Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 29:1-36

NUHE E BẸHẸN LẸ

  • Hẹzekia, ahọlu Juda tọn (1, 2)

  • Diọdo he Hẹzekia hẹnwa lẹ (3-11)

  • Tẹmpli lọ yin kiklọ́we (12-19)

  • Sinsẹ̀nzọn tẹmpli mẹ tọn lẹ vọ́ bẹ (20-36)

29  Owhe 25 wẹ Hẹzekia+ tindo to whenue e duahọlu, e sọ dugán to Jelusalẹm na owhe 29. Oyín onọ̀ etọn tọn wẹ Abija viyọnnu Zekalia tọn.+  Ewọ sọ to nuhe sọgbe to nukun Jehovah tọn mẹ lẹ wà,+ kẹdẹdile Davidi tọgbo etọn ko wà do.+  To owhe tintan gandudu etọn tọn mẹ, to osun tintan lọ mẹ, e hùn ohọ̀n ohọ̀ Jehovah tọn lọ tọn lẹ bo vọ́ yé jlado.+  Enẹgodo, e plan yẹwhenọ lẹ po Levinu lẹ po bo bẹ yé pli do tòplitẹn lọ to whèzẹtẹn-waji.  E dọna yé dọmọ: “Mì dotó mi, mì Levinu lẹ emi. Todin, mì klan mìde do wiwe+ bo klan ohọ̀ Jehovah Jiwheyẹwhe tọgbo mìtọn lẹ tọn do wiwe bosọ de nuhe yin mawé sẹ̀ sọn ofi wiwe lọ.+  Na otọ́ mítọn lẹ ma yin nugbonọ bo ko wà nuhe ylan to nukun Jehovah Jiwheyẹwhe mítọn tọn mẹ.+ Yé gbẹ́ ẹ dai bo de nukun yetọn sẹ̀ sọn gòhọtúntún Jehovah tọn lọ go bosọ dogodo ewọ.+  Yé sọ sú ohọ̀n atọ̀họ̀ lọ tọn lẹ+ bo ṣí miyọ́ngbán lẹ.+ Yé doalọtena nuyọnwan mimẹ̀+ po avọ́sinsan mimẹ̀ lẹ+ bibasi po to ofi wiwe Jiwheyẹwhe Islaeli tọn.  Enẹwutu, homẹgble Jehovah tọn wá Juda po Jelusalẹm po ji,+ sọmọ bọ e hẹn yé zun nudobu, nuhe hẹnmẹjọsi po nuhe na nọ hẹnmẹ kẹ̀hẹli* de po, kẹdẹdile mì sọgan mọ po nukun mìtọn titi lẹ po do.+  Mì pọ́n, tọgbo mítọn lẹ ko jai gbọn ohí dali,+ bọ visunnu mítọn lẹ, viyọnnu mítọn lẹ po asi mítọn lẹ po ko yì kanlinmọgbenu na ehe wutu.+ 10  Todin, ojlo ahun ṣie mẹ tọn wẹ nado basi alẹnu de hẹ Jehovah Jiwheyẹwhe Islaeli tọn,+ na homẹgble sinsinyẹn etọn nido lẹ́ sọn mí ji. 11  Visunnu ṣie lẹ emi, e ma yin ojlẹ lọ die nado yin vọdonanutọ,* na Jehovah ko de mìwlẹ nado nọ nọte to nukọn etọn, nado nọ sẹ̀n taidi lizọnyizọnwatọ etọn lẹ,+ podọ nado nọ basi avọ́sinsan mimẹ̀ etọn lẹ.”+ 12  Whenẹnu, Levinu lẹ fọnṣite: yèdọ Mahati visunnu Amasai tọn po Joẹli visunnu Azalia tọn po sọn Kohatinu+ lẹ mẹ; sọn Melalinu+ lẹ mẹ, Kiṣi visunnu Abdi tọn po Azalia visunnu Jehalelẹli tọn po; sọn Gẹlṣọninu+ lẹ mẹ, Joa visunnu Zima tọn po Edẹni visunnu Joa tọn po; 13  sọn visunnu Elizafani tọn lẹ mẹ, Ṣimli po Jeuẹli po; sọn visunnu Asafi+ tọn lẹ mẹ, Zekalia po Matania po; 14  sọn visunnu Hemani+ tọn lẹ mẹ, Jehiẹli po Ṣimei po; sọn visunnu Jedutuni+ tọn lẹ mẹ, Ṣemaia po Uziẹli po. 15  Yé sọ bẹ nọvisunnu yetọn lẹ pli dopọ bo klan yede do wiwe bosọ wá nado klọ́ ohọ̀ Jehovah tọn wé, kẹdẹdile ahọlu ko degbe etọn sọgbe hẹ ohó Jehovah tọn do.+ 16  Enẹgodo, yẹwhenọ lẹ biọ ohọ̀ Jehovah tọn mẹ nado klọ́ ẹ wé bo bẹ onú mawé he yé mọ to tẹmpli Jehovah tọn mẹ lẹpo tọ́njẹgbonu bosọ bẹ yé do awánu+ ohọ̀ Jehovah tọn mẹ. Whenẹnu, Levinu lẹ bẹ yé tọ́njẹgbonu yì Agbàdo Kidlọni tọn mẹ.+ 17  Gbọnmọ dali, yé bẹ klandowiwe lọ jẹeji to azán tintan gbè to osun tintan mẹ, bọ to azán ṣinatọ̀ntọ gbè to osun lọ mẹ, yé jẹ atọ̀họ̀ Jehovah tọn lọ kọ̀n.+ Yé klan ohọ̀ Jehovah tọn do wiwe na azán ṣinatọ̀n, bo dotana to azán 16tọ gbè to osun tintan lọ mẹ. 18  Enẹgodo, yé biọ họmẹ yì Ahọlu Hẹzekia dè bo dọmọ: “Mí ko klọ́ ohọ̀ Jehovah tọn pete wé, yèdọ agbà avọ́nunina mimẹ̀ tọn+ lọ po nuyizan etọn lẹpo+ po, gọna tafo he ji akla nọ yin tito do gọnu-gọnu*+ lọ po nuyizan etọn lẹpo po. 19  Podọ nuyizan he Ahọlu Ahazi ko bẹ sẹ̀ to gandudu etọn whenu to whenue ewọ yinuwa po nugbonọ-mayin po lẹpo+ wẹ mí ko wleawuna dote bo klandowiwe,+ bọ yé tin to agbà Jehovah tọn nukọn.” 20  Ahọlu Hẹzekia sọ fọ́n to afọnnu fuu bo bẹ ahọvi tòdaho lọ tọn lẹ pli dopọ, yé sọ hẹji yì ohọ̀ Jehovah tọn mẹ. 21  Yé hẹn oyìnsú ṣinawe, agbò ṣinawe, lẹngbọvu asu ṣinawe po gbọgbọẹ asu ṣinawe po wá taidi avọ́nunina ylando tọn de do ahọluduta lọ, fiwiwe lọ po Juda po tamẹ.+ Enẹwutu, e dọna yẹwhenọ lẹ he yin kúnkan Aalọn tọn lẹ nado yí yé do basi avọ́nunina to agbà Jehovah tọn ji. 22  Whenẹnu, yé hù oyìn lọ lẹ,+ bọ yẹwhenọ lẹ yí ohùn lọ bo mimí in do agbà lọ ji;+ enẹgodo yé hù agbò lọ lẹ bo mimí ohùn lọ do agbà lọ ji, yé sọ hù lẹngbọvu asu lọ lẹ bo mimí ohùn lọ do agbà lọ ji. 23  Bọdo enẹ go, yé hẹn gbọgbọẹ asu avọ́nunina ylando tọn lọ lẹ wá ahọlu po agun lọ po nukọn bo ze alọ do yé ji. 24  Yẹwhenọ lẹ hù yé bo yí ohùn yetọn do basi avọ́nunina ylando tọn de to agbà lọ ji, nado basi ovẹsè na Islaeli pete, na ahọlu dọ dọ avọ́nunina mimẹ̀ po avọ́nunina ylando tọn lọ po dona yin do Islaeli pete tamẹ. 25  To ojlẹ enẹ mẹ, e hẹn Levinu lẹ nado nọte to ohọ̀ Jehovah tọn kọ̀n po ajogàn lẹ po, gọna hànjinu okànnọ lẹ po ajalẹn lẹ po,+ sọgbe hẹ gbedide Davidi,+ Gad+ numọtọ ahọlu tọn lọ po Natani+ yẹwhegán lọ po tọn, na Jehovah dè wẹ gbedide lọ wá sọn gbọn yẹwhegán etọn lẹ gblamẹ. 26  Enẹwutu, Levinu lẹ to ote po hànjinu Davidi tọn lẹ po, bọ yẹwhenọ lẹ hẹn opẹ̀n lẹ.+ 27  Whenẹnu, Hẹzekia degbe dọ avọ́sinsan mimẹ̀ lọ ni yin bibasi to agbà lọ ji.+ Whenue avọ́nunina mimẹ̀ lọ bẹjẹeji, ohàn Jehovah tọn yin kiké bọ opẹ̀n lẹ jẹ núdọ ji, to kọndopọ mẹ hẹ hànjinu Ahọlu Davidi Islaeli tọn tọn lẹ. 28  Agun lọ blebu sọ dẹ́ do odò dile ohàn lọ to yinyin jiji bọ opẹ̀n lẹ to núdọ—ehe lẹpo zindonukọn kakajẹ whenue avọ́nunina mimẹ̀ lọ yin tadona. 29  Podọ tlolo he yé dotana avọ́nunina lọ bibasi, ahọlu po mẹhe to e dè lẹpo po dẹ́ do odò bo ṣinyọ́n nukunmẹ ai. 30  Todin, Ahọlu Hẹzekia po ahọvi lẹ po dọna Levinu lẹ nado yí hogbe Davidi+ po Asafi+ numọtọ lọ po tọn lẹ do pà Jehovah. Enẹwutu, yé yí ayajẹ daho do na pipà ẹ, yé sọ dẹ́ do odò bo ṣinyọ́n nukunmẹ ai. 31  Enẹgodo, Hẹzekia dọmọ: “Todin he mì ko yin kinklandovo* na Jehovah, mì wá bo hẹn avọ́sinsan lẹ po avọ́nunina pẹdido tọn lẹ po wá ohọ̀ Jehovah tọn mẹ.” Agun lọ sọ jẹ avọ́sinsan lẹ po avọ́nunina pẹdido tọn lẹ po hẹnwa ji, podọ mẹdepope he ahun etọn whàn ẹn nọ hẹn avọ́nunina mimẹ̀ lẹ wá.+ 32  Sọha avọ́nunina mimẹ̀ he agun lọ hẹnwa lẹ tọn wẹ oyìn 70, agbò 100 po lẹngbọvu asu 200 po—ehe lẹpo wẹ yin avọ́nunina mimẹ̀ na Jehovah+ 33  podọ avọ́nunina wiwe lẹ wẹ oyìn 600 po lẹngbọ 3 000 po. 34  Ṣigba, sọha yẹwhenọ lẹ tọn ma pé nado klọ́n ayú avọ́nunina mimẹ̀ lọ lẹpo tọn, enẹwutu nọvisunnu yetọn Levinu lẹ gọalọna yé+ kakajẹ whenue azọ́n lọ yin tadona podọ kakajẹ whenue yẹwhenọ lẹ penugo nado klan yede do wiwe,+ na Levinu lẹ yin ahunmẹduna* gando yede kinklandowiwe go hugan yẹwhenọ lẹ. 35  Humọ, avọ́nunina mimẹ̀+ susu sọ yin bibasi, gọna adà dojó avọ́sinsan jijọho tọn+ lẹ tọn po avọ́nunina nùnù lẹ po na avọ́nunina mimẹ̀+ lọ lẹ. Gbọnmọ dali, sinsẹ̀nzọn ohọ̀ Jehovah tọn gọjẹ otẹn etọn mẹ.* 36  Enẹwutu, Hẹzekia po gbẹtọ lọ lẹpo po jaya na nuhe Jiwheyẹwhe nugbo lọ ko wà na gbẹtọ lọ lẹ,+ na ehe lẹpo wẹ wá aimẹ to ajiji mẹ.

Nudọnamẹ Odò Tọn

Kavi “hẹnmẹ nado ṣanmẹko.”
Kavi “nado gbọjẹ.”
Enẹ wẹ, akla sọhia tọn.
To paa mẹ, “Todin he alọ mìtọn ko yin hinhẹn gọ́.”
To paa mẹ, “yin ahunjijlọnọ.”
Kavi “yin awuwlena.”