Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 25:1-28

NUHE E BẸHẸN LẸ

  • Amazia, ahọlu Juda tọn (1-4)

  • Awhànfunfun hẹ Edomi (5-13)

  • Boṣiọ-sinsẹ̀n Amazia tọn (14-16)

  • Awhànfunfun hẹ Ahọlu Jehoaṣi Islaeli tọn (17-24)

  • Amazia kú (25-28)

25  Owhe 25 wẹ Amazia tindo to whenue e duahọlu, e sọ dugán to Jelusalẹm na owhe 29. Oyín onọ̀ etọn tọn wẹ Jehoadani Jelusalẹm tọn.+  E zindonukọn nado to nuhe sọgbe to nukun Jehovah tọn mẹ lẹ wà, amọ́ e ma yin po ahun pipé de po.  Tlolo he e ko hẹn ahọluduta lọ lodo to alọ ede tọn mẹ, e hù devizọnwatọ etọn lọ lẹ he ko hù otọ́ etọn he yin ahọlu dai.+  Ṣigba, e ma hù visunnu yetọn lẹ, na e yinuwa to kọndopọ mẹ hẹ nuhe yin kinkan do Osẹ́n lọ mẹ, to owe Mose tọn mẹ, fie Jehovah degbe te dọ: “Otọ́ lẹ ma dona yin hùhù na ylando visunnu yetọn lẹ tọn, podọ visunnu lẹ ma dona yin hùhù na ylando otọ́ yetọn lẹ tọn; ṣigba mẹdopodopo wẹ dona yin hùhù na ylando etọn titi.”+  Amazia sọ bẹ omẹ Juda tọn lẹ pli bo hẹn yé ṣite sọgbe hẹ whédo otọ́ yetọn lẹ tọn, sọgbe hẹ ogán omẹ fọtọ́n lẹ tọn lẹ podọ sọgbe hẹ ogán omẹ kanweko lẹ tọn lẹ na Juda po Bẹnjamini po pete.+ E basi todohukanji yetọn, yèdọ mẹhe tindo owhe 20 podọ humọ lẹ+ tọn bo mọdọ sọha awhànfuntọ he yin azọ́nplọn* bosọ sọgan yì awhàn lẹ tọn wẹ 300 000, yèdọ mẹhe penugo nado hẹn owhán po awọ̀yinu daho po.  Humọ, e yí talẹnti* fataka tọn 100 do dà awhànfuntọ huhlọnnọ Islaeli tọn 100 000.  Ṣigba, omẹ Jiwheyẹwhe nugbo lọ tọn de wá e dè bo dọmọ: “Ahọlu E, a dike awhànpa Islaeli tọn hodo we blo, na Jehovah ma tin hẹ Islaeli,+ podọ e ma tin hẹ depope to Eflaiminu lẹ mẹ.  Hiẹ ṣo ni yì bo yinuwa bosọ yin adọgbotọ to awhàngbenu. Eyin e ma yinmọ, Jiwheyẹwhe nugbo lọ sọgan hẹn we dahli to kẹntọ nukọn, na Jiwheyẹwhe penugo nado gọalọ+ podọ nado hẹnmẹ dahli.”  Whenẹnu wẹ Amazia dọna omẹ Jiwheyẹwhe nugbo lọ tọn dọ: “Talẹnti 100 he yẹn ko na awhànfuntọ Islaeli tọn lọ lẹ lo?” Omẹ Jiwheyẹwhe nugbo lọ tọn gblọn dọmọ: “Jehovah penugo nado na we susu hugan mọ.”+ 10  Enẹwutu, Amazia hẹn awhànfuntọ Eflaimi tọn he ko wá e dè lẹ nado joagọ, bo do yé hlan nọtẹn yetọn titi. Ṣigba, yé gblehomẹ do Juda go sinsinyẹn, yé sọ zọ̀n adi ji lẹkọyi nọtẹn yetọn titi. 11  Enẹgodo, Amazia gboadọ bo deanana awhànfuntọ etọn titi lẹ yì Agbàdo Ojẹ̀ tọn+ mẹ bo hù omẹ Seili tọn 10 000.+ 12  Sunnu Juda tọn lẹ sọ wle omẹ 10 000 gbẹ̀te. Yé plan yé jẹ osé lọ ji bo sisẹ́ yé dlan odò sọn osé lọ ji aga, bọ yemẹpo gídí. 13  Ṣigba, awhànfuntọ he Amazia lẹkọna ma nado hodo e yì awhàn+ lẹ tọ́navùn tòdaho Juda tọn lẹ, sọn Samalia+ kaka yì Bẹti-holọni;+ yé hù omẹ 3 000 sọn yé mẹ bo bẹ ogblànnu susu sọyi. 14  Ṣigba, whenue Amazia ko hù Edominu lẹ bo lẹkọ godo, e hẹn yẹwhe he omẹ Seili tọn lẹ nọ sẹ̀n lẹ wá bo do yé ai taidi yẹwhe lẹ na ede+ bosọ jẹ didẹ́ do odò to nukọn yetọn ji, podọ e nọ basi avọ́sinsan mimẹ̀ lẹ hlan yé. 15  Enẹwutu, Jehovah gblehomẹ do Amazia go sinsinyẹn bo do yẹwhegán de hlan he dọna ẹn dọmọ: “Naegbọn a do to yẹwhe gbẹtọ lọ lẹ tọn lẹ he ma whlẹn omẹ yetọn titi lẹ sọn alọ towe mẹ hodo?” + 16  Dile e to hodọna ahọlu, ahọlu dọmọ: “Mí de we di ayinamẹtọ ahọlu tọn wẹ ya?+ Danido!+ Naegbọn yé nado hù we?” Whenẹnu, yẹwhegán lọ nabọẹ, amọ́ e yidogọ dọmọ: “Yẹn yọnẹn dọ Jiwheyẹwhe ko de dide nado hù we sudo, na hiẹ ko wà ehe bo masọ dotoaina ayinamẹ ṣie.”+ 17  To wedide hẹ ayinamẹtọ etọn lẹ godo, Ahọlu Amazia Juda tọn dowẹn hlan Jehoaṣi visunnu Jehoahazi he yin visunnu Jehu ahọlu Islaeli tọn dọmọ: “Wá! Na mí ni pehẹ míde to awhàn mẹ.”*+ 18  Ahọlu Jehoaṣi Islaeli tọn sọ dowẹn hlan Ahọlu Amazia Juda tọn dọmọ: “Wùnkan he to Lẹbanọni wẹ dowẹn hlan kedali Lẹbanọni tọn dọ, ‘Yí viyọnnu towe na visunnu ṣie di asi.’ Gbekanlin Lẹbanọni tọn de sọ juwajei bo tùnafọ wùnkan lọ ji. 19  Hiẹ ko dọ dọ, ‘Pọ́n! N’ko* gbawhàn Edomi tọn.’+ Enẹ wẹ zọ́n bọ ahun towe do to kikla bo to gigo dín. Amọ́ todin, nọ owhé* towe titi gbè. Naegbọn hiẹ nado fọ́n nugbajẹmẹji dote bo jai bosọ hẹn Juda nado jai hẹ we?” 20  Ṣigba, Amazia ma dotoai,+ na Jiwheyẹwhe nugbo lọ dè wẹ ehe wá sọn nado jo yé do alọ kẹntọ tọn mẹ,+ na yé ko hodo yẹwhe Edomi tọn lẹ wutu.+ 21  Enẹwutu, Ahọlu Jehoaṣi Islaeli tọn hẹji yì, bọ ewọ po Ahọlu Amazia Juda tọn po pehẹ yede to awhàn mẹ to Bẹti-ṣemẹṣi+ he yin Juda tọn. 22  Islaeli sọ gbawhàn Juda tọn bọ dopodopo yetọn họnyi whé.* 23  Ahọlu Jehoaṣi Islaeli tọn wle Ahọlu Amazia Juda tọn, yèdọ visunnu Jehoaṣi he yin visunnu Jehoahazi* tọn to Bẹti-ṣemẹṣi. E sọ plan ẹn wá Jelusalẹm bo de nùvo de do adó Jelusalẹm tọn mẹ sọn Họngbo Eflaimi+ tọn kọ̀n jẹ Họngbo Lọnglọnẹnmẹ tọn+ kọ̀n, ehe dite na awagbà 400.* 24  E bẹ sika, fataka gọna núzinzan he yin mimọ to ohọ̀ Jiwheyẹwhe nugbo lọ tọn mẹ to Obẹdi-edomi dè* podọ to adọkunnu sẹdotẹn owhé* ahọlu tọn mẹ lẹpo,+ gọna kanlinmọ lẹ. Enẹgodo, e lẹkọyi Samalia. 25  Amazia+ visunnu Jehoaṣi ahọlu Juda tọn nọgbẹ̀ na owhe 15 to okú Jehoaṣi+ visunnu Jehoahazi ahọlu Islaeli tọn godo.+ 26  Na nuhe dù otàn Amazia tọn he pò, yèdọ sọn bẹjẹeji jẹ vivọnu, pọ́n! be e ma yin kinkan do Owe Ahọlu Juda po Islaeli po tọn lẹ tọn mẹ ya? 27  Sọn ojlẹ he mẹ Amazia ko lẹkọ sọn Jehovah hihodo mẹ wẹ yé ko blasé+ do e go to Jelusalẹm bọ e họnyi Lakiṣi, ṣigba yé do sunnu lẹ hlan he dómọna ẹn yì Lakiṣi bo hù i to finẹ. 28  Yé sọ ze e do osọ́ lẹ ji lẹkọ bo dì i dopọ hẹ tọgbo etọn lẹ to tòdaho Juda tọn mẹ.

Nudọnamẹ Odò Tọn

To paa mẹ, “dide.”
Talẹnti dopo sọzẹn hẹ kg 34,2. Pọ́n Nud. B14.
Kavi “mí ni pé nukun sọ nukun.”
To paa mẹ, “Hiẹ ko.”
Kavi “họ̀nmẹ.”
To paa mẹ, “gòhọ mẹ.”
Sọ nọ yin yiylọdọ Ahazia.
Nudi m 178. Pọ́n Nud. B14.
Kavi “to nukunpedonugo Obẹdi-edomi tọn glọ.”
Kavi “họ̀nmẹ.”