Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 24:1-27

NUHE E BẸHẸN LẸ

  • Gandudu Jehoaṣi tọn (1-3)

  • Jehoaṣi vọ́ tẹmpli lọ jlado (4-14)

  • Atẹṣiṣi Jehoaṣi tọn (15-22)

  • Jehoaṣi yin hùhù (23-27)

24  Owhe ṣinawe wẹ Jehoaṣi tindo to whenue e lẹzun ahọlu,+ e sọ dugán to Jelusalẹm na owhe 40. Oyín onọ̀ etọn tọn wẹ Zibia, mẹhe wá sọn Beẹli-ṣeba.+  Jehoaṣi zindonukọn nado to nuhe sọgbe to nukun Jehovah tọn mẹ wà to ojlẹ Jehoiada yẹwhenọ lọ tọn lẹpo gblamẹ.+  Jehoiada dà asi awe na ẹn, bọ ewọ ji visunnu lẹ po viyọnnu lẹ po.  Enẹgodo, Jehoaṣi jlo sọn ahun mẹ wá nado vọ́ ohọ̀ Jehovah tọn jlado.+  Enẹwutu, e bẹ yẹwhenọ lẹ po Levinu lẹ po pli dopọ bo dọna yé dọmọ: “Mì tọ́nyi tòdaho Juda tọn lẹ mẹ bo bẹ akuẹ pli sọn Islaelivi lẹpo si nado nọ vọ́ ohọ̀ Jiwheyẹwhe mìtọn tọn jlado+ to whemẹwhemẹ; podọ mì dona yinuwa po awuyiya po to whẹho ehe mẹ.” Ṣigba, Levinu lẹ ma yinuwa po awuyiya po.+  Enẹwutu, ahọlu ylọ Jehoiada yẹwhenọgán lọ bo dọna ẹn+ dọmọ: “Naegbọn a ma do biọ to Levinu lẹ si nado hẹn takuẹ wiwe he Mose+ devizọnwatọ Jehovah tọn lọ ko degbe etọn lọ wá sọn Juda po Jelusalẹm po, yèdọ takuẹ wiwe agun Islaeli tọn na gòhọ Kunnudenu+ tọn lọ?  Na visunnu nawe ylankan enẹ, yèdọ Atalia+ tọn lẹ ko gbò adó biọ ohọ̀ Jiwheyẹwhe nugbo lọ tọn mẹ,+ podọ yé ko yí onú wiwe he to ohọ̀ Jehovah tọn mẹ lẹpo zan na Baali lẹ.”  Whenẹnu, ahọlu degbe bọ apotin+ de yin bibasi bo yin zizedo gbonu to họngbo ohọ̀ Jehovah tọn tọn kọ̀n.+  Enẹgodo, nulila de yin bibasi gbọn Juda po Jelusalẹm po pete nado hẹn takuẹ wiwe+ he Mose devizọnwatọ Jiwheyẹwhe nugbo lọ tọn ko gbò na Islaeli to danfafa ji lọ wá na Jehovah. 10  Ahọvi lẹpo po gbẹtọ lọ lẹpo po sọ jaya,+ yé sọ to nunina lẹ hẹnwa mapote bo to bibẹdo apotin lọ mẹ kaka bọ e gọ́.* 11  Whedepopenu he Levinu lẹ ze apotin lọ biọ họmẹ nado ze e jo na ahọlu bo mọdọ akuẹ sù to e mẹ, wekantọ ahọlu tọn po anadenanutọ yẹwhenọgán lọ tọn po nọ wá bo nọ bẹ nuhe to apotin lọ mẹ lẹpo,+ enẹgodo yé nọ gọ̀ ẹ do otẹn etọn mẹ. Nuhe yé nọ wà egbesọegbesọ niyẹn, yé sọ bẹ akuẹ susugege pli. 12  Enẹgodo, ahọlu po Jehoiada po nọ bẹ ẹ jo na mẹhe to nukunpedo azọ́n he gando ohọ̀ Jehovah tọn go lẹ, yewlẹ nọ dà zannu-pàtọ lẹ po anazọ́nwatọ lẹ po nado jla ohọ̀ Jehovah tọn do,+ gọna gànyuu po gànvẹẹ zọ́nwatọ lẹ po nado vọ́ ohọ̀ Jehovah tọn jlado. 13  Mẹhe to nukunpedo azọ́n lọ go lẹ bẹ azọ́n lọ jẹeji, azọ́n nuvọjlado tọn lọ sọ to nukọnyi to anademẹ yetọn glọ, bọ yé hẹn ohọ̀ Jiwheyẹwhe nugbo lọ tọn gọwá lehe e te dai bo hẹn ẹn lodo dogọ. 14  Tlolo he yé dotana, yé bẹ akuẹ he pò na ahọlu po Jehoiada po, yé sọ yizan nado basi nuyizan lẹ na ohọ̀ Jehovah tọn, nuyizan lẹ na lizọnyizọn lọ, podọ nado basi avọ́nunina lẹ po kọfo lẹ po gọna nuyizan sika po fataka po tọn lẹ.+ Humọ, yé nọ basi avọ́sinsan mimẹ̀+ lẹ to ohọ̀ Jehovah tọn mẹ whẹwhẹ to azán Jehoiada tọn lẹpo gbè. 15  Whenue Jehoiada ko poyọnho bo tindo pekọ to gbẹninọ mẹ, e kú; owhe 130 wẹ e tindo to whenue e kú. 16  Yé sọ dì i dopọ hẹ ahọlu+ lẹ do Tòdaho Davidi tọn mẹ, na ewọ ko wà dagbe to Islaeli+ na nuhe dù Jiwheyẹwhe nugbo lọ po ohọ̀ Etọn po. 17  To okú Jehoiada tọn godo, ahọvi Juda tọn lẹ wá bo dẹ́ do odò na ahọlu, ahọlu sọ dotoaina yé. 18  Yé gbẹkọ ohọ̀ Jehovah Jiwheyẹwhe tọgbo yetọn lẹ tọn go bo jẹ dòtin wiwe* lẹ po boṣiọ lẹ po sẹ̀n ji, enẹwutu homẹgble Jiwheyẹwhe tọn wá* Juda po Jelusalẹm po ji, na whẹhuhu yetọn wutu. 19  E sọ to yẹwhegán lẹ dohlan yé mapote nado hẹn yé lẹkọwa Jehovah dè, bọ yé to avase na* yé mapote, ṣigba yé gbẹ́ nado dotoai.+ 20  Gbigbọ Jiwheyẹwhe tọn wá* Zekalia visunnu Jehoiada+ yẹwhenọ lọ tọn ji bọ e ṣite to gbẹtọ lọ lẹ nukọn bo dọna yé dọmọ: “Nuhe Jiwheyẹwhe nugbo lọ dọ die, ‘Naegbọn mìwlẹ do to afọtùn gbedide Jehovah tọn lẹ ji? Mìwlẹ ma na tindo kọdetọn dagbe! Na mì ko gbẹ́ Jehovah dai wutu, ewọ lọsu na gbẹ́ mì dai.’”+ 21  Ṣigba, yé blasé do e go+ bo dlan zannu do e hù to gbedide ahọlu tọn glọ to awánu ohọ̀ Jehovah tọn mẹ.+ 22  Gbọnmọ dali, Ahọlu Jehoaṣi ma flin owanyi nugbo he otọ́ etọn* Jehoiada ko dohia ẹ bọ e hù visunnu etọn, mẹhe dọ to kúdonu dọmọ: “Na Jehovah ni mọ bo hẹn we nado dogbè.”+ 23  To bẹjẹeji owhe lọ tọn,* awhànpa Silianu lẹ tọn hẹji wá nado hoavùn hẹ Jehoaṣi bo tọ́nawhàn Juda po Jelusalẹm po.+ Yé sọ hù ahọvi+ gbẹtọ lọ lẹ tọn lẹpo bo do ogblànnu yetọn lẹpo hlan ahọlu Damasku tọn. 24  Na, mahopọnna dọ sunnu he to awhànpa Silianu lẹ tọn he tọ́nawhàn yé lọ mẹ lẹ ma sù, Jehovah jo awhànpa daho tlala de do alọ yetọn mẹ,+ na yé ko gbẹ́ Jehovah Jiwheyẹwhe tọgbo yetọn lẹ tọn dai wutu; gbọnmọ dali yé* hẹn whẹdida ṣẹ do Jehoaṣi ji. 25  Podọ to whenue yé yì sọn e dè (na yé jo e do po awugble sinsinyẹn po*), devizọnwatọ etọn titi lẹ blasé do e go, na ewọ ko sọ̀n ohùn visunnu Jehoiada+ yẹwhenọ lọ tọn lẹ* tọn dai wutu. Yé hù i to adọzan etọn titi ji.+ Ewọ sọ kú bọ yé dì i do Tòdaho Davidi tọn+ mẹ, ṣigba yé ma dì i do yọdò ahọlu lẹ tọn mẹ.+ 26  Mẹhe blasé do e go lẹ+ die: Zabadi visunnu Ṣimeati nawe Amọninu lọ tọn po Jehozabadi visunnu Ṣimliti nawe Moabinu lọ tọn po. 27  Na nuhe dù visunnu etọn lẹ po nulila susu he yin bibasi sọta ẹ+ lẹ po gọna vọjlado* ohọ̀ Jiwheyẹwhe nugbo lọ tọn,+ onú ehe lẹpo yin kinkan do kandai* Owe Ahọlu lẹ tọn mẹ. Visunnu etọn Amazia sọ lẹzun ahọlu do otẹn etọn mẹ.

Nudọnamẹ Odò Tọn

Kavi vlavo, “kakajẹ whenue yemẹpo ko basi nunina.”
Pọ́n Zẹm.
To paa mẹ, “homẹgble tin sọta.”
Kavi “to kunnude sọta.”
To paa mẹ, “ṣinyọ́n.”
Enẹ wẹ, otọ́ Zekalia tọn.
To paa mẹ, “To didiọ owhe lọ tọn whenu.”
Enẹ wẹ, Silianu lẹ.
Kavi “po azọ̀n susu po.”
Kavi “visunnu Jehoiada yẹwhenọ lọ tọn.” Vlavo e yin alọdlẹndo taidi mẹsusu nado do gigo daho hia.
To paa mẹ, “didoai.”
Kavi “zẹẹmẹ.”