Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 2:1-18

NUHE E BẸHẸN LẸ

  • Awuwiwlena tẹmpli lọ gbigbá (1-18)

2  Todin, Sọlomọni degbe nado gbá ohọ̀ de na oyín Jehovah tọn+ podọ owhé* de na ahọluduta etọn.+  Sọlomọni sọ de sunnu 70 000 taidi pakanọ paa* lẹ, sunnu 80 000 taidi zannu-pàtọ lẹ to osó lẹ ji+ podọ omẹ 3 600 taidi nugopọntọ lẹ do yé ji.+  Humọ, Sọlomọni dowẹn hlan Hilami+ ahọlu Tile tọn dọmọ: “Yinuwa hẹ mi kẹdẹdile a yinuwa hẹ Davidi otọ́ ṣie do to whenue hiẹ do atin kedali tọn hlan ẹn nado gbá owhé* he gbè e na nọ.+  Todin, yẹn jlo na gbá ohọ̀ de na oyín Jehovah Jiwheyẹwhe ṣie tọn, nado klan ẹn do wiwe na ewọ bo mẹ̀ nuyọnwan owán gblingblinnọ+ to nukọn etọn, podọ na akla he nọ yin tito do gọnu-gọnu* to whepoponu+ po avọ́nunina mimẹ̀ lẹ po, to afọnnu podọ to whèjai,+ to Gbọjẹzangbe+ lẹ, to osun yọyọ+ lẹ whenu, podọ to hùnwhẹ+ Jehovah Jiwheyẹwhe mítọn tọn lẹ whenu. Nubiọtomẹsi dẹn-to-aimẹ de wẹ ehe yin na Islaeli.  Ohọ̀ he yẹn jlo na gbá lọ na klo, na Jiwheyẹwhe mítọn klo hugan yẹwhe devo lẹpo.  Podọ mẹnu wẹ pegan nado gbá ohọ̀ de na ẹn? Na olọn lẹ, podọ olọn olọn lẹ tọn ma tlẹ sọgan hẹn ẹn,+ enẹwutu mẹnu wẹ yẹn yin bọ yẹn nado gbá ohọ̀ de na ẹn, adavo ni yin nọtẹn de nado basi avọ́sinsan mimẹ̀ lẹ to nukọn etọn?  Todin, do alọnuzọ́nwatọ de hlan mi he yin azọ́nyọnẹntọ na nuhe dù azọ́n sika, fataka, gànvẹẹ,+ gànyuu, sopẹ́-vọ̀, ahóvọ̀ po sekan juju po tọn bosọ yọ́n lehe yè nọ wà anazọ́n do núgo do. Ewọ na wazọ́n to Juda podọ to Jelusalẹm to pọmẹ hẹ alọnuzọ́nwatọ azọ́nyọnẹntọ he Davidi otọ́ ṣie ko wleawu yetọn dai lẹ.+  Humọ, do owhlẹ kedali, junipeli+ po algọmi+ po tọn lẹ hlan mi sọn Lẹbanọni, na yẹn yọnẹn dọ devizọnwatọ towe lẹ tindo numimọ to atin Lẹbanọni tọn lẹ gbigbò mẹ.+ Devizọnwatọ ṣie lẹ na wazọ́n hẹ devizọnwatọ towe lẹ+  nado wleawu owhlẹ susugege tọn na mi, na ohọ̀ he yẹn jlo na gbá lọ na klo taun. 10  Todin pọ́n! Núdùdù he yẹn na wleawu etọn na devizọnwatọ towe lẹ,+ yèdọ atin-sántọ he nọ gbò atin lẹ die: likun ojlẹnu kọli* tọn 20 000, balekun ojlẹnu kọli tọn 20 000, ovẹn ojlẹnu bati* tọn 20 000 podọ amì ojlẹnu bati tọn 20 000.” 11  Whenẹnu wẹ Hilami ahọlu Tile tọn do wekanhlanmẹ ehe hlan Sọlomọni dọmọ: “Na Jehovah yiwanna omẹ etọn lẹ wutu wẹ e do yí we do doahọlu do yé ji.” 12  Hilami sọ dọmọ: “Na Jehovah Jiwheyẹwhe Islaeli tọn ni yin pipà, yèdọ ewọ he dá olọn po aigba po, na ewọ ko na visunnu nuyọnẹntọ+ de Ahọlu Davidi, mẹhe tindo nuyọnẹn po nukunnumọjẹnumẹ po+ bo na gbá ohọ̀ de na Jehovah podọ owhé de na ahọluduta etọn. 13  Todin, yẹn to Hilami-abi,+ yèdọ alọnuzọ́nwatọ azọ́nyọnẹntọ de he tindo nukunnumọjẹnumẹ dohlan we, 14  ewọ yin visunnu nawe Daninu de tọn, ṣigba otọ́ etọn yin Tilenu; e tindo numimọ to azọ́n sika, fataka, gànvẹẹ, gànyuu, zannu, owhlẹ, sopẹ́-vọ̀, sekan juju, avọ̀ dagbedagbe po ahọ́vọ̀+ po tọn lẹ mẹ. Ewọ sọgan wà anazọ́n wunmẹ depope do núgo bosọ de yẹdide nudepope he yè ze na ẹn tọn.+ E na wazọ́n hẹ alọnuzọ́nwatọ azọ́nyọnẹntọ towe titi lẹ po alọnuzọ́nwatọ azọ́nyọnẹntọ oklunọ ṣie Davidi otọ́ towe tọn lẹ po. 15  Todin, gbọ oklunọ ṣie ni do likun, balekun, amì po ovẹn he e ko dopagbe etọn na devizọnwatọ etọn lẹ po hlan.+ 16  Míwlẹ nasọ gbò atin lẹ na we sọn Lẹbanọni+ sù sọ dehe a jlo, podọ mí na blá yé dopọ bo hẹn yé wá na we gbọn ohù ji jẹ Jọpa;+ hiẹ nasọ bẹ yé hẹji yì Jelusalẹm.”+ 17  Sọlomọni sọ hia sunnu he to jonọ-gbéji to aigba Islaeli tọn ji lẹpo,+ to mẹhihia Davidi otọ́ etọn tọn godo,+ yé sọ mọ gbẹtọ 153 600. 18  Enẹwutu, e deazọ́nna omẹ 70 000 to yé mẹ taidi pakanọ paa* lẹ, omẹ 80 000 taidi zannu-pàtọ+ lẹ to osó lẹ ji, podọ omẹ 3 600 taidi nugopọntọ lẹ he na whàn gbẹtọ lẹ nado wazọ́n.+

Nudọnamẹ Odò Tọn

Kavi “họ̀nmẹ.”
Kavi “agbàn hẹntọ.”
Kavi “họ̀nmẹ.”
Enẹ wẹ, akla sọhia tọn.
Kọli dopo sọzẹn hẹ L 220. Pọ́n Nud. B14.
Bati dopo sọzẹn hẹ L 22. Pọ́n Nud. B14.
Kavi “agbàn hẹntọ.”