+ he Levinu lẹ hẹnwa lọ. 17  Mẹsusu wẹ ma klan yede do wiwe to agun lọ mẹ, podọ Levinu lẹ yin azọ́ndena nado hù kanlin Juwayi tọn lọ lẹ do mẹhe ma yin wiwe lẹpo tamẹ,+ nado hẹn yé zun wiwe na Jehovah. 18  Na susu gbẹtọ lọ lẹ tọn, titengbe mẹhe wá sọn Eflaimi, Manasse,+ Isakali po Zebuluni po lẹ ma ko klọ́ yede wé, ṣogan yé dù Juwayi lọ, dile e ma tlẹ sọgbe hẹ nuhe ko yin kinkandai lọ. Ṣigba, Hẹzekia hodẹ̀ do ota yetọn mẹ dọmọ: “Na Jehovah he yin homẹdagbenọ+ ni jona 19  mẹdepope he ko wleawuna ahun etọn nado dín Jehovah Jiwheyẹwhe nugbo lọ,+ yèdọ Jiwheyẹwhe tọgbo etọn lẹ tọn, mahopọnna dọ e ma ko lẹ̀ ede wé sọgbe hẹ nujinọtedo wiwe-yinyin tọn lọ.”+ 20  Jehovah sọ dotoaina Hẹzekia bo jona* gbẹtọ lọ lẹ. 21  Enẹwutu, Islaelivi he to Jelusalẹm lẹ yí ayajẹ daho+ do basi Hùnwhẹ Akla Madotọ́n tọn+ lọ na azán ṣinawe, Levinu lẹ po yẹwhenọ lẹ po sọ to Jehovah pà egbesọegbesọ bo to hànjinu yetọn lẹ hò po ogbè lélé po hlan Jehovah.+ 22  Humọ, Hẹzekia dọhona Levinu he nọ wà sinsẹ̀nzọn hlan Jehovah po nuyọnẹn po lẹpo bo na tuli yé.* Yé sọ dùnú to hùnwhẹ lọ pete whenu na azán ṣinawe+ bo to avọ́sinsan jijọho tọn lẹ+ basi bosọ to pẹdona Jehovah Jiwheyẹwhe tọgbo yetọn lẹ tọn. 23  Whenẹnu, agun lọ pete de dide nado basi hùnwhẹ lọ na azán ṣinawe dogọ, yé sọ yí ayajẹ daho do basi i na azán ṣinawe dogọ.+ 24  Ahọlu Hẹzekia Juda tọn sọ na oyìnsú 1 000 po lẹngbọ 7 000 po do ota agun lọ tọn mẹ, podọ ahọvi lẹ na oyìnsú 1 000 po lẹngbọ 10 000 po do ota agun lọ tọn mẹ;+ yẹwhenọ susugege sọ to yede klandowiwe.+ 25  Podọ agun Juda tọn pete, yẹwhenọ lẹ, Levinu lẹ, agun he wá sọn Islaeli lọ blebu+ po mẹhe to jonọ-gbéji+ he wá sọn aigba Islaeli tọn ji lẹ po gọna mẹhe nọ nọ̀ Juda lẹ zindonukọn nado to ayajẹ. 26  Ayajẹ daho sọ tin to Jelusalẹm, na sọn azán Sọlomọni visunnu Davidi he yin ahọlu Islaeli tọn gbè gbọ́n, onú mọnkọ de ma ko jọ to Jelusalẹm.+ 27  To godo mẹ, yẹwhenọ he yin Levinu lẹ ṣite bo dona gbẹtọ lọ lẹ;+ Jiwheyẹwhe sọ sè ogbè yetọn bọ odẹ̀ yetọn yì kakajẹ nọtẹn wiwe etọn, yèdọ olọn mẹ.

Nudọnamẹ Odò Tọn

To paa mẹ, “wezundotọ.”
Kavi “mẹhe gọ́ na ojọmiọn.”
To paa mẹ, “wezundotọ.”
To paa mẹ, “nado na yé ahun dopo.”
To paa mẹ, “hẹnazọ̀ngbọna.”
To paa mẹ, “bo dọhona ahun yetọn.”